Saturday, 30 May 2015

ஊதா..ஊதா..எங்கும் ஊதா...!

நண்பர்களே,
    
வணக்கம்! ரொம்ப ரொம்ப நாட்களாய் புத்தக விழாக்களில், பதிவுகளில் என்னிடம் கேட்கப்படும் கேள்விகளின் தரவரிசைப் பட்டியல் இது போலிருப்பது வாடிக்கை:
  • §     இரும்புக்கை மாயாவி புக்ஸ் இப்போதெல்லாம் வர்றதில்லையா? (இது நமது மறுபதிப்புப் படலம் துவங்கும் முன்வரையிலான கேள்வி)
  • §“இரத்தப் படலம்“ முழுத்தொகுப்பை திரும்பவும் போடும் உத்தேசமுண்டா? வண்ணத்தில்/ Black & Whiteல்?
  • §     “டிராகன் நகரம்“ மறுபதிப்பு எப்போது?
  • §  எங்கள் வீட்டுக் குட்டீஸ்களுக்கு ஏற்ற மாதிரியாக; அடுத்த தலைமுறை இளம் வாசகர்களுக்காக ஏதாவது செய்யும் எண்ணமுண்டா?
இதில் முதற்கேள்வி தற்சமயம் relevant இல்லையெனும் போது- கேள்விகள் # 2 & 3 க்கு ‘ஹி...ஹி...ஹி... ரகப் பதில்களை நல்கி விட்டு வேறு topicக்குத் தாவுவது வழக்கம். ஆனால் கேள்வி # 4 ன் பதிலாக ஒரு மௌனத்தையே இதுவரை முன்வைத்திருக்கிறேன். என் மௌனங்களை எதிர்மறை பதிலுக்கு அடையாளமாகக் கருதிக் கொண்டு அடுத்த தலைமுறையைக் ‘கவனிக்க மறந்த மாபாதகனாக அவ்வப்போது ஆங்காங்கே என்னைப் போட்டுத் துவைப்பதும் உண்டு என்பதில் இரகசியமேது? பொதுவாக இந்த விஷயத்தில் எனது thought process இதுவே: 

அரை நிஜார் பாலகர்களாய் லயன் / திகில் / முத்து காமிக்ஸ் இதழ்களைக் கடைகளில் வாங்கியதொரு (கி.மு. காலகட்டத்து) சூழல் இன்றைக்கு நடைமுறையில் கிடையாதல்லவா? நமது இதழ்கள் தெரு முனையிலுள்ள கடைகளில் இப்போதெல்லாம் விற்பனையாவதும் கிடையாது ; இன்றைய சிறார்கள் கடைகளுக்குப் போய் காமிக்ஸ்களைக் கேட்டு வாங்குவதும் (பரவலாகக்) கிடையாதெனும் போது- குடும்பத்துப் பெரிய தலைகள் யாரேனும் மனசு வைத்தல் இங்கே அத்திவாசியம். And- குட்டீஸ்களின் பொருட்டு நாம் கார்ட்டூன் / காமெடிக் கதைகளைக் கோரினாலும் கூட அவை அடுத்த இலைக்குப் பாயசம்!! என்ற கதையும் கூடத் தானே ? So நமது வாசிப்புகளுக்கும் சுவாரஸ்யம் தரும் விஷயங்களாக அவை அமைந்திட வேண்டுமென்பதிலும் பரம இரகசியங்களில்லை ! Which means - உங்களையும் ஓரளவிற்காவது வசியம் செய்தாலன்றி அந்தக் கதைத் தொடர்கள் உங்கள் வீட்டு சுட்டீஸ்களைத் (தொடர்ச்சியாய்) சென்றடைவது சிரமமே அல்லவா? Tintin; Asterix போன்ற உலகப் பிரசித்தி பெற்ற கார்ட்டூன் களங்கள் இந்தத் தேவைக்குக் கச்சிதமான பதில்களாக இருந்திடலாம் தான்- ஆனால் அவை நமது reach-க்குள் இல்லா எட்டாக்கனிகள் எனும் போது பொறுமையுடன் தேடல்களைத் தொடர்வதே எனக்கிருந்த உபாயம்! சிக்பில் கதைகளோ ப்ளுகோட் கதைகளோ இளம் வரவுகளுக்குக் கதை சொல்ல ஏதுவானவையல்ல எனும் போது லக்கி லூக்கின் பாதையில் ரின் டின் கேனையும் நுழைத்திட முயற்சித்தேன் ! ஆனால் ஒரு நாலுகால் ஜீவனுக்கு ஒரு ஆல்பமா? என்ற ரீதியிலோ என்னவோ நம்மில் பலர் ரி.டி.கே.வை அத்தனை வாஞ்சையாய் ஆதரிக்கவில்லை என்பதால் பயலைக் கொஞ்சம் ஓரம்கட்ட நேர்ந்தது. Of course- ஒரே கதையோடு அந்தத் தொடரைக் கைகழுவுவதாயில்லை தான்; ரின்னியின் மறுவருகை would be sooner than later ! 

நமக்குப் பிடித்து / நம் வீட்டு குட்டீஸ்களுக்கும் பிடிக்கக் கூடிய இன்னொரு தொடரான சுஸ்கி-விஸ்கி கதைகளுக்கான உரிமைகளைப் பெற்றிட சென்றாண்டு முயற்சி செய்து- கிட்டத்தட்ட கான்டிராக்ட் போடும் நிலையிலிருந்தோம்! துரதிர்ஷ்டவசமாய் இறுதிக் கட்டத்தின் போது நமது நிதிநிலைமை தள்ளாட்டத்திலிருக்க கான்டிராக்டை ஜனவரிக்கு வைத்துக் கொள்வோம் என்றிருந்தேன்! ஆனால் நம் நேரமோ என்னவோ- அந்தப் பொறுப்பிலிருந்த நிர்வாகி "சு.வி". கம்பெனியிலிருந்து இடைப்பட்ட நாட்களில் வெளியேறியிருக்க ஜனவரியில் திரும்பவும் பிள்ளையார் சுழியிலிருந்து துவங்க வேண்டியது போலான சூழலைக் காண முடிந்தது! ஜனவரியில் நமது ரெகுலர் இதழ்களுக்கான முன்பணப் பட்டுவாடாக்கள் துவங்கிய ஜரூரில்- “சு.வி.யை“ கொஞ்சம் பொறுமையாகப் பார்த்துக் கொள்ளலாமே!' என்ற எண்ணம் தலைதூக்க- நாட்கள் நகன்று விட்டன!
     
இடைப்பட்ட சமயங்களில் எனது ஆந்தைவிழிகள் அங்குமிங்குமாய் தேடல்களில் ஈடுபடுத்திய வண்ணமே இருந்த போதிலும், உருப்படியாகக் கதைகள் சிக்கியபாடில்லை! அந்த சமயம் அவ்வப்போது செய்திடும் சில தேடல்களின் முடிவுகளைப் போட்டு வைத்திருக்கும் folder-ன் நினைவு வந்தது ! அதனை எதேச்சையாய் உருட்டிய போது தான் சில “புதியவர்கள்“ பற்றிய நினைவுகள் refresh ஆயின ! ஒவ்வொரு விடுமுறையின் போதும் எங்களிடம் குவிந்து கிடக்கும் முந்தைய இதழ்களை; கேட்லாக்களை மட்டுமின்றி நெட்டிலும் சிதறிக் கிடக்கும் சில / பல தொடர்களைத் திரும்பத் திரும்பப் புரட்டுவது ஒரு பொழுதுபோக்கு! காலங்கள் மாறும் போது நமது ரசனைகளில் / வாசிப்புக்களங்களில் மாற்றங்கள் நிகழ்வதும் உண்டு என்பதை அனுபவம் உணர்த்தியிருப்பதால்- எந்தவொரு கதைத் தொடருக்கும் இப்போதெல்லாம் ஒட்டுமொத்தமாய் reject முத்திரை குத்துவதில்லை ! பத்தாண்டுகளாய் புரட்டிப் பார்த்த கையோடு மூலைசேர்த்த லார்கோவைத் தான் பதினோறாம் ஆண்டு முதலாய் நாமொரு சூப்பர்ஸ்டாராய் ஸ்வீகாரம் செய்திருக்கிறோமல்லவா ? ஏகப்பட்ட காலமாய் ‘No-No’ ரகத்திலிருந்த பௌன்சரோ இன்றொரு டாப் வரவு நம்மிடையே ! ஆண்டாண்டு காலமாய் ஙே என்ற பார்வையோடு பரணில் சாத்தி வைக்கப்பட்டிருந்த டைலன் டாக் இன்று நம்மிடையே புழக்கத்தில் உள்ளார் ! So - நேற்றைய thought process-கள் இன்றைய ரசனைகளுக்கும் / தேர்வுகளுக்கும் அதே மாதிரியான தாக்கங்களையே ஏற்படுத்துமென்ற கட்டுப்பாடுகளின்றி ஒவ்வொரு தொடரையும் fresh ஆகப் புரட்ட முயற்சிப்பேன்! அப்போது கண்ணில் பட்டது தான் அந்த “ஊதா சமாச்சாரம்“!

வர்ணத்தைக் கொண்டு வில்லங்கமான விஷயமோ என்ற பயம் அவசியமில்லை... ஏனெனில் நான் குறிப்பிடும் அந்த நீல உலகம் பிரான்கோ- பெல்ஜியக் காமிக்ஸ் உலகினில் ஒரு 57 ஆண்டுச் சகாப்தமாகும்! 1958ல் முதன்முதலாய் பெல்ஜியத்தில் தலைகாட்டிய அந்தத் தக்கனூண்டு நீல மனிதர்களான SMURFS பற்றித் தான் நான் பேசிக் கொண்டிருக்கிறேன் என்பதைப் புரிந்து கொள்ள அதிக சிரமமிராது என்று நினைக்கிறேன்! 

நமது முந்தைய கையிருப்புகளுள் நிறையவே இடம்பிடித்திருந்த SMURFS ஆல்பம்களை நீண்டதொரு இடைவெளிக்குப் பின்பாகப் புரட்டிய போது சின்னதாய் ஒரு பொறி தட்டியது என் சொட்டைத் தலைக்குள் ! முழு வண்ணம் ; ஆர்ட் பேப்பர்... பெரிய சைஸ் என்றதொரு decent பாணிக்கு புரமோஷன் கண்ட பின்னே இந்தத் தொடரை நமது அணிவகுப்பில் கற்பனை செய்து பார்த்த போது- ஒரே கல்லில் சீனியர் + ஜூனியர் taste-களுக்கான  மாங்காய்கள் அடிக்க வாய்ப்புள்ளது  போல் தோன்றியது ! So- ஓசையின்றி சில பல மாதங்களுக்கு முன்பாகவே இதன் உரிமைகளை பெற்றிடும் பொருட்டு வேலைகளை ஆரம்பித்திருந்தேன்! என்ன தான் ஈ-மெயில்; facebook இத்யாதி என்றெல்லாம் உலகம் முன்னேறியிருப்பினும்- இந்த உரிமைகள் கோரிப்பெறும் படலமானது எப்போதுமே ஒருவிதமான நெடிய process ஆக அமைந்திடுவதைத் தவிர்த்தல் சாத்தியமாவதில்லை! இலட்சங்களில் விற்பனை- பல்லாயிர யூரோ / டாலர்களில் ராயல்டி என்று களமிறங்கும் இதர தேசத்து ; இதர மொழிப் பதிப்பகங்களோடு இடுப்பில் கோணிச் சாக்கைக் கட்டிக் கொண்டு நாம் நடத்தப் பார்க்க முயற்சிக்கும் ஓட்டப் பந்தயங்கள் எவ்வித முடிவுகளைத் தருமென யூகிப்பதில் சிரமங்களேது? சில வேளைகளில் ஒரு சின்ன மின்னஞ்சல் வினவலுக்குப் பதில் கிட்ட சில பல மாதங்கள் கூட அவசியப்பட்டிடலாமெனும் போது மண்டைக்குள் எட்டிப் பார்க்கும் அயர்ச்சிகளை பக்குவமாய் ஓரம்கட்டியாக வேண்டியிருக்கும். So- சந்தர்ப்பம் கிட்டும் போதெல்லாம் படைப்பாளிகளின் முன்னே போய் "ஒரு நடமாடும் நினைவூட்டலாய்" நான் நிற்க முயற்சிப்பதன் காரணம் இதுவே! SMURFS கதைகளின் தேடலின் பின்னனிக் கதையும் இந்த ரகமே!
     
So- கடந்த வாரம் ஐரோப்பாவில் எனக்கொரு பணி வாய்த்த போது- சந்தடி சாக்கில் SMURFS-ன் படைப்பாளிகளையும் சந்தித்து விடுவதென்ற தீர்மானத்தில் இருந்தேன்! வழக்கமாய் படைப்பாளிகளின் மைய அலுவலகங்கள் பாரிஸ் ; பிரஸ்ஸல்ஸ்; மிலான்; நியுயார்க்; இலண்டன் என உலகின் முக்கிய நகரங்களில் - ஒரு பளிச் இடத்தில் அமைந்திருப்பது வாடிக்கை! ஆனால் SMURFS-ன் படைப்பாளிகளோ பெல்ஜியத் தலைநகரிலிருந்து முப்பது நிமிட இரயில்ப் பயண தூரத்திலொரு குட்டியான கிராமத்தில் அமர்ந்திருப்பதை கூகுள் மேப்பில் பார்த்த போது வியப்பாக இருந்தது ! எனது இதர பணிகளை முடித்த கையோடு அவசரம் அவசரமாய் இரயிலைப் பிடித்து மதியப் பொழுதில் அந்தக் குட்டியான ரயில் நிலையத்தில் இறங்கிய போது லேசான சிலுசிலுப்புடனான காற்று மட்டுமே எனக்குத் துணைக்கிருந்தது! பூட்டிக் கிடக்கும் ஒரு பாழடைந்த இரயில்வே ஸ்டேஷன்; பரிதாபமாக நின்ற ஆட்டோமேடிக் டிக்கெட் வழங்கும் மிஷின் என்பதைத் தாண்டி அங்கே நின்றவை மௌனமான இரு இரும்பு பெஞ்சுகள் மாத்திரமே! கூகுள் மேப்பில் ஒரு கிலோ மீட்டருக்குக் குறைவான நடைதூரம் என்பதைக் கண்டிருந்த போதிலும் - உறுதிப்படுத்திக் கொள்ளலாமே என ஸ்டேஷனுக்கு வெளியிலிருந்ததொரு பாகிஸ்தானிய மளிகைக் கடைக்காரரிடம் (!!) கேட்டுப் பார்த்தால்- அவரோ உதட்டை வேக வேகமாய்ப் பிதுக்கி விட்டார்- எனக்குத் தெரியாது என்று!! சரி... நடராஜா டிரான்ஸ்போர்ட் இருக்க பயமேன்? என்று நான் நடைபோட- சுற்றுமுற்றும் வீடுகளும், சின்ன வயல்வெளிகளுமே கண்ணில்பட்டன! சரியான திசையில் தான் நடக்கிறோமா ? - அல்லது எதிர்திசையில் சொதப்பிக் கொண்டிருக்கிறோமோ ? என்ற சந்தேகத்தில்- அங்கே சாலைப் பராமரிப்புப் பணியில் ஈடுபட்டிருந்த இருவரிடம் கேட்டுப் பார்த்தேன்! நம் இங்கிலீஷ் அவர்களுக்கு நஹி மாலும்... அவர்களது பிரெஞ்சு எனக்கு புரிஞ்சில்லா... என்ற போது- கையிலிருந்த SMURFS ஆல்பம் ஒன்றினைக் காட்டிய மறுகணம் அந்த மனுஷன் முகத்தில் வெளிச்ச ரேகைகள்! அப்புறம் சைகை பாஷையில் பாதையை அவர் சுட்டிக்காட்ட- சில பல நிமிடங்களில் ஒரு இறக்கத்தில் ஒரு ஸ்டைலான கட்டிடத்தின் கண்ணாடிச் சுவர்கள் வழியாக ஒரு மந்தை நீலக் குள்ள மனிதர்கள் என்னை எட்டிப் பார்ப்பதைக் காண முடிந்தது! அத்தனையும் SMURFS அலுவலகத்தில் நின்ற அலங்கார பொம்மைகள்!
     
ரொம்ப... ரொம்ப... ஸ்டைலாக; அட்டகாசமான  ரசனையோடு வடிவமைக்கப்பட்டிருந்ததொரு அலுவலகத்திற்குள் நான் காலடி வைக்க- புன்னகையோடு என்னை வரவேற்று உள்ளே அழைத்துச் சென்றார்கள்! திரும்பிய பக்கமெல்லாம் SMURFS பொம்மைகள்; மாடல்கள்; கட்-அவுட்கள்; விளையாட்டுச் சாமான்கள்; ஆல்பம்கள்! மேற்கொண்டு நான் கதையளப்பதற்கு முன்பாக- இந்த SMURFS உலகத்தைப் பற்றிக் கேள்விப்பட்டிரா நண்பர்களுக்கென சின்னதாயொரு preview நல்கிடல் நலமென்று தோன்றுவதால்- சடக்கென்று 1929க்குத் தாவுகிறேன்! அந்த வருஷம் தான் பெல்ஜியம் தலைநகருக்கருகே பியரி கலிபோர்ட் என்றதொரு ஆற்றலாளர் பிறந்தார்! ஆரம்ப நாட்களில் சின்ன சின்னதாய் ஏதேதோ வேலைகள் பார்த்தவர்- சீககிரமே காமிக்ஸ் உலகத்தினுள் ஈர்க்கப்பட்டு லக்கி லூக்கின் படைப்பாளியான மோரிஸ் போன்ற ஜாம்பவான்களிடமெல்லாம் உதவியாளராகப் பணிபுரிந்திருக்கிறார்! ஒரு வரலாற்றுக் காமிக்ஸ் தொடரை துவக்கத்தில் போட்டுக் கொண்டிருந்த மனுஷன் 1958ல் இந்த SMURFS-களை முதன்முதலாகக் கற்பனையில் சிருஷ்டித்திருக்கிறார்!

    
ஒரு தூரத்து மாய உலகிலுள்ள சிறு கிராமம் தான் கதையின் பின்னணி. சுண்டுவிரல் உயரத்துக்கே இருக்கும் நீலக்கலரிலான ஜாலியான குட்டி மனிதர்கள் தான் அந்த கிராமத்தின் வாசிகள்! காளான் வடிவிலான வீடுகள்; கேக் மீது அலாதி ஆசை; தங்களுக்கே தங்களுக்கான SMURFS பாஷை என்பன தான் இந்த SMURFS-களின் முக்கிய அடையாளங்கள்! ராஜா ஸ்மர்ஃப்; தாத்தா ஸ்மர்ஃப்; பேபி ஸ்மர்ஃப்; சிடுமூஞ்சி ஸ்மர்ஃப்; கவிஞர் ஸ்மர்ஃப்; மந்திரவாதி கார்காமெல் என்று ஏகப்பட்ட குட்டியாசாமிகள் கதைநெடுகிலும் வந்து செல்வர்! 




இந்தக் கதைகளின் இன்னுமொரு விசேஷ அடையாளம் அவர்கள் பேசிக் கொள்ளும் பாஷையும், அதன் பாணியுமே!ஸ்மர்ஃப் என்ற வார்த்தை கிட்டத்தட்ட எல்லாவித அர்த்தங்களையும் வழங்கும் விதமாய் அநேக சம்பாஷணைகளிலும் இடம்பிடித்திடுவது வாடிக்கை!

“முக்கியமான ஸ்மர்ஃப் இருக்கு... அதனால் தான் ஸ்மர்ஃப்- ஸ்மர்ஃபா ஓடிட்டிருக்கேன்...!“

“என்னவொரு ஸ்மர்ஃப் உனக்கு? இவ்ளோ ஸ்மர்ஃப்பை விரயம் பண்ணிட்டு வந்திருக்கியே?“

ஸ்மர்ஃப் எனும் வார்த்தை கதை முழுக்க ரவுண்ட் கட்டியடிப்பது இங்கொரு டிரேட்மார்க் ! ரொம்பச் சீக்கிரமே பிரான்கோ-பெல்ஜியக் காமிக்ஸ் உலகில் தனக்கென ஒரு தனியிடத்தை இந்த நீல ஆசாமிகள் ஆக்கிரமித்துக் கொள்ள- ஆல்பம்கள்; ஒற்றைப்பக்க கார்ட்டூன்கள்; அப்புறமாய் தினசரிகளில் வெளிவரக்கூடிய strips என நிறைய வடிவங்கள் உருவாயின. 1992ல் SMURFS-களின் பிதாமகரான பீயோ (புனைப்பெயர்) மரணத்தைத் தழுவுவதற்கு முன்பாக 16 ஆல்பம்களை உருவாக்கி இருந்தார். அவரது மறைவுக்குப் பின்பும் இதர ஆர்டிஸ்டுகள் / கதாசிரியர்கள் துணைகளுடன் தொடரும் இந்தக் கதைவரிசையில் ஆல்பம் # 34 வெளியாகக் காத்துள்ளது ! பொதுவாக ஐரோப்பாவில் சாதிக்கும் காமிக்ஸ் தொடர்கள் அமெரிக்கக் கரைகளில் அட்டகாசம் செய்வது அதிசயமே! ஆனால் டி.வி. கார்ட்டூன் தொடராக 1981-ல் அமெரிக்காவினுள் எட்டிப் பார்த்த இந்த நீல மனிதர்கள் அங்குள்ள இளம் தலைமுறைகளை வசியம் செய்து விட்டனர். 256 எபிசோட்கள் இன்றளவும் உலகின் கிட்டத்தட்ட 70 நாடுகளில் ஒளிபரப்பாகி வருகிறதாம் ! (தமிழிலும் ஒரு முன்னணி TV இதனை தங்களது சுட்டிகளது சேனலுக்காக தற்போது டப்பிங் செய்து தயார் செய்து வருவது கொசுறுத் தகவல்!

2011-ல் சோனி நிறுவனம் ஸ்மர்ஃப்களைக் கொண்டதொரு கார்ட்டூன் 3D திரைப்படத்தை உருவாக்க- உலகளவில் வசூலை வாரிக் குவித்ததைத் தொடர்ந்து SMURFS-களின் ராஜ்ஜியம் விரிவாகிக் கொண்டே போனது! சுமார் 25 உலக மொழிகளில் இன்று வரைக்கும் கிட்டத்தட்ட 25 மில்லியன் ஆல்பம்கள் விற்பனை கண்டுள்ளன ! சராசரியாய் ஒவ்வொரு பிரெஞ்சு ஆல்பமும் 150,000 பிரதிகள் விற்கின்றனவாம்! காமிக்ஸ் விற்பனை என்ற களத்தில் மட்டும் வெற்றிக்கொடி என்றில்லாது- merchandising என்று சொல்லப்படும்- காமிக்ஸ் கதாபாத்திரங்களைக் கொண்டு உருவாக்கப்படும் வியாபார வாய்ப்புகளில் SMURFS கற்பனைக்கெட்டா சாதனைகள் செய்துள்ளனர்! கதைப் புத்தகங்கள்; நாவல்கள்; டிராயிங் / கலரிங் புத்தங்கள்; ABC புத்தகங்கள்; மழலைகளுக்கான ஓசை எழுப்பும் புத்தகங்கள்; ஸ்டிக்கர் ஆல்பம்கள்; CDகள்; கம்ப்யூட்டர் கேம்கள்; பொம்மைகள்; சாக்லேட்கள்; ஏகப்பட்ட விளம்பரங்களுக்கு உதவிடும் பிராண்ட் தூதுவர்கள்; என இவர்களது ஒவ்வொரு வியாபார முயற்சியும் அசாத்திய வெற்றிகள்! 

Cut & back to my புராணம்!
    
SMURFS-களின் அசாத்திய வெற்றிகளுக்கு சாட்சிகளாக அவர்களது மீட்டிங் ஹால் முழுவதிலும் இறைந்து கிடந்த கட்-அவுட்களை; பொம்மைகளை வென்று நான் பார்த்துக் கொண்டிருக்க மெதுவாக தங்களது அசுர வெற்றிக்கு உறுதுணை செய்துள்ள இந்தக் குட்டி மனிதர்களைப் பற்றிப் பேசத் தொடங்கினார்கள்! கடந்த 30+ ஆண்டுகளில் நானும் உலகின் எத்தனையோ டாப் காமிக்ஸ் நாயகர்களின் marketing யுக்திகளைப் பார்த்துள்ள போதிலும்- இந்தக் "குட்டிப் பசங்களை" மட்டுமே வைத்துக் கொண்டு இவர்கள் தொட்டிருக்கும் உயரங்கள் பிரமிப்பைத் தந்தன! நாம் பிரான்கோ-பெல்ஜிய உலகினுள் 1985-ல் புகுந்த நாட்களிலேயே ஸ்மர்ஃப்களும் இருந்தனர் தான் என்ற போதிலும்- அவர்களது பேசும் பாணிகளும்; கதைக்களங்களும் நமக்கு சுவாரஸ்யம் தருமோ-தராதோ என்ற தயக்கம் என்னிடமிருந்ததால் அந்நாட்களிலேயே இத்தொடரை அரவணைக்க நான் பெரியதொரு ஆர்வம் காட்டியிருக்கவில்லை! ஆனால் இன்றைய நமது தேடல்களுக்கு இந்தக் குட்டிக்கும்பல் சரிவருமென்று பட்டது! So- ஊர்க் கதை ; உலகக் கதை என்றெல்லாம் பேசிவிட்டு நமது சமீப இதழ்களையெல்லாம் காட்டினேன் - மி.மி. உட்பட! அட... இந்தியாவில் கூட எங்கள் தேசத்துத் தயாரிப்புகளில் இத்தனை கதைத்தொடர்கள் உலவுகின்றனவா ? என்ற ஆச்சரியம் அவர்களிடம் வெளிப்பட்டது ! ஆங்கிலத்தில் Papercutz என்ற நிறுவனம் வெளியிட்டு வரும் SMURFS ஆல்பம்களை ; சீனாவில் ; இந்தோநேஷியாவில் வெளியான ஆசிய ஆல்பம்களை காட்டினார்கள் ! Graphic Novel என்று ஆங்கிலப் பதிப்புகளில் பெயரிட்டிருப்பதைப் பார்த்த போது எனக்குள் ஒரு குட்டிப் புன்னகை! ஒவ்வொரு தேசத்திலும்; ஒவ்வொரு மார்கெட்டிலும் ஒரே சொற்றொடருக்குத் தான் எத்தனை மாறுபட்ட அர்த்தங்கள் என்று நினைத்துக் கொண்டேன்! ராயல்டி பற்றி, நமது விற்பனை முறைகள் பற்றியெல்லாம் பேசி முடித்த சமயம் - “வாருங்களேன்- எங்களது studio-வை ஒரு ரவுண்ட் பாருங்களேன்!“ என்று அழைத்தார்கள்! ஆஹா... இதைத் தானே எதிர்பார்த்தாய் பாலகுமாரா...! என்ற கதையாக நான் துள்ளிக் குதித்து அவர்களைப் பின்தொடர்ந்தேன்!

தரைத்தளத்தில் அலுவலகம் ; கீழ்தளத்தில் ஆர்டிஸ்ட்களின் ஸ்டுடியோ என அமைத்திருந்தனர். அலுவலகத்தின் சுவர்கள் ப்ளூ ; அனைத்து மேஜைகளின் நிறம் ப்ளூ ; பின்னணியின் பொருட்கள் சகலமும் ப்ளூ என அதுவே ஒரு குட்டி ஸ்மர்ஃப் உலகமாய்க் காட்சி தந்தது ! பீயோவின் மறைவுக்குப் பின்னே அவரது வாரிசுகளின் நிர்வாகத்தில் ஸ்மர்ஃப் படைப்புகள் தொடர்வதாகவும், வெவ்வேறு கால கட்டங்களில் வெவ்வேறு ஓவியர்கள் பணியாற்றி இருப்பதாகவும் சொன்னார்கள் ! நான் போன சமயம் புதிதாய் வெளியாகவிருக்கும் ஆல்பமின் பணிகளில் தலைமை ஓவியர் ஜெரொயென் டி கொனின்க் மும்முரமாய் ஈடுபட்டிருந்தார் ! மேஜையில் பென்சில் ஸ்கெட்ச் போட்ட பக்கங்கள் ; பக்கவாட்டில் ஒரு மெகா சைஸ் கம்பியூட்டர் ; பின்னே நிறைய ஸ்மர்ப் மாடல் பொம்மைகள் ; என்று குவிந்து கிடந்தன ! துளியும் பந்தாயின்றி நேசத்துடன் கைகுலுக்கி விட்டு, அழகான இங்கிலீஷில் எனது கேள்விகளுக்குப் பதில் சொன்னார் ! அவர்களது புது ஆல்பம்கள் நிறைய   தேசங்களில் நம்மூர் திரைப்படங்களைப் போல விமரிசையாக வெளியாகும் சங்கதிகள் என்பதால் - புதுத் தயாரிப்புகள் அரங்கேறும் சமயம் அது பற்றிய தகவல்கள் வெளியே கசிந்திடாது பார்த்துக் கொள்கின்றனர் என்பதால் - 'ஹி..ஹி..நான் போட்டோ எடுத்துக்கவா ?'  என்ற அசட்டுக் கேள்வியை கேட்கத் தோன்றவில்லை எனக்கு ! தவிர, இன்னமும் அவர்களோடு ஒரு காண்டிராக்ட் போட்டிருக்கா நிலையில் அவர்களை தர்மசங்கடப்படுத்தத் தோன்றவில்லை எனக்கு ! So திறந்த வாயை மூடாது பராக்குப் பார்த்துக் கொண்டு நின்றேன் அவரது விரல்கள் செய்யும் ஜாலங்களை ! 

அவருக்கு அருகாமையில் இன்னுமொரு ஓவியர் அமர்ந்து வேறேதோ செய்து கொண்டிருந்தார்....என்னுடன் வந்திருந்த பெண்மணி எட்டிப் பார்த்து என்ன செய்து கொண்டிருக்கிறீர்கள் என்று கேட்க - பத்தாண்டுகளாய் வேலை செய்து விட்டு ஒய்வு பெறப் போகும் டெலிபோன் ஆபரேட்டருக்கு ஒரு அழகான ஸ்மர்ப் கார்டூன் போட்டு கீழே தன பெயரையும் கையொப்பமிட்டுக் கொண்டிருந்தார் ! என்னவொரு அட்டகாசமான memento என்று நினைத்துக் கொண்டேன்..! அவருக்குப் பின்னே இருந்த கண்ணாடிச் சுவற்றில் ஒரு குட்டி ஸ்மர்ப் பயல் தொற்றி நின்று அடுத்த கேபினுக்குள் எட்டிப் பார்ப்பது போலொரு லைன் டிராயிங் ஒட்டி இருந்தது ! ஜாலியான மனுஷன் தான் என்பதை அவரது மின்னும் கண்களும் ; சிரித்த முகமும் சொல்லின ! வழக்கமாய் கேட்கும் அதே பழைய பல்லவியை இவர்களிடமும் கேட்டு வைத்தேன் - "ஒரு பக்கத்தை உருவாக்க எத்தனை நாட்கள் பிடிக்கும் ?" என்று ! சராசரியாய் பென்சில் ஸ்கெட்ச் முடிக்க 3 நாட்கள் ; அதன் பின்னே இந்தியன் இந்க்கில் அவுட்லைன் போடவொரு இரு நாட்கள் என்று சொன்னார் ஜெரொயென் ! லெட்டெரிங்க் பணிகள் வேறொரு பிரிவின் பொறுப்பு என்று சொன்னார் ! 

வர்ணக் கலவைகள் இன்னொரு பக்கம் கம்பியூட்டரில் நடந்து கொண்டிருந்தது சில இளைஞர்களுடன் ! இந்தக் கதைவரிசையின் mood எப்போதுமே ஜாலியானது என்பதால் 'பளிச்' கலர்களாகவே தேர்வு செய்து கொண்டிருந்தார்கள் ! இங்கே ஒரு பக்கத்துக்கு சுமாராய் 4-5 நாட்கள் என்ற அட்டவணையில் வண்டி ஓடுகிறது ! So சராசரியாய் ஒரு  48 பக்க ஆல்பத்தின் கதைப் பணிகளைச் சேர்க்காமலே டிராயிங் & கலரிங் மட்டுமே 250 நாட்களை விழுங்கி விடுவதைப் புரிந்து கொள்ள முடிந்தது ! காமிக்ஸ் வாசிப்புகளுக்குப் புதியவர்களின் பார்வைகளில் எல்லாமே "பொம்மை புத்தகங்கள்" தான் என்றாலும் - இந்த "பொம்மை படங்கள் நிறைந்ததொரு புக்கை உருவாக்கிட இத்தனை ஆற்றலும் ; இத்தனை அவகாசமும் அவசியப்படுவதை நினைத்த போது கண்ணைக் கட்டியது ! இன்னொரு பக்கமோ கம்பியூட்டரின் முன்னே அமர்ந்திருந்த இன்னொரு இளைஞன் 3D மாடல்களை உருவாக்கிக் கொண்டிருந்தார் ! ஸ்மர்ப் கையைத் தூக்கிக் கொண்டு நிற்பது போல் ; இப்படித் தலை சாய்த்து நிற்பது போல் ; அப்படி காலைத் தூக்கி நின்று கொண்டிருப்பது போல் என விதம் விதமாய் அவர் செய்திருந்த பொம்மைகள் அடுக்கி வைக்கப்பட்டிருந்தன ! அவை உருவாக்கப்படும் விதம் பற்றி பிரெஞ்சு கலந்த ஆங்கிலத்தில் வேக வேகமாய்ப் பேசிட, நான் "யெஸ்..யெஸ்..யெஸ்.." என்று மண்டையை ஆட்டி வைத்தேன் ! அவர்களது merchandising பிரிவின் பொருட்டு இந்த மாடல்கள் உருவாகி வருகின்றன என்பதை மட்டும் கிரகித்துக் கொள்ள முடிந்த போதிலும், அதன் பின்னணி செயல்முறை விளக்கங்கள் லத்தீன் மொழி போல் சுத்தமாய்ப் புரியவே இல்லை ! சீனாவில் ஒரு புத்தக விழா சமீபமாய் நடந்ததாகவும், அங்கே ஸ்மர்ப் கதைகளை வெளியிடும் பதிப்பகம் தமது ஸ்டாலுக்குப் பக்கத்தில் ஒரு குட்டியான ஸ்மர்ப் கிராமத்தையே பிளாஸ்டர் ஆப் பாரிசில் செய்து மாடலாக வைத்து அட்டகாசம் செய்ததாகவும் அவர் சொன்னார் ! விரைவில் மத்திய கிழக்கில்  துவங்கவிருக்கும் ஒரு தீம்பார்க்கில் "ஸ்மர்ப் உலகம்" என்றே ஒரு தனிப் பகுதி ஏகப்பட்ட விளையாட்டுக்களோடு இருக்கப் போவதாகவும், அதன் creative பின்னணி நான் பேசிக் கொண்டிருந்த இளைஞர் தான் என்றும் சொன்னார்கள் ! அந்தத் தளத்தின் இன்னொரு பகுதியிலோ கதை விவாதங்கள் ஓடிக் கொண்டிருந்தன ஒரு கண்ணாடி அறையினுள் ! மிட்டாய்க் கடையைப் பார்த்த பச்சைப் புள்ளையைப் போல வெளியில் நின்றே வேடிக்கை பார்த்தேன் - அவர்களது பணிகளைத் தொந்தரவு செய்திட வேண்டாமே என்று ! இன்னொரு பக்கமோ ஒரு யுவதி உலகெங்கிலிருந்தும் வந்து சேரும் ஸ்மர்ப் வேற்று மொழிப் படைப்புகளின் அட்டைப்படங்களை ; டிசைன்களை சரி பார்த்து ஒப்புதல் வழங்கும் வேளையில் ஈடுபட்டிருந்தார் ! 

சுண்டு விரல் சைஸ் மனிதர்களாக இருப்பினும், இவர்களுக்குப் பின்னே இத்தனை உழைப்பும், சிந்தனையும் மூலதனமாகிடுவதை நேரில் பார்க்கும் போது "காமிக்ஸ்  is indeed serious business !" என்பது நெத்தியடியாய் புரிந்தது ! ஒரு மாதிரியாய் திரும்பவும் மேல் தளத்துக்கு வந்து சம்பிரதாய bye -bye சொல்லி விட்டு ரயில் நிலையத்தை நோக்கிய வாபஸ் பயணத்தைத் தொடர்ந்த சமயம் என் மண்டைக்குள்ளே ஸ்மர்ப் டயலாக்கள் ஓடத் துவங்கியிருந்ததன ! ஆங்கிலத்தினில் போல தமிழில் உச்சரிக்கவும், எழுதிடவும் இந்தப் பெயர் அத்தனை சுலபமல்ல எனும் போது அவர்கள் பயன்படுத்தும் அத்தனை இடங்களிலும் நம்மாலும் அந்த "ஸ்மர்ப்" வார்த்தையினை லாவகமாய்ப் பயன்படுத்தல் சாத்தியமாவென்று எனக்கு சொல்லத் தெரிந்திருக்கவில்லை ! Anyways காண்டிராக்ட் கைக்கு வந்து, நாம் பணம் அனுப்பி, அதன் பின்னே கதை(கள்) கைக்கு வந்து சேர்ந்திட இன்னமும் அவகாசம் உள்ளதேனும் போது - அதற்குள் இந்த ஸ்மர்ப் பாஷையைக் கற்றுத் தேர்ந்து கொள்ளப் பார்ப்போமே என்று எனக்கு நானே சமாதானம் சொல்லிக் கொண்டேன் ! தொடரும் இந்த வாரத்தினில் காண்டிராக்ட் நம் கைகளுக்குக் கிட்டி விடுமென்றும் ; காத்திருக்கும் நமது கார்ட்டூன் ஸ்பெஷல் இதழினில் இந்த நீல மனிதர்களை உலா வரச் செய்வது சாத்தியமாகிடுமென்றும் நம்புகிறேன்...! 

இதே போலவே இன்னமும் 2 புது வரவுகளுக்காக துண்டை விரித்து வைத்து, படைப்பாளிகளின் பதில்களுக்காக waiting என்பதால் தான் கா.ஸ்பெ. பற்றிய அறிவிப்பு இன்னமும் தாமதம் காண்கிறது ! வழக்கமாய் போடும் கதைகளை ஒன்றிணைத்து அது தான் ஸ்பெஷல் என்று உங்கள் தலைகளில் சுமத்துவதை விட - கொஞ்சம் அவகாசம் எடுத்துக் கொண்டாவது அழகான-புதுக் கதைகளோடு உங்களை சந்திக்க முயற்சித்து வருகிறேன் folks ! இன்னொரு ராட்சசப் பதிப்பகமோ - "4 வார அவகாசம் கொடுங்கள் எங்கள் தீர்மானத்தைச் சொல்லிட" என்று கோரி 15 நாட்கள் ஆகின்றன ! அதுவும் நமக்கு சாதகமாய் அமைந்திடும் பட்சம் ஒரு கார்ட்டூன் ஸ்பெஷல் மட்டுமல்ல - ஒரு நூறு ஸ்பெஷல்கள் சாத்தியமாகிடும் என்பதால் பொறுமையாய்க் காத்திருக்கிறேன் ! இம்முயற்சிகளின் வெற்றி-தோல்வி பற்றிய கணிப்புகள் செய்திடும் திறன் என்னிடமில்லை ; and இதைப் பற்றி நான் வெளியே பேசாதேவும் இருந்திடுவது தான் எனது வழக்கமும் கூட ! மாம்பழம் கிட்டும் போது அதைப் பற்றிப் பேசிக் கொள்ளலாம் ; கல் மட்டுமே திரும்ப வந்து முன்மண்டையைப் பதம் பார்க்கும் பட்சத்தில் சத்தமின்றி வீக்கத்துக்கு ஒத்தடம் கொடுத்து விட்டு 'ஒட்டலியே..மீசையில் மண்ணே ஒட்டலியே.." என்று வண்டியை ஓட்டியும் இருக்கலாம் ! ஆனால் உங்களுள் பலருக்கும் இதழ் பற்றிய அறிவிப்பைக் காணோமே என்ற ஆதங்கம் தலைதூக்குவதாலேயே தான் திரைக்குப் பின்னே இருக்க வேண்டிய சில சங்கதிகள் முதல்முறையாக மேடைக்கு வருகின்றன ! So please relax folks....rest assured we are not lacking on efforts..!

ஒரு வியாபாரத்தின் துரிதத்தையோ / மந்த கதியையோ நிர்ணயம் செய்திடும் அதிகாரம் எல்லா நேரங்களிலும் நம் கைகளில் இருப்பதில்லை என்பது தான் யதார்த்தம் ! தவிர, நிறைய நேரங்களில் கதைகளின் உரிமைகளைக் கோரிப் பெறும் பணிகள் அதன் படைப்பாளிகளின் சட்டபூர்வ வாரிசுகளின் ஒப்புதல்களுக்காகத் தாமதப்படுவதும் நடைமுறை ! சில தருணங்களில் உரிமைகள் ஒரு legal trust வசம் ஒப்படைக்கப்பட்டிருக்கவும் செய்யும் ; அவ்வேளைகளில் பேரம் பேசுவதென்பது கண்ணாடி மேல் நடப்பது போலானதொரு அனுபவம் ! காலில் தக்காளிச் சட்னி ஒழுகினாலும் கூட காட்டிக்காமல் புன்னகை மன்னனாய் தொடர்ந்திட வேண்டி வரும் ! இந்த நர்த்தனங்கள் எல்லாமே எங்கள் பணியின் ஒரு அங்கமென்பதால் இவற்றை பெருசாய் நான் சிலாகிப்பது முறையாகாது ! உங்களிடமிருந்து நாங்கள் கோரிப் பெறும் பைசாக்களும், பாராட்டுக்களும் இந்த சங்கடங்களுக்கும் சேர்த்தே தான் எனும் போது இது பற்றிய நீட்டி முழக்கல்கள் நியாயமாகாது  தான் ! ஆனால் இந்த சூழலில் நண்பர்களுக்கு கொஞ்சமே கொஞ்சமாய் ஒரு புரிதல் புலர்ந்திடும் பொருட்டே இந்தப் பிலாக்கனங்கள் சகலமும் ! And yes, முயற்சிகளில் தற்போதைக்கு வெற்றி கிட்டாது போயின், இருக்கும் இட்லியையே  உப்மாவாக்கிப் பரிமாறும் ஹி..ஹி..வைபவங்களுக்கும் வாய்ப்புகள் உண்டே... ; but இயன்றமட்டிலும் காத்திருந்து பார்ப்போமே என்ற சின்னதொரு வைராக்கியம் தான் இம்முறை என்னை இயக்கி வருகிறது ! நம்புவோம்...நல்லது நடக்குமென்று !!

Before I sign off - கடந்த சில நாட்களாய் இங்கே அரங்கேறி வரும் களேபரம் பற்றிய எனது ten cents : வாழ்க்கையில் ஒவ்வொரு தினமும் ஒருவிதச் சவாலை முன்வைக்கும் வேளைகளில் இது போன்ற ஒன்றரை அணா பெறாத மோதல்களை நமக்குள்ளே நடத்திக் காட்டி நாம் சாதிக்கப் போவது தான் என்னவோ ? இதில் தவறு யார் மீது ? ; எதனால்..? எங்கிருந்து ஆரம்பித்தது ? போன்ற ஆராய்ச்சிகளில் செலவிடும் நேரத்தை ஆரோக்கியமான எத்தனையோ பல விஷயங்களில் காட்டித் தான் பார்ப்போமே guys ? நமக்குள் அபிப்பிராய பேதங்கள் நேரும் பொழுதுகளில் சட்டென்று ரியாக்ட் செய்திடாது அந்த கணத்தைக் கொஞ்சமாய் தாண்டிப் போகத் தான் விட்டுப் பார்ப்போமே -  மனதின் கனம் அந்த அவகாசத்தில் சற்றே குறைகிறதா என்று பார்த்திடும் பொருட்டு ?  பிரச்சனைகள் எதுவாக இருப்பினும், முற்சந்தியில் வைத்து அவற்றை சலவை செய்ய முற்படுவதும், சக வாசகரின் குடும்பத்தை இந்த சண்டைகளுக்குள் இழுப்பதும்  நிச்சயமாய் வேதனைக்கு வித்திடும் என்பதில் யாருக்கும் மாற்றுக்கருத்துக்கள் இருந்திட முடியாது ! நட்பை ; நேசத்தைச் சம்பாதிக்க ஒரு ஆயுட்காலம் போதாது guys; அதனை நான்கே சூடான வரிகளினாலும், சில நொடிப் பொழுதுகளின் ஈகோ மோதல்களாலும் ; பழசைச் சேகரிக்கிறேன் - விற்கிறேன் பேர்வழி என்ற முயற்சிகளினாலும் அநியாயமாய் கடாசும் வேலை நமக்கெதற்கு ? வார்த்தைக்கு வார்த்தை ; கருத்துக்குக் கருத்து என்று அறிக்கைப்போர் விடும் அக்கப்போரை நம் தலைவர்களிடம் விட்டு விட்டு - நாம் தல..தளபதி அபிமானிகளாய் மாத்திரமே தொடர்ந்திடுவோமே  ? Peace be with us ! See you around all..Bye for now !

P.S: ஜூன் இதழ்கள் புதன் காலையில் இங்கிருந்து புறப்படும் ! அன்றைய காலைப் பதிவில் "விடுதலையே உன் விலையென்ன ?" ட்ரைலர் பிரசன்னமாகிடும் ! 

Sunday, 24 May 2015

ஒரு "ஜொய்ங்" படலம் ...!

நண்பர்களே,
     
வணக்கம்! எல்லாப் பணிகளிலும் போலவே எங்களது  வேலைகளிலும் சில good days இருப்பதுண்டு ; பல not so good days-ம் இருப்பதுண்டு! மொழிபெயர்ப்பில் முதல் நாள் காலை கிட்டிடும் flow மறுநாள் காணாமல் போய் கடுப்பேற்றுவது சகஜம் ; டைப்செட்டிங்கில் ‘குண்டக்க மண்டக்க வேலைகள் நடைபெறும் நாட்களும் இருக்கத் தான் செய்யும்; சிகப்பு மையில் அங்கே இங்கே மொக்கையாய் பிழைதிருத்தங்களைக் குறி்த்து அனுப்பியும், அடுத்த பிரதியினில் அதே தவறுகள் தொடர்வதைப் பார்க்கும் போது ‘ஜிவ்வென்று உஷ்ணமானி உயர்வது நடைமுறை தான் ; பேப்பர் ஸ்டோர்களில் அந்தந்த மாதத்துக் காகிதங்களை வாங்கிட முயற்சிக்கும் போது பணம் புரட்டும் அத்தியாயங்கள் என் முகத்தை பெருந்தலைவர் ஸ்பைடரின் வதனத்தை விடவும் அழகாய் மாற்றிடுவது மாதாந்திர நிகழ்வே ; அச்சின் போது அடிக்க நேரிடும் அந்தர் பல்டிகள் இப்போதெல்லாம் பழகியே போச்சு ; அட்டைப்பட டிசைன்களுக்காக பொன்னனை துரத்தோ துரத்தென்று துரத்தி ஏகப்பட்ட ஜோடிச் செருப்புகளை தேய விட்டிருக்கிறோம் தான் ; கடனுக்குப் பிரதிகளை விற்று விட்டு கஷாயம் குடித்த குரங்குகள் போல வசூலுக்கு நடைபழகுவதும் நடைமுறையே...! ஆனால்- இவை அனைத்தையும் மறக்கச் செய்யும் ஆற்றல் மூன்றே விஷயங்களுக்கு உண்டு என்பது தான் saving grace

இதழ்கள் தயாராகிய பின்னே – அவை மொக்கைக் கதைகளாக இருந்தாலும் சரி – சூப்பர் ஹிட் ரகமாயிருந்தாலும் சரி; அவற்றைக் கையில் வைத்து இப்படியும், அப்படியும் மேலோட்டாய் புரட்டி அழகு பார்ப்பது முதல் சந்தோஷத் தருணம்! ஆழமாய் அதை ஆராய்ந்தால் பிழைகளோ / குறைகளோ கண்ணில் பட்டுத் தொலைத்து – அந்த முதல் பார்வையின் ஆனந்தத்தைப் போட்டுத் தள்ளி விடுமோ என்ற பயம் அடிமனதில் ஆட்சி செய்ய – தூரத்தில் வைத்து ‘ச்சே ..சூப்பர் லே...? என்று எனக்கு நானே பொன்னாடை போர்த்திக் கொள்ளும் சிறுபிள்ளைத்தனம் இந்த 31 ஆண்டுகளிலும் காணாமல் போயிருக்கவில்லை...!
     
அப்புறமாய் இதழ்கள் உங்களைச் சென்றடையும் தருணங்களில் – அவை நிஜமாகவே உங்களை impress செய்திருக்கும் பட்சத்தில் உங்களது ஆர்வமான விமர்சனங்களை, சிலாகிப்புகளை ரசிப்பது சந்தோஷ வேளை 2. அதிலும் ஆங்காங்கே கொஞ்சம் கூடுதல் கவனம் தந்து வசனங்களில் ஏதாவது extra fittings பொருத்தியிருந்து அவையும் கவனிக்கப்படும் போது ஒரு மெலிதான ‘ஜிலீர்’ feeling வியாபிப்பதுண்டு! “ஓவர் பீலிங்க்ஸ் உடம்புக்கு ஆகாது தம்பி ! என்ற கதையாக இன்னொரு பக்கம் ‘டின் கட்டும் படலம் ஏதாகினும் ஒரு காரணத்தின் பொருட்டு துவங்கிடுவதும் உண்டென்பதால் சடுதியில் புமிக்குக் கால்கள் திரும்பி விடுவதுண்டு !
     
எல்லாவற்றிற்கும் மேலாக – சந்தோஷ வேளைகளின் icing என்று நான் கருதுவது இந்த நிகழ்வுகளுக்கெல்லாம் நதிமூலமாய்- ரிஷிமூலமாய் இருந்திடும் புதுக்கதைகளின் தேர்வுக் கணங்களையே! சீக்கிரமே அரும்பிய மீசை கொண்டிருப்பினும் - பச்சாவாக; 17 வயதே ஆனதொரு எடிட்டராக (!!) இந்தப் பணிகளைத் துவக்கிய நாட்களில் தான் இந்த சந்தோஷத்தின் முதல் "ருசிபார்ப்புப் படலம்" வாய்த்தது! ஜேம்ஸ் பாண்ட் கதைகளை வாங்க முயற்சித்து – அது நடவாமல் போன பின்னே மாடஸ்டியை உறுதி செய்த கையோடு முதல் கதையின் bromide prints பதிவுத் தபாலில் வந்து சேர்ந்த பொழுது அவற்றைக் கையில் வைத்துத் தடவி, ரசித்த நாட்களுக்கு 31 வயதாகி விட்ட போதிலும் அந்த எண்ணங்களின் பசுமை துளியும் குறையவில்லை என்னுள் ! இரண்டே மாதங்கள் ஓடியிருந்த நிலையில் - மாடஸ்டியின் முதலிரண்டு கதைகளும் செம மாத்து வாங்கியிருந்த நிலையில்... ‘ச்சீய்... இந்தப் புள்ளையின் கதைகளை வாங்கியிருக்கக் கூடாதோ? என்ற கடுப்போடு சுற்றித் திரிந்த என் கண்களில் தானைத் தலைவரும்; ஏற்நெற்றி நாயகரும்; நியுயார்க்கைத் திருட முயற்சித்தவருமான திருமிகு.ஸ்பைடரின் கதை தட்டுப்பட்ட பொழுது அந்த சந்தோஷப் புல்லரிப்பை திரும்பவும் உணர்ந்தேன்! எடுத்த எடுப்பிலேயே டாப் கியர் தான் என்று ஸ்பைடர் ஊர்ஜிதம் செய்தான பின்னே, அவசரம் அவசரமாய் டெல்லிக்கு எனது தாத்தாவோடு பயணம் மேற்கொண்டு அங்கிருந்த Fleetway ஏஜெண்டின் அலுவலகத்தில் கிடந்த ஸ்பைடர் கதைகளைப் பார்த்த போது- பூட்டிக் கிடக்கும் வீட்டுக்குள் திருடப் புகுந்த ‘நந்தா பட கருணாஸ் போல டான்ஸ் ஆடாத குறை தான்! “எத்தனை கோடி இன்பம் வைத்தாய் இறைவா!!“ என்று உள்ளம் உற்சாகத்தில் துள்ளியது - அந்தக் கதைக் குவியலைக் கண்டு! வாயெல்லாம் பல்லாக நான் நிற்பதைப் பார்த்து விட்டால் ஏஜெண்ட் விலையைக் கூட்டித் தொலைத்து விடுவாரோ என்ற முன்ஜாக்கிரதையையும் மீறி என் முத்துப்பற்கள் அங்கே காட்சிப் பொருட்களாகத் தான் இருந்தன!
     
தொடர்ந்த மாதங்களில் frankfurt புத்தக விழாவிற்குள் திருவிழாவில் தொலைந்த பிள்ளையாகச் சுற்றித் திரிந்த பொழுது ஒரு non-stop ‘ஜொய்ங் நிலையில் தான் அடியேன் பயணித்தேன் என்று சொல்லலாம்! ‘ஜென் நிலை பற்றிக் கேள்விப்பட்டிருக்க வாய்ப்புண்டு; அதென்ன ‘ஜொய்ங் நிலை என்ற கேள்வி எழுகிறதா? சதா காலமும் ‘ஜொய்ங் என்று ஆகாசத்தில் பறக்கும் உணர்வோடே சுற்றித் திரிந்தால் அது ‘ஜொய்ங் நிலையில்லாது வேறென்னவாக இருந்திட முடியும்? திரும்பிய பக்கமெல்லாம் அட்டகாசமான கதைகள் ; நாம் துளி கூட சுவாசித்திரா ஒரு அகன்ற உலகம்; அள்ள அள்ளக் குறையவே முடியாத காமிக்ஸ் களஞ்சியம் ஒன்றுக்குள் தொபுக்கடீரென்று குதிக்கும் அதிர்ஷ்டம் வாய்த்த அந்த நாட்களில் ஒவ்வொரு புதுத்தொடரையும் துவங்கும் போதெல்லாம் நான் அந்த சந்தோஷப் பரவசங்களை உணர்ந்திருக்கிறேன் !
     
பின்நாட்களில் டெக்ஸின் வெற்றி இதழ்கள் ; லக்கி லூக்கை இரண்டே ரூபாய்க்கு வண்ணத்தில் கொணர முடிந்த சம்பவங்கள் ; அப்புறமாய் கேப்டன் டைகரின் தங்கக் கல்லறையை ஒரு நடுராத்திரி விமானப் பயணத்தின் போது ரசித்தது என பல ஜிலீர் moments தொடர்ந்தாலும்- நடுவே நேர்ந்த ஒரு வித தொய்வு என்னை மழுங்கச் செய்திருந்தது ! ஆண்டவன் புண்ணியத்தில் 2012ல் நமது Comeback Special-ஐ உருவாக்க எத்தனித்த நாட்கள் முதலாய் இந்த பிரிட்ஜூக்குள் குந்திடும் சந்தோஷ நாட்களும் மறுமலர்ச்சி கண்டன ! அதிலும் க்ரீன் மேனர் கதைகளை ; லார்கோவின் சாகஸங்களை ; பௌன்சரின் அதிரடிகளை முதல் தடவையாகக் கையில் printout-களாக ரசித்த சமயங்கள் ரொம்பவே ஸ்பெஷல் ! சரி... ‘தம் கட்டி இந்த மலரும் நினைவுகளை ஞாயிறு காலையில் களமிறக்கும் அவசியமென்னவோ என்று கேட்கிறீர்களா? 

கடந்த சில நாட்களை நமது மிஷினரி இறக்குமதிப் பிரிவின் பணியொன்றிற்காக ஐரோப்பாவில் செலவிட நேர்ந்தது! எப்போதும் போலவே செலவுகளை அந்த நிறுவனத்தின் தலையில் கட்டி விட்டு கிடைக்கும் முதல் சந்தர்ப்பத்தில் நமது கதைத் தேடல்களின் பொருட்டு படைப்பாளிகளைச் சந்திக்க அற்றுவிட்ட கழுதையாக நான் புறப்பட்டிருந்தேன்! அதிவேக ரயிலில் ஏறியமர்ந்தால் காலையில் ஹாலந்து ; ஒன்றரை மணி நேரப் பிரயாணத்தில் பெல்ஜியம் ; அங்கிருந்து இன்னொரு ஒன்றரை மணி நேரப் பயண தூரத்தில் பிரான்ஸ் என்பதால் – கிடைத்த ஒற்றை நாள் சைக்கிள் கேப்பில் முடிந்தளவுக்கு ரோடு போட முயற்சிக்க தீவிரமாயிருந்தேன். நமது பதிப்பகங்களுக்கு நான் எப்போதுமே ‘வாம்மா... மின்னல் என்ற பாணியில் வேளை கெட்ட வேளைகளிலும் ஆஜராகி அவர்களது குடல்களை உருவிடுவேன் என்பதும் தெரியும் என்பதால் முகம் சுளிக்காமல் காத்திருப்பது புதிய அனுபவமல்ல ! இம்முறை ஒன்றுக்கு மூன்றாய் பதிப்பகங்களை ஒரே நாளில் நான் சந்திக்க முடிந்ததும் சரி; இந்தாண்டின் இதுவரையிலான அவர்களது ஆக்கங்களின் பிரவாகத்தினுள் மூழ்கியதும் சரி; புதிய பதிப்பகம் ஒன்றினில் நமக்குக் கிட்டிய வரவேற்பும் சரி- புகைக்க ஹூக்கா பைப்போ; அதை எடுத்துத் தர இடுங்கிய கண்ணழகி யின் லியோ இல்லாமலும் கூட வானத்தில் சஞ்சாரம் செய்யும் புளகாங்கிதம் (!!) கிட்டியது ! 

Seven & more donkeys அகவைகளைத் தொடும் வேளைகளில்- ஒரு விதமான ‘த்சௌ... ஏற்கனவே பார்த்த வேலை தானே..? புதுசாய் இதிலென்ன இளிப்பு வேண்டிக் கிடக்கிறது? என்ற ரீதியில் ஒரு பெரிய மனுஷத் தோரணையை maintain பண்ணிடச் சொல்லி தலை பாசாங்கு நாடகத்தை அரங்கேற்றுவது சகஜமே! ஆனால்- அந்த விறைப்பையும், பாசாங்கான முறுக்கையும் மீறி படைப்பாளிகளோடு நேரம் செலவிடும் ஒவ்வொரு முறையும் தொண்டைக்குழி வரைக்கும் ஒரு வித நிறைவு ததும்புவதை இந்த வியாழனன்று திரும்பவும் ஒரு முறை உணர முடிந்தது! அதிலும் அந்தப் புதிய பதிப்பகத்தில் எனக்கொரு guided tour தந்தார்கள். கதையிலாகாவிலிருந்து- ஓவியப் பிரிவு- வர்ணப் பிரிவுகள் வரையிலும்! ஒவ்வொரு ஓவியரும் பணியாற்றுவதை அருகிலிருந்து பார்க்க முடிந்த போது தான் இந்த எல்லையில்லா உலகின் நிஜமான ஆற்றலாளர்களின் முழுப் பரிமாணங்களை உணர முடிந்தது! ஒரு வெற்றுக் காகிதம் சில பல மணி நேர உழைப்பின் பின் உலகை மயக்கும் பேசும் சித்திரங்களாய் உருமாற்றம் காண்பதைப் பார்த்த போது- “ஷப்பாடி“ என்ற பெருமூச்சு மட்டுமே சாத்தியமானது! ஏதேதோ மனக்கோட்டைகளையும் நம்மைப் பற்றி நாமே வளர்த்திருக்கக் கூடிய இறுமாப்புகளையும் தரைமட்டமாக்க இது போன்ற அனுபவங்கள் பெரிதும் உதவிடுவது தான் கலப்பில்லா நிஜம்! எங்கோ வசிக்கும் இந்த ஜாம்பவான்களின் நிழலில் நாம் குளிர் காயக் கூட ஒரு வரம் வாங்கியிருக்க வேண்டுமென்பதை உணர முடிந்தது; கைகுலுக்கி விட்டு, அடுத்த பதிப்பகத்தைப் பார்க்க ரயிலைப் பிடிக்க ஓட்டம் பிடித்த போது ஏழரைக் கழுதைகளில் ஒரு சில காணாமல் போய்விட்டது போலொரு feeling! சரி.. அது எந்தத் தொடர் ? - எந்தப் பதிப்பகம் ? - என்ற சஸ்பென்ஸை மட்டும் இன்னும் ஒரேயொரு வாரத்திற்கு அனுமதியுங்களேன்- ப்ளீஸ்! முறைப்படி contract அடுத்த சில நாட்களுக்குள் நம் கைக்குக் கிட்டியான பின்னே பெவிகாலை வாயிலிருந்து கழுவிடுவது உத்தமம் என்பதால் தான் இந்த முன்ஜாக்கிரதை முத்தண்ணா  அவதாரம்!

அதே போல- வரவிருக்கும் நமது கார்டூன் ஸ்பெஷலுக்கான கதைத் தேர்வுக்களத்தில் நான் இதுவரை வண்டி வண்டியாய் கதைகளை உலவ விட்டு வேடிக்கை பார்த்து வருவதும் ஒரு அட்டகாசமான அனுபவமாகயிருந்து வருகிறது! இம்முறை பார்க்க நேரிட்ட சில பல புதிய கதைகளையும் இதற்குள் நுழைத்தாலென்ன என்ற சிந்தனை! சில வேளைகளில் மெனுவில் தட்டுப்படும் அத்தனை ஐட்டங்களையும் பார்த்து கடவாயில் நயாக்ரா ஓடும் அல்லவா ? –அதைப் போலத் தான் இந்த கார்ட்டூன் விருந்தில் ‘ஏக் தம்மில் எல்லாவற்றையும் பரிமாறிட முடியாதா ? என்பது போலான ஆதங்கம் என்னுள் ! சரி... இப்போதைக்கு இதை மட்டும் சொல்லி வைக்கிறேன்- கா.ஸ்பெ.யில் மொத்தம் 4 கதைகள் / நாயகர்கள்...! விலை ரூ.200/- முழு வண்ணத்தில்! "ஐநூறு-ஆயிரம்" என்று விலைகளைப் போட்டு மீண்டுமொரு தாக்கு தாக்கிட தற்காலிகமாய் நம்மிடம் தம்மில்லை என்பதால் ரொம்பவே ‘மெகா இதழாக எதிர்பார்த்துக் காத்திருந்த நண்பர்கள் ஏமாற்றம் கொண்டிருக்கலாம்; அடுத்த மாதம் காத்திருக்கும் ‘தல திருவிழாவிற்குத் தயாராவதிலேயே தாவு தீர்ந்து வருகிறது! அது மட்டுமின்றி ஆகஸ்ட் தான் நமது மறு ஆண்டின் கதை finalization-களின் தருணமாக கடந்த 2 ஆண்டுகளுமே அமைந்து வந்திருக்கிறது! So- அந்த நேரத்தில் இன்னமும் ஒரு முரட்டு இதழின் பணிகளுக்குள் ஐக்கியமாகிக் கிடந்து நமது focus-ஐ சிதறச் செய்ய வேண்டாமே என்றும் பார்த்தேன்! ஆனால் 4 கதைகள் கொண்ட இந்த கார்ட்டூன் ஸ்பெஷல் நிச்சயம் ஒரு கலக்கல் இதழாக அமையவிருப்பது உறுதி!
     
சரி- துபாய்; உஸ்பெகிஸ்தான் என்ற பறக்கும் சிந்தனைகளிலிருந்து இங்கேயிருக்கும் உளுந்தூர்பேட்டையில் தரையிறங்குவோமா guys - இம்மாத இதழின் அடுத்த preview சகிதமாய் ? இதோ ஒன்றரையாண்டுகளுக்குப் பின்பாய் மறுவரவு காணும் ஜில் ஜோர்டனின் “துணைக்கு வந்த தொல்லை“ யின் அட்டைப்பட first look! இது இன்னமும் பூர்த்தியடையா  டிசைன் என்பதால்- பின்னட்டையில் கொஞ்சம் பட்டி-டிக்கரிங் காத்துள்ளது! ஒரிஜினல் டிசைன்- நமது improvements சகிதம் என்ற சமீப பாணி இம்முறையும் தொடர்கிறது ! பாருங்களேன் - ஒரிஜினலையும், நமது version-ம்...!



கதையைப் பொறுத்தவரை- ரிப்போர்ட்டர் ஜானி பாணியிலான துப்பறியும் களங்களோ; C.I.D. ராபின் பாணியிலான மர்ம முடிச்சுகளோ ஜல்லாரின் armoryல் எதிர்பார்த்தல் விவேகமாகாது! அதே போல கார்ட்டூன் பாணிச் சித்திரங்கள் கொண்ட தொடரிது என்பதற்காக பக்கத்துக்குப் பக்கம் சிரிப்பு வெடிகளை எதிர்நோக்கியிருப்பதும் வேலைக்கு ஆகாது! சுலபமாய் படிக்க; ஜாலியாய் ரசிக்க; கண்களுக்கு இதமான வர்ண / சித்திர பாணிகள் உள்வாங்கிட இதனை ஒரு வாய்ப்பாக எடுத்துக் கொண்டால்- you wouldn’t be disappointed! 

இதோ- அவரது உட்பக்கத்தின் ஒரு teaser! ஜரூராய் பணிகள் நடந்து வருகின்றன- மே இறுதியில் இதழ்கள் மூன்றையும் அனுப்பும் விதமாய்! அவ்வப்போது நான் ஊர் சுற்றல்களை மேற்கொள்வதைத் தவிர்க்க இயலாதெனும் போது கடைசி நிமிடக் கூத்துக்கள் எப்போதும் போல இம்மாதமும் அரங்கேறுகின்றன! ஆனால் அது தான் நமக்குப் பரிச்சயமே- ஆண்டாண்டு காலமாய் !மீண்டும் சந்திப்போம் guys! Have fun! Bye for now !

Saturday, 16 May 2015

புயலும்..தென்றலும்...இடியாப்பமும்...!

நண்பர்களே,

வணக்கம்! புயலுக்குப் பின்னே அமைதி என்ற கதையாக – ஏப்ரலின் இறுதியில் நமது வேங்கைத் தலைவரின் மின்னும் மரண அதளத்திற்குப் பின்பாக தேமே என்று வெளியான நார்மல் இதழ்கள் ஒருவிதமான anti-climax-ஆக அமைந்துள்ளது போல் எனக்குப் படுகிறது! பழமைக் காதலர்களுக்கு நமது குற்றச் சக்கரவர்த்தியும், ஸ்டைலான ஜானி நீரோவும் ஆறுதல் தந்திருக்க – இன்றைய தலைமுறைக் கதைகளின் பிரதிநிதிகளாகக் களமிறங்கிய மர்ம மனிதன் மார்டின் & விண்ணின் வேங்கை லாராவும் இரு complete contrasts என்று சொல்லலாம்! கிறுகிறுக்கச் செய்யும் complex கதை பாணி மார்ட்டினின் டிரேட்மார்க் எனில் – சீரான நேர்கோடே லாராவின் அடையாளமாக (இதுவரையிலாவது) உள்ளது ! கற்பனைகளின் உச்சம் கனவுகளின் குழந்தைகள் என்றால் – நடந்து முடிந்த நிஜங்களின் ஒரு poetic சித்தரிப்பு தானே  விண்ணில் ஒரு வேங்கை

என் கண்ணோட்டத்தில் எல்லாமே பொன்குஞ்சுளாகத் தான் தெரிகின்ற போதிலும் – ஒரு down to earth வாசகனென்ற கூலிங் கிளாஸை மாட்டிக் கொண்டு இது போன்ற இதழ்களை (சு)வாசிக்கும் பொழுது லேசானதொரு நெருடல் எழுவதை நான் ஒத்துக் கொண்டே தீர வேண்டும்! Yes –மார்டின் கதைகள் சுலபக்களங்களாக ஒரு போதும் இருந்திடப் போவதில்லை என்பதை நாம் அறிவோம் தான் – இருந்தாலும் இது மாதிரியான கற்பனைகளின் உச்சங்களில் நமக்கு முழுத் திருப்தி தானா ? என்ற கேள்விக்குப் பதில் சொல்லத் தெரியவில்லை! அதிலும் கடந்த பதிவினில் மார்டினாரின் கதைக்கு இதுவரையிலும் மூன்றல்லது, நான்கு விமர்சனங்கள் வந்திருந்தாலே ஜாஸ்தி என்பதைக் கவனிக்கும் போது - நம்முள் எத்தனை பேர் அதற்கென நேரம் ஒதுக்கினார்களோ - எத்தனை பேர் என்றேனும் ஒரு மழை நாளில் படித்துக் கொள்வோமே என ஓரம் கட்டினார்களோ என்று தெரியவில்லை ! ஒரேயொரு இடியாப்ப சாகஸத்தைக் கண்டு மிரண்டு போனதன் knee-jerk reaction ஆக இதைப் பார்த்திடாமல் – தொடரும் காலங்களில் இது போன்ற offbeat தொடர்களைத் தொடர்ந்திடல் ஓ.கே. தானா ? என்ற எனது தயக்கத்திற்கான விடைகளைத் தேடிப் பார்ப்போமா ? நமது தற்போதைய active நாயகநாயகியர் பட்டியலை ஒருவாட்டி நினைவலைகளுக்குள் கொணர்ந்து நிறுத்துவது இங்கே அவசியமென்று நினைக்கிறேன் ! அவர்களை இரண்டு அல்லது மூன்று பட்டியல்களுக்குள் அடைத்திடலாம் என்பேன்:

பட்டியல் 1: – Surefire 'ஹிட்' ஹீரோக்கள்:
  • டெக்ஸ் வில்லர்
  • லக்கி லூக்
  • லார்கோ வின்ச்
  • சிக் பில்
  • வேய்ன் ஷெல்டன்
  • C.I.D. ராபின்
  • பௌன்சர்
  • கேப்டன் டைகர்
  • மாடஸ்டி பிளைஸி (!!)
  • மதியில்லா மந்திரி
பட்டியல் 2: – Good – but not super-good ரக நாயகர்கள்:
  • XIII
  • கமான்சே
  • டைலன் டாக்
  • மேஜிக் விண்ட்
  • இளம் டைகர்
  • ப்ளுகோட் பட்டாளம்
  • ரிப்போர்டர் ஜானி
  • தோர்கல்
பட்டியல் 3: - மதில் மேல் பூனைகள்(சிலருக்கு ஓ.கே.; பலருக்கு no-no..!)
  • சாகஸ வீரர் ரோஜர்
  • ஜில் ஜோர்டன்
  • மர்ம மனிதன் மார்ட்டின்
  • ஜூலியா
  • ரின் டின் கான்
  • டேஞ்சர் டயபாலிக்
மேற்படிப் பட்டியலில்களில் அவரவர் ரசனைகளுக்கேற்ப லேசான இடமாற்றங்கள் அவசியமாகத் தோன்றிடலாம்ஆனால் இந்தத் தரம்பிரித்தலில் பெரும்பான்மைக்கு உடன்பாடேயிருக்கும் என்ற நம்பிக்கை எனக்குள்ளது! எனது கேள்விகளென்பது இவையே :
  1. Variety அவசியம் என்ற வேட்கையில் நாம் அகலமாய் வீசும் தேடல் வலைகளில் சில தருணங்களில் சிக்குவது திமிங்கலமெனில்; சில வேளைகளில் சிக்குவது அலங்காரமான கோல்ட் பிஷ் ! வரும் காலங்களில் variety மீதான நமது மோகத்தைக் கொஞ்சமாய் மட்டுப்படுத்திக் கொண்டு – உறுதியான ஹிட் நாயகர்களின் கதைக் கிட்டங்கிகளிலிருந்து மட்டும் சரக்கை வெளியிலெடுப்பது சரிப்படுமா? (அந்த prime பட்டியலில் லார்கோ; பௌன்சர் ஆகியோரின் கதைவரிசைகளில் எஞ்சியிருப்பவை சொற்பமே என்பதும்; கேப்டன் டைகரின் கையிருப்பு nil என்பதும் நினைவில் கொள்ள வேண்டிய சங்கதி!)
  2. பட்டியல் # 2ல் உள்ள நாயகர்களில் யாருக்கேனும் புரமோஷன் அவசியமென்று சொல்வீர்களா? And யாருக்கேனும் பட்டியல் 3-க்குப் பதவியிறக்கம் செய்திட பரிந்துரைப்பீர்களா?
  3. பட்டியல்-3 ன் அங்கத்தினர்களில் யாருக்கேனும் ஒட்டுமொத்த கல்தா உசிதமென்று நினைக்கத் தோன்றுகிறதா? அல்லது ஆண்டுக்கொரு தடவை என்பது போல பட்டும், படாமலும் இவர்களுக்கு வாயப்பளிப்பது ஓ.கே. தானா?
  4. பெருங்காய டப்பாக்களாய் – நேற்றைய வெற்றிக்கதைகளின் மவுசில் இன்று மிதமான கதைகளோடு வண்டியோட்டும் நாயக / நாயகியரை எவ்விதம் கையாளலாம்? 'சச்சக்... சச்சக்...' என்று போட்டுத் தள்ளுவதா? அல்லது collection-ன் பொருட்டேனும் அவை தொடர்ந்திட வேண்டும் என்று நினைக்கத் தோன்றுமா?
  5. சும்மாவே சும்மா – இதுவொரு கற்பனையான scenario மாத்திரமே! ஓராண்டு – ஒட்டுமொத்த நமது நாயக / நாயகியரை ஓரம் கட்டி விட்டு – ஒட்டு மொத்தமாய் புது வரவுகளைக் கொண்டு வண்டியை ஓட்டினால் எவ்விதமிருக்குமென்று நினைக்கிறீர்கள்? No லார்கோ... No டெக்ஸ்... No ஷெல்டன்... ஆண்டின் 12 மாதங்களும் புது வரவுகள்! என்றால் அது கல்லைக் கட்டிக் கொண்டு கிணற்றுக்குள் குதிக்கும் யுக்தியாக இருக்குமா? – அல்லது சுவாரஸ்யத்தைக் கிளப்பும் ஒரு தடாலடி மார்க்கமாக அமையுமா ? Your thoughts on this please? (நிற்க: இது ஒரு கற்பனை மட்டுமே; so-  பௌன்சர்களாய் ரௌத்திரம் பழகிட வேண்டாமே ப்ளீஸ்!)

2016க்கான திட்டமிடல்கள் ஏற்கனவே துவங்கி விட்டுள்ள நிலையில்; புதிய பதிப்பகங்கள் பலரோடும் நாம் அளவளாவி வரும் நிலையில்- நமது ரசனைகளை அவ்வப்போது ஊர்ஜிதம் செய்து கொள்ளும் பொருட்டே மேற்படிக்  கேள்விகள்! So - ஆண்டுக்கொரு முறை இதே ரீதியிலான கேள்விகளை நான் எழுப்புவதை எண்ணி முழித்திட வேண்டாமே ?

Moving on- ஜூன் மாதம் 3 இதழ்கள்; எல்லாமே கலரில் என்பதால் இம்முறை b&w நாயகர்கள் உங்கள் கூரியர் கவர்களில் இருந்திடப் போவதில்லை ! சீரியஸான சமீப மாதங்களின் இறுக்கத்தைத் தளர்த்த வரவிருக்கும் ப்ளுகோட் பட்டாளத்தை இந்த வார preview-ல் பார்த்திடுவோமா? தங்கம் தேடிய சிங்கம் ப்ளுகோட் கதை வரிசையில் ஆல்பம் # 26! சென்றாண்டின் ஏதோவொரு தருணத்தில் படைப்பாளிகளின் ஆபீஸில் இருந்த சமயம் அங்கிருந்த ஸ்கூபி-ரூபி கட்-அவுட்டின் அருகில் நின்று ஒரு பெண் புகைப்படம் எடுத்துக் கொண்டிருந்ததைப் பார்க்க முடிந்தது. ப்ளுகோட் ரசிகர்களுக்கென உள்ளதொரு blog-ல் ஏதோ தகவல்கள் வெளியிடும் பொருட்டு அந்த போட்டோ session நடந்து கொண்டிருந்ததென பின்னர் அறிந்து கொண்டேன். இது வரை (ஆங்கிலத்தில்) Cinebooks வெளியிட்டுள்ள ப்ளுகோட் கதைகள் நீங்கலாக- அத்தொடரில் இருக்கக்கூடிய டாப் கதைகள் என்னவாகயிருக்குமென்ற கேள்வி எனக்குள் இருந்ததுண்டு! அதனை அன்றைக்கு நான் கேட்டு வைக்க- போட்டோவுக்கு போஸ் கொடுத்துக் கொண்டிருந்த பெண்ணிடம் அதை திசைதிருப்பி விட்டனர் – அந்த யுவதி தான் ப்ளுகோட் கதைகளில் expert என்பதால்! So அவர் அனுப்பிய 4 ஆல்பங்களின் பெயர்களை அடித்தளமாக வைத்துக் கொண்டு நெட்டில் முடிந்தளவு ஆராய்ச்சிகளை மேற்கொண்டேன் நான்! அந்தத் தேடலில் முதலிடம் பெற்ற கதை தான் ‘Quebec Gold என்ற இந்த சாகஸம் ! பொதுவாக இந்த ரசனை விஷயங்களில் பிரான்கோ-பெல்ஜிய ரசிகர்கள் ரொம்பவே இளகிய மனம் படைத்தவர்கள் என்பது எனது அனுபவப் பாடம். நாம் கழுவிக் கழுவி காக்காய்க்கு ஊற்றிய சில கதைகளுக்கெல்லாம் அவர்கள் 4 5 மார்க் கொடுத்திருந்தது உண்டு ! So- ரசனைகளில் நாம் ரொம்பவே கறார் என்பதைத் தெரிந்து வைத்திருந்த நிலையில் அவர்களது பரிந்துரைகள் எத்தனை தூரம் நமக்கு சரிப்பட்டு வருமோ என்ற சந்தேகம் இல்லாமலில்லை ! ஆனால் கதையின் பிரெஞ்சு மொழிபெயர்ப்பு வந்த சமயமே இதுவொரு அழகான கதையென்பது ஊர்ஜிதமானது. மாமூலான வடக்கு-தெற்கு யுத்தகளமென்று இல்லாது ஒரு வித்தியாசமான பின்னணியில் கதை நகர்கிறது! ஸ்கூபியும்-ரூபியும் சிரிப்பலைகளை வெளிப்படுத்த நிறையவே scope இருக்க- விறுவிறுப்பாய் செல்லும் இந்தக் கதையின் அட்டைப்பட first copy இதோ : (சிற்சிறு திருத்தங்கள் ; பின்னட்டையில் வர்ணனைகள் இன்னும் உண்டு)

ஒரிஜினல் ராப்பரே பிரமாதமாய் இருப்பதால் அதனை நோண்டும் அவசியமின்றி அப்படியே பயன்படுத்தியுள்ளோம். பின்னட்டை மாத்திரம் நமது கைவண்ணம்! And இதோ- உட்பக்கத்தின் டீசர்! வழக்கம் போல ‘பளிச் வர்ணங்களில்- ரசித்துப் படிக்கும் விதத்தில் அமைந்துள்ளது!
Further ahead- ஜூலையின் டெக்ஸ் மேளாவிற்குப் பரபரப்பாய் தயாராகி வருகிறோம். மாலையப்பன் போட்டுள்ள டிசைன் அழகாய் புன்னகைக்க, பொன்னனும் தன் பங்கிற்கு முயற்சிகளைத் தொடங்கிட- the best will be chosen! கதைகளைப் பொறுத்த வரை - டெக்ஸ் ரசிகர்களுக்கு உதடுகளும், தொண்டையும் புண்ணாகப் போவது உறுதியென்று தோன்றுகிறது- விசிலடிக்க அவர்களுக்குக் காத்துள்ள சந்தர்ப்பங்களைப் பார்க்கும் போது! அதிலும் நிறைய ஆக்ஷன் ; அளவாய் செண்டிமெண்ட் ; குழப்பமில்லாக் கதைக்களம் என்று பயணிக்கும் ஓக்லஹோமா 340 பக்கக் கதையின் போது சத்தியமாக தப்பட்டைகள் கிழிந்திடப் போகின்றன ! தலைவரின் ‘முரட்டுக் காளை’; ‘எஜமான்’; ‘சிவாஜி படங்கள் அவ்வப்போது உங்கள் மனத்திரைகளில் ஓடவிருப்பதால் – this should be a real treat ! நெய்வேலிப் புத்தக விழாவில் பங்கேற்க நாம் தொடுத்துள்ள விண்ணப்பம் இந்தாண்டாவது ஏற்கப்படும் பட்சத்தில்- நிலக்கரி நகருக்கு நமது வருகையை அறிவிக்க இந்த மெகா-இதழ் ஒரு அட்டகாசமான விசிட்டிங் கார்டாக அமைந்திடக் கூடும்! நம்பிக்கையோடு காத்துள்ளோம் !

தெரிந்த டெக்ஸ் இதழ் ஓ.கே. ; இன்னமும் என்னவென்று தெரியாத ‘கார்ட்டூன் ஸ்பெஷல் பற்றிய விபரங்கள் என்னவோ? என்ற உங்கள் mind voice கேட்கத் தான் செய்கிறது! என்னளவில் கதைகளைத் தேர்வு செய்தெல்லாம் முடித்து விட்டு - படைப்பாளிகளின் இறுதி தலையசைவுக்காகக் காத்துள்ளோம் ! Tintin’ வருகிறாரா ? ‘Asterix’ வருகிறாரா ? எனற கேள்விகளோடு அலைபாய்ந்திருக்கும் நண்பர்களுக்கு "சாரி..not for now !" என்பதே பதில் ! அந்த அசாத்தியப் படைப்புகள் பக்கமாய் நாம் தலை வைக்க இன்னமும் நிறையவே வளர்ந்திடத் தேவையென்பதால் பொறுமையோடு காத்திருக்கத் தேவைப்படும் ! சீராய் இன்னும் சில ஆண்டுகளும்; இன்னும் பல நாயகர்களின் பட்டியல்களும் நமக்கு சாதகமாகிடும் சமயம் - எல்லாமே எட்டும் தூரத்திலிருக்கப் போவது உறுதி ! காத்திருப்போமே அது வரையிலும் See you around folks! Bye for now!

P.S : நான் மேலே எழுப்பியுள்ள வினாக்களுக்கு மறவாது பதில்கள்  பதிவிடுங்களேன்  - ப்ளீஸ் ! 2016-ன் அட்டவணைகள் ஒரு shape பெற்றிடும் வேளையிது  என்பதால்  - your inputs could make a difference ! Thanks !