Thursday, 31 October 2013

படிக்க.....படம் பார்க்க !

நண்பர்களே,

வணக்கம் ! அனைவருக்கும் அட்வான்ஸ் தீபாவளி நல்வாழ்த்துக்கள் ! நேற்று மாலை கூரியரின் மார்க்கமாகவும் ; இன்று பதிவுத் தபால்கள் வாயிலாகவும் நவம்பர் இதழ்கள் 2-ம் அனுப்பியுள்ளோம் ! நாளை மதியம் முதல் திங்கள் காலை வரை நமது அலுவலகம் விடுமுறையினில் இருந்திடும் ! நம் பணியாளர்களுக்கு மிகவும் அவசியமான பிரேக் என்று தான் சொல்ல வேண்டும் ! EBAY-ல் புது இதழ்களுக்கான லிஸ்டிங் போட்டாகி விட்டது ! ஆர்டர் செய்ய விரும்பும் நண்பர்களுக்கு சின்னதொரு வேண்டுகோள் : இதழ்கள் கிடைத்தான பின்னே, உங்களின் ஒப்புதல் கிட்டும் வரை எங்களுக்குப் பணம் கைக்குக் கிடைப்பதில்லை ! So இதில் சற்றே கவனம் காட்டிடக் கோருகிறோம் ! அயல்நாட்டில் வசிக்கும் நண்பர்களுக்கு ; இதழ்களை கடைகளில் / E -BAY -ல் வாங்கும் நண்பர்களுக்கு - புக் கிடைக்கும் வரை இருந்திடக்கூடிய ஆர்வத்தின் பொருட்டு -படிக்கக் கொஞ்சம் ; படம் பார்க்கக் கொஞ்சமென இதோ இம்மாத இதழ்களின் highlights ! 2014-ன் அட்டவணையினை சிக்கன நடவடிக்கை காரணமாய் சாதா தாளில் அச்சிடச் சொல்லி இருந்தேன் ; திருஷ்டிப் பரிகாரமாய் அதனை ரொம்பவே சஸ்தா  தாளில் அச்சிட்டு விட்டனர் நம்மவர்கள் ! சாரி guys - அடுத்த இதழோடு ஆர்ட் பேப்பரில் ஒரு preview தயார் செய்திடுவோம் !   





தொடரும் நாட்களில் 2014-ன் தேர்வுகளைப் பற்றி நிறைய அபிப்ராயங்கள் இங்கு பதிவாகும் என்பது யூகம் ; இயன்ற வரை இம்மாத இதழ்கள் இரண்டையும் படித்து விட்டு உங்களின் எண்ணங்களையும் சேர்த்துப்  பரிமாறினால் இன்னும் சிறப்பாக இருக்கும் ! I'll be around guys ! 

முந்தைய பதிவில் உங்களின் பின்னூட்டங்களுக்கும் பதில் சொல்லத் துவங்குகிறேன் இன்று !  Bye for now !

Tuesday, 29 October 2013

ஒரு நவம்பர் நாயகன் !

நண்பர்களே,

வணக்கம். நண்பர் XIII ஒரு நிஜ வாழ்க்கைப் பாத்திரமாய் இருந்திடும் பட்சத்தில் -அவரது "ஞே" முழிக்கும்  ; குழப்பப் பார்வைக்கும் நிச்சயமாய் நான் விளக்கம் கோரி இருக்க மாட்டேன் ! கடந்து சென்ற ஒரு வாரத்தின் தலையைப் பிய்க்கச் செய்யும் பரபரப்பு என்னையும் கிட்டத்தட்ட அதே நிலைமையில் வைத்திருப்பதால் அவரை ஓரளவுக்குப் புரிந்து கொள்ள முடிகிறது எனும் நிலை ! எழுத எழுத நீண்டு கொண்டே செல்லும் காமிக்ஸ் டைம் பக்கங்கள் ; எத்தனை முயற்சித்தாலும் இன்னும் கொஞ்சம் மெருகூட்டலாமோ என்று தோன்றச் செய்த டெக்ஸ் இதழின் ஹைலைட்டான "டேவிட் பொனெல்லியின் பேட்டி" ; 460+ டெக்ஸ் பக்கங்களில் பிழைகளைத் திருத்தம் செய்யும் வேகத்திலேயே புதிது-புதிதாய்க் கண்ணில் பட்ட கூடுதல் பிழைகள் ; சற்றே complex ஆகத் தோற்றம் தந்த  "சிப்பாயின் சுவடுகளில் "கிராபிக் நாவலை நம் ரசனைக்கு ஏற்புடையதாய் செதுக்கிட அவசியமான ஒரு வண்டி அவகாசம் ; அந்த இதழில் உச்ச முக்கியத்துவம் கொண்ட 2014-க்கான அறிவிப்புகள் ; அவற்றின் பின்னணியில் நின்ற எனது சிந்தனைகள் பற்றிய தொகுப்பு ; ஜானி ஸ்பெஷல் இதழோடு வரவிருக்கும் KBT -3 -ன் முதல் கதையின் வெற்றி பெற்ற ஆக்கத்தைத் தேர்வு செய்யும் பணிகள் ;  அடுத்த மாதம் CHICK BILL ஸ்பெஷல் பற்றிய திட்டமிடல் ; எல்லாவற்றிற்கும் மேலாய் 2014 -ன் முழு அட்டவனணயினையும் தாங்கிய குட்டி புத்தகத்தின் வடிவமைப்பு ; "இந்தக் கதைக்குப் பதிலாய் - அதைப் போட்டிருக்கலாமோ ? பாணியிலான கடைசி நிமிட யோசனைகள் நடு ராத்திரியில் எழுந்திட - பரீட்சைக்குப் படிக்கும் புள்ளையைப் போல  இறுதித் தருணத்தில் நான் படிக்க அவசியமான கதைகள்.... என மொத்தமாய் ஒரு அதகள வாரம் மங்கலான நினைவுகளாய் மட்டுமே உள்ளது !  

'வாரத்தில் குறிப்பிட்ட தினங்களில் பதிவிடலாமே !' என்ற உங்களின் சமீபத்திய பின்னூட்டங்களை அவசரமாய்ப் படிக்க நேர்ந்தது ! நானொரு முழு நேர காமிக்ஸ் எடிட்டராய் செயல்படும் சுதந்திரம் கிட்டும் நாளன்று நிச்சயமாய் இது சாத்தியமே ! ஆனால் ஒரே நேரத்தில் காமிக்ஸ் குதிரையிலும், நமது இதர முயற்சிகளிலும் சவாரி செய்திடல் அவசியமாகிடும் வரை எனது நாட்களின் திட்டமிடல் நிச்சயமாய் எனது கைகளில் இல்லை ! இந்த காமிக்ஸ் சர்க்கஸ் ஒரு பக்கம் ஓடிக் கொண்டிருக்க  - வெள்ளியன்று எழுந்ததொரு அவசரப் பணி நிமித்தமாய் - சனி இரவு புறப்பட்டு - நியூயார்க் நகரை ஞாயிறு மாலை  எட்டிப் பிடிக்க வேண்டிப் போனது !  மொத்தமாய் 4 மணி நேரப் பணியின் பொருட்டு - 25 + 25 மணி நேரப் பயணம் என்பதை நியூயார்க் விமான நிலைய immigration அதிகாரியிடம் விளக்கிய போது 'இது மறை கழன்ற கேஸ் !' என்று சொல்லாமல் சொன்னது அவரது பார்வை ! திங்கள் மாலை ஊரைப் பார்த்துத் திரும்பிடும் பயணம் ; விமான நிலையத்துக்குக் கிளம்பிடுவதற்கு முன்னே கிட்டிய முதல் அரை மணி நேரத்தில் இந்தப் பதிவை அரக்கப் பரக்க எழுதுகிறேன் ! 



இதோ - இது வரையில் இருந்த "சிப்பாயின் சுவடுகளில்" அட்டைப்படம் ! அடிப்படையில் வியட்நாமின் கிராமங்களில் நடந்தேறும் கதை இது என்பதால் - இதற்கு ஒரு ultra மாடர்ன் லுக் வேண்டாம் என நினைத்தேன் ! எனக்கு அழகாய்த் தோன்றிய பொன்னனின் இந்தப் படைப்பு உங்களுக்கு எவ்விதம் தோன்றவிருக்கிறதோ தெரியவில்லை ! நாளை நள்ளிரவுக்கு ஊர் திரும்பிட வேண்டும் என்பது இப்போதையப் பயண திட்டம் ! நேரம் கிடைக்கும் பட்சத்தில் அதற்கு முன்பை இந்தப் பதிவை இன்னும் தொடருவேன் ; இல்லையெனில் புதன் காலை வரை கொஞ்சமாய்ப் பொறுத்துக் கொள்ளுங்களேன் !

Before I sign out...ஒரு கொசுறுத் தகவல் : இம்மாதம் வரவிருக்கும் இதழ்களில் பிரபல நாயகர்கள் இருந்திட்டாலும் - நிஜமான ஹீரோ யார் என்பது எனக்குத் தெரியும் ! அது வேறு யாருமல்ல - எனது வலது ; இடது ; முன் ; பின் கரங்கள் சகலத்தையும் உணர்த்திடும் நமது அலுவலக மைதீன் தான் ! இந்த ஒரு வாரத்தில் நான் தூங்கிய நேரங்களை விடக் குறைவாய்த்  தூங்கியவன் மைதீன் ! துளியும் புன்னகை மாறாது - 'சரி அண்ணாச்சி' என்ற ஒற்றைச் சொல்லைத் தாண்டிய வேறு ஏதும் அறிந்திரா இந்த மௌன ஹீரோ தான் நமது நவம்பர் நாயகன் !  See you soon folks !

Part 2 : தவணை முறைகளில் பதிவுகளைப் பூர்த்தி செய்வது நமக்குப் புதிதல்ல தான் என்றாலும், இம்முறை இந்த transatlantic சங்கதி கொஞ்சம் ஓவர் என்று தான் எனக்கே படுகிறது ! செவ்வாய் பின்னிரவு சென்னை வந்து இறங்கியான பின்னே - தூங்குவதா ? - சாப்பிடுவதா ? என அறிந்திருக்கா உடம்பின் குழப்பத்தின் மத்தியினில் இங்கே எட்டிப் பார்த்தால் கிட்டத்தட்ட 130 பின்னூட்டங்கள் ! நாளைய பகலில் நேரம் கிட்டுமோ - என்னவோ என்ற சந்தேகம் எழுவதால் - ராக்கூத்தை தொடர்ந்திடுவதே உத்தமம் என்ற தீர்மானத்தில் எழுதுகிறேன் !

அனைவர் முன்னும் பெரிதாய் நிற்கும் - இம்மாத இதழ்களின் despatch நிலவரத்தைப் பற்றிய update பிரதான முக்கியத்துவம் பெறுகிறது ! டெக்ஸ் வில்லரின் "குண்டூஸ்" இதழும் ; "ஒரு சிப்பாயின் சுவடுகளில் " கிராபிக் நாவலும் புதன் (30/Oct ) மாலைக்குள் தயார் ஆகிடும் ! ஜானி ஸ்பெஷலுக்கு மேற்கொண்டு ஒரு நாள் அவசியமாகிடலாம் ! ஆனால் ST கூரியர் நண்பர்கள் 'வியாழன் புக் செய்யப்படும் பார்சல்கள் - வெள்ளியன்று கிடைக்கும் சாத்தியக் கூறுகள் 50-50 தான் !' என்று சொல்லி விட்டதால் 'மூன்றையும் ஒன்றாய் அனுப்புகிறேன் பேர்வழி ' என மொத்தத்திற்கு சொதப்புவதை விட - தயார் ஆகி  விட்ட 2 இதழ்களையாவது அனுப்பிடல் நலம் என நினைக்கிறேன் ! So - புதன் மாலை 2 இதழ்களும் கூரியரில் கிளம்பிடும்  ! 2014-ன் அட்டவணையும் மிகுந்த முக்கியத்துவம் வாய்ந்த சங்கதி என்பதால் கூரியர் பயணத்தை அதுவும் சேர்த்தே செய்திடும். So - வியாழன் & வெள்ளிக்குள் அனைவரது கைகளிலும் at least  2 புது வெளியீடுகள் + தொடரும் ஆண்டின் நமது ஜாதகமும் இருந்திடும் !

2014-ன் அட்டவணை கொணரக் காத்திருக்கும் உங்களின் responses - நிச்சயமாய் தொடரும் நாட்களை ரொம்பவே விறுவிறுப்பாய் வைத்திருக்கப் போகிறது என்பது எனது யூகம் ! கடைசி வாரம் வரை mixing & matching வேலைகளை செய்த வண்ணம் இருந்தேன் என்றாலும், நிச்சயமாய் என்னுள் குழப்பங்கள் இருந்திடவில்லை  !(சொல்லப் போனால் இன்று காலை இலண்டன் விமான நிலையத்தினில் அமர்ந்து ப்ளூ கோட் பட்டாளத்தின் சாகசம் ஒன்றிற்குப் பெயர் வைக்கும்  கூத்தும் அரங்கேறியது !) இந்தாண்டின் பாடங்கள் + ஹிட்ஸ் + flops எனது திட்டமிடல்களைப் பெருமளவிற்கு செதுக்கியன என்பதால் - இந்த அட்டவணை indirect ஆக உங்களின் ஆக்கமே என்று தான் சொல்ல வேண்டும் ! இம்முறை வழங்கப்படவிருக்கும் அட்டவணையில் - 11 மாதங்களுக்கான (லயன் 30-வது ஆண்டுமலர் வெளியீடு நீங்கலாய்) புது இதழ்கள் + மறுபதிப்புப் பட்டியல்கள் உள்ளன ; ஆனால் எவை எந்த மாதங்களில் - எந்தக் கூட்டணியில் வரும் என்ற நிர்ணயம் மாத்திரம் இப்போதைக்குக் கிடையாது ! கொஞ்சமேனும் ஒரு எதிர்பார்ப்பு எஞ்சி இருக்க வேண்டுமன்றோ ?

நம் காமிக்ஸ் வரிசைக்கு 2014 ஒருப் புது ஆட்டக்காரரையும் அறிமுகம் செய்யக் காத்துள்ளது ! கிராபிக் நாவல்களின் தாக்கம் நம் அனைவரிடமும் ஒரே விகிதத்தில் இருப்பதில்லை என்பதை   இந்தாண்டின் அனுபவங்கள் தெளிவாகவே புரியச் செய்துள்ளன ! So  புதுத் திட்டமிடலின் போது கிராபிக் நாவல்களுக்கென ஒரு பிரத்யேக அரங்கினைத் தயார் செய்திடும் பட்சத்தில் - 'பிடிக்கிறதோ - பிடிக்கலியோ - சந்தாவில் இவையும் சேர்ந்தே வரும் !' என்ற கட்டாய நிலை தவிர்க்கப்படும் என்று தோன்றியது ! தவிரவும், நமது தற்சமய பாணிகளில் இருந்து விலகி நிற்கும் சில படைப்புகளை இது போன்றதொரு தனி track-ல் பயணம் செய்திடச் செய்தால் நெருடல்கள் இராது என்றும் நினைத்தேன். So "சன்ஷைன் கிராபிக் நாவல்ஸ் " எனும் நமது புது வரவு 2014 -ல் ஒரு பரீட்சார்த்த முயற்சியாகத் துவங்கிடவுள்ளது ! இன்னமும் சில படைப்பாளிகளிடம் இது தொடர்பான கதைகளுக்குப் பேச்சு வார்த்தைகள் நடந்து வருவதால் - இப்போதைக்கு என்னால் இந்த வரிசையின் வெளியீட்டுப் பட்டியலை முழுமையாக்கிட இயலாது ! ஆகையால் இந்தப் புது வரவின் விபரங்கள் 2014-ன் தற்சமய அட்டவணையினில் இருந்திடாது ! ஏப்ரலில் துவங்கவிருக்கும் இம்முயற்சிக்கு ரூ.400 ஆண்டுக் கட்டணம் என்பது உறுதி ; so ஒரே வேலையாக சந்தாத் தொகைகளை அனுப்பிட நினைக்கும் நண்பர்கள் - 2014-ன் அறிவிக்கப்படும் தொகையோடு இந்த ரூ.400-ம் சேர்த்தே அனுப்பிடலாம் !

நாளை இரவு உங்களின் பின்னூட்டங்களுக்குப் பதில் தரும் முயற்சியில் இறங்கிடுகிறேன் ! தூங்க முயற்சிக்கப் புறப்படும் முன்னே - இதோ இம்மாத இதழ்களின் அட்டைப்படங்களில் நாங்கள் செய்த எக்கச்சக்க முயற்சிகளில் சில samples !ஒரு மெல்லிய rustic look இக்கதைக்குப் பொருத்தமாய் இருந்திடும் என எனக்குத் தோன்றியதால் - action sequences கொண்ட டிசைன்களைத் தேர்வு செய்திடவில்லை ! அதே போல் ஒரு நல்ல நாளும், பொழுதுமாய் வெளியாகும் இதழின் அட்டையில் அடுக்கிக் கிடக்கும் சவப்பெட்டிகள் வேண்டாமே என்று மண்டைக்குள் ஒரு சிந்தனை ஓட, ஒரிஜினலின் அந்த சவப்பெட்டி ராப்பருக்குக் கல்தா கொடுத்தேன் ! Anyways - கதைக்கு இது ஒரு முகவுரை மாத்திரமே என்பதால் நிஜத் தேர்வு அட்டையினை விட - தொடரும் உட்பக்கங்களில் தான் என்று சொல்வேன் ! Bye for now guys !




Tuesday, 22 October 2013

எங்கள் வீதியில் ஒரு வானவில் !

நண்பர்களே,

வணக்கம். ஒவ்வொரு மாதமும்,இதழ்களை உங்களுக்கு despatch செய்திடும் நாள் வரையில் அட்டைப்படங்களை இங்கே உங்கள் கண்ணில் காட்டாது வைத்திருப்பதன் மூலம் ஒரு குட்டியான எதிர்பார்ப்பு + சுவாரஸ்யத்தை பில்டப் செய்திட முடியும் என்பது எனது எண்ணமாக இருந்து வந்துள்ளது ! ஆனால் இந்த ஒரு முறை அந்தக் கட்டுப்பாட்டிற்கு விலக்குத் தரலாமெனத் தோன்றியது ! இந்த "தயாள" சிந்தைக்குப் பின்னணிக் காரணங்கள் 4 ...!

ஒன்றுக்கு மூன்றாய் இம்மாதம் நம் இதழ்கள் வரவிருப்பதும் ; அவற்றில் ஒரு இதழுக்கு cover வடிவமைக்கும் பணியானது வாசகர்களின் கைகளில் என்பதும் நாம் அறிந்ததே ! So நண்பர்களின் அட்டைப்பட டிசைன் முயற்சிகள் ஒரு பக்கம் ; பாக்கி 2 இதழ்களுக்குமான நமது டிசைனிங் வேலைகள் மறுபக்கமென - கடந்த நாலைந்து நாட்களாய் நிறையவே ஜானிகளையும், இரவுக் கழுகாரையும் ; வியட்நாமின் மஞ்சள் முகத்தவர்களையும் பார்த்திட முடிந்ததால் - கொஞ்சமேனும் உங்களோடு அனுபவங்களைப்  பகிர்ந்தால் தேவலை என்று தோன்றியது ! So இது காரணம் # 1 !

இதழ்கள் வெளியாகும் சமயம் வரை KBGD (KAUN BANEGA GRAPHIC DESIGNER ) போட்டியின் வெற்றியாளரை அறிமுகப்படுத்தாது இருக்கும் பட்சத்தில் - 3 இதழ்களின் வருகை + விமர்சனங்கள் + தீபாவளிப் பண்டிகையின் களேபரங்களில் அந்தத் திறமையாளரின் மீதான ஒளி வட்டம் முறையாய் பாய்ந்திட வாய்ப்புக் குறைந்திடக் கூடும் என்று மனதுக்குத் தோன்றியது ! 'ஆகையால் இப்போதே வெற்றியாளரையும், அவரது ஆக்கத்தையும் அறிமுகப்படுத்துவோமே !' என மண்டைக்குள் தோன்ற - அது காரணம் # 2 ஆனது !

இம்மாத டெக்ஸ் ஸ்பெஷல் பொருட்டு நண்பர்களிடையே நிறையவே எதிர்பார்ப்புகள் நிலவுவது புரிந்திட முடிகிறது ! இந்த இதழுக்கு முன் + பின் அட்டைகளை வடிவமைக்கும் பணியை நமது ஓவியர் மாலையப்பனிடம் ஒப்படைத்து இருந்தோம். துவக்கம் முதலே சின்னச் சின்னதாய் 2 டிசைன்களிலும் மாற்றங்கள் அவசியப்பட்டுக் கொண்டே இருந்தது ஒரு பக்கமெனில், அவரது பணி நிறைவுற்று - நமது டிசைனர் பொன்னனிடம் மெருகூட்டும் வேலைக்காக 2 படங்களும் சென்ற பொது, அங்கும் மந்த நிலையே ! முதல் சில முயற்சிகளில் எனக்குக் கொஞ்சமும் திருப்தி ஏற்படவில்லை ! இறுதியாக நானே சில-பல மாதிரிகளைக் குடைந்து எடுத்துக் கொடுத்து - அந்த வண்ண சேர்க்கையை முன்னட்டைக்குப் பயன்படுத்திப் பார்த்தோம் ; 'பளிச்' என பலன் தெரிய - நமது டெக்ஸ் தீபாவளி ஸ்பெஷலின் அட்டைப்பட flashback இது !  So அதைச் சொல்லி கொஞ்சமாய் காலரை தூக்கி விட்டுக் கொள்ளலாமே என்ற ஒரு நப்பாசை காரணம் # 3 ! 

4-வதும் , பிரதான காரணமும் - இம்மாத இதழ்களோடு வரக் காத்திருக்கும்  2014-க்கான அட்டவணையே ! தொடரும் 12 மாதங்களது schedule ; நாயகர்கள் பட்டியல் ; என 2014-க்கான நமது பயணத் திட்டம் அதனில் இருக்கும் ! அந்த அறிவிப்புகள்  கொண்டு வரவிருக்கும் விவாதங்கள், அபிப்ராயங்கள், கலந்துரையாடல்கள் et al நிச்சயம் வண்ணமயமாய் இருந்திடும் என மனதுக்குத் தோன்றுவதால் - அந்த வேளையில் இந்த அட்டைப்படங்கள் ஓரம் தள்ளப்பட வாய்ப்புண்டு என்று நினைக்கத் தோன்றியது ! So இப்போதே அட்டையினை (at least 2 cover களை மட்டுமாவது)  unveil செய்வதில் தவறில்லை எனத் தீர்மானித்தேன் ! 

முதலில் KBGD போட்டியில் பங்கேற்ற நண்பர்களுக்கு ஒரு மிகப் பெரிய நன்றி சொல்லியாக வேண்டியது எனது கடமை ! நிறையப் பேர் இதனில் பங்கு கொள்வது சாத்தியமாகாது என்றாலும், கலந்து கொண்டோர் மிகுந்த ஆர்வத்தோடு தங்கள் திறமைகளைக் காட்டியது ரொம்பவும் நிறைவாக இருந்தது ! இதோ பாருங்களின் நண்பர் கர்ணனின் படைப்புகள் :



இது தவிரவும் இன்னும் 2 டிசைன்களை ஏக துரிதமாய் அனுப்பி இருந்தார் நண்பர் !! இதற்கென அவர் எத்தனை நேரத்தையும், உழைப்பையும் செலவு செய்தாரோ - தெரியவில்லை !! Thank you ever so much sir !!!

தொடர்வது நண்பர் Podiyan அவர்களது அற்புதமான  கைவண்ணம் ! Great job !!


தொடர்வது நண்பர் ஆதி தாமிராவின் கைவண்ணம் ! ரொம்பவே வித்தியாசமான முயற்சிகள் !! Really really cool stuff...!




And இது நண்பர் கொமாரபாளையம் அருணாச்சலத்தின் ஆக்கம் ! Beautiful work - குறிப்பாகப் பின்னட்டை !! Great work !!


இறுதியாக - நண்பர் ரமேஷ் குமாரின் கைவண்ணம்


முன் + பின் அட்டைகள் ஒரு சேரப் பார்க்கும் போது நண்பர் ரமேஷ் குமாரின் கைவண்ணம் - மற்றவர்களின் படைப்புகளை விடக் குட்டியானதொரு வித்தியாசத்தில் முன்னே நிற்பதை எனக்கும், எங்களது டீமுக்கும் தோன்றியதால் - KBGD -ன் வெற்றியாளராக ரமேஷ் குமார் தேர்வு செய்யப்படுகிறார் ! வாழ்த்துக்கள் நண்பரே - உங்களுக்கொரு சிவகாசிப் பட்டாசு பார்சல் பரிசாகக் காத்துள்ளது ! அட்டகாசமான முயற்சிகள் எடுத்துக் கொண்ட இதர நண்பர்கள் அனைவருக்கும் நம் நன்றிகளோடு - அன்பின் அடையாளங்களாய் ஒரு சின்ன wrist watch பரிசாக அனுப்பிடப்படும் ! Thanks a ton all !! 

இறுதியாய் - நமது இரவுக் கழுகாரின் அட்டைப்பட டிசைன் இதோ ! 

Back cover's original !
முன்னட்டையில் நிற்கும் டெக்ஸ் + பின்னட்டை - இரண்டுமே மாலையப்பனின் கைவண்ணங்கள் ! முனட்டையினில் வண்ணச் சேர்கை + மெருகூட்டல் - பொன்னனின் பங்களிப்பு ! பினட்டையை இன்னும் கொஞ்சம் fancy ஆக்குவதை விட - ஒரிஜினலை ஒத்த அதே look தேவலாம் எனத் தோன்றியது எனக்கு ! ஆகையால் பின்னட்டையில் மாலையப்பன் all the way ! விடை பெறும் முன்னே - ஒரே ஒரு குறிப்பு மட்டும் ! 

இரவுக் கழுகாரின் இதழின் முதுகு கனத்தைக் கவனித்தீர்களா guys ? :-) Take care all !! See you soon ! 

Friday, 18 October 2013

உலகம் சுற்றலாம் வாங்க..!

நண்பர்களே,

வணக்கம். உலகைச் சுற்றி வர தம்பி சுப்பிரமணியன் மயிலேறிப் புறப்பட, அண்ணன் விநாயகரோ இருந்த இடத்திலேயே அம்மையையும், அப்பனையும் வலம் வந்து காரியம் சாதித்தது புராணங்கள் சொல்லும் கதை ! இருந்த இடத்திலிருந்தே உலகைச் சுற்றி வரும் அந்த லாவகத்தை கடந்த ஏழு நாட்கள் எனக்கும் கற்றுத் தந்துள்ளன என்று சொன்னால் மிகையாகாது ! தசரா விடுமுரைகளைத் தொடர்ந்து சின்னதாய் ஒரு விடுமுறைப் பயணம் ; சென்ற இடத்திலிருந்து இறக்குமதி செய்து வந்த ஜலதோஷமும், காய்ச்சலும் படுக்கையில் என்னைச் சாய்த்திட - இடையிடையே இங்கு எட்டிப் பார்க்கக் கூட இயலாது போனது ! ஆனாலும், தீபாவளி நெருங்க நெருங்க - 'இதழ்களின் தயாரிப்பில் சுணக்கம் நேர்ந்திடக் கூடாதே' என்ற இன்னொரு காய்ச்சலும் உள்ளுக்குள் ஓடியதால் - வரிசையாய்த் தலைமாட்டில் கதைகளின் print out கள் அணிவகுப்போடு, பணிகளையும் பார்த்திட முனைந்தேன் !

டெக்ஸ் வில்லரின் 2 தடிமனான சாகசங்கள் என் பட்டியலின் முதன்மையில் இருந்தன. பருமனான புக் என்பதால் - அச்சு ; பைண்டிங் என சகலமும் நேரத்தை விழுங்கும் சங்கதிகள் என்பதால் அதற்கு priority தருவது அவசியமாய்ப் பட்டது ! முதலாம் கதை முழுக்க முழுக்க மெக்சிகோவில் நடைபெறும் சாகசம் ! 224 பக்கங்கள் என்பதும் சரியான நீளம் என்பதால் கதை முடிவதற்குள் நானே அந்த மெக்சிகன் புழுதிக் காடுகளிலும், மேடுகளிலும் 'லோ-லோ' வென நடை போட்டது போல் தோன்றியது ! சரி - ஒரு வழியாக மெக்சிகோவிற்கு சலாம் போட்டாயிற்று - என கதை # 2 ஐக் கையில் எடுத்தால் அது அமெரிக்காவின் ப்ளோரிடா மாகாணத்தில் உள்ள எவர்க்லேட்ஸ் சதுப்பு நிலங்களில் அரங்கேறும் ஒரு சாகசம் ! திரும்பிய திசையெல்லாம் சதுப்புக் காடுகள் ; முதலைகள் ; டிசைன் டிசைனான குடுமிகள் கொண்ட செமிநோல்ஸ் செவ்விந்தியர்கள் என இதுவும் ஒரு மாறுபட்ட களத்தில் என்பதால் பயணம் # 2 கூட என்னை எங்கெங்கோ இட்டுச் சென்றது ! சில மாதங்களுக்கு முன்பாய் எழுதப்பட்ட கதைகளை ஒரு சேர - ஒரே இதழாக்கிப் படிக்கும் போது ஏற்படுவது முற்றிலும் மாறுபட்டதொரு feeling  ! எழுதும் போது ஒரு நேரத்திற்கு 10 பக்கங்களை ஒரு சேர எழுதுவதே பெரும் பணி என்பதால் - இடைவெளி விட்டு-விட்டு எழுதுவதே வழக்கம். So இறுதியாய் எடிட்டிங் செய்யும் போது அவற்றை கோர்வையாக்கி - ஒரு மொத்தமாய்ப் படிக்கும் அனுபவம் ரொம்பவே வித்தியாசமானது ! 450 பக்கங்கள் டெக்ஸ் வில்லரோடு பயணித்தான பின்னர் எனது சமீபத்திய கனவுகள் கூட 'டமால்-டுமீல்-கும்-கிராக்" DTS சவுண்ட் effect சகிதம் தான் அரங்கேறுகின்றன !
சென்ற மாதம் வெளியாகியுள்ள இதழ் + DVD !  போனெல்லி நிறுவனத்தின் காமிக்ஸ் பரிணாம வளர்ச்சியினை விளக்கும் வண்ணப் பக்கங்கள் + ஒரு ஆவணப் படம் + ஒரு  48 பக்க western  வண்ண சாகசம் !
ஒரு வழியாய் டெக்சின் பயணங்களுக்கு முடிவுரை எழுதி விட்டு, எதிர்நோக்கி நின்ற கிராபிக் நாவலைக் கையில் எடுத்த போது தலைக்குள் கிரைண்டர் ஓடாத குறை தான் ! இந்த வியட்நாம் பின்னணியிலான கதை ஏறத்தாள 7 மாதங்களுக்கு முன்பாகவே பிரெஞ்சிலிருந்து மொழிபெயர்க்கப்பட்டு - நமது கருணைஆனந்தம் அவர்களால் தமிழாக்கமும் செய்யப்பட்டு ஏன் மேஜையில் துயில் பயின்று வந்த சங்கதி ! கதையின் பிரெஞ்சு மொழிபெயர்ப்பைப் பார்த்த கையேடு - என்னிடம் பேசியவர் - 'கதை ஏகப்பட்ட நீளத்திற்குச் செல்கிறது ; எக்கச்சக்கமான வரலாற்றுக் குறிப்புகளோடு உள்ளது ; இது நமக்கு சரி வருமா ? என்பதை யோசித்துக் கொள் !' என்று ஒரு பிட்டைப் போட்டிருந்தார் ! பிடிவாதமாக இந்தக் கதையை நான் 'டிக் ' அடித்ததைத் தொடர்ந்து, அவர் பணியைச் செய்து பிப்ரவரியிலேயே மொழிபெயர்ப்பு வந்தாகி விட்டது. தொடர்ந்து அவரது எழுத்துக்களை மெருகூட்டும் பணியை நான் கையில் எடுத்து முடித்து - டைப்செட்டிங்கில் ஒப்படைத்தால்  - மூன்றே நாட்களில் கதை தயார் என்ற நிலை ! ஆனால் எனது வேலையினைத் துவக்காமலே நான் மாதங்களைக் கடத்தி வந்திருந்தேன். இவ்வார ஆரம்பத்தில்   'இனியும் தாமதித்தால் வேலைக்கு ஆகாது மகனே !' என்ற சூழலில் ஒரு வழியாய்க் கதையைக் கையில் எடுத்த போது என்னைக்  கிறுகிறுக்கச் செய்தது இக்கதைக்கான பிரெஞ்சு to இங்க்லீஷ் மொழிபெயர்ப்பின் பரிமாணம் ! பரீட்சைப் பேபரில் சுத்தமாக 81 பக்கங்கள் கொண்ட முழு நீள ஸ்கிரிப்ட் அது ! இத்தனையையும் அடுத்த சில நாட்களுக்குள் படித்து - ஏற்கனவே கையிலிருந்த தமிழாக்கத்தில் கூட்டல் / குறைத்தல் / மெருகூட்டல் செய்தாக வேண்டுமென்று நினைத்த போதே விலகி இருந்த காய்ச்சல் U -turn அடித்தது போல் இருந்தது ! சிறுகச் சிறுக உள்ளே புகுந்திட ; கதையின் ஜீவனைப் புரிந்திட முயற்சிக்கத் தொடங்கிய போது தான் ஒரு பிரமிப்பூட்டும் படைப்பின் வாயிலில் நான் நிற்கும் விஷயம் எனக்கே புலனானது ! இந்தக் கதையை நான் வாங்கிடும் முன்னே அதன் கதைச்சுருக்கத்தை ஆங்காங்கே அலசி இருந்தேன் தான்  என்ற போதிலும், அதனை வரிக்கு வரி ; frame by single frame படித்திடும் போது தான் அதனுள் புதைந்து கிடக்கும் முத்துக்களை இனம் காண முடிந்தது!

கதையின் முதல் பகுதி அரங்கேறுவது பிரான்சின் யௌவனம் கொஞ்சும் கிராமீயப் பகுதிகளிலும் ; இரண்டாம் பாகம் நடந்தேறுவது வியட்நாமின் வயல்வெளிகளிலும் ! ' டமால்-டுமீல் ' என்ற தோட்டா முழக்கங்கள் கிடையாது ; 'விர்ரூம்ம் ' என்ற புழுதி பறக்கும் கார் விரட்டுகளுக்கு இங்கே இடமில்லை ; ஆண்மை மிடுக்கான ஹீரோக்களோ ; மிரட்டலான வில்லன்களோ இங்கு அறவே கிடையாது ! ஆனால் இங்கு சொல்லப்பட்டிருப்பது யுத்தமெனும் அர்த்தமற்ற இரத்த பலியின் இடையே சராசரி மக்கள் படும் அவஸ்தைகளும், அந்த யுத்த வெறி வெளிக் கொணரும் மிருக குணங்களுமே ! கொஞ்சம் கொஞ்சமாய் அந்த சிப்பாயின் சுவடுகளைத் தேடி நானும் பேனாவோடு பயணமாக - பிரான்சின் தூங்குமூஞ்சி கிராமங்களையும், வியட்நாமின் பரபரப்பான நகரங்களையும், பழமையில் ஊறிப் போன அதன் கிராமீயப் பிராந்தியங்களையும் தரிசித்த உணர்வு ஏற்பட்டது ! இது அதிரச் செய்யும் ஒரு கதையல்ல ; யூகிக்கக் கூடியதொரு கதைக்கருவே  என்றாலும் - சொல்லப்பட்டிருக்கும் விதம் ரொம்பவே endearing என்பது படைப்பாளிகளின் வெற்றிக்கு சான்று ! விரைவில் இதனைப் படித்திடும் நீங்களும் என்னைப் போலவே லயித்திடுவது சாத்தியமானால் - உங்களின் பாராட்டுக்கள் சேர்ப்பிக்கப்பட வேண்டியது பிரெஞ்சிலிருந்து ஆங்கிலத்துக்கு அசராமல் மொழியாக்கம் செய்து தந்த அந்த இல்லத்தரசிக்கே !! Simply breathtaking job !

'இத்தனை 'பில்டப்' இந்தக் கதைக்குத் தேவை தானா ?' என்ற சிறு சந்தேகம் மண்டையின் ஒரு ஓரத்திலும் இல்லாமல் இல்லை தான் ! நண்பர்களில் ஒரு சாராருக்கு இது மசாலாவற்றதொரு சமையலாகத் தெரிந்திடும் வாய்ப்புகள் பிரகாசமாய் உள்ளன எனும் போது ஓவரான அலப்பரையாக இந்த அறிமுகப் படலம் தெரிந்திட சாத்தியமாகும் தான் ! ஆனால் - மொழிபெயர்ப்பை முழுமையாய் re-do செய்த கையோடு இந்தப் பதிவை நான் எழுதுவதால் - fresh from vietnam என்ற உணர்வோடு என்  எண்ணங்களைப் பகிர்ந்திடுகிறேன் ! இந்த ஒரு முறை மட்டும் - இக்கதையின் commercial வெற்றியோ-தோல்வியோ ஒரு தடுமாற்றத்தை என்னுள் விதைக்கப் போவதில்லை என்பது நிச்சயம் ! 'ஒரு நிஜமான மாறுபட்ட முயற்சியைக் கையில் எடுக்க வாய்ப்பு அமைந்ததே ! என்ற மனநிறைவு மேலோங்கி நிற்பது உறுதி ! நீங்களும் ரசிக்க வேண்டுமென்ற ஆசை எப்போதையும் விட இப்போது மிகுந்து நிற்கின்றது !Fingers crossed big time !!

அப்புறம் நமது சமீபத்திய KBT -3 போட்டிக்கு இம்முறை கிட்டத்தட்ட 50% போட்டியாளர்கள் தங்கள் ஆக்கங்களை அனுப்பியுள்ளது மிகுந்த சந்தோஷமளித்தது ! அனுப்பியதோடு மட்டும் நிற்காது - தொடரும் நாட்களில் - "Improvements ; enhancements ; changes " என வெவ்வேறு சிற்சிறு மாற்றங்கள் ; திருத்தங்களையும் செய்து அனுப்பி இருப்பது ஒவ்வொருவரின் முயற்சிகளின் தீவிரத்தை உணரச் செய்தது ! இம்முறை இரு கதைகளுமே லக்கி லூக்கின் காமெடிக் கதைகள் தான் என்ற போதிலும், 'பெண்டு' கழற்றி விட்டன என்பது தான் ஏகோபித்த கருத்து ! இவ்வார இறுதியோடு time limit நிறைவு பெறுவதால் - அதற்குள் வந்திடும் / வந்திருக்கும் மொழிபெயர்ப்புகளுள் மிகச் சிறப்பானததைத் தேர்வு செய்து - இம்மாத "ஜானி ஸ்பெஷல்" இதழின் filler pages -களாக  (முதல் கதையினை) வெளியிடவுள்ளோம் ! இம்முறை மெய்யாகவே அனைவரும் 'தம்' கட்டி திறமைகளைக் காட்டி இருப்பதால் - தேர்வு செய்யும் என் பொறுப்பு சுலபமல்ல என்பது புரிகிறது !  Great show folks !!

அதே போல் KBGD போட்டிக்கு சில பளிச் அட்டைப்படங்கள் வந்துள்ளன ! சில நண்பர்கள், சில விபரங்களைக் கோரி மின்னஞ்சல் அனுப்பி இருந்தனர்!  உடல்நலக் குறைவால் ஓய்விலிருந்த என்னால் அவற்றிற்குப் பதிலளிக்க இயலாது போயிற்று ! இன்று அவர்களுக்கும் தேவையான விபரங்கள் அனுப்பப்படும் ; so வரும் செவ்வாய்க் கிழமைக்குள் நமக்கு வந்திடும் டிசைன்களில் பெஸ்ட் தேர்வாகிடும் !
ஊடு சூன்யம் ...

ஓநாய் மனிதன் ! 
ஒரு சிப்பாயின் சுவடுகளில்...!
2014-ன் சந்தா + அட்டவணை + ட்ரைலர்களின் தயாரிப்புப் பணிகளும் ஒரு பக்கம் பெரும் சவாலாய்க் காத்திருப்பதால் - தொடரும் நாட்கள் ரொம்பவே hectic ஆக இருந்திடப் போவது புரிகிறது ! So - இப்போதைக்கு இங்கிருந்து விடைபெறுகிறேன் ! Adios amigos !! 

Saturday, 12 October 2013

உதை வாங்கும் நேரமிது !

நண்பர்களே,

வணக்கம். அக்டோபர் இதழ்களின் reviews + விற்பனை குறை சொல்ல இடம் தரவில்லை என்பது மட்டுமல்லாது, இங்கு நமது பதிவு + பின்னூட்டங்களும் ஏக விறுவிறுப்பாய் அமைந்தது இரட்டை சந்தோஷத்துக்கு வழி தேடித் தந்தது ! ஆனால் ஷொட்டுக்களும்    - குட்டுக்களும் மாறி மாறி நம் பக்கமாய் வருவது வழக்கமான நியதியே என்பதால் - இம்முறையும் அது தொடர்ந்ததில் எனக்கு அதிக வியப்பில்லை ! ஆனால் குட்டுக்கள் விழுந்த காரணம் தான் நிஜமாக என்னை சற்றே விழிக்கச் செய்தது !  

2013-ல் எஞ்சி இருக்கும் வண்ண மறுபதிப்புகளுள் ஒன்றான சிக் பில் ஸ்பெஷலின் கதைகளில் நேர்ந்ததொரு மாற்றம் தான் சமீபத்திய குட்டு மழையின் காரணி ! "விண்வெளியில் ஒரு எலி" கதையின் அன்றைய நமது மொழிபெயர்ப்பு பாணியானது தூய தமிழில் இருப்பதால் அதனிடத்தில் வேறொரு கதையைத் தேர்வு செய்வது உசிதம் ; அல்லது அதே கதைக்குப் புதிதாய் இன்னொரு மொழிபெயர்ப்பு தயாரித்தால் தேவலை ' என நண்பர் கிரி இங்கே சுட்டிக்காட்டி இருந்ததும் ; அது எனக்கும் சரி என்று தோன்றியதால் "விண்வெளியில் ஒரு எலி"க்கு கல்தா கொடுக்கப்பட்டதும் நாம் அறிந்ததே ! ஆனால் இந்த மாற்றம் நிறையவே வருத்தக் குரல்கள் ; கண்டனங்கள் ; மின்னஞ்சல் அர்ச்சனைகள் உருவாக காரணமாக இருக்குமென்று சத்தியமாய் நான் நினைத்திருக்கவில்லை !  'ஏகமாய் எதிர்பார்த்த கதையினை வாசகர் ஒருவர் சொன்னார் (!) என்பதற்காக 'படக்' கென நீங்கள் எவ்விதம் மாற்றலாம் ?' என்ற கேள்வியோடு துவங்கி ; ' எதைத் தலையில் கட்டினாலும் நாங்கள் ஏற்றுக் கொள்வோமென்ற போக்கை ஜீரணிக்க முடியவில்லை !' ; 'இதே போல் குட்டிக் காரணங்களைத் தொடர்ந்தால் கோவிந்தா தான் !'  என்ற ரீதியிலான பிரவாகங்கள் ! கருத்து சுதந்திரம் நம் பிறப்புரிமை என்ற போதிலும் - அவசியங்களுக்கு ஏற்ப சில வேளைகளில் அரங்கேறும் சில மாற்றங்களைப் புரிந்து கொள்தலும் அவசியம் என்றாகாதா ? மறுபதிப்புகளைப் பொருத்த வரை நான் personal ஆகச் சந்தித்திடும் நெருடல்கள் சிலவுண்டு : 

அன்று துவங்கி, இன்றளவும் தொடரும் ஒரு கதையினை (லக்கி லுக் ; பிரின்ஸ் ; டைகர் இத்யாதி) மறுபதிப்பு செய்யும் போது உங்களின் nostalgia craving அதே ஒரிஜினல் மொழிபெயர்ப்பையே துளி மாற்றமுமின்றிக் கோருகிறது என்பது நிதர்சனம். ஆனால் ரசனைகளில் பரிணாம வளர்ச்சி என்பதைப் போலவே ஒரு கதையை ; ஒரு தொடரை நாம் கையாளும் விதங்களிலும், எழுத்து நடைகளிலும் ஒரு இயற்கையான மாற்றம் இருந்திடுவதும் கூட யதார்த்தம் தானே ? 20 ஆண்டுகளுக்கு முந்தைய நம் எழுத்துகளை இன்று மீண்டும் படிக்கும் போது எனக்கு நெருடல்கள் சில தோன்றுகின்றன ! ஆனால் அவற்றை செப்பனிட அவகாசம் இருப்பதில்லை என்பதோடு - உங்களின் 'பழமைக் காதல் ' அந்தச் செப்பனிடும் முயற்சிகளை இரசிப்பதுமில்லை என்பதால் status quo போதுமென்று விட்டு விடுகிறேன்.

இது தவிர, என்னைப் பொறுத்த வரை நமது முந்தைய இதழ்களை அவ்வப்போது நான் மீண்டும் படிப்பதோ ; புரட்டுவதோ கிடையாது ! நமது oldies எல்லாமே அட்டைப்படன்களாய் ; அனுபவங்களை ; கதைகளின் மெல்லிய outline கலை மாத்திரமே ஏன் தலைக்குள் உறைகின்றன என்பது தான் நிஜம் ! So - மறுபதிப்புக்கென நான் ஒரு கதையைத் தேர்வு செய்யும் போது எனக்குத் துணை நிற்பது - அந்தக் கதையின் ஒரிஜினல் பதிப்பு வெளியான சமயம் கிட்டிய வெற்றியும் ; ஈட்டிய பாராட்டுக்களும் மாத்திரமே ! ஏகப்பட்ட தடவைகள் ஒரு கதையைப் படித்திருந்து அதனை மனப்பாடமாய் ஒப்பிக்கும் ஆற்றல் கொண்டவர்கள் நீங்கள் தானேயன்றி நானில்லை ! "விண்வெளியில் ஒரு எலி"யைப் பொருத்த வரை அதனில் பயன்படுத்தப்பட்டிருந்தது பேச்சு வழக்குத் தமிழல்ல என்பது நண்பர்கள் சுட்டிக்காட்டும் வரை எனக்கு நிச்சயமாய் நினைவிலில்லை ! ஒரே இதழில் - ஒரே நாயகரின் கதைகள் - வெவ்வேறு இரு விதங்களில் கையாளப்பட்டிருக்கும் பட்சத்தில் புது / சமீப வாசகர்களுக்கு அது நெருடலாய் அமைந்திடும் என்ற காரணத்தினால் கதைகளை switch செய்திடத் தீர்மானித்தேன் ! ஆனால் அதற்கே பிடரியில் சாத்து வாங்க நேரிடும் போது - இன்னும் நான் சொல்லக் காத்திருக்கும் சங்கதிக்கு பெரியதொரு டின் நிச்சயம் என்பது புரிகிறது ! 

எலியாரை மூட்டை கட்டி விட்டு அதனிடத்தில் "இரும்புக் கௌபாய்" கதையினை அறிவித்திருந்தோம் ! ஆனால் தலை நோவு விட்ட பாடில்லை ! சிக் பில் தொடரின் கதைகளுக்கான வண்ணப் பக்கங்களை நவீன பாணியிலான டிஜிட்டல் கோப்புகளாய் மாற்றிடத் தீர்மானமாகி உள்ளதாகவும் ; முந்தைய files -ல் சில நுணுக்கமான குறைபாடுகள் சில உள்ளதால் அவற்றைப் பயன்படுத்த அனுமதி இல்லை என்றும் நம் பதிப்பகத்தினர் குண்டைத் தூக்கிப் போட்டு விட்டனர் ! இந்தப் புதுப்பிக்கும் பணியில் சிக் பில்லின் ஆரம்ப காலத்துக் கதைகளும் (ரொம்பவே புராதனமானவைகள்!!) ; சமீபத்திய சில கதைகளும் மாத்திரமுமே பூர்த்தியாகி உள்ளன ; பாக்கிக் கதைகள் தயாரகிட சில / பல மாதங்கள் எடுக்குமெனக் கையை விரித்து விட்டனர் ! நாம் ஏற்கனவே வெளியிட்டுள்ள கதைகளுள் தற்சமயம் வண்ண மாற்றம் செய்யப்பட்டு தயாராக உள்ள கதைகள் இரண்டே இரண்டு மாத்திரமே ! அவை :
  1. விற்பனைக்கு ஒரு ஷெரிப் 
  2. நிழல் 1..நிஜம் 2 !

அதிலும் "விற்பனைக்கு ஒரு ஷெரிப் " ஆல்பத்தில் ஒரு பிரதான 30 பக்கக் கதை + 8 பக்கம் + 6 பக்கக் குட்டிக் கதைகள் என்பது தான் அமைப்பு. 'இதனில் அந்த 30 பக்கப் பிரதானக் கதை மாத்திரமே டிஜிட்டல் கோப்புகளில் தயாராக உள்ளன ; பாக்கியை ஒரு மாதத்திற்குள் உங்களுக்காக வண்ணப் புனரமைப்பு செய்திட முயற்சிக்கிறோம் ' என்று சொல்லியுள்ளனர் ! ஆனால் நம் அவசரத்திற்கு அது சாத்தியமாகுமென்ற நம்பிக்கை பெரியளவில் என்னுள் இல்லை ! சிக் பில் தொடரானது இதர மொழிப் பதிப்பகங்களால் அத்தனை ஆர்வமாய் நாடப்படும் கதைவரிசை அல்ல என்பதால் அவர்களுக்கு இது ஒரு முன்னணித் தொடர் ஆகாது ! So - இதன் பொருட்டு அவர்கள் பெரியதொரு சடுதியைக் காட்ட முகாந்திரங்கள் அதிகமில்லை ! 

ஆக வண்ணத்தில் மறுபதிப்புக்கு நமக்கு சாத்தியம் என்பது - "விற்பனைக்கு ஒரு ஷெரீப் "-30 பக்கங்கள் + "நிழல் 1..நிஜம் 2" கதையின் 44 பக்கங்கள் மாத்திரமே ! இதில் ஒரு குட்டியான ஆறுதல் என்னவெனில் "நி 1..நி--2" கதைக்கு இப்போது தயார் செய்யப்பட்டுலவை புதிப்பிக்கப்பட்ட சித்திரங்களே ! நாம் இந்தக் கதையினை 13 ஆண்டுகளுக்கு முன்பாக வெளியிட்ட சமயம் நமக்கு வழங்கப்பட்டவை 1960-களில் உருவாக்கப்பட்ட இதன் ஒரிஜினல் சித்திரங்களே ! 1980-களில் குறிப்பிட்ட சில கதைகளை ஓவியர் திபெத்தைக் கொண்டு re -draw செய்திருந்தனர் ! இது தொடர்பானதொரு சர்ச்சை கூட நமது பதிவுகள் துவங்கிய சமயம் எழுந்தது நினைவிருக்கலாம் !(http://lion-muthucomics.blogspot.in/2012/02/blog-post_13.html) So - இம்முறை இக்கதையை நாம் வண்ணத்தில் வெளியிடும் போது முற்றிலும் புதிதான artwork சாத்தியமாகிடும் ! பாருங்களேன் - சின்னதாய் ஒரு சாம்பிள் :

'ஆண்டின் அட்டவணையைத் திட்டமிடும் போதே இதையெல்லாம் தெரிந்து கொள்வதற்கு என்ன கேடு ?' என்ற கேள்விகள் நிச்சயம் எழும் என்பதை நான் உணராது இல்லை ! ஆனால் இந்த digitalization பணிகள் ; தீர்மானங்கள் - சமீப சங்கதிகள் ; நமது கைக்குள் அறவே இருந்திடா விஷயங்கள் எனும் போது கையைப் பிசைவதைத் தாண்டி நான் செய்வதற்கு அதிகமில்லை ! ஓராண்டுக்குத் தேவையான கதைகளை ஒட்டு மொத்தமாய்க் கொள்முதல் செய்திடும் கோமான்களாய் நாம் இருந்திடும் பட்சத்தில் இது போன்ற கடைசி நிமிடக் காரணங்களை ஓரளவிற்கு மட்டுபடுத்திட இயலும் தான் ; ஆனால் இலட்சங்களில் நீண்டு செல்லும் ராயல்டிகளை 12 மாதங்களுக்கு முன்பாகவே முடக்கும் சக்தியோ ; சாகசமோ நமக்கு அந்நியம் என்பதால் - அன்றைய சமையலுக்கு அன்றைய அன்னக் கொள்முதல் என்பது தானே சாத்தியமாகிட முடியும் ? 

2013-ன் அட்டவணையில் இதுவரை நேர்ந்துள்ள ஒரே மாற்றம் Jason Brice கதையினைக் கழற்றி விட்டு, அதனிடத்தில் கிரீன் மேனரை நுழைத்தது மாத்திரமே ! மையக்கரு முறையற்ற உறவைக் காட்டிடும் கதையாக JB இருந்ததாலும் ; கிரீன் மேனரின் மாறுபட்ட பாணியை உங்களுக்கு அறிமுகம் செய்திடும் ஆர்வமும் கைகோர்த்ததால் மட்டுமே அந்த மாற்றம் அவசியமானது ! அதற்குப் பின் இந்த சிக் பில் பல்டி - நம் கட்டுப்பாட்டிற்கு மீறியதொரு சூழ்நிலை ஏற்படுத்தித் தந்துள்ள கட்டாயம் ! 

ஒரு மாத அவகாசம் கொடுக்கும் பட்சத்தில் "விற்பனைக்கு ஒரு ஷெரீப்" கதையின் பாக்கி 16 பக்கங்களும் வண்ணத்தில் தயாராகிடுமா என்று சின்னதாய் ஒரு சான்ஸ் பார்த்திடும் பொருட்டு - சிக் பில் ஸ்பெஷலை டிசெம்பருக்கு நகற்றி விட்டு, அதனிடத்தில் ஜானி ஸ்பெஷலை இம்மாதம் கொணரலாம் என எண்ணியுள்ளோம். "ஊடு சூன்யம் " + "ஓநாய் மனிதன்" என்றதொரு combo வில் ஜானி ஸ்பெஷல் வரவிருக்கிறது ! இந்த மாற்றங்கள் நண்பர்கள் சிலரது உஷ்ணத்தை அதிகரிக்கச் செய்யும் என்பதை உணர்கிறேன் ! ஆனால் சின்னதொரு பட்ஜெட்டோடு ; ஓராண்டுத் திட்டமிடல்கள் என்பதையெல்லாம் முதல் முறையாய் தரிசிக்கும் எனக்கு இதுவும் ஒரு learning curve என்பதால் - என் வசம் வருத்தம் தெரிவிப்பதைத் தாண்டி வேறு உருப்படியான கேடயம் ஏதுமில்லை ! ஒருக்கால் மாற்றம் கொண்ட கதையினைத் தாங்கி வரும் இந்த சிக் பில் ஸ்பெஷல் இதழினை சந்தாவில் வாங்கிடுவதில் நண்பர்களுக்குப் பிரியம் இல்லாதிருப்பின் சின்னதாய் ஒரு மின்னஞ்சலைத் தட்டி விடும் பட்சத்தில் இது உங்களது சந்தாவில் அனுப்பப்படாது. அந்த வரவு தொகையை 2014-க்கு carry forward செய்திடும் சுதந்திரம் நிச்சயமாய் உண்டு ! 

2013 புகட்டும் ஒவ்வொரு பாடமும் தொடரவிருக்கும் ஆண்டின் செயல்பாடுகளுக்கு நிறையவே உதவிடும் என்பது புரிகிறது ! ஏற்கனவே 2014-ன் முதல் ஆறு மாத இதழ்களுக்கான கதைக் கொள்முதலுக்காக இப்போதிலிருந்தே 'தம் ' கட்டிப் பணம் புரட்டும் முயற்சிகளைத் துவங்கி விட்டோம். கடந்த காலங்களில் நமது ஸ்டாக் பல்லாயிரம் பிரதிகளாய் இருந்தாலும், அதனில் முடங்கிடும் தொகையானது பூமியை அதிரச் செய்யும் ஒரு எண்ணமாக இருந்திடாது ! ஆனால் இன்றோ சில ஆயிரங்கள் கையிருப்புப் பிரதிகள் கூட பல லட்ச முதலீட்டைக் கபளீகரம் செய்து வருவதால் - ஆண்டின் போக்கில் நாங்கள் இதனுள் pump செய்திட அவசியமாகும் கூடுதல் முதலீட்டின் அளவுகளும் 'திடும்' திடுமென அதிகரித்த வண்ணம் உள்ளன ! இதையெல்லாம் சொல்லி உங்களது அனுதாபங்களைச் சம்பாதிப்பதோ ; வரக்கூடிய டின்களை திசை திருப்புவதோ  நிச்சயமாய் எனது நோக்கமல்ல ; என் பக்கத்துப் பார்வையினை சற்றே உங்கள் விழித் திரைகளுக்கும்  கொண்டு வரும் ஒரு யதார்த்த முயற்சி மாத்திரமே ! 'கல்லாதது உலகளவு !' என்று சும்மாவா சொன்னார்கள் என்பதை தினமும் நாம் படித்து வரும் பாடங்கள் புரியச் செய்கின்றன ! விற்பனை முகவர்களின் ஒத்துழைப்பும் சிறுகச் சிறுக அதிகரிக்கத் தொடங்கும் போது நமது சிரமங்கள் சற்றே மட்டுப்படும் என்பதையும் உணர்வதால் அதற்கென முயற்சிகளையும் செய்து வருகிறோம் ! எல்லாவற்றிற்கும் மேலாக 2014-ன் பிரதான இலக்கு - 1500 சந்தாக்களாவது  திரட்ட வேண்டுமென்பதே ! அடுத்த 10 நாட்களுக்குள் புதிதாய் ஒன்றிரண்டு தொடர்களுக்கான பேச்சு வார்த்தைகள் நலமாய் முடிந்து விடுமென்ற நம்பிக்கை எனக்கிருப்பதால் - அதனையும் integrate செய்து 2014-ன் அட்டவணை + சந்தா அறிவிப்பை உறுதியாய் வெளியிட்டு விடுவோம். 

புத்தாண்டின் உத்வேகத்தை நிர்ணயம் செய்யும் பொறுப்பு வெகு சீக்கிரமே உங்கள் திசை நோக்கிப் பயணிக்கும் வேலை நெருங்கி விட்டது guys ! See you soon ! 
Updates : 
1.தொடரவிருக்கும் நமது விளம்பரத்துக்கு நண்பர் ரமேஷ் குமாரின் ஆக்கம் இதோ :-)


2.KBGD போட்டிக்கான கோப்புகள் இன்று மின்னஞ்சலில் விண்ணப்பித்துள்ள 9 நண்பர்களுக்கும் அனுப்பிடப்படும். ஒரு வார அவகாசமென்பது சரியாக இருக்குமா guys ? வெற்றி பெரும் நண்பருக்கு நம் வாழ்த்துக்களோடு ஒரு தீபாவளிப் பட்டாசு பார்சல் பரிசும் உண்டு ! 

3.KBT-3 -க்கு இது வரை வந்துள்ள ஆக்கங்கள் அழகாய் உள்ளன ! அதிலும் ஒரே நாளில் முதல் கதையை எழுதி அனுப்பி இருந்த நண்பர் சிம்பாவின் வேகம் அமர்க்களம் ! 

4.சென்னையில் LANDMARK கடைகளில் நமது இதழ்களின் விற்பனை மகிழ்ச்சி தரும் விதத்தில் இருந்து வருகிறது ! இவ்வாரத்து bestseller - "நிலவொளியில் நரபலி "  :-)

Saturday, 5 October 2013

தொடரும் ஒரு யாத்திரை !

நண்பர்களே,

வணக்கம். நேற்றைய மாலை அக்டோபர் புது இதழ்கள் இரண்டும் கூரியரை நாடிக் கிளம்பி விட்டன ; அவை இன்று உங்கள் கைகளுக்கு வந்து சேர்ந்திட ST கூரியரின் கடாட்சம் நாடுவோம் ! பதிவுத் தபாலில் இதழ்களைப் பெற்று வரும் நண்பர்களுக்கு இன்று காலை தான் பிரதிகள் ship ஆகின்றன ....!


இதோ இரத்தப் படலம் - இன்னிங்க்ஸ் 2-ன் அட்டைப்படம் ! முன் + பின் அட்டைகளுக்கு ஒரிஜினல் டிசைன்களையே பயன்படுத்தியுள்ளோம் - எழுத்துச் சேர்ப்போடு ! பின்னட்டையில் சமீப மாதத்துப் பாணிகளைப் பின்பற்றி கதாசிரியர் + ஓவியர்களின் படங்களையும் ; சின்னதாய் கதையைப் பற்றியதொரு intro -வும் கொடுத்துள்ளோம் ! XIII -ன் தொடருக்கு நாலு வரியில் intro எழுதுவதெல்லாம்   நாக்குத் தொங்கும் வேலை என்பதால் basic ஆக இந்தத் தொடரைப் பற்றிய outline மட்டும் தந்திருக்கிறேன் ! தவிர இது இரத்தப் படலம் தொடரின் இரண்டாம் இன்னிங்க்ஸ் என்பதால் - பாகம் 20 ; 21 என்றெல்லாம் அட்டையில் போடவில்லை ! புதியதொரு யாத்திரையை - புதியதொரு திசையில் ஆசாமி துவக்குவதால் முந்தைய தொடர்களை குறிப்பிட்டு அநாவசியமாய்ப் புது வாசகர்களை மிரளச் செய்ய வேண்டாமென்று தோன்றியது. சின்னதாய் ஒரு கதைச்சுருக்கம் உங்களின் நினைவுகளை refresh செய்திடவும் வருகிறது ! இங்கே சில சமீப காலத்து வாசகர்களின் பொருட்டு சின்னதாய் ஒரு clarification -ம் கூட ! 'இரத்தப் படலம் பாகம் 1-18 போட்டாச்சு ; ஒ.கே. ! ஆனால் இப்போது வெளியிடுவது பாகம் 20 & 21 என்றால் - part 19 என்னவாச்சு ?' என நிறைய கேள்விகள் வந்துள்ளன நமக்கு ! The making of XIII பாணியிலான ஒரு டாகுமெண்டரி இடையில் ஒரு பாகமாக பிரான்சில் வெளியிடப்பட்டது ; அதனைத் தான் "புலன்விசாரணை" என்ற பெயரில் நாமும் வெளியிட உத்தேசித்து அதற்கான உரிமைகளையும் வாங்கி பணிகளைத் துவக்கிப் பார்த்தோம் ; ஆனால் அது ஒரு காமிக்ஸ் கதை பாணியில் இல்லாது - ஒரு casefile போல் மிகவே dry ஆகப் பயணிப்பதால் விஷப்பரீட்சை வேண்டாமே என்ற எண்ணத்தில்  அதை பரணுக்குப் pack செய்திட்டோம்.ஆகையால் இடைப்பட்ட நம்பர் இந்த (வெளி வரா) பாகத்திற்கே! 

சென்ற மாதத்து அச்சுக் குறைபாடுகளை இம்முறை இயன்ற வரை களைந்துள்ளோம் என்று சொல்லத் தோன்றுகிறது. அச்சுப் பிரிவில் சீனியர் பிரிண்டர் ஒருவரை நியமித்து உள்ளதோடு - நான் ஊரில் இல்லா சமயங்களில் (அது தான் பெரும்பாலும் நடக்கும் சங்கதி!) அச்சினை monitor செய்ய நமது துவக்க காலத்து technician ஆன அமீன் பாயையும் பொறுப்பேற்கச் செய்துள்ளோம். இரத்தப் படலம் இதழினில் ஒரு 8 பக்கங்களில் black மங்கலாக அமைந்திருப்பது நீங்கலாக (apologies for that in advance!) - இரு இதழ்களிலும் மேஜர் flaws என ஏதும் இல்லையென்றே சொல்லத் தோன்றுகிறது !ஆகாயத்தில் அட்டகாசம் நிஜமாக சிறப்பாய் அமைந்துள்ளதாக எனக்குத் தோன்றியது.தொடரும் இதழ்களில் இன்னமும் perfectionக்கு எங்களால் ஆனதைச் செய்வோம் உறுதியாக ! 

KBT -3-ல் பங்கேற்க ஆர்வம் தெரிவித்திருந்த 39 நண்பர்களுக்கு 8 +6 பக்க லக்கி லூக் குட்டிக் கதைகள் இம்மாத இதழ்களோடு அனுப்பப்பட்டுள்ளன. உச்சமாய் 15 நாள் அவகாசம் எடுத்துக் கொண்டு இதனை சிறப்பாய் மொழியாக்கம் செய்து அனுப்பிடக் கோருகிறேன்! முதலில் சொன்னது போல் இரு வெவ்வேறு பாணிகளிலான கதைகளை அனுப்பிடும் பட்சத்தில் தேர்வு செய்திடும் பணி இடியாப்பம் ஆகி விடும் என்று மண்டையில் உதித்ததால்  - ஒரே genre -ல் கதைகளை அனுப்பியுள்ளோம். உங்கள் முயற்சிகளின் தரம் எவ்விதம் இருப்பினும் தவறாது எழுதி அனுப்பிடுங்களேன் - ப்ளீஸ் ? வெற்றி பெறும் இரு மொழிபெயர்ப்புகளும் தொடரும் இதழ்களில் பிரசுரமாகும் என்பதோடு ஏற்கனவே நான் சொல்லி இருந்தது போல் "நாடோடி ரெமி" வண்ண இதழ் ஒன்றும் பரிசாக அனுப்பப்படும் ! Give it your best shot guys !

KBGD முயற்சியில் பங்கேற்க எண்ணும் நண்பர்களும் இப்போதே ஆர்வத்தைத் தெரிவிக்கலாம் ! வரும் வாரமே அதனைத் துவக்கிடும் பட்சத்தில் மட்டுமே அட்டைப்பட டிசைனை உரிய நேரத்திற்கு பூர்த்தி செய்திட இயலும் அல்லவா ? 

சமீபமாய் இங்கே நம் பதிவுகளில் நண்பர்களின் பங்களிப்பு வெறும் பார்வைகளோடு நின்று வருவது அப்பட்டமாய்த் தெரிகிறது. தினமும் சராசரியாய் 1500 பார்வைகள் என்றாலும் பின்னூட்டங்களின் எண்ணிக்கை கணிசமாய்க் குறைந்துள்ளதில் இரகசியம் ஏதுமில்லை தானே ? வாரா வாரம் எனது பாணியை தொடர்ந்து வாசிப்பதில் எனக்கே கொட்டாவி எழும் போது உங்களிடமும் ஒருவித அயர்ச்சி எழுவதில்  வியப்பில்லை என்றே தோன்றுகிறது ! பதிவுகளுக்கிடையிலான அவகாசத்தை சற்றே அதிகரிப்பதன் மூலம் தொடரும் மாதங்களது பணிச் சுமையையும் ; 2014-ன் திட்டமிடல்களையும் அணுகிட எனக்குக் கூடுதலாய் நேரம் கிடைக்கும் என்பதோடு - எழுத்தில் ஒரு staleness தலைதூக்கிடாது  இருக்கவும் உதவும் என்று நினைக்கிறேன் ! முயற்சித்துப் பார்ப்போமே ?! See you around folks ! 

Wednesday, 2 October 2013

நீலச் சட்டைகளுக்கு சிகப்புக் கம்பளம்...!

நண்பர்களே,

வணக்கம். நீல நாயகர்களின் முழுநீள சாகசம் உங்களை எட்டிட இன்னும் சில நாட்களே பாக்கி உள்ளன ! அக்டோபர் 4-ஆம் தேதி ஐரோப்பாவில் இந்தத் தொடரின் ஆல்பம் # 57 வெளியாகும் அதே வேளையில்-  தமிழ் பேசும் நம் நல்லுலகிலும் ப்ளூகோட் பட்டாளத்தின் முதல் சாகசம் அறிமுகமாகிறது ! வெள்ளிக்கிழமை இங்கிருந்து அக்டோபர் மாதத்துப் புது இதழ்களான (லயன் காமிக்ஸ்) "இரத்தப் படலம்" + (சன்ஷைன் லைப்ரரி) "ஆகாயத்தில் அட்டகாசம் " டெஸ்பாட்ச் ஆகிடும் ! இதோ ஆ.அ-வின் அட்டைப்படம் + ஒரு preview page ! 



சென்றாண்டிலிருந்தே நம் நண்பர்களில் சிலர் இந்தத் தொடரை முயற்சிக்கும்படி அவ்வப்போது கோரிக்கை எழுப்பி வந்தது நிஜமே ! ஆனால் லக்கி லுக் ; சிக் பில் ; மதியில்லா மந்திரியார் ; பற்றாக்குறைக்கு ஸ்டீல்பாடியார் என்று காமெடி பிரிவு ஓரளவுக்கு ஒ.கே. யாக எனக்குத் தோன்றியது ! தவிரவும் இன்றைய நமது audience பெரும்பாலும் பால பருவங்களைப் பின்விட்டு வந்தவர்களே என்பதால் comedy quotient-ஐ இதற்கு மேல் அதிகரிக்க அவசியம் இருப்பதாய் எனக்குத் தோன்றவில்லை ! ஆனால் ஈரோடு புத்தக விழாவின் விற்பனை அனுபவமும்  ; E-Bay -ல் ஓராண்டாய் தொடர்ந்திடும் விற்பனைகளின் ஆய்வும் ; சமீபமாய் தொடரும் LANDMARK Bookstores -களின் விற்பனை புள்ளிவிபரங்களும் - காமெடியின் பக்கம் தராசின் முள்ளை இன்னும் கொஞ்சமாய் திருப்புவதில் தப்பில்லை என்று புரியச் செய்தன !  So - புதிதாய் ஒரு முழு நீள கார்ட்டூன் தொடரை தேடிடும் போது BLUE COATS பிரதானமாய் கை தூக்கி நிற்பது நினைவுக்கு வர - பெல்ஜியத்திலிருந்து பொடி நடையாய் அவர்களைப் புறப்படச் செய்தோம் ! இவ்வார இறுதியில் உங்கள் இல்லங்களுக்கும் வருகை புரியக் காத்திருக்கும் இந்த சிப்பாய்களை நீங்கள் எவ்விதம் வரவேற்கக் காத்துள்ளீர்கள்   என்பதை அறிந்திட ஆவல் ! 

கூகிள் உள்ளவரை பெரியதொரு அறிமுகங்களோ ; பீடிகைகளோ அவசியமாகாது என்றாலும் - அந்த வேலையைச் செய்ய சோம்பலாய்   இருக்கும் நண்பர்களின் பொருட்டு குட்டியாய் ஒரு intro ! 1970-ல் சிறு கதைகளாய் பெல்ஜியத்தில் அறிமுகம் ஆகி இன்றளவும் தொடர்ந்திடும் LE TUNIQUES BLEU என்ற ப்ளூகோட் பட்டாளம் - ஐரோப்பாவின் டாப் 10 விற்பனை சாதனைப் பட்டியலுக்குள் ஆண்டுதோறும் இடம் பிடிக்கும் ஒரு கதை வரிசை ! துவக்கம் முதல் ஒரே கதாசிரியரின் பொறுப்பில் சீராய் சென்று கொண்டிருக்கும் இந்த ஆல்பம்கள் சராசரியாய் 1.75 லட்சம் பிரதிகள் விற்பனை ஆகின்றனவாம் (ஒவ்வொரு இதழுக்கும் !!) ! புதிதாய் தயாராகி இருக்கும் ஆல்பம் # 57-க்கு என்ன printrun என்று இம்முறை நான் பதிப்பகத்தில் வினவிய போது சிறு புன்னகையோடு கைகள் இரண்டையும் அகலமாய் விரித்து மாத்திரமே காட்டினார் அந்தப் பெண்மணி ! அத்தனை அகலமாய் இல்லாவிடினும் - என்றேனும் ஒரு நாள் நாமும் கைகளை சற்றே விசாலமாக்கி சைகை செய்யும் வாய்ப்பை ப்ளூகோட் பட்டாளம் நமக்கு நல்கிடும் என்று நம்புவோமே ?! 

KBT - 3 க்கான பக்கங்களை வெள்ளியன்று டெஸ்பாட்ச் ஆகிடும் இதழ்களோடு - அதே கவரில் இணைத்து அனுப்பிடத் தயாராக வைத்துள்ளோம் ! (கூரியருக்கு அளக்கும் படியை கொஞ்சமேனும் மிச்சம் செய்த புண்ணியம் கிடைக்குமே என்ற சிறு ஆசை தான் - sorry  guys for this சிக்கன நடவடிக்கைஸ் !! Butஆண்டின் இறுதி நெருங்கும் சமயம் என்பதால் வங்கிக் கையிருப்புகள் ஹி..ஹி ..என்று அடிக்கடி பற்களை காட்டி வருகின்றன !) இம்முறை பங்கேற்கும் நண்பர்களின் எண்ணிக்கையும் ஓரளவுக்குக் கணிசம் என்பது கொசுறுச் சேதி ! 

KBT -3 -ன் வாலைப் பிடித்துக் கொண்டே இம்முறை சீரியசான "KAUN BANEGA GRAPHIC DESIGNER ?" போட்டியும் அரங்கேற வாய்ப்புள்ளது - இதற்கென நீங்கள் நேரம் செலவிடத் தயாராக இருப்பின் ! தொடரவிருக்கும் ரிப்போர்டர் ஜானி ஸ்பெஷல் இதழுக்கு அட்டைப்படம் தயாரிக்கும் பணி காத்துள்ளது ! ஒரிஜினலாய் பெல்ஜியத்தில் பயன்படுத்தப்பட்ட அந்த high resolution கலர் files-களை நாங்கள் அனுப்பி வைக்கும் பட்சத்தில் - கொஞ்சமாய் நகாசு வேலைகள் செய்து மெருகூட்டி நம் பாணிக்கு கொணர வேண்டும் ! தேர்வாகும் டிசைனே அந்த இதழின் ராப்பராக அரங்கேறும் என்பதால் - டிசைனிங்கில் ரசனை + ஆற்றல் கொண்ட நம் நண்பர்கள் பங்கேற்கலாம் ! What say guys ? சமீபமாய் நம் நண்பர்களின் creativity + skillsets அப்பட்டமாய்த் தெரியத் துவங்கி வருவதால் - அவற்றை நம் இதழ்களில் showcase செய்வது பொருத்தமாய் இருக்கும் என்று தோன்றியது ! சத்தியமாய் "கடிக்கும் பர்ஸ் படலம்" இந்த போட்டி பற்றிய சிந்தனையின் பின்னணியில் கிடையாது ! தொடரும் இரு மாதங்களில் நம் lineup -ல் காத்திருக்கும் இதழ்களின் எண்ணிக்கை ஏகம்....! தவிரவும் தீபாவளி + ஆண்டின் இறுதி நெருங்குவதால் நமது டிசைனர் பொன்னன் - காலெண்டர் ; டயரி இத்யாதிகளின் டிசைன் பணிகளில் பிஸி ஆகிடுவார் ! So அவர் கழுத்தில் ஏறி அமர்வதை சற்றே குறைத்தது போலவும் ஆச்சு ; நண்பர்களின் திறமைகளை highlight செய்தது போலவும் ஆச்சு என்று நினைத்தேன் ! 

Creativity ; talent பற்றிய பேச்சு வரும் சமயத்தில் -give this a look folks ?  தூத்துக்குடியில் எனது நெருங்கிய உறவினரின் மருமகன் ஒரு பிரபல தொழிலதிபர் + diehard காமிக்ஸ் ரசிகர் + புத்தக ஆர்வலர் + இனிய மனிதர் ! அவரது இன்னொரு plus ஓவியம் தீட்டுவதும் கூட என்பதை சமீபமாய்த் தான் நானும் தெரிந்து கொண்டேன் ! 


Artwork : திரு முரளி ராஜகோபாலன், தூத்துக்குடி ! 
இத்தனை ஆற்றலாளர்களால் சூழப்பட்டிருப்பது அற்புதமானதொரு உணர்வு !  Awesome guys - you all rock in your own ways ! Catch you soon !