Tuesday, 28 January 2014

ஒரு அமைதிப் படையின் உரத்த குரல்..!

நண்பர்களே,

வணக்கம். பிப்ரவரி இதழ்களின் பணிகள் நிறைவுறும் நேரமென்பதால் இங்கு சில நாட்களாய் வருகை சாத்தியமாகவில்லை ! இதோ - இம்மாத முத்து காமிக்ஸ் இதழின் அட்டைப்படம் + உட்பக்க preview !


அட்டைப்படம் துளியும் மாற்றம் செய்யப்படா ஒரிஜினல் சித்திரமே என்பதால் அந்த தத்ரூபம் + வர்ணக் கலவை அழகாய் அமைந்துள்ளதாய் எனக்குப்பட்டது ! சாகச வீர ரோஜரின் கதைவரிசையில் இது மிகச் சமீபமான ஆக்கம் என்பதால் சித்திரத் தரத்தில் ஒரு நவீனத்துவமும், அசாத்திய perfection-ம் மிளிர்கிறது ! அந்தப் பிணக்குவியலில் எலும்புக்கூடுகளின் மீதான வேலைப்பாட்டை உன்னிப்பாய்ப் பாருங்களேன் - ஓவியரின் உழைப்பின் பரிமாணத்தைப் புரிந்து கொள்ள ! உங்களுக்கு நிஜமானதொரு visual treat காத்துள்ளது இம்மாதம் ! 

இம்மாதத்து இதழ் # 2 - NBS முதலாய் நமக்கு அறிமுகமான துப்பறியும் ஜில் ஜோர்டனின் "காவியில் ஒரு ஆவி !" சுலபமானதொரு கதைக் கரு ; டின்டின் பாணியில் artwork ; 'பளிச்' ரக வர்ணங்கள் என இதுவும் ஒரு வகையில் ஜாலியான வாசிப்பு அனுபவத்தை உங்களுக்குத் தரக் காத்துள்ளது ! ஜோர்டனின் உதவியாளன் அடிக்கும் நக்கல்கள் கதையின் சுலப ஓட்டத்துக்கு நிறையவே உதவியது எனில் - இன்னுமொரு கதாப்பாத்திரமும் சீரியசாக வந்தே கிச்சு கிச்சு மூட்டுவதையும் பார்த்திடப் போகிறீர்கள் !இதோ - ஜாலியான...சாரி...சாரி...காவியான ஆவியின் முன்னோட்டம் ! 

இவ்வார இறுதிக்குள் இதழ்கள் தயாராகி விடும் ; வரும் திங்கட்கிழமை உங்களுக்கு அனுப்பிடுவோம் ! இரு இதழ்களிலுமே , 'லொட-லொட' வென நான் நிறையவே எழுதிட நேர்ந்துள்ளது ! ஒரு ஹாட்லைன் ; ஒரு காமிக்ஸ்டைம் ; ஒரு சிங்கத்தின் சிறுவயதில் + ஒரு சிங்கத்தின் சிறுவலையில்" போதாதென - 2013-ன் நமது இதழ்களைப் பற்றிய வாசகர்களின் review -ஐ எனது எண்ணங்களோடு இணைத்தால் - அதுவொரு 3 பக்கங்களுக்கு ஆக்கிரமிப்பு செய்து விட்டது ! So - இம்முறை filler pages இருந்திடாது -blah blah blah நிறையவே இருந்திடும் என்று முன்கூட்டியே எச்சரிக்கை செய்திடுகிறேன் ! இதோ -இணையத்தில் இணைந்திருக்கா ; வலைப்பதிவின் பக்கம் வந்திருக்கா ;அப்படியே வந்திருப்பினும் இது நாள் வரை மௌனமாய், பார்வையாளர்களாய், அமைதியான வாசகர்களாய் மாத்திரமே இருந்து வந்துள்ள பல நண்பர்களின் குரல்களின் ஒரு பிரதிபலிப்பு ! இந்த அமைதிப் படைக்கும் ஒரு உரத்த குரலுண்டு என்பதை சந்தோஷமாய் ரசிக்க முடிந்தது ! பாருங்களேன்   : 



பொறுமையாய்ப் படித்து விட்டு - உங்களின் அபிப்ராயங்களையும் இங்கு ஒலிபரப்பிடலாமே ?! See you around ! Bye for now !

Sunday, 19 January 2014

சிந்தனைகளுக்கும் சிறகுண்டு...!

நண்பர்களே,

வணக்கம். பொதுவாக ஒவ்வொரு பதிவின் முன்னரும் ஏதாவதொரு இதழின் முன்னோட்டமோ ; விமர்சனப் பார்வையோ ; அவ்வேளைகளில் அவசியமான பகிர்தல்களோ என் மனதில் மேலோட்டமாய் ஓடுவதுண்டு ! டைப் செய்யத் துவங்கும் போது on the run அவற்றை மெருகூட்டி ஒரு பதிவை உருவகப்படுத்துவது பழகிப் போனதொரு செயல்முறை. ஆனால் முதல்முறையாக பெரிதாய் எந்தவொரு விஷயமுமின்றி, ஒரு மெல்லிய மௌன மகிழ்ச்சியோடு பேப்பரையும், பேனாவையும் எடுத்துக் கொண்டு அமர்ந்த போது எழுத்துக்கள் தன்னிச்சையாய் தத்தம் இடத்தில் வந்து விழுந்தன ! 

ஒவ்வொரு ஆண்டையும் இப்போதெல்லாம் நமக்குத் துவக்கி வைப்பது சென்னைப் புத்தக விழா தான் என்றாகிப் போய் விட்ட நிலையில் - பெரிதாய் எதிர்பார்ப்புகளின்றி, கைவசமிருந்த சுருக்கமான titles களோடு இந்தாண்டையும் அணுகினோம்.  சென்ற வருட (சென்னை) விற்பனையின் 50% NBS சேர்த்த புண்ணியம் என்பதால் - அது போன்ற முயற்சி இம்முறை இல்லையெனும் போது விற்பனை இலக்குகளை உச்சாணியில் நிர்ணயிக்க நான் தயாராக இல்லை. ஆனால் ரூ.60 x 4 என ஜனவரி மாதத்துப் புது இதழ்கள் 'பளிச்' என அமைந்திருந்ததாலும் ; கைவசமிருந்த 2013-ன் வெளியீடுகள் சகலமும் ரூ.50 ; ரூ.100 ; ரூ.200 என்றிருந்ததாலும் - புத்தக விழாவின் இறுதிப் பகுதியினை அணுகும் இந்த வேளையினில் நமது விற்பனை விபரங்கள் உற்சாகம் தரும் வகையில் உள்ளன என்பது தான் pleasant surprise ! சென்றாண்டின் விற்பனையை எட்டிப் பிடிக்க வாய்ப்பில்லை என்றாலும், கைவசமிருக்கும் சொற்பமான பட்டாளத்தோடு இத்தனை தொலைவு முன்னேற முடிந்துள்ளதே பெரும் விஷயமாய்ப் பட்டது ! 12 நாள் விழாவின் முடிவினில் ரூ.4.25 இலட்ச விற்பனையை தொட்டுப் பிடிப்பதென்பது ஒரு அசகாய சூரத்தனமாகவோ ; பதிப்புலகைப் புரட்டிப் போடப் போகும் ஒரு பகீரத நிகழ்வாகவோ இருந்திடப் போவதில்லை தான் ; ஆனால் பள்ளிக்கூட ஆண்டுவிழாவில் மேடையேறி பாக்யராஜ் பாணியிலாவது நம் வீட்டுக் குழந்தை போடும் டான்சை நாம் ரசிப்பதில்லையா ? அதே சந்தோஷத்துடன் கிடைத்திருக்கும்  இந்த விற்பனை மேடையில் நமது சிக் பில்களும் ; லக்கி லூக்குகளும் ; டெக்ஸ் வில்லர்களும் ; டைகர்களும் ஆடும் நடனத்தை ரசித்திட முனைந்தேன் நான் ! 'அதில் சிக்கல்'......'இதில் சிரமம் !' என்ற பஞ்சப் பாட்டுக்களை அவ்வப்போது பகிர்ந்திடும் அதே வேகத்தோடு சின்னதான இச்சந்தோஷக் கணத்தையும் உங்களுடன் பகிர்ந்திடத் தோன்றியது ! 

இந்தாண்டின் (நம்) சென்னைப் புத்தக விழாவின் நாயகர்கள் இருவருமே மஞ்சள் சட்டைகளை நிரந்தரக் குத்தகைக்கு எடுத்த இரு தொப்பிவாலாக்கள் ! மின்னலாய்ச் சுடும் இரவுக்கழுகார் ஒரு பக்கமெனில் ; மின்னலை விட வேகமாய்ச் சுடும் ஒல்லிப்பிச்சான் லக்கி லூக் மறுபக்கம் ! நம் ஸ்டாலில் நான் இம்முறை செலவிட முடிந்த அவகாசம் அதிகமில்லையெனினும், தினமும் நம்மாட்கள் வழியாகக் கிடைக்கும் விற்பனை விபரங்களும், காலியாகும் புத்தகங்களின் பட்டியல் சொல்லும் சேதியும் ரொம்பவே ஸ்பஷ்டம் ! லக்கி லூக்கின் வண்ண இதழ்கள் இளம் வாசக / வாசகியரையும், டெக்ஸ் வில்லர் கிட்டத்தட்ட அனைவரையும் வசீகரித்து வைத்திருப்பது புரிகிறது ! அதிலும் சுட்டி லக்கியாருக்கு சிகப்புக் கம்பள வரவேற்பு ! இம்முறை விற்பனைக்குப் பெரும் துணை நின்றது நமக்குக் கிட்டிய வெகுஜன மீடியாவின் அன்புப் பார்வையும் என்று சொல்வது மிகை கிடையாது. 5 பக்க தினகரன் வசந்தம் இதழின் coverage ; சன் செய்திகள் தொலைக்காட்சியின் பேட்டி ; புதிய தலைமுறை தொலைக்காட்சியின் நேற்றைய செய்தித் தொகுப்பு என அரையணா செலவின்றி நம் பக்கமாய்த் திரும்பிய ஒளிவட்டம் அரூபமாய் நமக்கு ஆற்றியுள்ள சகாயம் விலைமதிப்பற்றது !

ஒவ்வொரு புத்தக விழாவின் நிறைவினிலும் 'அடுத்த வருஷம், பெரூசாய்ய்ய்ய் ஏதாச்சும் வெளியிட்டு தூள் கிளப்பிடணும் !' என்ற சிந்தனை எனக்குள் ஓடுவதுண்டு ! NBS முயற்சி நீங்கலாய்  இது வரை அந்த நினைப்புக்கு செயல்வடிவம் தர இயலவில்லை என்ற போதிலும், 2015-ஐ நோக்கியும், "மின்னும் மரணத்தை"ச் சுற்றியும் இப்போதே ஒரு உத்வேகம் உருவாகி வருவது நிஜம் ! "மி.ம." தவிர 2015 சென்னை விழா  சமயத்திற்கு இன்னுமொரு "மெகா சர்ப்ரைஸ்" காத்திருக்குமென்பதை மட்டும் இப்போதே சொல்லி வைத்து விடுகிறேன் !  12 மாதத் தொலைவிற்குள் தலை நுழைக்கும் முன்பாய் - ஆறேழு மாதத் தூரத்தில் காத்திருக்கும் நமது லயனின் 30-வது ஆண்டுமலர் பக்கமாய் நம் உழைப்பு துவங்கும் நேரமும் நெருங்கி வருகிறது ! டெக்சின் விற்பனைப் புள்ளிவிபரங்கள் - அவரது solo சாகசமாய் இந்த மெகா இதழை அமைத்திடுவதற்கு வலுவானதொரு முகாந்திரத்தை முன்வைப்பது நிஜமே ! ஆனால் இங்கும் சரி ; என்னை நேரில் சந்தித்த நண்பர்களும் சரி - எப்போதும் போலவே பல நாயகர்கள் கொண்டதொரு cocktail இதழாகவே நமது 30-வது ஆண்டுமலர் அமைந்திட வேண்டுமென வலியுறுத்துவதற்கு நிச்சயம் மதிப்பளிக்கப்படும் ! கதைகளின் தேர்வுகள் ; பாதி ராத்திரியில் தோன்றும் திடீர் சிந்தனையால் தேர்வான கதைக்குக் கல்தா தருவது ; புதிதாய் எதையாவது போட்டு தலைக்குள் மாவு பிசைவது என இவ்வாரத்தின் பல நாட்கள் எனக்குப் பிசியான பொழுதுகளே ! ஓரிரு புதுப் படைப்பாளிகளோடு பாலம் அமைக்க முயன்று வருவது சற்றே அவகாசத்தை விழுங்கி வரும் முயற்சியாக இருப்பதால் எனது கதைத் தேர்வுகள் இறுதி வடிவம் பெற இன்னும் வாரங்கள் சில செலவாகுமென்பது உறுதி ! அரக்கப் பறக்க ஓடுவதே நமது பாணி என்பதைச் சன்னமாய் மாற்றி - இம்முறையேனும் மூச்சு விட அவகாசத்தோடு பணிகளைச் செய்திட வேண்டுமென்ற ஆசை உள்ளுக்குள் ! Fingers crossed ! 

இந்தப் புத்தக விழாவின் இன்னுமொரு படிப்பினை - கறுப்பு/வெள்ளை இதழ்கள் தொடர்பானதும் கூட ! கதையோ, நாயகரோ சிறப்பாய் இருக்கும் பட்சத்தில் அது b &W ஆக இருந்தாலும் விற்பனையில் தொய்விருக்காதென்று உணர முடிந்துள்ளது ! டெக்ஸ் ; டயபாலிக் ; டெக்ஸ் தீபாவளி ஸ்பெஷல் மூன்றும் வண்ண இதழ்களுக்குத் தந்த போட்டி சுவாரஸ்யமானது ! விலைகள் குறைவாய் இருந்ததும் ; தீபாவளி ஸ்பெஷலின் பருமன் நிறைவாக இருந்ததும் இதற்கொரு காரணமாய்   இருந்திருக்கலாம் தான் ; ஆனால் கறுப்பு-வெள்ளையின் கொடியும் தொடர்ந்து பறப்பதை கண்கூடாய் இம்முறை பார்க்க முடிந்துள்ளது ! ("டெக்ஸ் கலரில் தான் வேண்டும் !' எனக் கொடி பிடிக்கும் நண்பர்களின் நறநறக்கும் பற்கள் எழுப்பும் ஒலி கேட்காமல் இல்லை !!) 

இன்று பெற்றோர்களாகவும் காட்சி தரும் நமது காமிக்ஸ் காதலர்களும் சரி ; இச்சுவைக்கு புதியவர்களான இளம் பெற்றோர்களும் சரி - குழந்தைகளுக்கு தமிழ் சொல்லித் தர காமிக்ஸ்களை  ஒரு அழகான பாதையாய்ப் பார்ப்பதையும் இந்த சென்னை விழா கோடிட்டுக் காட்டியுள்ளது ! ஒரு ஆர்வத்தில், வேகத்தில் குடும்பங்கள் நம் ஸ்டாலுக்குள்  நுழைவதும், "ஒ ..காமிக்ஸா ?" என்ற அசிரத்தையோடு அதே வேகத்தில் கிளம்புவது அடிக்கடி நிகழ்ந்திடும் விஷயமே ! ஆனால் இம்முறையோ பொறுமையாகப் புத்தகங்களைப் புரட்டுவதும், கார்ட்டூன் கதைகளைத் தேர்வு செய்து சுட்டிகளிடம் தருவதையும் பார்க்க முடிந்தது ! ஒரு சரியான புத்தக விநியோக முறையை உருவாக்க முடிகின்ற போது நல்ல தரத்தில் சுட்டித் தலைமுறைக்கென ஒரு பிரத்யேக காமிக்ஸ் இதழை அறிமுகம் செய்ய வாய்ப்புகள் இருக்குமென்றே நினைக்கத் தோன்றுகிறது ! பரபரப்பாய் - லட்சங்களில் அவற்றின் விற்பனை இருக்குமென்ற பகற்கனவுகள் இல்லாவிடினும், ஒரு modest விற்பனை எண்ணம் சாத்தியமாகும் என்ற நம்பிக்கை லேசாய்த் துளிர் விடுகிறது ! ஐந்தாண்டுகளுக்கு முந்தைய ஆசாமியாய் நான் இருந்திருக்கும் பட்சத்தில் கூட - "மீண்டும் மினி-லயன்" என்று இந்நேரத்திற்கெல்லாம் தண்டோரா  போட ஆரம்பித்திருப்பேன் !  ஆனால் இன்றைய யதார்த்தங்கள் ; தயாரிப்புச் செலவுகள் ; அவசியமாகும் முதலீடுகள் என்பன எத்தனை கருணையற்ற முதலாளிகள் என்பதை அனுபவத்தில் புரிந்து வைத்திருப்பதால் - 'கண்ட்ரோல்...கண்ட்ரோல்..!' என்று எனக்கு நானே பிரேக் போட்டுக் கொள்கிறேன் ! சின்னதாய் இருப்பினும், எடுத்து வைக்கும் அடிகள் உறுதியாய் இருப்பதன் அவசியத்தை நாம் அறிவோம் தானே ?! 

இன்னும் ஓரிரு நாட்களில் சென்னை விழாவும் சரி ; ஜனவரியும் சரி நம் நினைவுகளில் மாத்திரமே நிலை கொண்டிருக்கும் ! விடுமுறைகளற்ற பிப்ரவரியும் ; புது இதழ்களின் பணிகளும் வெகு அருகாமையிலிருந்து அழைப்பதால் அவற்றை நோக்கி நடை போடுவோம் ! விரைவில் புது இதழ்களின் preview களோடு இன்னொரு பதிவில் சந்திக்கிறேன் ! எல்லா நேரங்களிலும் பதிவிட ஒரு சேதி அவசியமாகாது ; சுதந்திரமாய் சிறகடிக்கும் சில இலகுரக சிந்தனைகளைப் பகிர்வதும் கூட ஒரு சந்தோஷ அனுபவமே என்ற புரிதலோடு இந்த ஞாயிறு பின்னிரவுப் படலத்தை நிறைவு செய்து புறப்படுகிறேன் ! Take care folks....will be around again soon ! 

Tuesday, 14 January 2014

சென்னையில் ஒரு சனிக்கிழமை !

நண்பர்களே,

வணக்கம். மதராசபட்டினம் மறக்க இயலா அனுபவங்களைத் தரும் தனது அளப்பரிய ஆற்றலை மீண்டுமொருமுறை நிலைநாட்டியுள்ளது ! பதிப்புலகத் துறைக்கு ஒரு பாலைவனச் சோலையாகி விட்ட புத்தகத் திருவிழா இம்முறையும் தன பிரம்மாண்டத்தை சிறுகச் சிறுகக் கட்டவிழ்த்து விட - சென்ற வாரத்தின் இறுதி நாட்கள் சகலமும் நமக்கு சுவையான தருணங்களாகிப் போயின ! 

ஸ்டாலுக்குள் வெள்ளி மாலை நானும் ஜூனியரும் நுழைந்தே போதே "போஸ்டர் தப்பா இருக்கு சார் !" என்று முகம் நிறைந்த சிரிப்போடு என் கரங்களை வாஞ்சையோடு பற்றிக் கொண்ட வாலிபரின் வயது 78 ! 'ஏழு முதல் எழுபத்தி ஏழு வரை' என்ற நமது பேனரை சுட்டிக் காட்டிய அந்த நண்பர் - ராயல் என்பீல்டு நிறுவனத்தின் மிக சீனியரான பைக் மெகானிக் ! ஆனால் தன வீட்டு விசேஷத்தில் பங்கேற்கும் உத்வேகத்தோடு பில் போடுவதிலும், புத்தகங்களை பேக் செய்து கொடுப்பதிலும் நம்மாட்களுக்கு உதவிக் கொண்டிருந்தார் இந்தக் காமிக்ஸ் காதலர் ! அடுத்தாண்டில் நாம் அச்சிடும் பேனரை '8 to  88' வரை என அவரின் பொருட்டு மாற்றிடுவதாய் வாக்குத் தந்தேன் !

வழக்கம் போல் நம் நண்பர்களில் பலர் உள்ளூர்-வெளியூர் பாகுபாடின்றி நம் ஸ்டாலுக்கு வருகை புரிந்து தங்களது சந்தோஷங்களைப் பகிர்ந்து கொண்டது மனதுக்கு ரொம்பவே இதமாய் இருந்தது ! நாகர்கோவிலில் இருந்து வெள்ளி காலையே வந்து, புத்தகங்களை அடுக்கிக் கொடுப்பது முதல் ஸ்டாலை நிர்மாணிப்பது வரை 2 முழு நாட்களும் நமக்காகச் செலவிட்டவர் நிச்சயமாய் எனக்குக் கிறுக்கனாகத் தெரியவுமில்லை ; அவரது பேச்சிலோ பாணியிலோ கிறுக்கல்களும் புலனாகவில்லை ! இரவு ரயிலைப் பிடிக்கும் டிக்கெட்டைக் கையில் வைத்துக் கொண்டும், சக நண்பர்களின் கேள்விகளைச் சுமந்து வந்து விடாப்பிடியாய் கணைகளைத் தொடுத்த திருப்பூராரோ ப்ளுபெர்ரியின் பிடிவாதத்தை இரவல் வாங்கி வந்திருந்தார் என்பது கண்கூடு ! சந்தித்துக் கொள்ளும் ஒவ்வொரு நண்பரும் பரஸ்பரம் மொபைல் நம்பர்களைப் பரிமாறிக் கொண்டு சகஜ தோழர்களாய் உருமாறிக் கொண்டதை ஓரக்கண்ணால் பார்த்து ரசித்துக் கொண்டிருந்தேன். எப்போதுமான "இரும்புக்கை மாயாவி எங்கே ? ஸ்பைடர்   எங்கே ?" என்ற கேள்விகளை விட இந்தாண்டு நான் எதிர்கொண்ட வினவல்களின் பெரும்பகுதி - 
  • "இந்தாண்டும் NBS போல் ஒரு தடி புக்கோடு புத்தக விழாவைச் சந்தித்திருக்கலாமே ?"   
  • "லயன் ஆண்டுமலர் 30-ல் முழுசும் டெக்ஸ் கதைகள் தானே ?" 
  • "+6 இந்தாண்டும் உண்டா - கிடையாதா ?" 
  • Million Hits Special ?? 
  • "சிங்கத்தின் சிறுவயதில் ??"  

என்ற கேள்விகள் தான் ! வழக்கம் போல் நான் கல்லுளிமங்கனாக இருந்ததில் நண்பர்கள் கடுப்பாகியும் போய் இருக்கலாம் - ஆனால் "செய்து விட்டுச் சொல்கிறேனே - ப்ளீஸ் !" என்ற எனது மாமூல் டயலாக்கை (வேறு வழியின்றி) ஏற்றுக் கொண்டனர் ! நண்பர்களோடு பேசிக் கொண்டிருந்த போது நான் கேட்க நேரிட்ட மாமூலான டயலாக்கும் இல்லாதில்லை ! "நாள் தவறாது நம் வலைப்பதிவுக்கு விஜயம் செய்து விடுவோம் ; ஆனால் நாங்கள் அமைதியான பார்வையாளர்கள் மாத்திரமே ! ஒரு பின்னூட்டம் விடாமல் படித்து விடுவோம் !" என்று சொன்ன நண்பர்களின் எண்ணிக்கை நிச்சயம் கணிசம் !  

சென்றாண்டைப் போல நம்மிடம் பருமனில் ; விலையில் தாட்டியமான இதழ் ஏதும் இல்லாது போயினும், இம்முறை அதன் இடத்தில் ஜனவரியின் 4 புது இதழ்களும் 'பளிச்' என இடம் பிடித்திருந்தன ! "தினகரன்" குழுமத்திலிருந்து மதிப்பிற்குரிய திரு.K.N.சிவராமன் அவர்கள் நம் ஸ்டாலுக்கு வருகை தந்த போது புதிய இதழ்களை அவர் கையில் மகிழ்ச்சியோடு கொடுத்தேன் ! தோர்கல் இதழைப் புரட்டியவர் ஆர்ட் பேப்பரிலிருந்து எழும் அந்த மசியின் fresh மணத்தை வாஞ்சையோடு ஒரு முறை நுகர்ந்து விட்டு பக்கங்களைப் புரட்டிய போது இத்துறையில் அவருக்கிருக்கும் அனுபவம் அப்பட்டமாய்ப் புலனானது ! அவரது அடக்கமான வார்த்தைகளும், நேசமான பாராட்டுக்களும் நமது முயற்சிகளுக்கு பெரும் பெருமிதம் தந்தது நிஜம் ! ஞாயிறு தினகரனில் 5 முழு வண்ணப் பக்கங்களை ஒதுக்கி காமிக்ஸ் மீது ; நம் பதிப்பகத்தின் மீது ஒளிவட்டம் விழச் செய்த அவரது பெருந்தன்மைக்கும் , பேட்டியை சுவாரஸ்யமாய் வழங்கி இருந்த எழுத்தாளர் "அணில்" அவர்களுக்கும், எல்லாவற்றிற்கும் மேலாய் தினகரன் குழுமத்திற்கும் நன்றிகள் சொன்னேன் ! 16.50 லட்சம் சர்குலேஷன் கொண்டதொரு இதழில் இத்தனை விஸ்தீரணமானதொரு விளம்பரம் நமக்கு பரிவின் பெயரால் கிட்டியதை நம் நல்லதிர்ஷ்டம் என்பதைத் தாண்டி வேறு என்னவென்பது ?
நடுவில் இருப்பவர் திரு சிவராமன் அவர்கள்.. 
முதல் நாள் மாலை மெலிதான கூட்டம் மட்டுமே விழா முழுவதினிலும் இருந்தது சற்றே ஏமாற்றமாய் இருந்த போதிலும், நமது ஸ்டாலில் நான்கே மணி நேர விற்பனையின் எண்ணிக்கை ரூ.39,000 என்பதை அறிந்த போது - "ஆவென " வாயைப் பிளந்தேன் ! இம்முறை நான் கவனித்த மிக அழகான   விஷயங்கள் இரண்டு ! முதலாவதும், மிகப் பிரதானமானதும் - பெண்கள் நமது காமிக்ஸ் மீது காட்டிய அசாத்திய ஆர்வத்தை பார்த்திட முடிந்ததே ! நமது ஸ்டாலின் பெயர் பலகையைப் பார்த்த மாத்திரத்தில் 'விறு விறு'வென்று உள்ளே நுழைந்து - இருந்த இதழ்களின் சகலத்தையும் வாங்கிய வாசகியர் முதல் இரு நாட்களின் விற்பனையில் ஒரு 40 சதவிகிதமாவது பங்களித்திருப்பர் ! நான் யாரென்று கேட்டுக் கொள்ளாமலே கொஞ்ச நேரம் என்னிடம் பேசி விட்டு, இதழ்களை வாங்கி விட்டு, அப்புறமாய் "You are ..?" என்று கேட்டுத் தெரிந்து கொண்டு  "Keep up the good work ! " என்று சொல்லிச் சென்ற சகோதரி - காமிக்ஸ் ஆண்களின் சாம்ராஜ்யம் மாத்திரமே அல்ல என்று சொல்லாமல் சொல்லிச் சென்றது போல் பட்டது ! நிறைய குடும்பங்கள் நம் ஸ்டாலுக்குள்  அடி வைத்து விட்டு - ஆளுக்கு ஒரு திசையில் புத்தகங்களைப் புரட்டி ; விவாதித்து ; வாங்கிச் சென்றது மறக்க இயலா கணங்கள் ! நான் ரசித்த விஷயம் # 2 - காமிக்ஸ் சிநேகமற்ற புதியவர்கள் கூட, நமது இதழ்களை லேசாகப் புரட்டத் துவங்கி விட்டு, வண்ணங்களை, சித்திரங்களைப் பார்த்து லயித்துப் போய் நேரம் செலவிட்டது தான் ! வழக்கமாய் ஏதோ ஒரு ஆர்வத்தில் உள்ளே நுழைபவர்கள், மேலோட்டமாய் ஒன்றிரண்டு புத்தகங்களை அசுவாரஸ்யமாய்ப் புரட்டி விட்டு, இடத்தை காலி செய்திடுவது தான் வாடிக்கை ! ஆனால் இம்முறையோ லயிப்போடு இதழ்களைப் புரட்டியதொடு - ஒருவருக்கொருவர் காமிக்ஸ் பற்றிப் பேசிக் கொள்வதை கண்குளிரக் காண முடிந்தது !  

"இந்த மாமா யாரு ? ...ஆங் ..இவர் கார்சன்...இது..? குட்..இவர் லக்கி லூக் ! " ஜாலி ஜம்பர் எங்கேப்பா ?" என்ற வண்ணம் ஒரு ஒன்றரை + வயதிலான குட்டி மாடஸ்டியை அழைத்து வந்ததொரு இளம் குடும்பம் ! அந்த மழலையின் ஆதர்ஷ நாயகன் லக்கி லூக் என்றும், போஸ்டரில் இருந்த TEX + CARSON கூட்டணி கூட அந்த வாண்டுக்குப் பரிச்சயம் என அவர்கள் சொல்லிய போது நிஜமாக உற்சாகமாய் இருந்தது ! இந்த வயதிலேயே காமிக்ஸ் எனும் சுவாசத்தை நுகரத் தொடங்கி விட்ட அந்தக் குட்டி வாசகியை எண்ணி மகிழ்வதா ? - அல்லது இச்சிறு வயதிலேயே காமிக்ஸையும் புகட்ட வேண்டுமென்று ஆர்வம் காட்டிய பெற்றோரைப் பாராட்டுவதா ? பதில் தெரியாது மண்டையைச் சொறிந்தேன் ! சொல்லி வைத்தார் போல ஸ்டாலுக்குள் நுழைந்த அத்தனை வாண்டுகளும் நேராய்ப் போய் புரட்டியது லக்கி லூக்கின் இதழ்களை மாத்திரமே ! சுட்டி டி.வீயின் சீரியல் ஏற்படுத்திய தாக்கமா - அல்லது ஆங்கில லக்கி காமிக்ஸ்கள் உண்டாக்கிய பரிச்சயமா தெரியவில்லை ; அத்தனை சுட்டிகளுக்கும் தஞ்சம் தந்தது லக்கி தான் ! கார்ட்டூன் நாயகர்களுள் அசைக்க இயலா # 1 அண்ணன் LUCKY LUKE தான் என்பது சுட்டிகளின் சார்பான தீர்ப்பு ! 

அதே போல not so குட்டி வாசகர்களின் கண்களும், கரங்களும் சென்றது நேராய் நம் இரவுக் கழுகாரின் திசையில் தான் ! கறுப்பு-வெள்ளையில் இருப்பினும் கூட டெக்ஸ் இதழ்கள் செம விறுவிறுப்பாய் விற்பனை ஆகின ! In fact முதலில் தீர்ந்து போனது டெக்ஸ் தீபாவளி மலர் தான் ! தொடர்ந்த நாட்களில் டெக்சின் இதர இதழ்களும் விற்பனையில் மின்னல் வேகம் காட்டின ! இங்கும் கூட ஒரு out of court தீர்ப்பு கிட்டி இருப்பது போலாய் எனக்கொரு பட்சி சொல்கிறது !! உங்களுக்கும் ஏதேனும் கேட்கிறதா folks ? நிறைய பிரபல வலைப்பதிவாள நண்பர்களும் நமது ஸ்டாலுக்கு ஆர்வமாய் வந்திருந்து நேரம் செலவிட்டது நமக்குப் பெருமை சேர்ப்பதாய் இருந்தது ! அனைவருமே ஒற்றை வரியாய் - "Carry on the good work !" என்று முழு மனதாய் வாழ்த்திச் சென்றனர் ! "நாளைக்கு என் மனைவி சகிதம் வருகிறேன் சார் - உங்களிடம் சொல்ல அவர் புகார் ஒன்று வைத்திருக்கிறார் !" என்று நண்பர் ஒருவர் புதிர் போட, மறு நாள் மாலை சொன்னபடியே ஆஜரானார் துணைவியாருடன் ! "நீங்கள் புத்தகமும், வலைப்பதிவும் போட்டாலும் போட்டீர்கள் - அவர் வீட்டிலிருக்கும் நேரம் முழுவதும் காமிக்ஸோடு அல்லது கணினியின் முன்னே தான் செலவிடுகிறார் சார் !" என்று சொன்ன சகோதரியின் முகத்திலோ புன்னகை ! "சிறுகச் சிறுக நானும் இந்த ரசனைக்குப் பரிச்சயம் ஆகிக் கொள்ள உதவிடும் விதமாய் குட்டிக் கதைகளாய் கொஞ்சம் போடுங்களேன் ! "என்று அவரே கோரிக்கையும் வைத்த போது அருகில் நின்ற கணவரின் முகத்தில் பெருமிதத் தாண்டவம் ! ஒரு பக்கத்திற்கு எட்டுப் பத்துக் கட்டங்கள் ; அவற்றினுள் எண்ணற்ற பலூன்கள் ; வசனங்கள் ; சித்திரங்கள் - இவை நம்மிடையே ஏற்படுத்தும் இந்தத் தாக்கத்தை எண்ணி வியக்காதிருக்க   இயலவில்லை ! 

சனிக்கிழமை புத்தக விழா காலை 11 மணிக்கே துவங்கி விட்ட போதிலும், சன் செய்திகள் தொலைகாட்சியினில் - 2014 புத்தக விழாவின் செய்திச் சேகரிப்பு வரிசையில் காமிக்ஸ் வெளியிடும் நம்மைப் பற்றி ; பொதுவாக காமிக்ஸ் பற்றிப் பேசிட அவர்களது ஸ்டுடியோவிற்கு நான் வர இயலுமா ? எனக் கோரி இருந்தனர் ! 'புத்தக விழாவிலேயே ; நமது ஸ்டாலிலேயே நேர்முகக் காணலை வைத்துக் கொண்டால் சுலபமாகி விடுமே !' என்று நான் அபிப்ராயப்பட்டேன் ! ஏற்கனவே கடந்த 2 ஆண்டுகளாய் இது போன்ற சின்ன பேட்டிகளுக்கும்,  நண்பர்களின் முழு நீள கேள்விகள் session க்கு பதில் சொல்லியும் இருந்ததால் அதே போலச் சமாளித்து விடலாமே என்று பார்த்தேன் ! ஆனால் - 'ஸ்டுடியோவில் எடுத்தால் இன்னும் நன்றாக இருக்கும்' என சன் செய்திகளின் எடிடர் கருதியதால் தலையாட்டி வைத்திருந்தேன். சனி பகலில் சன் குழும அலுவலகத்தினுள் நானும், ஜூனியரும் நுழைந்த போதே "ஆவென" விரிந்த வாய் மூட நேரம் நிறைய எடுத்தது ! 10 மாடிகள் ; பிரமாண்டமான ஒவ்வொரு தளத்திலும் ஒவ்வொரு செயல்பாடு என தொலைக்காட்சித்துறையின் உச்ச திறமைசாலிகள் அங்கு பம்பரமாய் சுழலுவதை முதன்முறையாப் பார்க்க வாய்ப்புக் கிட்டியது ! நேசமாய் வரவேற்ற திரு நெல்சன் அவர்கள் முதல் மாடியில் இருந்த ஸ்டுடியோவினை காட்டி விட்டு, இலக்கியம் + சினிமா தொடர்பாய் ஒரு நேர்காணலை நடத்தச் சென்றார். 'கண்ணாடிக்குப் பின்னே இருந்த production அறையில் இருந்து பாருங்களேன் !' என என்னையும், விக்ரமையும் அமரச் செய்தார் ! 3 காமெராக்கள் ; எண்ணற்ற தொழில் நுட்பச் சாதனங்கள் ; அவற்றை லாவகமாய்க் கையாளும் கலைஞர்கள் என அந்தச் சின்ன அறையே பரபரப்பாய் இருக்க, கண்ணாடிக்கு மறு பக்கமோ பேட்டி துவங்கியது ! கேள்விகளை சரமாரியாய் திரு நெல்சன் பாய்ச்ச ; சற்றும் சளைக்காது, சரளமாய் பதில்கள் வந்து விழுந்தன ! அது வரை ஒரு பாவ்லாவில் வண்டியை ஒட்டி வந்திருந்த எனக்கு உள்ளுக்குள் உதறத் தொடங்கியது ! காமிக்ஸ் என்பது நமக்கு நேசமானதொரு விஷயம் தான் ; அது தொடர்பான கேள்விகளுக்கு homework பண்ணிக் கொண்டு வராமலே பதிலளிக்க முடியும் தான் என்ற நம்பிக்கை உள்ளுக்குள்ளே பூரணமாய் இருந்த போதிலும், முதன் முறையாய் இது போன்றதொரு நிகழ்ச்சியில் பங்கேற்கும் நேரம் சொதப்பித் தொலைக்காமல் இருந்தால் போதும்டா சாமி!! என்ற சிந்தனையே உள்ளுக்குள் ஓடியது ! நீண்ட காத்திருப்புக்குப் பின் மதியம் மூன்று மணிக்கு என்னை கிரீன் ரூமுக்குள் அழைத்தனர் - ஷூட்டிங் துவங்கலாமென்று சொல்லி ! திரு. நெல்சன் தான் பேட்டி எடுக்க வருவார் என்ற எதிர்பார்ப்பில் நான் உள்ளே இருந்த சொகுசுச் சேரில் சென்று அமர - இளம் பெண் நிருபரான Ms.அபர்ணா உள்ளே வந்தார் சின்னதொரு புன்சிரிப்போடு ! 

'ஆஹா....உளறாமல் இருக்கணுமே சாமி !" என்று நொடிக்கொரு முறை உலர்ந்து போய்க் கொண்டிருந்த நாக்கோடு மனசுக்குள் இன்னும் தீவிரமாய்  பிரார்த்தித்துக் கொண்டேன் ! அங்கிருந்த Aquafina -வில் பாதியை மடக்-மடக்கெனக் குடித்து விட்டு அபர்ணாவிடம் லேசாய் பேசிப் பார்த்தேன் ! அவர் இது நாள் வரை களப்பணியாற்றி வந்தவர் என்பதையும், அவரது முதல் ஷோ இது தான் என்றும் தெரிந்து கொண்டேன் ! 'சரி..நம் பிரார்த்தனைகளை சாமி கேட்காமல் போனாலும், முதல் ஷோ நன்றாக அமைய வேண்டுமென பிரார்த்திக்கும் அந்த யுவதியின் பெயரைச் சொல்லியாச்சும் நாமும் கரை சேர்ந்து  விடலாம் டோய் !" என்று மனசுக்குள் சிந்தனை ஓடியது. சட்டையில் மைக்கை மாட்டி விட்டு, காமெராக்களை சரியாக நிலைப்படுத்தி விட்டு கலைஞர்கள் அகன்று விட  - அந்த அறைக்குள் நாங்கள் இருவர் மாத்திரமே இருந்தோம். கேள்விகள் ஒன்றன் பின் ஒன்றாய் வர, நான் பதில் சொல்லத் துவங்கினேன். இது நாள் வரை நம் வாசகர்கள் கேட்கும் கதைகள் ; வெளியீடுகள் தொடர்பான கேள்விகளாய் இல்லாது, பொதுவான கேள்விகளாய் அவை இருந்ததால் 'பர பர' வென்று பதிலுக்குள் பாய்ந்திடாமல் சற்றே நிதானமாய் பேசிட முயற்சி செய்தேன். "ஞீ" என்று எந்த நிமிடம் குரலில் அபஸ்வரம் குடி கொள்ளுமோ என்ற பயம் உள்ளுக்குள்ளே இருந்தாலும், சற்றே குறைவான வேகத்தில் பேசியது தொண்டையையும் காப்பாற்றியது ; கொஞ்சமாய் யோசித்து பதில்களை  சொல்லவும் இடம் தந்தது ! கிட்டத்தட்ட 35 நிமிடங்களின் முடிவில் ஷூட்டிங் நிறைவுற்ற போது  - "நான் இப்போ எங்கே இருக்கேன் ?" என்று கேள்வி கேட்காத குறை தான் ! என்ன பேசினோம் இத்தனை நேரமாய் என்று துளியும் மண்டையில் நிற்கவில்லை ! கண்ணாடி அறைக்குள் அமர்ந்து பார்த்தும் கேட்டும் கொண்டிருந்த ஜூனியரிடம் "தேறுமா தம்பு ? " என்று கேட்ட போது - நன்றாகவே இருந்ததாய் சொன்னான் ! அபர்ணாவுக்கும், நெல்சன் அவர்களுக்கும் நன்றி சொல்லி விட்டு புறப்பட்டு நேராய் புத்தக விழாவிற்குத் திரும்பிய போது "சொதப்பவில்லை !" என்பது மட்டும் மண்டைக்குள் நின்றது. 

"சரி...எப்படியும் எடிட்டிங்கில் கத்திரி போட்டு விட்டு ஒரு நாலைந்து நிமிடங்கள் தானே போடுவார்கள் !" என்ற சிந்தனை ஆறுதலைத் தர - புத்தக விழாவின் மும்முரம் பற்றிக் கொண்டது ! சனிக்கிழமை திகுடு முகுடான கூட்டம் - விழா முழுவதினிலும் ! நம் ஸ்டால் முதல் நுழைவு வாயிலின் வரிசையிலேயே அதிர்ஷ்டவசமாய் அமைந்து இருந்ததால் - ஏராளமான குடும்பங்கள் வருகை தந்தன ! நண்பர்களும், ஆர்வமாய் குழுமி இருக்க கச்சேரி களை கட்டியது ! அப்போது குமுதம் இதழின் ஆசிரியர் அன்போடு நம் ஸ்டாலுக்கு வருகை புரிந்ததோடு மட்டுமல்லாது, நம் இதழ்களின் ஒரு முழு செட்டையும் வாங்கிச் சென்றார் ! 'பணம் வேண்டாமே சார்...!' என்று நான் எத்தனை வற்புறுத்தியும், காதில் போட்டுக் கொள்ளாமல் - "இவை அனைத்தும் நான் படிக்கும் புத்தகங்கள் ; நிச்சயமாய் பணம் கொடுத்தே தீருவேன் !" என்று சாதித்து விட்டார் ! "உங்களின் சின்ன வயது அனுபவங்களை கட்டுரையாய் எழுதுவதை நான் ரசித்துப் படிப்பேன் !" என்று அவர் சொன்ன போது எனக்கு வார்த்தைகள் வரவில்லை ! தமிழ் இதழியலின் ஒரு ஜாம்பவானிடமிருந்து கிட்டிய அந்தப் பாராட்டு என் நாளை முழுமையாக்கியது ! கண்ணதாசன் பதிப்பகத்தின் திரு. காந்தி கண்ணதாசன் அவர்களும் நம் ஸ்டாலுக்கு வந்த போது வாய் நிறையப் பாராட்டுக்களோடு என் தோளில் தட்டிக் கொடுத்தார் ! அவருடன் வந்திருந்த நடிகர் திலகத்தின் மூத்த   புதல்வர் திரு ராம்குமார் சிவாஜி அவர்களும் அன்பாகப் பேசிக் கொண்டிருந்து விட்டு, நமது காமிக்ஸ் இதழ்களைப் புரட்டினார் ! Classics Illustrated கதைகளை தமிழில் போடுங்களேன் என்று அவர் அபிப்ராயம் சொன்ன போது - 'நிச்சயம் யோசிக்கிறேன் சார் !' என்று சொன்னேன் ! 

நண்பர்கள் கால் கடுக்க நின்று கொண்டே இருந்தனர் நம் ஸ்டாலில் விற்பனைக்கும் அவ்வப்போது ஒத்தாசை செய்து கொண்டே ! போராட்டக் குழுவின் பிரதிநிதிகளை அவ்வப்போது நண்டு பிரையின் வாசம் காட்டியே நான் சமாளிக்க - இன்னுமொரு இளம் குடும்பம் வந்தது ! இல்லத்தரசியும், அவரது தங்கையும் தீவிர காமிக்ஸ் ரசிகைகளாய் இருக்க, "மாடஸ்டி கதைகளைப் போடுங்களேன் !" என்ற கோரிக்கை வைத்தனர் ! "நிச்சயம் முயற்சிக்கிறேன் !" என்று சொல்லி விட்டு, அக்குடும்பம் லக்கி லூக்கின் முன் நின்று புகைப்படம் எடுத்துக் கொள்வதை ரசித்த போது - என்றோ - எப்போதோ இந்தத் துறையில் ஒரு துவக்கம் தந்த என் தந்தையின் தீட்சண்யம் என் மனதில் நிழலாடியது ! காமிக்ஸ் எனும் உலகின் பரிமாணம் எத்தகையது என்பதை உணர்ந்திட இணையமோ ; உலகளாவிய காமிக்ஸ் சேகரிப்புகளோ இல்லாத அந்தப் புராதன நாட்களிலேயே ஒரு கோடு போட்டு வைத்த அவரது ஆற்றலை எண்ணி வியக்காதிருக்க முடியவில்லை ! நண்பர்களிடம் விடை பெற்று விட்டுப் புறப்பட்ட போது பாக்கெட்டில் ரூ.70,000 வசூல் பணம் இருந்தது ! தொடரும் நாட்களில், விடுமுறைகள் நிறையவே இருப்பதால் - இந்தாண்டு வளமான விற்பனை எண்ணங்களை நமக்குக் காட்டிடும் என்ற நம்பிக்கையோடு நடையைக் கட்டினேன் ! எத்தனையோ பணிகளுக்கு மத்தியினில் நமக்காக நேரம் செலவிட்டதற்கும், துளியும் குறையா அன்பைப் பொழிவதற்கும், ஏற்ற தாழ்வுகள் எது வந்தாலும், குறைவிலா காமிக்ஸ் காதலோடும் வாழ்ந்து வரும் இந்தச் சிறு வாசகக் குடும்பத்திடம் நாங்கள் பட்டிருக்கும் கடன் மலையளவிலானது ! "ஈரோட்டில் சந்திப்போம் ! " என்று ஆத்மார்த்த அன்போடு சொல்லிச் சென்றுள்ள அத்தனை அன்புள்ளங்களுக்கும் ஒரு பரிபூரண விருந்து படைக்கும் பொறுப்பு எங்களுக்குள்ளது ! தவற மாட்டோம் ! Take care all ! அனைவருக்கும் சந்தோஷப் பொங்கல் வாழ்த்துக்கள் ! 

P.S : ஞாயிறு காலை சன் டி-வியிலிருந்து நெல்சன் அவர்கள் போன் செய்து மதியம் 1 மணிக்கும், மாலை 5-க்கும் ; இரவு 10-30க்கும் பேட்டி ஒளிபரப்பாகிறது என்று சொன்ன போது பூம் பூம் மாடைப் போல் தலையை ஆட்டி விட்டு சத்தமின்றி இருந்து விட்டதும், . நண்பர் விஸ்வா SMS தட்டி விட, அந்தப் பட்டியலில் எனது தந்தையும் இருந்திட, குடும்பத்தில் அனைவரும் ஆங்காங்கே டி.வி. முன்னே ஆஜர் ஆகிட்டதும்  ,  எனக்கோ சென்னையில் சன் செய்திகள் தெரியாது போக, பின்னே கணினியில் லைவ் ஸ்ட்ரீமிங்கில் பார்த்ததும் எப்போதோ நிகழ்ந்தவை போல் மனதில் நிழலாடுகின்றன ! 

Thursday, 9 January 2014

மதராசபட்டினமும்...ஒரு மாயாஜால லோகமும்..!

நண்பர்களே,

வணக்கம். இது நாள் வரை ஒரே இதழாய் வெளியானவற்றை இப்போது இரண்டாய்ப் பிரித்துப் போடுவது  மாத்திரமே மாற்றம் என்ற போதிலும் - 'பள பள' வென 4 புது இதழ்களை கையில் வைத்து ரசிப்பது ஒரு சூப்பர் அனுபவமாய் தோன்றியது எனக்கு ! "குண்டு புக்" ரசிக சிகாமணிகளுக்கு இக்கருத்தில் ஒப்புதல் இராதெனினும், கூரியரில் 4 இதழ்களும் ஒருசேர நாளை உங்கள் வீட்டுக் கதவைத் தட்டும் போது நீங்கள் சந்தோஷப்படாவிடின் ஆச்சர்யப்படுவேன் ! நான்கு இதழ்களின் அட்டைப்படங்களும், 4 இதழ்களின் அச்சும் அழகாய் அமைந்ததும் இம்மாத இதழ்களுக்கு மெருகூட்ட பெரிதும் உதவியுள்ளன என்பதில் ஐயமில்லை ! இதோ நீங்கள் இன்னமும் பார்த்திருக்கா ராப்பர் # 4 ! துளியும் மாற்றமின்றி ஒரிஜினல் டிசைன்களையே தோர்கலின் கதைவரிசையின் முழுமைக்கும் நாம் பயன்படுத்திட இருப்பதால் - அதன் முதல் episode இங்கே ! பின்னட்டை வழக்கம் போல் நமது தயாரிப்பு - கதாசிரியர் + ஓவியரின் போட்டோக்களோடு ! அட்டையில் சின்னதாய் காட்சி தரும் அந்த சன்ஷைன் கிராபிக் நாவல் லோகோவானது - லோகோ தயாரிக்கும் ஒரு நண்பரின் நிறுவனத்தின் கைவண்ணம் ! சிம்பிளாய் தோற்றம் தரும் அந்த சூரியன் ஏதேனும் ஒரு டிசைனின் தழுவலா என்பது தெரியவில்லை - ஆனால் பார்க்க அழகாய்த் தோன்றியது எனக்கு ! (இதன் நிறை-குறைகள் பற்றி ஆளுக்கொரு அபிப்ராயம் இருக்குமென்பதில் சந்தேகமே கிடையாது !) தொடரும் மாதத்து லோகோவில் எழுத்துக்களை தமிழுக்கு மாற்றிட உள்ளோம் ; நேரமின்மை காரணமாய் இம்முறை அதனை செயல்படுத்திட இயலவில்லை !


தோர்கல் கதையைப் பொறுத்த வரை - இது எனக்கும் first time என்றே சொல்ல வேண்டும் ! பொதுவாய் இது போன்ற fantasy கதைகள் என் ரசனைகளை அவ்வளவாய்க் கவர்ந்தது கிடையாது என்பதால் இது வரை  ஆங்கிலத்தில் வந்த Cinebook தோர்கல் தயாரிப்புகளை நான் படித்திட முனையவில்லை ! இக்கதை வரிசையினைக் கோரி வாசக நண்பர்களின் வற்புறுத்தல்கள் தொடர்ந்தது ஒரு பக்கமும் ; 'அழுகாச்சிக் கதைகளைத்' தாண்டிய சில புதுப் பாணிகளை 2014-ல் முயற்சிப்போமே ! என்ற சிந்தனை மறு பக்கமும் எழுந்த போது எனக்கு தோர்கலை பரீட்சிக்கும் சமயம் புலர்ந்து விட்டது என்று தோன்றியது. அப்போதும் கூட Cinebooks வெளியிட்டுள்ள கதைகளை மேலோட்டமாய் புரட்ட மாத்திரமே செய்தேன் ! அவர்கள் தோர்கலின் இளம் பிராயத்து சிறுகதையோடு தொடரினைத் துவக்கியுள்ளதைக் கவனிக்கவும், நாமும் அதே பாணியைப் பின்பற்றுவோமா ? என்று சிந்தனை எனக்குள் லேசாய் எழுந்தது ! But - 'எங்களது ஒரிஜினல் வரிசையையே பின்பற்றுங்கள் !' என நம் படைப்பாளிகள் சொல்லிட - அப்பீலே இல்லாமல் அதன்படியே தோர்கலின்தமிழ் இன்னிங்சுக்குத் துவக்கம் கொடுத்துள்ளோம் ! "வஞ்சிக்கப்பட்ட வசியக்காரி" + "ஏறத்தாள சொர்க்கம் " என்ற இரு கதைகளின் தொகுப்பு நமது இம்மாத கிராபிக் நாவல் ! கதைகளைப் பொறுத்த வரை - இது முழுக்க முழுக்க லாஜிக் பார்த்திடா ; ஒரு மாந்த்ரீக - மாயாஜால லோகத்தினில் சஞ்சாரம் செய்யும் முயற்சி   என்பதால் நமது சமீபத்திய 'இரத்தப் படலம்' ; 'கிரீன் மேனர்' ; 'சிப்பாயின்  சுவடுகளில்...' இத்யாதிகளில் இருந்து சுத்தமாய் விலகி நிற்கும் !  இக்கதையினை முதன் முறையாகப் படிக்கும் போது பெரிய complications இன்றி கதை நகர்ந்திடும் பாணி ஒரு refreshing change ஆகப்பட்டது ! எழுதுவதிலும், எடிட் செய்வதிலும் துளியும் சிரமமே தராத இக்கதை படிக்கும் போதும் உங்களை சுலபமாய் ஈர்க்கும் என்றே தோன்றுகிறது ! தவிர, வீட்டில் உள்ள இளம் காமிக்ஸ் வாசகர்களுக்கு இது ஒரு சூப்பர் ஆரம்பம் என்றும் பட்டது ! 1970-களில் உருவான கதை என்பதால் அன்றைய கலரிங் யுக்திகள் சற்றே பளிச் - பளிச் என ராமராஜன் வண்ணங்களில் இருப்பது கூட கவனத்தைக் கோரும் ஒரு யுக்தியாக இருந்திருக்கலாம் ! கிரைம் த்ரில்லர் கதைகளின் பிதாமகரான வான் ஹாமேவால் இப்படி ஒரு ஜானரிலும் கதை சொல்ல முடியும் என்பது கண்டு வியக்காது இருக்க இயலவில்லை ! The man is simply awesome...!

இன்றைய கூரியரில் சந்தாப் பிரதிகள் அனைத்தும் அனுப்பி விட்டோம் ; ST கூரியரின் நண்பர்கள் நாளையே அவற்றை உங்களுக்குப் பத்திரமாய்ப் பட்டுவாடா செய்திட - தோர்கலின் இஷ்ட தெய்வமான ஓடினை நானும் வேண்டிக் கொள்கிறேன் !  E -Bay லிஸ்டிங் கூட இப்போதே போட்டு விட்டோம் என்பதால் அங்கு வாங்கிடும் நண்பர்கள் தங்கள் கிரெடிட் கார்டுகளைத் தயாராக்கிக் கொள்ளலாம் ! இதழ்கள் கிடைத்தான பின்னே உங்களின் அபிப்ராயங்கள் ; விமர்சனங்கள் பற்றித் தெரிந்திட ஆவலாய்க் காத்திருப்போம் என்பதை நான் சொல்லவும் வேண்டுமா - என்ன ?! As always, fingers crossed !

சென்னைப் புத்தக விழா நாளை (ஜனவரி 10 - வெள்ளிக் கிழமை) மாலை துவங்குவதால் - சென்னைக்கு நம்மவர்கள் ஏற்கனவே கிளம்பி விட்டார்கள் ! இன்றிரவு நானும் 'பட்டினப் பிரவேசம்' செய்கிறேன் - நாளையும், சனிக்கிழமையின் பெரும் பகுதியும் நமது ஸ்டால் எண் 748-ல் உங்களை சந்திக்கும் பொருட்டு  ! Please do drop in folks ! சென்னையில் இம்முறை நமது ஸ்டாலின் சுவர்களில் வண்ணத்தில் கண் சிமிட்டும் banner கள் இதோ :

பொன்னனின் டிசைன்கள்..


சென்றாண்டை விட இம்முறை அரங்கமும்,   பங்கேற்கும்   ஸ்டால்களும் அளவில் ; எண்ணிக்கையில் அதிகம் என்பதால்   நல்ல வரவேற்பிருக்கும்   என விழாக்குழுவினர் அபிப்ராயம்    கொண்டுள்ளனர் !      சென்றாண்டைப் போல NBS எனும் பயில்வான் நம்மிடம் இம்முறை   கிடையாதென்பதால் - அந்த விற்பனைத் தொகைகளை    எட்டிப்    பிடிப்பது     சிரமமே !   எனினும் காமிக்ஸ் எனும் நம் மாய உலகின் அறிமுகம் கொஞ்சம் கொஞ்சமாய் புது வாசக    வட்டங்களுக்குப்    போய்ச் சேர     இது     அற்புதமானதொரு களம் என்பதால்     ஆவலாய்க் காத்திருக்கிறோம் ! நாளைய பொழுது நன்றாய்ப் புலரும்     என்ற   நம்பிக்கையோடு இந்தப் பதிவிற்கொரு 'சுபம்' போட்டுப் புறப்படுகிறேன் ! See you around ! 



Sunday, 5 January 2014

ஒரு கூட்டணிக் கணக்கு !

நண்பர்களே,

வணக்கம். நேற்றைய பொழுது ஜனவரியின் இதழ் # 3 அட்டகாசமாய் அச்சாகி முடிந்தது என்பது தான் லேட்டஸ்ட் update ! இதோ நெடு நாள் கழித்து மறு பிரவேசம் செய்திடும் ப்ரூனோ பிரேசிலின் அட்டைப்படம் + உட்பக்க preview ! இதன் ஒரிஜினல் அட்டைப்படத்தினை ஓவியர் வில்லியம் வான்ஸ் வரைந்துள்ளது 1967-ல் !! பின்னாட்களில் அவர்களே இக்கதையை மறுபதிப்பு செய்த வேளையினில் உருவான இன்னொரு அட்டையும் உங்கள் பார்வைக்கு இங்கே ! சென்றாண்டில் "ப்ரூனோ -சீசன் 2" கூட பெல்ஜியத்தில் துவங்கியுள்ளதும் - 3 கதைகள் கொண்ட 2 மறுபதிப்பு அல்பம்கள் அட்டகாசத் தரத்தில் அங்கு வெளியாகி - பிரமாதமாய் விற்பனை ஆகி வருவதையும் அறிந்திட முடிந்தது ! நமக்கு வந்துள்ள இந்த இரு ஆல்பம்களின் மாதிரிகளையும் பார்க்கும் போது நம்பிக்கை பிறக்கிறது - தரமான கதைகளை இன்றைய தலைமுறையும் படித்து ரசிக்கும் போது இது போன்ற golden oldies தொடர்களை அவர்கள் மறுபடியும் உயிரூட்டக்கூடுமென்று ! அவ்விதம் நடக்கும் பட்சத்தில் நமக்குக் கொண்டாட்டமே ! 
1967-ல் ஓவியர் வான்ஸ் வரைந்த அட்டைப்பட டிசைன்
90'களில் இக்கதை தனியாக மறுபதிப்பான சமயம் !
வண்ணத்தில் இப்போது... 
Black & white-ல் சித்திரங்களைப் பாருங்களேன்...!
இது வரை முடிந்துள்ள  3 இதழ்களுமே அட்டகாசத் தரத்தில் நம்மாட்கள் அச்சிட்டுள்ளனர் என்பது மிகுந்த சந்தோஷம் தருகிறது ! பிழைகளைக் களைந்திட நாங்கள் எடுத்து வரும் முயற்சிகள் வெற்றி தருவதை உணர்ந்திடும் போது - அந்த சந்தோஷம் ஒரு படி அதிகமானது என்று கூடச் சொல்லலாம் ! தோர்கலும் தொடரும்  நாட்களில் இதே தரத்தில் உருவாகி விட்டால் அற்புதமான மாதமாகிடும் இந்த ஜனவரி ! சென்னைப் புத்தக விழா கூப்பிடும் தொலைவுக்கு நெருங்கி விட்ட வேளையினில் அதன் பொருட்டு வேலைகளும் இன்னொரு பக்கம் நடந்து வருகின்றது ! ஸ்டாலில் நமக்குத் தேவையான banner களின் அளவு : 8 feet x  4.5 feet ! டிசைன் செய்திட விரும்பும் நண்பர்கள் இத்தனை பெரிய சைசில் தங்கள் டிசைனை தயாரிக்க வேண்டிய அவசியமில்லை ; ஆனால் இந்த proportion -ல் ஓரளவுக்கு உயர் resolution -ல் டிசைன் செய்து அனுப்பினால் நாம் அதனைப் பெரிதாக்கி அச்சிட்டுக் கொள்ள இயலும் ! Give it a try please ?

பரபரப்பாய் நவம்பர் இறுதியில் 2013-ன் இதழ்களை தயார் செய்தான பின்னே - ஜனவரி 10 வரை புது இதழ்களுக்கான அவகாசம் உள்ளதென்ற நினைப்போ என்னவோ - ஒரு மெல்லிய சோம்பல் என்னுள் குடி கொண்டு விட்டது என்பது தான் நிஜம். பற்றாக்குறைக்கு 2014-ன் கதைத் தேர்வுகள் ரொம்ப முன்பாகவே செய்து விட்டதால் 2013 செப்டெம்பர் முதலே அவற்றின் மொழிபெயர்ப்புப் பணிகளும் துவங்கி விட்டன ! So இந்தாண்டின் அறிவிக்கப்பட்டுள்ள சகலக் கதைகளின் பிரெஞ்சு + இத்தாலிய மொழிமாற்றங்கள் இப்போதே முழுமையாகத் தயார் ! தமிழாக்கங்களும் இன்னொரு பக்கம் ஓசையின்றிச் சென்று கொண்டிருப்பதால்  சமீப மாதங்களில் முதன்முறையாக சற்றே டென்ஷன் இன்றி சுற்றி வந்தேன் ! ஆனால் இப்போது வண்டி திரும்பவும் தண்டவாளம் ஏறும் வேளையாகிவிட்டபடியால் அந்த விடுமுறை mode -க்கு டாட்டா காட்டி விட்டு - work mode -க்கு மீண்டும்  கை குலுக்கியாச்சு!

தொடரும் மாதங்களுக்கான திட்டமிடல்கள் ஏற்கனவே உரிய இடத்தினில் இருப்பதால் நம் பார்வைகளை இந்தாண்டின் மெகா ப்ராஜெக்ட் ஆன LION 30--வது ஆண்டுமலரின் மீது தீவிரமாய்த் திருப்பிடும் வேளை மெதுவாகப் புலர்கிறது ! இது தொடர்பாய் மூன்று விஷயங்களில் தீர்மானமாகியுள்ளேன் ; இதழின் பெயர் ; விலை & வெளியீட்டு வேளை என்பதாக ! இதழின் பெயரை ஏப்ரலில் முன்பதிவுகள் துவங்கும் வேளையினில் அறிவிக்கும் சுதந்திரத்தை எடுத்துக் கொண்டு - பாக்கி 2 விஷயங்களைப் பகிர்ந்திட இப்பதிவை ஒரு துவக்கமாக்குகிறேன் ! லயனின் மெகா ஆண்டுமலர் - ரூ.500 விலையில் ; 2014 ஆகஸ்ட் மாதம் நடைபெறவிருக்கும் ஈரோட்டுப் புத்தகத் திருவிழாவின் போது வெளியாகும் ! லயனின் முதல் வெளியீட்டுத் தேதி ஜூலை 15 தான் என்ற போதிலும், இத்தனை பெரியதொரு இதழை வெளியிட ஒரு வாகான platform அமைந்தால் சிறப்பாக இருக்குமென்ற ஆசையினில் இதனை ஆகஸ்ட் வரை சற்றே நீட்டிப்பது தேவலை என்று நினைத்தேன் ! சுலபத் தீர்மானங்களாய்  இவை அமைந்து விட்டன ; அடுத்துக் காத்திருப்பதே இமாலயப் பணிகள் என்பதை உணர முடிகின்றது ! "இந்தக் கதை....கதை தான் வேணும் !" என்று சுற்றித் திரியும் "காதலிக்க நேரமில்லை" நாகேஷைப் போல எனது தற்சமயத் தேடல் - தரமான கதைகள் ! வரவிருக்கும் நமது இந்த mega இதழினில் 464 வண்ணப் பக்கங்கள் இருந்திடும் - வழக்கமான பெரிய சைசில் ! திரும்பிய திசையெல்லாம் - 'அவர்கள் இவர்களோடு கூட்டணிப் பேச்சுவார்த்தை' ; 'இவர்கள் அவர்களோடு கூட்டணி உறுதி !' என்று தலைப்புச் செய்திகளாய் ஓடி வரும் இவ்வேளையில் நாம் ஏன் சளைக்க வேண்டும் ? நமக்கிருக்கும் 464 பக்கங்களை யாருக்கு - எவ்விதமாய் ஒதுக்குவது ? என்ற கலந்தாய்வில் இறங்குவோமே ?!

'கூட்டணியே வேண்டாம் - மொத்தமாய் 464 தொகுதிகளிலும் ஒரே கட்சியே நிற்கட்டும் !' என்ற குரலெழுப்பும் அணியினரின் வாதங்களையும் ஒதுக்கிட மாட்டோம் ! ஆனால் அவ்விதம் சகல தொகுதிகளிலும் நின்று சோலோவாக தூள் கிளப்பும் ஆற்றல் கொண்ட ஒரே வேட்பாளர் மஞ்சள் சட்டை மாவீரர் மாத்திரமே என்பதில் எனக்குத் துளியும் ஐயமில்லை ! அவ்விதம் நமது கட்சியின் பொதுக் குழு உறுப்பினர்கள் சகலரும் நினைத்திடும் பட்சத்தில் - சுலபமாய் ஒரு தீர்மானம் நிறைவேற்றி விட்டு சுடச் சுட  பிரியாணி சாப்பிடக் கிளம்பிடலாம் ! ஆனால் அது தொடர்பான வோட்டெடுப்பினில் ஒத்த கருத்து இன்றிப் போகும் பட்சத்தில் - கூட்டணி வைத்துக் கொள்ளக் காத்திருக்கும் கட்சியினர் அனைவரையும் நாம் முதலில் பொதுக் குழுவில் அறிமுகம் செய்தாக வேண்டியது அவசியம். நமது தற்சமய டாப் ஹீரோக்கள் வரிசையில் லார்கோ வின்ச் ; கேப்டன் டைகர் ஆகியோர் முத்து காமிக்ஸின் நாயகர்கள் என்பதால் அவர்களோடு நாம் பேச்சு வார்த்தை நடத்தப் போவதில்லை ! தவிர இம்முறை வரவிருக்கும் நம் மெகா இதழினில் ஒரு தொடராய்ப் பயணிக்கும் கதையின் இடைச் செருகல்கள் இடம்பிடித்திடாது என்பதால் மேற்படி 2 ஹீரோக்களுமே not in contention ! காமடி வரிசையில்  ப்ளூகோட் பட்டாளமும், துப்பறியும் இலாக்காவினில் ரிப்போர்டர் ஜானியும் கூட முத்துவின் சொத்துக்களாய் இருந்து விட்டுப் போகட்டும் என்பதால் - அவர்களையும் நாம் கணக்கில் கொள்ள வேண்டாமே..! திருவாளர்கள் ஸ்பைடர் + ஆர்ச்சிக்கு இடம் நம் இதயங்களில் மாத்திரமே என்பதால் அவர்கள் பொருட்டு சீட்களைக் கோரிடும் வேண்டுகோள்களும் வேண்டாமே ?  BATMAN ; ஜேம்ஸ் பாண்ட் ; Tintin  போன்ற (தற்சமயத்து) எட்டாக்கனிகளைக் குறி வைத்து அம்பு விடவும் வேண்டாமென்பதும் அன்பான வேண்டுகோள் ! So - இவர்கள் நீங்கலாய் எஞ்சி நிற்கும் நாயகர்கள் + புது அறிமுகங்கள் என நம் தேர்வுக் களம் விரிந்து நிற்கின்றது ! ஒவ்வொரு (முழு) பிரெஞ்சு கதையும் 44 அல்லது 46 பக்க நீளம் கொண்டதென்பதைக் கணக்கில் எடுத்துக் கொண்டு உங்களின் தொகுதி ஒதுக்கீடுகளை....சாரி..சாரி... பக்க ஒதுக்கீடுகளைக் கொஞ்சம் நிர்ணயம் செய்திடுங்களேன் ! இறுதி முடிவு எனதாய் இருக்கும் தான் என்ற போதினிலும், பொதுக் குழுவின் கருத்துக்களே என் தேர்வுகளை செதுக்கிட உதவப் போகிறது என்பதில் ஐயமில்லை ! So - ஜல்தியாய் அந்தக் கரை வேட்டிகளையும் ; துண்டுகளையும் அணிந்து கொண்டு களப்பணியாற்ற விரைந்திடுங்களேன் folks ?!!

சென்னை புத்தக விழாவின் முதல் இரு நாட்களும் நான் நமது ஸ்டாலில் இருந்திடுவேன் ! எப்போதும் போல் உங்களின் வருகைகள் நம்மைப் பெருமைப்படுத்தும் ! The Welcome mat's always out !! Please do drop in guys !
Banner Designed by S.Sathish !

Wednesday, 1 January 2014

ஜாம்பவான்களின் ஜனவரி !

நண்பர்களே,

புத்தாண்டு வாழ்த்துக்கள் + வணக்கங்கள் ! புதிதாய் ஒவ்வொரு ஆண்டு புலர்வதும் ; அதைக் காரணமாய்ச் சொல்லி கேக்குகளை ரவுண்ட் கட்டி அடிப்பதும் இம்முறை அறவே கூடாதென்பதே எனது புத்தாண்டுத் தீர்மானம் என்பதால் - பெரிதாய் சேதாரமின்றி ஜெயித்திட முடிந்தது ! வாரத்தின் மத்திய நாளைத் தேர்வு செய்து புது வருடம் புலர்ந்துள்ளதால்  இங்கு வழக்கம் போலவே வேலை ! புத்தாண்டின் பெயரைச் சொல்லி ஆபீசுக்கு மட்டம் போட்டு விட்டு எங்கேனும் ஊர் சுற்றுவதை விட, 'அக்கடா'வெனப் பணிகளைப் பார்த்திடுவது not a bad deal at all என்பதை இன்றைய பொழுது உணர்த்தியது ! ஜனவரி நமக்கு நான்கு இதழ்களைக் கொணர வேண்டிய பொழுதென்பதால் அலுவலகத்தில் அனைவருமே இன்று செம பிசி ! அச்சுப் பணிகளும் ஒரு பக்கம் அழகாக நடந்து வருவது ஒரு சின்ன திருப்தியினைத் தந்திட - இம்மாதத்து ட்ரைலர்களை தொடரும் நாட்களில் உங்கள் பார்வைக்குப் படைத்தால் தேவலை என்று தோன்றியது ! இதோ - ஆண்டின் துவக்க மாதத்தின் 2 அட்டைப்படங்கள் ! 
நமது டிசைன்
இது   ஒரிஜினல்    அட்டையின்  அப்பட்டமான   மறுவார்ப்பு -   நமது ஓவியர் மாலையப்பனின் கைவண்ணத்தில். செவ்விந்திய முகத்தின் details ; அவனது சிறகு அலங்காரத்தின் நுணுக்கங்கள் - ஒரிஜினலில் அத்தனை துல்லியமாய் இல்லாதது   போல்   எனக்குத்   தோன்றியதால்     -   அதனைக்      கணினியில் மெருகூட்டச் செலவழிக்கும் நேரத்தினில் -புதிதாகவே ஒரு ஓவியம் போட்டு விடச்   சொல்லலாமே  என்று நினைத்தேன்   ! பின்னட்டையைப்    பொறுத்த வரை அது நமது டிசைனர் பொன்னனின் பணியே ! பார்த்த மாத்திரத்திலேயே இந்த அட்டைக்கு   படைப்பாளிகளின் ஒப்புதல் கிடைத்தது போல உங்களின் thumbs up கிடைக்குமா என்பதை அறிய ஆவலாய் இருப்போம் ! 
ஒரிஜினல் 
கதையைப் பொறுத்த வரை - இது கமான்சே தொடரின் அடுத்த லெவல் செல்லும் முயற்சி என்று சொல்வேன் ! ANS-ல் துவங்கிய முதல் அத்தியாயம் ஒரு அறிமுகப் படலம் போல் அமைந்திட - கதையின் pace இந்த அத்தியாயத்தில் ஜெட் வேகம் தான் ! டைகரின் சூட்சும பாணிகள் இன்றி நேர்கோட்டில் மாத்திரமே கதை பயணித்தாலும், அதிலும் ஒரு சுவாரஸ்யத்தைக் கொண்டு வர முடியுமென நிரூபிக்கும் கதாசிரியர் கிரெக் ஒரு salute பெறுகிறார் !
ஒளி வட்டத்தின் முக்காலே மூன்று வீசப் பார்வை இம்மாதம் அவர் மீதே நிலைத்திருக்கப் போவது ஒரு தற்செயலான ஒற்றுமையே ! ஏனெனில் இம்மாதம் வெளியாகும் 4 கதைகளுள் - மூன்றுக்கு கதாசிரியர் கிரெக் தான் ! இம்மாத மறுபதிப்பான கேப்டன் பிரின்சின் "பயங்கரப் புயல்" இவரது படைப்பே ! அதே போல முத்து காமிக்ஸில் இம்மாதம் வரக் காத்திருக்கும் "ப்ருனோ பிரேசில் " சாகசத்திற்கும் 'லூயிஸ் ஆல்பர்ட்' என்ற புனைப்பெயரில் கதை எழுதியது கூட நம் ஆசாமியே !  இதழ் # 4 (தோர்கல்) கதாசிரியர் வான் ஹாம்மேவின் கை வண்ணம் எனும் போது - இம்மாதம் நிஜமானதொரு பிரான்கோ-பெல்ஜிய ஜாம்பவான்களின் ஆராதனையாக அமைகிறது ! பற்றாக்குறைக்கு ப்ருனோ பிரேசிலுக்கு ஓவியங்கள் வில்லியம் வான்ஸ் எனும் போது - எனது கூற்றுக்கு வலு கூடுகிறது ! 

இம்மாதத்து வண்ண மறுபதிப்பில் செயலாற்றுவதும் கதாசிரியர் கிரெக் - ஓவியர் ஹெர்மன் கூட்டணியே ! முதன் முதலாய் "பனிமண்டலக் கோட்டை" வாயிலாக நமக்கு அறிமுகம் ஆன ஓவியர் ஹெர்மனின் அந்தக் கீச்சலான பாணி ; நாளடைவில் பார்க்கப் பார்க்கப் பிடிக்க ஆரம்பித்து விட்டதெல்லாம் பழங்கதைகள் ! இன்று அவரது பாணிக்கு நாம் வலுவான ரசிகர்கள் என்ற நிலையில் இரு மாறுபட்ட கதைக்களங்களில் அவரது சித்திர ஜாலங்களை தரிசிக்கவுள்ளோம் ! ஏறத்தாள 25 ஆண்டுகளுக்கு முன்பாய் வெளி வந்த "பயங்கரப் புயல்" - பிரின்ஸ் கதை வரிசைகளின் சூப்பர் ஹிட்களுள் இன்னும் ஒன்று ! முழு வண்ணத்தில் - பெரிய சைசில் பார்க்கும் போது படைப்பாளிகளின் உழைப்பின் முழுப் பரிமாணமும் பளிச் என highlight ஆகிறது ! பின்னட்டையினில் வரும் கதைச் சுருக்கம் மாத்திரமே நமது பணி  என்பதைத் தாண்டி அட்டைப்படத்தின் டிசைன் நண்பர் பிரதீப்பின் கைவண்ணம் ! இதோ அச்சுக்குச் செல்லும் அந்த அட்டை டிசைன் !   

இவ்விரு இதழ்களோடும் filler pages-ல் லக்கி லூக்கின் 2 புதிய குட்டிக் கதைகள் இடம் பிடிக்கின்றன ! இவற்றோடு தற்சமயம் நம் கைவசமுள்ள fillers காலி என்பதால் தொடரும் மாதங்களில் மீண்டும் மதியில்லா மந்திரியாரைத் தேடிச் செல்வது ஒரு option ! இல்லாவிடின் இருக்கவே இருக்கிறார் -"ஸ்டீல்பாடியார்  " ?!! What say folks ? 

நாளைய தினம் 2014 சென்னைப் புத்தக விழாவினில் ஸ்டால் ஒதுக்கீடு பற்றிய விபரங்கள் தெரிய வரும் என்பதால் ஆவலாய்க் காத்துள்ளோம் ! நமக்கென தனியாகவே ஸ்டால் கிடைப்பது கிட்டத்தட்ட உறுதி என்ற நிலையில் - இந்தாண்டுக்கான banners டிசைன் செய்திடும் பணி துவங்குகிறது ! வழக்கம் போலவே நண்பர்களின் கைவண்ணங்கள் வரவேற்கப்படுகின்றன ! பெரிய banner ஒன்றும் ; சின்னவை இரண்டும் நம் தேவைகள் ! நமது டிசைனர் பொன்னன் ஜரூராய் ஒரு பக்கம் அவற்றைத் தயார் செய்து வர, நீங்களும் உங்கள் திறமைகளைக் காட்டிடலாமே guys ? 

அடுத்த வாரப் பதிவினில் "சாக மறந்த சுறா" + "தோர்கலின்" முன்னோட்டங்களோடு உங்களை மீண்டும் சந்திக்கிறேன் ! சித்திரக் கதை உலகின் ஜாம்பவான்களை ஒரு சேர ரசிக்கும் வாய்ப்புத் தந்துள்ள இந்த ஜனவரியைக் கொண்டாடுவோமே அது வரையிலும் !சின்னதாய் ஒரு நினைவூட்டலும் கூட - சந்தாக்கள் புதுப்பித்தல் தொடர்பாய் ! புத்தாண்டும் துவங்கி விட்ட நிலையில் - இது வரையினில் சந்தா செலுத்திட மறந்திருக்கும் நண்பர்கள் மேற்கொண்டும் தாமதிக்க வேண்டாமே ப்ளீஸ் ? !  Bye for now ! 
Writer Greg 
Illustrator : Hermann
Writer  Jean Van Hamme 
Illustrator : William Vance


க்யூபாவுக்குப் போவோமா..?

நண்பர்களே, வணக்கம். என் தாய்வழித் தாத்தா ஒரு கதர் பிரியர். சொட சொட சொடக்கும் வெள்ளை கதர் சட்டையும், வெள்ளை வேஷ்டியும் அவருக்கொரு அடைய...