Powered By Blogger

Saturday, October 29, 2016

தீப ஒளியும்...ஒரு சந்தோஷச் சேதியும் !

நண்பர்களே,
            
வணக்கம். ‘அதோ வருது.... இதோ நெருங்கி விட்டது‘ என்று வெவ்வேறு காரணங்களுக்காக, வெவ்வேறு விதமான எதிர்பார்ப்புகளை நம்முள் விதைத்திருந்த தீபத் திருநாள் இதோ புலர்ந்தும் விட்டது! ‘திடும்‘; ‘திடும்‘ என்று எழும் ஓசைகளும், ‘ஊஊஷ்ஷ்‘ என்ற சீற்றச் சத்தங்களும் சந்து பொந்தையெல்லாம் நிறைத்து உற்சாகமான தீபாவளிக் கொண்டாட்டங்களைப் பறைசாற்றுகின்றன ! நம் பங்குக்கு, இரவுக் கழுகாரும், டீமும் முழுவீச்சில் அதிரடி நடத்தும் தீபாவளி மலரின் மார்க்கமாய் சின்னதொரு சரவெடியைக் கோர்த்துவிட்ட சந்தோஷத்துடன் மனமார்ந்த தீபாவளி வாழ்த்துக்களைச் சொல்லிக் கொள்கிறோம்! Have a wonderful & safe Diwali all!

நல்ல நாளும் பொழுதுமாய், ஆளாளுக்குச் சொந்த ஊர்ப் பயணம்; குடும்பங்களோடு புதுப் பட outing ; டி.வி.யில் பட்டிமன்ற லயிப்புகள் என்று பிஸியாக இருக்கும் இந்த வாரயிறுதியில் - ‘அது வந்துடா பேராண்டி... அந்தக் காலத்தில் எப்படியிருந்தோம் தெரியுமா ?‘ என்ற ரேஞ்சில் இன்னமுமொரு விசாலமான ப்ளாஷ்பேக்கை எடுத்து விட்டு உங்களை நான் கொலையாய்க் கொல்வதாகயில்லை ! மாறாக- நமது இந்த நெடும் பயணத்தின் ஒரு வெகு சமீப மைல்கல் தருணத்தைப் பற்றிச் சொல்லி விட்டு I am ஜுட்!

ஆண்டாண்டு காலமாய் இந்தக் காமிக்ஸ் துறையில் நாமுள்ளோம் தான் ; மூன்று தலைமுறைகளை இந்தப் பயணம் பார்த்து வருகிறது ; வண்டி வண்டியாய் இதழ்களை வெளியிட்டுள்ளோம் தான் ! ஆனால்- நமது முயற்சிகளை “2012க்கு முன்” & “2012க்குப் பின்” என்று வரலாறு (ஹி! ஹி! ஹி!) பிரித்துப் பார்க்குமென்பது உறுதி ! இந்த இரண்டாம் வருகையின் போது - பெரிய சைஸ்; வண்ணம்; தயாரிப்பில் இயன்ற முன்னேற்றங்கள் என்பதோடு கதைக் களங்களிலும் ஒரு புதுத்தேடல் இருப்பதை நாமறிவோம் ! இவற்றிற்கெல்லாம் உங்களது ஆரவாரமான பாராட்டுக்களும், சிலாகிப்புகளும் தொடர்ந்து இருந்து வருவதில் இரகசியமில்லை ! ஆனால் வெகு சமீபமாய் இவற்றிற்குக் கிட்டியுள்ளதொரு அசாத்திய அங்கீகாரம் - நம் அனைவருக்கும் பெருமை சேர்க்கும் ரகத்திலானது!

‘ஆலையிலா ஊருக்கு இலுப்பைப்பூ சர்க்கரை‘ என்ற கதையாக - நமது அந்நாட்களது பாக்கெட் சைஸ்கள் & நியூஸ் பிரிண்டில் b&w கதைகளும் உங்களின் வாஞ்சைகளுக்கு உகந்தவைகளாகவே இருந்து வந்துள்ளன ! நிஜத்தைச் சொல்லப் போனால் - ‘பழசா? புதுசா?‘ என்ற கேள்வியை இன்றைக்கு முன்வைத்தாலும் உங்களுள் ஏராளமானோர் - அந்நாட்களது ஆக்கங்களுக்கே ‘ஜே‘ போடுவீர்கள் என்பதை நானறிவேன் ! ஆனால் நமது குறுகிய காமிக்ஸ் வட்டத்தைத் தாண்டிய வேறு எவரும் அன்றைய நமது இதழ்களுக்கொரு இரண்டாவது பார்வையை நல்க ஆர்வம் காட்டியிருந்ததாக எனக்கு நினைவில்லை ! ‘இவை தான் நாங்கள் வெளியிடும் இதழ்கள் !‘ என்று பந்தாவாய் ஒரு ஸ்பைடரையோ; ஆர்ச்சியையோ நான் நீட்டினால் - படைப்பாளிகளில் முக்கால்பங்கினர் சின்னதொரு செயற்கையான புன்னகையோடே- ‘Nice!’ என்று சொல்லிக் கொள்வார்கள். என் தலை அந்தப் பக்கமாய் அகன்ற மறுகணமே அவற்றைக் குப்பைக்கூடைகளுக்கு அனுப்பியிருப்பார்கள் என்பதில் எனக்குச் சந்தேகங்கள் இருந்ததில்லை ! வெளிநாட்டினர் ஏன் ? - உள்ளுர்களிலேயே ஒரு லேண்ட்மார்க் புக்ஷாப்பிலோ; ஹிக்கின்ம்பாதம்ஸிலோ; இண்டியா புக் ஹவுஸிலோ நமது இதழ்களைப் பார்க்கும் போது ‘ஓஹோ! இது தான் உங்க ‘ஓஹோ புரொடக்ஷனோ?‘ என்ற மாதிரியே ஒரு லுக் விடுவதை நான் பல தடவைகள் அனுபவத்தில் கண்டிருக்கிறேன் ! ஆனால் அத்தனைக்கும் பிறகும் நமது படைப்பாளிகள் நம்மைக் கைவிடாது - தொடர்ந்து கதைகள் தந்து வந்தது எந்தச் சாமியின் புண்ணியமோ- சத்தியமாய்த் தெரியாது ! ஆனால் post 2012- நிலவரமே தலைகீழ் எனலாம்!

வழு வழு ஆர்ட் பேப்பரில் ; பளா பளா வண்ணத்தில் ; ஒரு தெளிவான சைஸோடு நாம் வலம் வரத் துவங்கிய நாள் முதலாய் - காமிக்ஸ் அபிமானமிலா புதியவர்கள் கூட நின்று நமது இதழ்களை ரசித்து வருவதை ஏகப்பட்ட புத்தகவிழாக்களில் கவனிக்க முடிந்துள்ளது ! அதையெல்லாம் விடப் பதிப்பகத்துறையில் பழம் தின்று கொட்டை போட்ட ஜாம்பவான்கள் பலரின் விழிகளிலும் ஒரு ஆச்சர்யம் தெறிப்பதை உள்ளுக்குள் சத்தமில்லாமல் ரசித்திருக்கிறேன் ! நம் மீதும், காமிக்ஸ் ரசனை மீதும் கொண்டுள்ள பிரியத்தின் காரணமாய், சில பல குறைகளை நீங்கள் ஒதுக்கி விட்டு பாராட்டுக்களை அள்ளித் தெளிப்பது இயல்பே ! ஆனால் இதே துறையிலுள்ள - இந்தச் சிரமங்களைப் புரிந்து வைத்திருக்கும் சக பத்திரிகையாளர்கள் வியப்புக் கொள்ளும் போது - அதனை ஒரு மெகா compliment ஆக எடுத்துக் கொள்வேன் ! சரி - நம்மூர் பாணிகளுக்கு இதுவொரு மேல்நோக்கிய மாற்றமே என்றாலும் - மேற்கத்திய நாடுகளின் தரங்கள் முன்பு இப்போதும் கூட ஜுஜுப்பிக்களே என்பதை நிச்சயமாய் மறுக்கப் போவதில்லை நான் ! ஆனால் நமது படைப்பாளிகளே கூட நம்மின் இந்த மாற்றங்களை- ‘அடடே!‘ என்று ரசிக்கத் துவங்கியிருப்பது நமது பயணப்பாதைக்கொரு பெட்ரோமேக்ஸ் வெளிச்சம் என்பேன் ! அத்தகையதொரு தருணத்தில் துளிர் விட்டது தான் இந்தப் பதிவிற்கானப் பின்னணிக் காரணம்!

இந்த ஆண்டின் துவக்கப் பகுதியினொரு மதியப் பொழுது அது ! பாரிசிலிருக்கும் நமது படைப்பாளிகளின் அலுவலகத்தில், அதிசயமாய் ஒரு செம relaxed சந்திப்புக்கு வாய்ப்புக் கிட்டியிருந்தது. பொதுவாகவே நான் ‘விசிட்‘ அடிக்கவிருக்கிறேன் எனில் - என்னென்ன பேசிடத் தேவையிருக்குமோ அவை அனைத்தையும் தயாராக வைத்திருப்பார்கள் ! ‘வாம்மா... மின்னல்‘ என்ற வேகத்தில் நான் ஆஜராகிட, லொட லொடவென மூச்சு வாங்காமல் பேசி விட்டு, திடுபுடுவென புறப்பட்டு விடுவேன் என்பது அவர்களுக்குத் தெரியும் ! நான் அத்தனை ‘ஆணி பிடுங்கும் பிஸி‘ என்பதை விடவும் - நமக்கென மெகாப் பரிவோடு ஒத்தாசை செய்து வரும் படைப்பாளிகளின் நேரத்தைத் தேவையின்றி ஸ்வாஹா செய்த பாவம் வேண்டாமே ! என்ற ஜாக்கிரதையுணர்வு தான் எனது ‘மின்னல் மனிதன்‘ அவதாரத்தின் பின்னணி! ஆனால் அன்றைய பொழுதுதோ அவர்களே ஜாலியாய் கொஞ்சம் அரட்டையடிக்கும் மூடில் இருக்கிறார்கள் என்பது புரிந்தது ! ‘அட்ரா சக்கை‘ என்ற துள்ளலோடு அவர்களைப் பேச அனுமதித்து விட்டுப் பராக்குப் பார்க்கத் தொடங்கினேன் ! ஊர்க்கதை, உள்ளுர்க்கதை என்றெல்லாம் பேசி விட்டு, நமது “இரத்தப் படலம்” மெகா b&w தொகுப்பை தனது மேஜையோரத்திலிருக்கும் ததும்பி வழியும் அலமாரியின் மேலிருந்து எடுத்தார் ! நன்றாகவே பழுப்பேறி விட்டிருந்தது அந்த நியூஸ் பிரிண்ட் இதழ் ! ஆனாலும் அதனை ஒரு சந்தோஷப் பார்வை பார்த்து விட்டு- “ஓவியர் வில்லியம் வான்ஸ் இதனில் 2 பிரதிகள் கேட்டு வாங்கினார் !” என்று ஜாலியாகச் சொன்னார் ! நான் பிரமித்துப் போனது போல முகத்தை வைத்துக் கொண்டேன் - ஏனெனில் கடந்த 3 ஆண்டுகளில் மட்டும் இதே விஷயத்தை என்னிடம் ஒரு நாலைந்து தடவைகளாவது சொல்லியிருப்பார் ! ஆனால் இன்னமும் என்னைப் பார்க்கும் போதெல்லாம் அந்தத் தலையணை பருமன் இதழின் ஒரு வசீகரம் அவரையுமறியாது உற்சாகம் கொள்ளச் செய்யத் தவறுவதில்லை ! பேசிய கையோடு நமது “மின்னும் மரணம்” வண்ண இதழையும் அருகில் வைத்துக் கொண்டு- ‘you have come a long distance!” என்றார் ! நான் சட்டி, பெட்டியைக் கட்டிக் கொண்டு வந்திருக்கும் பயண தூரத்தை விடவும், நமது காமிக்ஸ் பயணத்தில் கடந்திருக்கும் தூரத்தைத் தான் அவர் குறிப்பிடுகிறார் என்பதால் வாயெல்லாம் மொச்சைக் கொட்டைப் பற்களானேன் ! கிட்டவே கிடந்த லார்கோ; சுட்டி லக்கி, XIII வண்ண இதழ்களையும் புரட்டிக் கொண்டே “ஆசியா முழுவதுமே தரம் கூடிச் செல்லும் காலத்தில், நீங்கள் மாத்திரமே பின்தங்கி நின்றது சற்றே வருத்தம் தந்தது தான் ; ஆனால் இப்போது தேறி விட்டீர்கள் ! You are doing o.k.!” என்றார். சீனாவில் வெளியாகும் லக்கி லூக் வண்ண இதழ்கள் அவர் மேஜையின் இன்னொரு ஓரத்தில் குந்திக் கொண்டிருந்ததை நான் ஏற்கனவே பார்த்திருந்தேன் ! நாமெல்லாம் பெருமூச்சு மட்டுமே விடக்கூடியதொரு தரத்தில் சீனப் பதிப்பகம் அமர்க்களப்படுத்தியிருந்தது ! அவர்களது விலைகளும் அதற்கேற்ற உச்சத்தில் இருப்பது எங்கள் பரஸ்பர கவனங்களுக்கு ‘டிமிக்கி‘ கொடுத்திருக்கவில்லை ! மெதுவாகப் பேச்சு அந்தப் பக்கமாய் பயணம் செய்தது!

”ஒரு யூரோவுக்கும் குறைவான விலையில், இத்தனை சின்ன சர்குலேஷன் வைத்துக் கொண்டு எப்படித்தான் தாக்குப் பிடிக்கிறீர்கள் ? இந்த சீனப் பதிப்பைப் பாருங்களேன்- விலையும் ஒப்பீட்டில் அதிகம் & they sell much much more than you do !” என்று சொன்னார்கள் ! “அடேய் கடன்காரா... எங்களுக்கு ராயல்டியாக நீ தரும் பணம் இங்கே பேரீச்சம்பழம் வாங்கத் தான் சரிப்படும்! என்ற புகார் வாசிக்கும் தொனியல்ல அது ! மாறாகக் கடந்த 30 வருடங்களாய் அவர்களுக்குப் பரிச்சயமானதொரு முகம் - இன்னும் சற்றே வளமாய் தொழிலில் கால் பதித்து நின்றால் சந்தோஷமாக இருக்குமே என்ற பரிவும், ஆதங்கமும் கலந்ததன் வெளிப்பாடு என்பதைச் சுலபமாய்ப் புரிந்து கொண்டேன் ! மந்தகாசமாய் ஒரு புன்னகையைப் பதிலாக்கி, வழக்கம் போல நமது பக்கத்து விற்பனைச் சங்கடங்களை லேசாகக் கோடி காட்டிவிட்டு நம்மிடமே காலம் காலமாய் அச்சகம் உள்ளதால் தயாரிப்புச் செலவுகளில் மிச்சம் பிடிக்கும் சாத்தியங்கள் ஓரளவுக்கு உண்டு என்பதையும் சொல்லி வைத்தேன் !

லேசாய் சிந்தனை வயப்பட்டவர், “எங்கள் தேசக் கலாச்சார மேம்பாட்டு மையங்கள், உலகின் சிலபல முக்கிய இடங்களில் உள்ளன ! எங்கள் மொழி சார்ந்த படைப்புகளுக்கு அவர்கள் சில சமயங்கள் ஏதாவதொரு விதத்தில் ஒத்தாசை செய்திடக் கூடுமென்று நினைக்கிறேன்!” என்றார் ! “ஓஹோ...?” என்று கேட்டுக் கொண்டு வேறு ஏதோ சமாச்சாரங்களைப் பேசிவிட்டு விடைபெற்றேன் ! அவர் குறிப்பிட்டிருந்த விஷயத்தைப் பற்றிப் பெரிதாய் அதன் பின்னர் சிந்திக்க நேரமும் இருக்கவில்லை ; ஞாபகமும் இருக்கவில்லை ! நாட்களும், மாதங்களும் விறுவிறுவென்று ஓட்டம்பிடிக்க, மே மாதம் புலர்ந்திருந்தது. பொதுவாக ஜனவரியில் உங்கள் சந்தாக்கள் + சென்னைப் புத்தக விழாவின் விற்பனை வரவுகளென்று ஆரோக்கியம் காட்டும் நமது வங்கிக் கணக்கானது, ஆண்டு மலர் வெளியாகும் ஜுலையின் போது டி.பி. பேஷண்ட் போல காட்சி தரத் தொடங்கும் ! ஆகஸ்டில் ஈரோட்டுப் புத்தக விழா கொஞ்சமாய் க்ளுகோஸ் ஏற்றித் தர, அதன் பின்னே கோவை, மதுரை என்று சிறுசிறு வைட்டமின் டானிக்குகளை உள்ளே தள்ளிக் கொண்டே டிசம்பர் வரை வண்டியை தள்ளிக் கொண்டே போன கதையாகயிருப்பது வாடிக்கை ! ஆனால் இம்முறை சென்னை வெள்ளங்கள் ; புத்தக விழாவின் மட்டுப்பட்ட விற்பனை காரணமாய் மே மாதமே நமது வங்கிக் கணக்கு கள் குடித்த குரங்கு போல தடுமாறத் தொடங்கியிருந்தது ! அப்போது தான் பாரிசின் அந்த மதிய வேளையில் எனக்குச் சொல்லப்பட்டிருந்த அறிவுரை லேசாக மண்டையில் பதிவாகத் துவங்கியது. விறுவிறுவென்று அவருக்கே ஒரு ஈ-மெயில் தட்டி விட்டு, இது தொடர்பாய் யாருக்குத் தொடர்பு கொள்வதென்று கேட்டு வைத்தேன் ! தலைநகரத்திலுள்ள பிரெஞ்சுத் தூதரகத்திலேயே மையம் இருப்பதாகப் பதில் கிட்டியது ! என்ன எதிர்பார்ப்பது என்ற ஐடியா துளியும் இல்லை என்றபோதிலும், நமது சமீப ப்ரான்கோ-பெல்ஜிய இதழ்கள் சகலத்திலும் ஒரு பிரதி வீதம் - மொத்தமாய் சேகரித்து ஒரு அழகான பார்சலாக்கினேன். காக்கைக்குத் தன் இளவல்கள் என்றைக்குமே 916 kdm ரகம் தான் என்றாலும் – ஒரு 4 ஆண்டு உழைப்பின் பலன்களை ஒட்டுமொத்தமாய் மேஜைமீது குவித்துப் பார்க்கும் போது எனக்கே லேசான மலைப்பு எழத் தவறவில்லை ! அந்த மெகா கத்தை இதழ்களோடு சின்னதொரு கடிதத்தையுட் இணைத்திருந்தேன் - நமது 1985 முதலான பிரெஞ்சுக் காமிக்ஸ் நேசங்கள் பற்றியும் ; நாமிதுவரை கைகோர்த்து வரும் பிரபல பிரெஞ்சுப் பதிப்பகங்கள் பற்றியும் எழுதி ! “எங்களது இந்தப் பதிப்புகளை உங்களது நூலகத்தில் ஒரு சிறு அங்கமாக்கின் பெருமிதம் கொள்வோம் !” என்றும் எழுதியிருந்தேன் ! DTDC கூரியரில் பார்சலை அனுப்பி விட்டு மாமூலான பணிகளுக்குள் ஐக்கியமாகியிருந்தேன் !

10 நாட்கள் கழித்துப் புதியதொரு முகவரியிலிருந்து ஒரு மின்னஞ்சல் வந்திருந்தது ! அவ்வப்போது ஐரோப்பியக் காமிக்ஸ் சேகரிப்பாளர்களிடமிருந்து “ரோஜர் இதழ்கள் வேண்டும் ; சுஸ்கி விஸ்கி வேண்டும் !” என்று மின்னஞ்சல்கள் வருவது வழக்கமென்பதால் அந்தப் பிரெஞ்சுப் பெயர் தாங்கிய மின்னஞ்சல் என் புருவங்களை உயரச் செய்யவில்லை ! ஆனால் அதனை வாசிக்கத் தொடங்கிய போது - மின்சார துவாரத்திற்குள் நமது மாயாவிகாரு விரல் விடும் போது என்ன உணர்ந்திடுவாரோ அதனை நானும் உணர்ந்திட முடிந்தது ! "Dear Mr.Vijayan, உங்கள் கடிதமும், அந்தக் காமிக்ஸ் குவியலும் கிடைத்தன ! And we are simply stunned!” என்று துவங்கிய அந்த மின்னஞ்சலின் வரிகளைப் படிக்கப் படிக்க நமது சுட்டிப் புயல் பென்னியைப் போல நாலுமாடிக் கட்டிடங்களைத் தாண்டிக் குதிக்கக் கூடிய ஆற்றல் எனக்கு வந்ததைப் போல உணர்ந்தேன் !! “இந்தியாவின் ஒரு மூலையில் அமர்ந்து கொண்டு எங்கள் மொழியின் ஒரு அற்புத அங்கமான காமிக்ஸ்களை இத்தனை அழகாய் இத்தனை காலமாய் வெளியிட்டு வருகிறீர்களென்பது just incredible ! எங்களால் இயன்ற விதங்களில் உங்களுக்கு உதவிடத் தயாராகயிருப்போம்!” என்று தொடர்ந்தது அந்த மின்னஞ்சல் ! அந்தத் துறையின் நிர்வாகியே ஒரு காமிக்ஸ் ரசிகை என்பதால் - அவரது பால்யத்தில் பார்த்தும், படித்தும், ரசித்துமிருந்த எண்ணற்ற தொடர்களை ஒட்டுமொத்தமாய் இங்கு தமிழில் பார்க்க நேரிட்டது அவருக்கொரு திகைப்பான அனுபவமென்பது புரிந்தது !

தொடர்ந்த நாட்களில் நமது விற்பனை விபரங்கள் ; நமது இத்தனை கால அனுபவங்கள் ; தமிழக பதிப்புலக நிலவரங்கள் என சகலம் பற்றியும் மின்னஞ்சல்களும், புள்ளி விபரங்களும் குறுக்கும். நெடுக்கும் பயணமாகத் தொடங்கின ! பாரிஸிலிருக்கக் கூடிய அவர்களது தலைமையகத்துக்கும் அந்த மின்னஞ்சல்கள் copy அனுப்பப்பட, நமது நிலை பற்றியதொரு ஆய்வை அவர்கள் மேற்கொண்டார்கள் ! ஒரு சுபயோக சுபதினத்தில்- “உங்களின் புதிய முயற்சிகளுக்கு எங்கள் மையம் இயன்ற உதவிகளைச் செய்திடுவதென்று தீர்மானித்துள்ளது! உங்களது அடுத்த புதிய இலக்கு என்னவோ?” என்று கேட்டார்கள்! அது நமது Million & More ஸ்பெஷல் பற்றிய திட்டமிடலில் நானிருந்த தருணம் என்பதால் - புது நாயகர் JEREMIAH பற்றியும்; நமது வலைப்பதிவின் 20 இலட்சம் + பார்வைகளைக் கொண்டாடும் விதமாய் அதனை வெளியிடவிருப்பது பற்றியும் விளக்கினேன். “தயாரிப்புச் செலவுகளுக்கு உதவிட ; விளம்பரம் செய்திட உதவிட - எங்கள் மையத்தின் சார்பில் ஒரு தொகையினை மான்யம் போல உங்களுக்குத் தருவதென்றுத் தீர்மானித்துள்ளோம்! ஏற்கனவே நீங்கள் செய்து வரும் முயற்சிகள் அதன் போக்கில் பயணிக்கட்டும் ; புதிதாய் / சற்றே பெரிதாய் நீங்கள் திட்டமிடும் போது எங்கள் ஆதரவு உங்களுக்கு நிச்சயம் இருந்திடும் !” என்று அந்த அதிகாரபூர்வமான கடிதம் பாரிஸ் அமைச்சகத்திடமிருந்து கிட்டிய போது - 1985-ல் பச்சைக் குழந்தையாய் இந்தப் பிரான்கோ-பெல்ஜியக் காமிக்ஸ் உலகினுள் கால் பதிக்கக் கர்ணம் போட்டுத் திரிந்த நாட்கள் என் கண் முன்னே நிழலாடின ! சிட்டாயப் பறந்து விட்ட இந்த 30+ ஆண்டுகளில் நாம் பார்த்துள்ள பிரெஞ்சுத் தொடர்கள் தான் எத்தனை- எத்தனை ? அந்த தேசத்தோடும் ; அவர்களது படைப்புகளோடும் நமக்கு உருவாகியுள்ள அந்த ‘சங்கர் சிமெண்ட்‘ பந்தம் இன்றும் தொடர்வது நமது ரசனைகளுக்கொரு ஷொட்டு தானே ? And அதை நமக்குத் தந்திடும் தேசமே நம்மை இன்று அங்கீகரித்திருப்பது நம் அனைவரது தொப்பிகளிலும் ஒரு வண்மையான இறகல்லவா ? நமக்கு சாங்ஷன் ஆகியுள்ள தொகை நவம்பரில் கைக்குக் கிட்டிடும் ! தொகையின் அளவு எத்தகையாகயிருப்பினும்- அதன் பின்னுள்ள அன்பும், நட்பும், பாராட்டுக்களும் ஒரு மில்லியனுக்கும் அதிகமாகிடாதா ? Take a bow people ! இது உங்கள் அனைவரின் ஒட்டுமொத்த ரசனைகளுக்குமான பாராட்டுகளே ! உங்கள் பங்களிப்புகளின்றிப் போனால் - தண்டவாளமேது ? பயணம் தானேது ? 

So- ஜெரமையா தொடரை பிரெஞ்சு அரசின் அன்பான உதவியோடு தொடங்கிடவுள்ளோம் ! இந்த ஏற்பாடுகளெல்லாம் பாதி வழியில் நமக்குக் கிடைத்தவை என்பதால் - Super 6-ன் முதல் இதழாக லக்கி லூக் Classics-ஐக் களமிறக்கி விட்டு, அதன் பின்பாக MILLION & MORE SPL-ஐ தயாரிப்பதெனத் தீர்மானித்துள்ளோம் ! ஈரோட்டுப் புத்தக விழாவின் வாசக சந்திப்பின் தருணத்தில் நான் லேசாகக் கோடிட்டுக் காட்டியது இந்த விஷயத்தையே ! எல்லாமே திடமாகி, நடைமுறை காணும் வரை அதைப் பற்றி வாய் திறக்க வேண்டாமென்று இந்தச் சமாச்சாரத்தை ஜுனியர் எடிட்டரோடு மட்டும் பகிர்ந்திருந்தேன் ! சீனியர் எடிட்டருக்கே இந்தப் பதிவைப் படிக்கும் போது தான் விஷயம் தெரிந்திடும் ! பெவிகால் பூச்சை இந்த நல்ல நாளில் களைவதில் தப்பில்லை என்று தோன்றியதால் இந்தப் பதிவு !! ‘ஒத்தாசை செய்திட நாங்க உள்ளோம்!‘ என்று அவர்கள் சொன்னதற்காக - அவர்களது கதவுகளைத் தினமும் தட்டி நின்று ‘ஹி... ஹி‘ என்று மண்டையைச் சொரியப் போவதெல்லாம் நிச்சயமிராது ! அது பிரியத்தையும், மரியாதையையும் அடமானம் வைக்கச் செய்த முயற்சியாகிவிடும் என்பதில் எனக்குள் சந்தேகமில்லை ! So வழக்கமான நமது தடத்தில் வழக்கம் போலப் பயணிப்போம் ! ஏதேனும் புது முயற்சிகளின் தருணங்களில் இத்தகைய ஒத்தாசை கிடைப்பின் அதனையும் கூட பைக்குள் திணித்துக் கொள்ளாது - இது நாள் வரை நமக்குச் சாத்தியமாகிடா விளம்பரங்களின் பொருட்டு செலவிடாமென்றுள்ளோம் ! பார்க்கலாமே !!

Alrite guys !! “சின்னதொரு பதிவு” என்று ஆரம்பித்து விட்டு ஜீனியஸ் ஸ்மர்ஃப் போல நீளமாய், விஸ்தீரணமாய்  ; வேகமாய் ; விலாவாரியாய் ; விசாலமாய் ; மூச்சு விடாமல் ; மும்முரமாய் ; முத்தாய்ப்பாய் ; பேசிக் கொண்டே போகிறேன் ! இதற்கு மேலும் உங்களை இந்த வாரயிறுதியில் படுத்தி எடுக்காமல் புறப்படுகிறேன் ! மீண்டும் தீபாவளி வாழ்த்துக்கள் ! உங்கள் “கனவு இதழ்கள்” பற்றியும் ; புது இதழ்களின் விமர்சனம் பற்றியும் தொடரும் நாட்களில் இங்கு தொடர்வோமே?! Have a ball all! Bye for now!

And - இதோ - சந்தா A ஒன்றினை யாருக்கேனும் பரிசளிக்கவொரு வாய்ப்பு !! வழக்கம் போலொரு caption போட்டி !!

Tuesday, October 25, 2016

படப்பொட்டி புறப்பட்டாச்சு !

நண்பர்களே,

வணக்கம். ஊர்சுற்றும்  வேலைகள் என்னதான்  இருந்தாலும் கூட, நமது மாதாந்திர டெஸ்பாட்ச் தினத்திற்கு ஆபீசில் ஆஜராகி இருப்பதில் ரொம்பவே முனைப்பாக இருப்பேன் ! புத்தகங்களின் குவியலுக்கு மத்தியில் நம்மாட்கள் பேக்கிங் செய்யும் லாவகத்தை ரசிப்பதோடு - "ஆங்...இந்த டப்பாவுக்கு இன்னும் கொஞ்சம் டேப் ஓட்டுங்க ; இதிலே பெயர் தப்பா இருக்கு பாருங்க...; முடிஞ்ச பார்சல்களை ST-க்கு அனுப்பலியா  ? மெயின் ஆபீசுக்கா ? பிரான்ச் ஆபீசுக்கா ? - எங்கே அனுப்பப் சொன்னாங்க ?" என்று அவ்வப்போது சவுண்ட் கொடுப்பதில் அப்படியொரு சுவாரஸ்யம் கண்டிடுவேன் ! அந்த மாதத்துக் கதைகள் சூப்பர்-ஹிட்டா ? அல்லது மண்டையில் குட்டு வரவழைக்கப் போகும் மொக்கைகளா ? என்பதெல்லாம் அந்த நொடியில் மறந்து போய் ; எங்களது 30 நாள் உழைப்பின் பலனை உங்களிடம் காட்டும் ஆர்வமே மேலோங்கி நிற்கும் ! 

சின்ன வயதில் ஊர்கூடித் தேர் இழுப்பதை வேடிக்கை பார்ப்பதைவிடவும். தேரின் ஒரு ஓரத்தில் தொற்றிக் கொண்டு, ஒரு துண்டை இப்படியும், அப்படியுமாய் வீசிக் கொண்டே -"ஆங்..இங்கே தடியே போடுங்க...ஆங்..சக்கையை அங்கே வையுங்க...இழு..இழு..இழு,,,!!தள்ளு...தள்ளு..தள்ளு.."என்று குரல் கொடுக்கும் மேஸ்திரி போன்ற அந்த ஆசாமியைத் தான் பராக்குப் பார்த்து நிற்பேன் ! அந்தப் பழக்கமோ என்னவோ, பேக்கிங் வேலைகள் நடக்கும் பொழுது அலப்பரைகள் பண்ணும் ஆசை தொடர்கின்றது ! And இன்றைக்கும் அதற்கு விதிவிலக்கல்ல ! தீபாவளி மலர் தக தகவென்று காலையில் வந்திறங்க - ஆபீசில் அட்டை டப்பா மலைக்குள்ளே தான் இன்றைய பொழுது முழுவதும் தாண்டவமாடினோம் ! கூரியர் பார்சல்களின் சகலமும் மதியமே DTDC : STC : PFC ஆபீஸ்களில் தஞ்சம் புகுந்துவிட்டன ; அதே போல பார்சல்களும் இன்றே இங்கிருந்து கிளம்பிவிட்டன என்பதையும் உறுதி செய்து விட்டோம் ! So உங்கள் பக்கத்துக் கூரியர் நண்பர்கள் தான் இனி  மனது வைக்க வேண்டும், பட்டுவாடாக்களைத் தாமதப்படுத்திடாது ! 

தீபாவளிக்கு முன்பாகவே உங்கள் அனைவரிடமும் 'தல' யை ஒப்படைத்த திருப்தியில் - கார்டூனின் 'தல' ; மஞ்சள்சட்டை பென்சில்வீரன் லக்கியோடு அடுத்த சில நாட்களைக் கழிக்கத் தயாராகுகிறேன் ! SUPER 6 நேரமல்லவா ?!

நவம்பர் இதழ்கள் ஆன்லைனில் லிஸ்டிங் செய்துவிட்டோம் என்பதால் - தீபாவளி ஷாப்பிங் பட்டியலில் அவற்றையும் சேர்த்துக் கொள்ளலாமே ? (http://lioncomics.in/monthly-packs/250-november-2016-pack.html) பட்ஜெட்டில் மீதமிருப்பின், இருக்கவே இருக்கிறது 2017-ன் சந்தாக்களும் ! (http://lioncomics.in/2017-subscription/240-2017-subscription-abcde-tamilnadu-st-courier.html) அட்வான்ஸ் வாழ்த்துக்கள் all !!! Have a Cracking Diwali !!

Sunday, October 23, 2016

கனவும்...ஒரு கட்டை விரலும்..சில பல கோடிகளும்....!

நண்பர்களே,

வணக்கம். கூப்பிடு தொலைவில் தீபாவளி காத்து நிற்க, கடைவீதியெல்லாம் கலகலக்கும் கூட்டத்தில் அலை மோதுவதைப் பார்ப்பதே ஒரு சந்தோஷ அனுபவம் ! என்னதான் பிக்கல் பிடுங்கல்கள் இருந்தாலும், அவற்றையெல்லாம்  ஓரம் கட்டிவிட்டு, பண்டிகையின் வரவை எதிர்நோக்கிக் காத்திருப்பதும் ஒரு அவசியமான எதிர்பார்ப்பு தானன்றோ ? And நமது காமிக்ஸ் எதிர்பார்ப்புகளை பூர்த்தி செய்திட, பைண்டிங் அணியினர் ஞாயிறும் பணி செய்து வருகின்றனர் - வரும் செவ்வாய்க்கிழமைக்கு உங்கள் கூரியர்களை நாம் அனுப்பிட வேண்டுமென்பதன் பொருட்டு !! சில தினங்களுக்கு முன்பாய் நடந்த கோரமான அந்தப் பட்டாஸுக்கடை விபத்துப் பகுதியில் தான் நமது அட்டைப்படங்களின் மினுமினுப்பான foils அச்சிடும் பணியகம் உள்ளது ! விபத்து நாளன்று துண்டிக்கப்பட்ட மின்சாரம் ஒன்றரை நாட்களுக்கு அங்கே திரும்பிடவில்லை என்பதால், முடங்கிக் கிடந்த பணிகளை எண்ணிக் கைகளைப் பிசைவதைத் தாண்டி எதுவும் செய்திட முடியவில்லை !  ஆனால் எட்டுப் பேர் பரிதாபமாய் உயிர் இழந்த நிலையில்,  foils அச்சிடவில்லையே என்ற விசனங்களெல்லாம்  பெரியதொரு சமாச்சாரமாய்த் தெரியவில்லை !  "ஆகிற போது பணிகள் ஆகட்டும்" என்று விட்டுவிட்டேன் ! ஆனால் இது "தீபாவளி மலர்" எனும் பொழுது, தாமதமாய்த் தயாராகின் நமத்துப் போன பட்டாசாகிடும் என்று அந்த நண்பர் புரிந்துகொண்டு, இரவில் பணிமுடித்துக் கொடுக்க, பைண்டிங்கில் ஞாயிறும் வேலை நடந்தேறி வருகிறது ஜரூராய் !! தோள் தரும்  இது போன்ற நல்ல இதயங்கள் மட்டும் நம்மைச் சுற்றி   இல்லையெனில்  , ஒவ்வொரு அட்டவணையிலும் எங்கேனும் சறுக்கிப் பல்லை பதம் பார்த்துக் கொண்டிருந்திருப்போம்  !  

So தக தகக்கும் வர்ணத்தில் இரவுக் கழுகாரும், லியனார்டோ தாத்தாவும் ஜொலிக்க - இதோ இம்மாத கருப்பு-வெள்ளை அணியினர் ! C.I.D ராபினின் "வேதாள வேட்டையின்" அட்டைப்பட முதல் பார்வை இதோ ! நமது ஓவியரின் டிசைனுக்கு சற்றே வித்தியாசமான பின்னணி தந்தாலென்ன ? என்ற மகா சிந்தனை அடியேனுக்கு ஒரு நாள் உதிக்க, எங்கோ , எப்போதோ பார்த்திருந்த பாணியை நமது DTP அணியினைச் சார்ந்த கோகிலாவின் சகாயத்தோடு செயல்படுத்தியதன் விளைவே நீங்கள் இப்போது பார்த்திடும் அட்டைப்படம் ! "தலை தப்பிக்கும் ரகமா ?" என்பதை நீங்கள் தான் சொல்லியாக வேண்டும் ! கதையைப் பொறுத்தவரை - பெரியதொரு ஆர்ப்பாட்டமெல்லாம் இல்லாத நேர்கோட்டு கிரைம் த்ரில்லர் இது ! 

And இதோ - ஆண்டின் இறுதி மறுபதிப்பின் அட்டைப்பட preview ! 

நமது ஓவியரின் கைவண்ணமே இங்கும் - இம்முறை துளி கூட நமது நோண்டல்களின்றி ! ஒரிஜினலாகவே டிசைன் பளிச் என்று அமைந்துவிட்டதால் அதனில் பட்டி-டிங்கரிங் பார்த்திட நமக்கு ஆர்வம் எழவில்லை ! So கதைக்கு ஏற்றதொரு (புதிய) தோரணையில் நிற்கும் CID லாரன்ஸ் ஓ.கே.வா ? என்ற தீர்ப்பை எதிர்பார்த்திருப்போம் ! பின்னட்டைகள் இரண்டுமே கோகிலாவின் உருவாக்கங்களே  ! இந்தாண்டில் மறுபதிப்புகள் நிஜமாகவே செமையாய் ஸ்கோர் செய்திருக்கும் தருணத்தில் - இந்த இதழும் சோடை போகப் போவதில்லை என்று நிச்சயமாய் நம்புகிறோம் ! பழமை விரும்பிகளுக்கு இதோ இன்னுமொரு விருந்து ! If all goes well, செவ்வாய் பகலில் உங்கள் கூரியர்கள் எல்லாமே புறப்பட்டுவிடும் இங்கிருந்து ! And வலைப்பதிவினைத் தவறாது தொடர்ந்திடும் முகவர் நண்பர்களின் கவனத்துக்கு :  உங்களது பார்சல்கள் புதன்கிழமை இங்கிருந்து கிளம்பிடும் !  "செவ்வாயே எங்களுக்கும்  வேண்டுமென்று" நம் பணியாளர்களை தயைகூர்ந்து வறுத்து எடுக்க வேண்டாமே - ப்ளீஸ் ! Becos முதல்நாள் பைண்டிங்கிலிருந்து நமக்கு வந்து சேரும் பிரதிகள் சந்தாவின் எண்ணிக்கைக்கே சரியாக இருக்கும் !  ஒரு தினத்துப் பொறுமை ப்ளீஸ் !  

நவம்பரின் பணிகள் நிறைவுற்ற கையோடு - டிசம்பரின் இதழ்களின் இறுதிக் கட்டப் பணிகளுக்குள் குதித்தாயிற்று என்பதால் - தீபாவளி விடுமுறைகளுக்கு முன்பாகவே டிசம்பர் இதழ்கள் அச்சுக்குத் தயாராகி விடும் ! டிசம்பரில் 3 ரெகுலர் இதழ்களே எனும் போது - சமீபமாய் நாம் பழகி விட்டுள்ள அந்த "FOUR EACH MONTH " என்ற பார்முலா உதைவாங்கிடக் கூடும் என்பதால்  - அந்தக் குறையை நிவர்த்தி செய்திட SUPER 6-ன் முதல் இதழாக லக்கி லூக் CLASSICS அட்டகாசமாய் வந்திடவுள்ளது ! முன்சொன்னது போலவே - இதுவொரு வரிசைக்கிரம நம்பர் தாங்கிய, குறைவான பிரிண்ட் ரன் கொண்ட பதிப்பாகவே இருந்திடும் ! அது மட்டுமன்றி - நீங்கள் ஏற்கனவே ரசித்துள்ள அந்த 2 கதைகளை இன்னமும் அட்டகாசமாய் சுவாரஸ்யமாக்கிட, சிலபல எக்ஸ்டரா நம்பர்களை இணைக்கும் முஸ்தீபுகள் முழுவீச்சில் நடைபெற்று வருகின்றன ! இந்த எக்ஸ்டரா நம்பர்கள் இதழ்களை வாங்கிடவிருக்கும் ஒவ்வொரு முகத்தினிலும்  ஒரு அகலமான புன்னகையைக் கொணரப் போவது நிச்சயம் ! லக்கி லூக்கின் 70-வது பிறந்தநாள் ஆண்டின் இறுதி மாதத்திலாவது அவருக்கொரு tribute செய்திட முடிகிறதே என்ற மகிழ்ச்சி எங்களுக்கு !  இதை படிக்கும் கணமே "சூப்பர் 6-ன் முதல் இதழாக MILLION & MORE ஸ்பெஷல் வரலியா ? ஜெரெமியா வரலியா ?" என்ற கேள்விகள் உங்களுக்கு எழுந்திடும் பட்சத்தில் - "no worries ; கொஞ்சமே கொஞ்சமாய்ப் பொறுமை ப்ளீஸ் !" என்று மட்டும் சொல்லிடுவேன் ! அதன் பணிகள் மும்முரமாய் நடைபெற்று வருகின்றன ; and அந்த இதழ் சற்றே தாமதமாய் வெளிவந்திடுவதற்கு ஒரு அட்டகாசமான காரணமும் உள்ளது ! அதனை இப்போதே போட்டு உடைத்து விடாமல், இதழ் வெளியாகவிருக்கும் தருவாயில் சொல்வது இன்னமும் நயமாக இருக்கும் என்பதால் மௌனச் சாமியார் ஆகிடுகிறேன் இப்போதைக்கு ! 

SUPER 6 துவங்கிடும்  நேரம் முன்பதிவுகளைப் பார்த்துக் கொள்ளலாமென்று இதுவரை முனைப்புக் காட்டாது இருந்திருக்கக்கூடிய வாசக நண்பர்களே : இனி ஜாஸ்தி அவகாசமில்லை ! ஒரு வாரத்தினில் அச்சுக்குச் செல்லவிருப்பதால் இந்த மைல்கல் முயற்சிக்கு உங்கள் பங்களிப்புகள் இருந்திட வேண்டுமென்ற அவா இருப்பின், please do send in your subscription right away !  ஆன்லைனில் இதனைச் செய்திட நினைப்பின் : http://lioncomics.in/2017-subscription/197-the-super-6-pre-booking.html
போராட்டக் குழுவின் உக்கிரமான பதுங்கு குழி சிரசாசன SMS போராட்டத்தின் விளைவாய் மறுமலர்ச்சி கண்டிருக்கும் (!!) "சிங்கத்தின் சிறுவயதில்" பகுதியின் புண்ணியத்தில் - நானே மறந்து போயிருக்கும் சிலபல முந்தைய வெளியீடுகளைத் தேடித் துருவும் படலம் சமீபமாய் நடந்து வருகிறது ! துண்டும், துக்கடாவுமாய் அந்நாட்களது பாக்கெட் சைஸ் ; அதுக்கும் குட்டி சைஸ் என்று பழுப்புக் காகிதங்களிலான அந்த இதழ்களை பார்க்கும் போது கலவையான உணர்வுகள் ! பற்றாக்குறைக்கு இங்கே நமது வலைப்பதிவினில் வந்து பார்த்தால் -  சேலம் டெக்ஸ்விஜயராகவன் அந்நாட்களது தீபாவளி மலர்களை வரிசைப்படுத்தி இருக்க, கால் கட்டைவிரலில் ஒரு பரிச்சயமான நமைச்சல் தோன்றியது ! மண்டைக்குள் சிலபல சக்கரங்கள் சுழலும் சத்தம் லியனார்டோ தாத்தா பாணியில் எனக்கும் கேட்க - இதோவொரு கேள்வி உங்களுக்கு :

இன்றைய சூழலில் "ஒரு கனவு இதழ்"  என்று நீங்கள் உருவகப்படுத்துவதாயின் - அது என்னவாக இருக்கும் ? 

(இரத்தப் படலம் முழுத் தொகுப்பு - வண்ணத்தில்  என்பது நீங்கலாக ! அது நிச்சயிக்கப்பட்ட இதழே ; அதற்கான ஆண்டு எது ? என்பது மட்டுமே தீர்மானம் காணப்பட வேண்டிய விஷயம் ! So அதனை இங்கே கொணர வேண்டாமே - ப்ளீஸ் !)  உங்களது "கனவு இதழ்" நமது நாயக / நாயகியர் சார்ந்த தேர்வுகளாகவும் இருக்கலாம் ; மொத்தமாய் புதிதாய் - global புதியவர்களின் கதைகள் சார்ந்தும் இருந்திடலாம் ! "2000 பக்கங்கள் ; 3000 பக்கங்கள் !" என்ற ரீதியில் பீதியைக் கிளப்பாது - சற்றே நடைமுறைக்கு ஒத்து வரும் கனவுகளாய்  இருப்பின்,   அவற்றை நாங்களும் கண்டு பார்ப்பது முடிகிறதா ? சாத்தியங்களின் எல்லைகளுக்குள் இருப்பின் அவற்றை நனவாக்கிட முடிகிறதா ? என்று முட்டித்  தான்பார்க்கிறோமே ?!! கழுதை - கட்டை விரல்தான் எதற்கு உள்ளது?  - தொண்டைக்குழி நர்த்தனத்துக்கு உதவாது போனால் !! (அதற்காக - "SINISTER SEVEN - ஸ்பைடர் போடுங்க " என்று மட்டும் சொல்லி விடாதீர்கள் ; அழுதே விடுவேன் நான் !!) 

And இன்றைய கனவு - அடுத்த மாதத்து நனவாகிடும் என்றெல்லாம் எதிர்பாத்திட வேண்டாமே ப்ளீஸ்! தடையின்றி ஏகமாய்க் கதைகள் கிடைத்து வரும் இத்தருணத்திலும் உங்களுக்குள் ஏக்கங்களென்று ஏதேனும் நிஜமாக உள்ளனவா ? என்பதைக் கண்டறியும் brainpicking முயற்சியே இது என்று இப்போதைக்கு வைத்துக் கொள்ளுங்களேன் !  So இதற்கு பலன் தெரிய அவகாசம் நிறையவும் ஆகலாம் ; நம் சக்திகளுக்கு மீறிய கனவுகளாய் இருப்பின் அவை கானல்நீராகவே இருந்தும் போகலாம் என்பதை முதலிலேயே சொல்லி விடுகிறேன் ! "நான் மாங்கு-மாங்கென்று எழுதினேன் ; நீ அதைச் சட்டையே செய்யவில்லை !!" என்று பின்னாட்களில் துடைப்பத்தைத் தூக்கிடக் கூடிய நண்பர்களின் பொருட்டு இந்த disclaimer ! 

அப்புறம், போன வாரத்து "டெக்ஸ்-மாந்த்ரீகர்" caption போட்டியின்joint winners - ஈரோடு விஜய் & டாக்டர் ஹரிஹரன் ! 
Dr.Hariharan :
A: புனித மானிடோ, எங்கள் இரவுக் கழுகை காப்பாற்று  !
B: ஜில் பர டிம்பலக்கோ (புனித மந்திரம்)C: டைகர் ஜாக் அதிநவீன மருத்துவமனைனு சொல்லிருக்கும் போதே சுதாரிச்சுருக்கணும்.

Erode VIJAY :
A : விஷக்காய்ச்சலுக்கான மருந்துடன் வெள்ளி முடியார் விரைந்து வந்துகொண்டிருப்பதாக புகை சமிக்ஞை வந்திருக்கிறது!

B : வோ! வெள்ளிமுடியாரின் பசிதீர விருந்துக்குத் ஏற்பாடு செய்யுங்கள்!

தல : (மனதுக்குள்) அச்சச்சோ...! கொஞ்சூண்டு வறுத்தகறி வாசம் வந்தாலே அந்தப்பய விஷக்காய்ச்சல் மருந்தை வீசியெறிஞ்சுட்டு விருந்துக் குடிலுக்குள்ள பாய்ஞ்சுடுவானே...!!

வாழ்த்துக்களுடன் - இருவருமே ஆளுக்கொரு சந்தாவினை (B அல்லது C) யாருக்கேனும் வழங்கும் வாய்ப்பை அவர்களுக்குத் தருகிறோம் ! Congrats !!

அப்புறம் ஒரு சமீப வலைத்தள ரிப்போர்ட் இது - சீனியர் எடிட்டரின்கண்ணில் பட்டது :

உலகளவில் காமிக்ஸ் சேகரிப்பாளர்களின் மெக்காவாக இருந்து வரும் அமெரிக்காவின் சில பல ரெக்கார்டுகள் ஆட்டம் கண்டுள்ளன - ஒரு காரட் நிற மண்டை கொண்ட டின்டின் முன்னே ! ஜூன் 1938-ல் வெளியான முதல் சூப்பர்மேன் காமிக்ஸ் தான் வரலாற்றிலேயே அதிக விலை கொடுத்து வாங்கப்பட்ட இதழாக இருந்து வந்துள்ளது - அதாவது  இரண்டு ஆண்டுகளுக்கு  முன்பாக வரையிலும் ! 32 இலட்சம் டாலர்கள் ( 21.50 கோடி ரூபாய்) கொடுத்து சேகரிப்பாளர் ஒருவர் இந்த இதழை EBAY-ல் நடந்த ஏலத்தினில் வாங்கி இருந்தது ஒரு அசாத்திய சாதனையாக இருந்து வந்தது ! 
ஆனால் சமீப காலங்களில் பெல்ஜியத்தின் ஆதர்ஷப் புதல்வனான  டின்டினின் ஓவிய ஒரிஜினல்களில் பல ஏலத்தில் ஈட்டியுள்ள தொகைகள் கண்களை பிதுங்கச் செய்யும் விதத்தில் உள்ளன !! 1937 முதல் 1958 வரை வெளியாகிய டின்டின் ஆல்பம்களின் அட்டைப்பட ஒரிஜினல் டிசைன்கள் 36 லட்சத்துப் பதினெட்டாயிரம் டாலர்களுக்கு (24.25 கோடி ரூபாய் !!) விற்பனை கண்டு உலக சாதனை படைத்துள்ளன !! 
சேகரிப்பின் பொருட்டு ஜாக்பாட் அடித்திருக்கும் காமிக்ஸ் பட்டியல் இதோ ! 
இதோ - அந்த ACTION COMICS இதழை வாங்கிய குழுமத்தின் பிரதிநிதி !! 
அட..ஒரேயொரு சூப்பர் ஹீரோவுக்கே இந்த அலப்பரை என்றால் - ஒன்றுக்கு மூன்றாய் சூப்பர் ஹீரோக்கள் நிறைந்திருக்கும்   நமது சூப்பர் ஹீரோ சூப்பர் ஸ்பெஷல் இதழை யாராச்சும் சிலபல கோடிகளுக்கு வாங்கிடத் தயாராக இருப்பின் நானும் E-BAY-க்கு வருகிறேன் சாமியோவ் !! மீண்டும் சந்திப்போம் all !! Have a great Sunday !

Sunday, October 16, 2016

தாவித் திரியும் சிந்தனைகள் !

நண்பர்களே,
            
வணக்கம். மெலிந்த தேகங்கள் ; தொள தொள பனியன்... வெயிலில் உரமேறிய காபி நிறச் சருமம் ; பளீர் வெண்பற்கள் ; முதுகில் ஒரு நம்பர் ! மாரத்தான் ஓட்டங்களை டி.வி.யிலோ ; நேரிலோ நாம் பார்த்திருக்கும் பட்சத்தில் அதனி்ல் தவிர்க்கஇயலா வெற்றி பெற்றிடும் ஆப்பிரிக்க வீரர்களுக்கு நான் மேலே சொன்ன அடையாளங்கள் கச்சிதமாய்ப் பொருந்துவதைப் புரிந்திட முடியும் ! ‘விதியே‘ என்று சீராய் ஓடிக் கொண்டேயிருக்கும் மனுஷன்கள் - முடிவுக்கோட்டின் மஞ்சள் ரிப்பனைத் தூரத்தில் பார்த்த மறுகணமே புயலாய் உருமாற்றம் கண்டு செம ஓட்டம் எடுப்பதையும் பல தடவைகள் வாய் பிளந்து ரசித்திருக்கிறேன்! ‘எங்கிருந்து தான் அந்த திடீர் எனர்ஜி ஊற்றடிக்கிறதோ?‘ என்று மண்டைக்குள் கேள்வி ஓடும் ! ஆனால் இம்முறை அதற்கான பதில் எனக்கே லேசாகத் தெரிவது போலொரு ஃபீலிங் !

“2016” எனும் 12 மாதப் படலம் காத்திருக்கும் டிசம்பரோடு தான் நிறைவுபெறுகின்றதென்றாலும் எங்களைப் பொறுத்தவரை வருஷம் கிட்டத்தட்ட இப்போதே நிறைவானது மாதிரித் தான்!

- லயன் தீபாவளி மலர் – ஆச்சு!
- வேதாள வேட்டை – ஒரு நாள் வேலை மட்டுமே பாக்கி !
- லியனார்டோ – ஆச்சு!
- பனிக்கடலில் பயங்கர எரிமலை – ஆச்சு!

டிசம்பர் :
ஜேசன் ப்ரைஸ் (2) – எடிட்டிங் பணி பாக்கியுள்ளது !
-வானம் தந்த வரம்(ஸ்மர்ஃப்) – எடிட்டிங்  பணிகள் பாக்கி 
- நீதிக்கு நிறமேது (Tex) – ஆச்சு !

அட்டைப்படங்கள் சகலமும் எப்போதோ ரெடி ; இங்கும், அங்குமாய் சிற்சிறு நகாசு வேலைகள் மட்டுமே செய்து விட்டால் – டிசம்பரின் இதழ்களும் தயாராகி விடும் என்பது தலைக்குள் பதிவாகும் போதே ‘ஈஈஈஈஈஈ‘ என்றதொரு இளிப்பு முகம் முழுவதும் நிறைகிறது ! சமீபகாலத்து வழக்கப்படி இது இன்னுமொரு ஆண்டின் நிறைவு மட்டுமே என்ற போதிலும் - அந்த எல்லைக்கோடு கண்ணில் தெரியும் போது உள்ளே ‘ஜில்‘லென்று அடிக்கும் சாரலுக்குத் தான் ‘புளகாங்கிதம்‘ என்று பெயர் போலும் ! (ஹை !! ஆதலினால் அதகளம் செய்வீர்" க்கு அப்புறமாய் இந்த வார்த்தையை மறுபடியும் நுழைத்தாயிற்று !!

“அட மக்குப் பையா...” டிசம்பர் முடிவதற்கு முன்பாக SUPER 6-ன் முதல் இதழ் (லக்கி classics) காத்துள்ளது ; அப்புறம் பின்னாடியே 2017 எனும் அடுத்த நெடும்பயணமும் ஜனவரி மாதத்துச் சென்னைப் புத்தகவிழாவோடு தொடங்கவுள்ளது ! So பல்லைக் காட்டுவானேன் ?” என்று மண்டை ‘லா பாயிண்ட்டைப் பிடித்தாலும் – “இப்போதைக்குக் கொஞ்சம் ரிலாக்ஸ் பண்ணிக் கொள்கிறேனேடாப்பா!” என்ற பதில் தான் கிட்டுகிறது!

2017-ன் பக்கமாய் பார்வையை ஓடவிட்டால் - பிரெஞ்சு to ஆங்கில மொழிபெயர்ப்பு 100% முற்றுப்பெற்று, இந்த வாரம் முதல் 2018-க்குள் அடியெடுத்து வைத்திருக்கிறோமென்று சொன்னால் எனக்கே கொஞ்சம் ஓவராய்த் தோன்றுகிறது ! But those are the facts ladies & gentlemen ! அப்புறம் இத்தாலிய மொழிபெயர்ப்பு ஒரு 40% நிறைவு பெற்றிருக்கும் - அங்குள்ள 2 வெறித்தனமான ரசிகைகளின் புண்ணியத்தில் ! 224 பக்க டெக்ஸ் கதையினை ‘அவசரம்‘ என்ற ஒற்றை வார்த்தை மின்னஞ்சல்லைப் பார்த்த மறுகணத்தில் ஒரு வாரத்தில் முடித்துத் தூக்கி வீசும் திறனைக் கண்டு வாய்பிளக்கத் தான் முடிகிறது! So 2017-க்குள்ளும் ஏற்கனவே ரவுண்ட் கட்டிக் கொண்டிருக்கிறோமென்ற உணர்வே இதமாகவுள்ளது ! ஜுனியர் எடிட்டரின் புண்ணியத்தில் இப்போதொரு குரல் பதிவு app-ஐ ஃபோனில் போட்டு வைத்துக் கொண்டு, கூர்க்காக்களும், வேதாளங்களும் வீதியுலா போகும் சாமப் பொழுதுகளில் மொழிபெயர்ப்பினை பதிவு செய்து கொண்டேயிருக்கிறேன் ! வெளியிலிருந்து கேட்பவர்களுக்கு ஏதோ டிராமா ரிகர்சல் நடக்கிறது போலும் என்றும் தோன்றக் கூடும் ; அல்லது 'இது பூட்ட கேஸ் !' என்றும் படலாம் ! But கார்ட்டூன் கதைகளை மட்டும் எப்போதும் போல பேனா பிடித்து எழுதுவது ; தூய தமிழிலான சீரியஸ் கதைகளை voice record செய்து நம்மவர்களை டைப்செட் செய்யச் சொல்வது என்ற பாணி தான் இப்போது ! So பேப்பரும் மிச்சமாகிறது ; என் விரல் ரேகைகளும் இன்னும் கொஞ்சம் ஆயுள் நீட்டிப்புப் பெறுகின்றன !

“திரும்பிப் பார்க்கிறேன்” என்றொரு பதிவு போட்டு 2016-ஐ அலச இன்னமும் நேரம் நிறையவே உள்ள போதிலும் - சமீப ஆண்டுகளில் 2015 & 2016 நமக்கு landmark வருடங்கள் என்பதில் ஐயமேது ? இந்த 2 ஆண்டுகளின் output மட்டுமே 102 இதழ்கள் என்றால் எனக்கே லேசாகச் சுற்றுகிறது தலை ! இந்த எண்ணிக்கையில் மறுபதிப்புகளின் நம்பர் 30 என்பது ஒரு கணிசமான எண்ணமே என்றால் கூட- அவை நீங்கலாய் 24 மாத அவகாசத்தில் 72 புது (அல்லது புதுசு மாதிரியான பணிகளை அவசியப்படுத்தும்) இதழ்கள் எனும் போது- அத்தனையையும் தொய்வின்றி ரசித்தும், சிலாகித்தும் வரும் உங்களை எண்ணிக் காலரைத் தூக்கிவிட்டுக் கொள்ளாது இருக்க முடியவில்லை ! அதிலும் இந்த நடப்பாண்டில் டெக்ஸ் தனிச் சந்தா ; கார்ட்டூன் வழித்தடம் ; மறுபதிப்புகளுக்கு தனி ட்ராக் என்ற பிரிவுகளை உருவாக்கிய பின்னே பொதுவான வரவேற்பு எவ்விதமிருக்குமென்ற curiosity ரொம்பவே இருந்தது எனக்கு ! அதற்கான பதில்கள் கிட்டத்தட்ட தெரிந்திருக்கும் சூழலில் தோளிலிருந்ததொரு பளு இறங்கியதொரு உணர்வு ! என்னதான் ‘தல‘ நமக்குத் தலையாய நாயகரெனினும் “சர்வமும் நானே” என்று அவர் பறைசாற்றுவதை எத்தனை தூரம் நாம் ஏற்றுக் கொள்வோமென்ற சிறு தயக்கம் என்னுள் இருந்தது ! ஆண்டின் இறுதி stretch நெருங்கி நிற்கும் சமயத்தில் - ‘தல‘ மீதான வாஞ்சை கூடியுள்ளதைப் புரிந்து கொள்வதும் ஒரு சந்தோஷ அனுபவமே ! 

சரி, பின்னே பார்க்கிறேன் ; முன்னே பார்க்கிறேன் ! என்ற பிலாக்கனங்கள் போதுமென்பதால் - காத்திருக்கும் புது இதழ்கள் பக்கமாய்ப் பார்வைகளை ஓடச் செய்வோமா ? இதோ- நமது சோன்பப்டித் தாடித் தாத்தாவின் சாகஸம் (!) நம்பர் 2-ன் அட்டைப்பட முதல் பார்வை ! ஒரிஜினல் டிசைனை நமது டிசைனர் tweak செய்துள்ளார் ! பிரமாதமாக வந்துள்ளதாய் எனக்குத் தோன்றியது ! நீங்கள் என்ன நினைக்கிறீர்கள்?     

ஜீனியஸ் உறங்குவதில்லை” இதழினை மொழிபெயர்ப்பது ஜாலியான அனுபவமாக இருந்தது ! ஆங்காங்கே நகைச்சுவைகளின் பொருட்டு out of the way நான் ஜோடித்துள்ள வரிகள் ‘எக்ஸ்ட்ரா நம்பர்கள்‘ போல நண்பர்களுள் சிலருக்குத் தோன்றிடலாம் ! But trust me - இந்த மாதிரியானதொரு ஆல்பத்தில் பணியாற்றுவது சத்தியமாய் சுலபமான காரியமல்ல ! ஒவ்வொரு சிறுகதைக்கும் ; ஒவ்வொரு ஒற்றைப்பக்க gag-க்கும் நகைச்சுவை கோட்டா கணிசமாகவே இருந்திட வேண்டுமென்ற நமது பொதுவான எதிர்பார்ப்புகளுக்கு நியாயம் செய்திடல் சுலபமே இல்லை என்பதை இந்தக் கதையின் பணிநாட்கள் எனக்கு மீண்டுமொரு முறை ஞாபகப்படுத்தின ! தாத்தாவின் மீதான தீர்ப்பு உங்கள் கைகளில் கணம் ஜுரியாரே ! ஏதோ பார்த்துப் பண்ணுங்க !

அப்புறம் போன வாரத்துப் பதிவில்- இங்கே பதிவிடும் நண்பர்களின் அடையாளங்களை உறுதி செய்து கொள்வது பற்றிய topic-க்குத் துவக்கம் தந்திருந்தோமல்லவா ? தற்போதைய Blogger தளத்தில் கீழ்க்கண்ட வழிமுறைகள் மட்டுமே சாத்தியம் என்பது புரிகிறது!

1. நண்பர்களது ஈமெயில் ஐடிக்களைக் கோரிப் பெறும் வேளையில் அவர்களது ஃபோன் நம்பர் இத்யாதிகளையும் சேர்த்தே வாங்கிக் கொண்டு, அவர்களைப் பதிவிற்கு invite செய்வது வழிமுறை # 1 ! ஆனால் இந்த முறையில் சிக்கலென்னவெனில் நமது வலைப்பக்கத்தை பதிவு செய்திருக்கா casual வாசகர்கள் பார்த்திடவே முடியாது ! முழுக்க முழுக்கவே இதுவொரு closed க்ரூப்பாகவே செயல்பட்டிட முடியும் !

2.அல்லது கொஞ்ச காலம் முன்பாக நாம் பயன்படுத்திய disqus கமெண்ட் பாணிக்கு மாறிட வேண்டும் ! ஆனால் அதனில் உள்ள சிக்கலை நாம் ஏற்கனவே பார்த்து விட்டோம் - இதுவரையிலான முந்தைய பதிவுகள் சகலமும் காணாது போய் விடுமென்ற வகையில் ! So இது நிச்சயமாய் வேலைக்கு ஆகும் சமாச்சாரமல்ல !

3.அல்லது இந்த BLOGGER தளத்திலிருந்து நண்பர் கார்த்திக் சோமலிங்கா சுட்டிக் காட்டிய wordpress தளத்துக்குச் சட்டி, பெட்டிகளைத் தூக்கிக் கொண்டு கிளம்பிட வேண்டும் ! அங்கும் இந்த கமெண்ட் பில்டரிங் வசதி எவ்விதம் செயல்படுகிறது என்பதை சற்றே பொறுமையாய்ப் பார்த்திட வேண்டும் ! அதனில் வசதிகள் அதிகமென்பது உறுதியெனில் சலோ wordpress என்போம் ! ஆனால் இங்குள்ள பார்வை எண்ணிக்கைகள் தொடருமா, அல்லது அங்கே புதிதாய்ப் பிள்ளையார் சுழியிலிருந்து ஆரம்பித்தாக வேண்டுமாவென்பது தெரியவில்லை ! இந்த வாரம் முழுக்கவே தீபாவளி மலரின் இறுதிக்கு கட்டப் பணிகளுக்கும் நானும், ஜுனியர் .எ.வும்  மூக்கை நுழைத்துக் கிடந்தபடியால், இந்தப் புதுக் தல ஆராய்ச்சி சாத்தியமாகிடவில்லை !

4.வழிமுறை # 4 : இங்கேயே COMMENTS MODERATION ! உங்கள் பின்னூட்டங்கள் முதலில் எனது மின்னஞ்சலுக்கு வந்திடும் - அதனைப் பிரசுரிப்பதா ? வேண்டாமா ? என்ற தீர்மானத்தைக் கோரி ! So நீங்கள் பதிவிட்ட மறு கணமே இங்கே கமெண்ட்ஸ் பிரசன்னமாவது நடவாது ; சின்னதொரு கால அவகாசத்துக்குப் பின்னாகவே பிரசுரமாகும் ! இங்கே ராக் கூத்துக்களும், உடனுக்குடன் உங்களுக்குள் கச்சேரிகள் நடத்துவதும் சாத்தியமாகாது ! தவிர, நான் ஊரில் இல்லா நாட்களில் ரொம்பவே சிரமமாகிப் போய்விடும் ! இந்த ஆலமரத்துப் பஞ்சாயத்து ; ஜமுக்காளம் சொம்பு சமாச்சாரங்களுக்கும், ஜுனியருக்கும் தூரம் ஜாஸ்தி என்பதால் அவரை இதனுள் நுழைக்க முனைவது சரியாகாது ! So இதனை செயல்படுத்துவது கஷ்டமே !

5.Made to order - நம் தேவைகளுக்கு ஏற்ப ஒரு discussion page தனை உருவாக்கி  நமது வலைத்தளத்தில் இணைப்பது இதற்கொரு தீர்வாகுமா ? என்று நமது டாக்டர் பாலசுப்ரமணியனின் மைந்தரிடம் வரும் வாரத்தில் கேட்டாகணும் ! அது ஓ.கே. ஆகிடும் எனில் சூப்பர் !

So wordpress தளமாற்றம் அல்லது நமக்கே நமக்கொரு டிஸ்கஷன் பக்கமே தீர்வு என்று தோன்றுகிறது ! வரும் வாரத்தில் இது பற்றிய தீர்மானம் எடுத்திடுவோம் !

இப்போதைக்கு  இந்த பிளேட் போதுமென்பதால் - விடைபெறும் முன்பாக இலகுவான விஷயங்கள் பக்கமாய்ப் பார்வையை ஓட விடுவோமே ? சந்தா E-ன் தேடலில் நாம் பரிசீலித்த கதைகள் ஒரு வண்டி தேறும் ! விலை சார்ந்த வரையறைகள் ஒரு முக்கிய காரணமாகிப் போனதால் அவற்றுள் நிறையவற்றை ஓரம் கட்ட வேண்டிப் போனது - at least தாற்காலிகமாகவாவது ! ஆனால் அவற்றை உங்கள் கண்களில் காட்டும் ஆவல் மண்டைக்குள் 'கொய்ங்ங்க்க்' என்று ரீங்காரமிடுவதால் - இதோவொரு குட்டி சாம்பிள் மட்டும் ! ஆங்கிலத் திரைப்படங்கள் ; நாவல்கள் ; காமிக்ஸ் இத்யாதிகளில் ZOMBIES பற்றிய ஆக்கங்கள் நிறையவே உண்டு ! பாதி செத்த நிலையில் திரியும் இந்த "மிருதன்களை" சமீபமாய்த் தான் தமிழ் சினிமாவிலும் பார்த்திருக்கிறோம் ! இதோ - கிட்டத்தட்ட அந்தப் படத்தின் பாணியிலேயே உள்ளதொரு கதையிலிருந்து ஒரு ஸ்டில் ! சந்தா E - சீசன் 2 ஆரம்பிக்கும் பொழுது - இதனை முயற்சிப்போமா ? What say folks ?

And ரொம்ப நாளாகி விட்டதே ஒரு ஜாலியான caption போட்டியினைப் பார்த்து ?! அந்த வரலாற்றுப் பிழையை இன்றைக்குச் சரி செய்து விடுவோமா ? இதோ உள்ள இந்தப் படத்துக்குப் பொருத்தமாய் , நயமாயொரு வசனம் எழுதி அனுப்புங்களேன் ? வெற்றி பெறும் பேனாக்காரர் - சந்தா A அல்லது B அல்லது C -ஐ தேர்வு செய்து கொண்டு அவருக்கு வேண்டப்பட்ட  யாருக்கேனும் அன்பளிப்பாக்கிடலாம் ! Get cracking guys !! 

See you around !! Bye now !!
கிளம்பும் முன்பாய் ஒரு  சந்தா நினைவூட்டலும் கூட !! இந்த வாரத்தில் சந்தா செலுத்தும் வாய்ப்புண்டாவென்று பாருங்களேன் guys ?

Sunday, October 09, 2016

கொஞ்சம் அக்டோபர்...கொஞ்சம் நவம்பர்...!


நண்பர்களே,
            
வணக்கம். அக்டோபர்கள் எப்போதுமே நம் அனைவருக்கும் வாஞ்சையான பொழுதுகள் என்பதில் சந்தேகமிருக்க முடியாது ! மெலிதாய் எட்டிப் பார்க்கும் அடை மழை... ஆயுத பூஜை... அப்புறமாய் அதிரடி தீபாவளி என்று இந்த மாதமே ஒருவிதக் கோலாகல மூடில் பயணிப்பது போல் எனக்குத் தோன்றுவது வழக்கம். ‘பட்டாசுத் தலைநகரம்‘ என்பதால் இந்த மாதம் எங்களுக்கு ரொம்பவே ஸ்பெஷல் என்பதை நான் சொல்லவும் வேண்டுமா ? திரும்பிய திசையிலெல்லாம் பட்டாசுப் பார்சல்கள் இந்தியாவின் மூலை முடுக்குகளையெல்லாம் தேடிக் கிளம்புவது இங்கே அன்றாடக் காட்சிகள் ! இந்தப் பரபரப்புகளுக்கு மத்தியில் நமது “பட்டாசுப் பார்டிகள்” வன்மேற்கையே ஒரு தீபாவளிக் களமாக்குவது தான் இவ்வாரத்துப் பதிவின் highlight !

     “சர்வமும் நானே” இதழினைத் திட்டமிட்ட போது- அதன் தலைப்பினைத் தேர்வு செய்ய எனக்கு ஒன்றரை நொடிகளுக்கு மேல் அவசியப்பட்டிருக்கவில்லை ! தற்போதைய நிலவரத்தில் (தமிழ்) காமிக்ஸின் சர்வமுமாய் உலா வரும் நமது இரவுக்கழுகாருக்கு இந்தக் கதைத் தலைப்பு அட்சரசுத்தமாய்ப் பொருந்துவதாய்ப்பட்டது எனக்கு ! 3 தனித்தனி இதழ்கள் என்ற துவக்க நாட்களது திட்டமிடலுக்கு விடைகொடுத்து விட்டு ஒரே hardcover பதிப்பாகத் திட்டமிட்டு - அதன் பணிகள் முழுவீச்சில் நடைபெற்று வருகின்றன ! இதோ- நம்மவரின் இந்த 395 பக்க சாகஸத்தின் அட்டைப்பட முதல் பார்வை!





ஒரிஜினல் டிசைனே... ! வர்ணச் சேர்க்கைகளில் மட்டும் நமது கைவரிசைகளோடு ! வழக்கம் போல - “பச்சையைக் கூட்டு ; சிகப்பை ஜாஸ்தி பண்ணு... ....இல்லை நீலம் கம்மியாய்.... no... no... மஞ்சள் தூக்கலாய் தெரியட்டும் ! ” என்று நமது டிசைனிங் டீமின் குடல்களின் பரிமாணங்களைப் பரிசோதிக்கத் தவறவில்லை நான் ! இதோ நீங்கள் பார்ப்பதெல்லாமே நாம் முயற்சித்த சிலபல வர்ணக் கூட்டணிகள் ! இதனுள் எதனை நாம் தேர்ந்தெடுத்திருப்போமென்பதில் நிச்சயமாய் சந்தேகங்களுக்கு இடமிராது என்றே நினைக்கிறேன் !

கதையைப் பொறுத்தவரை - பக்கம் 1-ல் துவங்கும் டாப் கியர் - ‘சுப மங்களம்‘ என்று end card போடும் 395-வது பக்கம் வரையிலும் துளி கூட மாற்றமின்றி பரபரப்பாய் பறக்கிறது! ‘குப்பண்ணன் தான் வில்லன்... சுப்பண்ணன் தான் அவனது தளபதி... கோவிந்தசாமி தான் போர்வாள்‘ என்று கதையின் துவக்கத்திலேயே எதிராளிகளை அழகாய் அடையாளம் காட்டி விடுவது டெக்ஸ் கதைகளின் டிரேட்மார்க் எனலாம் ! ‘அதில் twist வைக்கிறேன் பேர்வழி... எதிரி யாரென்று யூகியுங்கள் பார்ப்போம் !‘ என்ற பல்லாங்குழி ஆட்டத்திற்கெல்லாம் இங்கே அவசியங்களே இருப்பதில்லை தானே ? அதே ஸ்டைல் தான் இம்முறையும் ! ‘வல்லவன்‘ என்றதொரு வில்லனை அறிமுகம் செய்து வைத்து, அவனை துவம்ஸம் செய்திட நமது புயல்படை கிளம்புவதே கதையின் களம் ! இம்முறை மொத்த டீமும் கதைநெடுக வலம் வருவதால் அதிரடிகளுக்குப் பஞ்சமே கிடையாது ! And எப்போதும் போலவே மஞ்சள் சட்டைகள் தகதகக்கின்றன - பக்கத்துக்குப் பக்கம் ! கடந்த 2 நாட்களாய் நமது அச்சுக் கூடத்தினுள் புகுந்தாலே - ‘நெருப்புடா!‘ என்று நம்மாட்கள் பின்னணி மியூசிக் தந்தால் ஆச்சர்யப்பட ஏதுமிருக்காது – becos ‘டமால்‘; ‘டுமீல்‘; ‘க்ராஷ்‘; ‘சத்‘ என்று அதிரடிகள் மட்டுமே அவர்களது கண்களில் பட்டு வருகின்றன “சர்வமும் நானே” அச்சிடத் தொடங்கியது முதலாகவே ! பாலைவனங்கள்... யுத்தகளங்கள்... சலூன்கள் என்ற பழகிப் போன backdrops மட்டுமன்றி இம்முறை கப்பலில் ஏறி நமது டீம் கடலுக்குள் செல்கிறது புலிப்பாய்ச்சலாய் ! “சர்வமும் நானே” – நேர் கோட்டில் பாய்ந்து பரபரக்கும் யானை வெடிச்சரம் ! தீபாவளிக்கு 4 நாட்கள் முன்பாகவே நவம்பர் இதழ்கள் உங்கள் கைகளில் கிடைத்திட வேண்டுமென்பதால் - தீயாய்ப் பணி செய்து வருகிறது எங்களது டீம் !

அக்டோபரின் முதல் வார விளிம்பிலிருக்கும் போதே அடுத்த மாத இதழ்கள் பக்கமாய் நமது பார்வைகளைத் திருப்பினால் - இம்மாத இதழ்கள் சவலைப் பிள்ளைகளாய் மாறிப் போகுமென்பதால் - ஒளிவட்டம் அக்டோபரின் மைந்தர்கள் மீதே தொடரட்டுமே ? இறுக்கமான முகத்தோடு, இருண்டதொரு பின்னணியில் அமர்ந்திருந்த ஜேஸன் பிரைஸ் அக்டோபரின் டாப் ஸ்டார் என்பதில் ஐயமில்லை ! கதை நெடுக விரவிக் கிடந்த அந்த மெல்லிய திகிலுணர்வை ஓவியரும், கலரிங் ஆர்ட்டிஸ்டும் அற்புதமாய் கையாண்டிருந்ததே இந்த ஆல்பத்தின் highlight என்பேன் ! And இங்கொரு கொசுறுச் சேதி ! இந்த இதழின் அடித்தள மொழியாக்கத்தில் உதவியது திரு.N.சொக்கன் அவர்கள் ! ஈரோட்டுப் புத்தக விழாவினி்ல் சந்தித்த போது அதிகம் பேசிக் கொள்ள வாய்ப்பில்லாது போனாலும், அப்புறமாய் மாயாவி சிவாவின் உதவியோடு சொக்கன் சாரோடு தொடர்பில் இருக்க முடிந்தது ! ஏதேனுமொரு மொழிபெயர்ப்பை முயற்சித்துப் பார்க்க அவர் ஆர்வம் காட்டிய போது- என் மேஜையில் காத்துக் கிடந்த ஜே.பி.யை பொட்டலம் கட்டி அனுப்பி வைத்தேன் ! வேகமாய் பார்சலை அனுப்பி விட்ட போதிலும் எனக்குள் நிறையவே கலக்கம் ! பெரியதொரு எழுத்தாளர்- அவருக்கென சன்மானம் தரும் சத்து நமக்குக் கிடையாதெனும் போது, நாம் தரக்கூடிய தொகை சங்கடம் கொள்ளச் செய்து விடக் கூடாதே என்பது கலக்கம் # 1. அப்புறம் நமது கருணையானந்தம் அவர்கள் எழுதினாலும் சரி ; (வாசக) நண்பர்கள் எழுதிய ஸ்க்ரிப்ட்களாக இருந்தாலும் சரி, வெண்கலக்கடையினுள் புகுந்த யானையைப் போல தயக்கமின்றி மாற்றங்கள் செய்து நான் overwrite செய்திடுவதே நடைமுறை ! நிறையத் தருணங்களில் பாதிக்குப் பாதி மாற்றங்கள் கூடச் செய்துள்ளேன் எவ்விதத் தயக்கமுமின்றி ! ஆனால் இம்முறை ஒரு தேர்ந்த எழுத்தாளரின் ஸ்க்ரிப்டில் கை வைப்பதென்பதை அவர் எவ்விதம் எடுத்துக் கொள்வாரோ என்பது கலக்கம் # 2. So மெதுமெதுவாய் எனது எண்ணங்களை மின்னஞ்சலில் தெரியப்படுத்திய போது - சொக்கன் சார் சிம்பிளாக முடித்துக் கொண்டார் – ‘அவசியமென்று நீங்கள் கருதும் மாற்றங்களைத் தாராளமாகச் செய்து கொள்ளுங்கள் ! உங்களுக்குச் சாத்தியமான சன்மானத்தில் எனக்கும் பூரண திருப்தியே‘ என்று ! வாயடைத்துப் போனேன் ! சில வாரங்கள் கழித்து ஸ்க்ரிப்டும் அழகாய் ஈமெயிலில் வந்து சேர, மெது மெதுவாய் அதனுள் புகுந்தேன். சரளமான நடையும், சுலபமான ஓட்டமும் ஸ்க்ரிப்டில் இருந்ததால் – ஏகமாய் திருத்தங்கள் செய்திட அவசியம் தோன்றிடவில்லை. ஆனால் கதையின் dark mood-க்கு ஏற்றவாறு பட்டி டிங்கரிங் தேவைப்பட்டிட அவற்றைச் செய்யத் துவங்கினேன். ஒரு மாதிரியாய் சொக்கன் சாரது சாலையில் தார் போடும் பணி நிறைவேறிய போது - “எழுதப்பட்ட விதி” தயாராகி இருந்தது ! மூன்று பாகங்கள் கொண்ட இந்தத் தொடரின், தொடரும் 2 பாகங்களை நானுமே இன்னும் படிக்கவில்லை ; அந்த சஸ்பென்ஸைப் பணியாற்றும் நேரத்திற்கே தெரிந்து கொள்வோமென்ற எண்ணத்தில் ! So ‘மறைக்கப்பட்ட நிஜங்கள்‘ என்னவென்பதை உங்களைப் போலவே நானும் டிசம்பரில் அறிந்திட ஆவலாய்க் காத்திருப்பேன் !  ஒரே  ‘இக் கன்னா‘ என்னவென்றால்  – கதையோட்டத்தில் கொஞ்சம் 'மிட்நைட் மசாலா' சமாச்சாரங்கள் தூக்கலாய் தலைகாட்டுவதாகத் தோன்றுகிறது ! அதனைச் சமாளித்தாக வேண்டும் – கதைக்குச் சேதமின்றி ! Fingers crossed !

அக்டோபரின் அணுகுண்டு ஜேசன் ப்ரைஸ் எனில், ஜாலியான சரவெடி “தற்செயலாய் ஒரு ஹீரோ” தான் என்பதும் உறுதி ! 2016-ன் ஓட்டத்தில் மாதம்தோறும் நாம் இரவுக்கழுகாரைச் சந்தித்து வந்தாலும் – நிஜமான highlight அவரது பற்பலப் பரிமாணங்களைப் பார்க்க சாத்தியமானதே என்பேன் !

- சட்டத்திற்கொரு சவக்குழியில் – அதிரடி முகம்
- திகில் நகரில் டெக்ஸ் – டிடெக்டிவ் முகம்
- விதி போட்ட விடுகதை – பாசமான தந்தை அவதாரம்
- தலையில்லாப் போராளி - துணிவே உருவான சாகஸ முகம்
-டாக்டர் டெக்ஸ் – லைட்டான கதைக்களத்திலும் பளீரிடும் பாங்கு
- குற்றம் பார்க்கின் – மனித உணர்வுகளுக்கு மதிப்பளிக்கும் ஈரம்
- கனவாயின் கதை – நட்பின் வலிமை !
- துரோகத்திற்கு முகமில்லை – தோல்வியின் பயம் உணரும் சராசரி மனிதனின் வேதனை !
- தற்செயலாய் ஒரு ஹீரோ – பெருந்தன்மையின் மறுமுகம் !

நவம்பரில் ஒரு பாசாங்கில்லா ஆக்ஷன் அதிரடியிலும், டிசம்பரில் ஒரு மனதைத் தொடும் சாகஸத்திலும் நம்மவரைப் பார்த்திடும் போது ஒரு வானவில்லின் பல வர்ணங்களைப் பார்த்த திருப்தி கிட்டின் – இந்தாண்டின் special தருணங்களுள் இதுவொரு உச்ச இடத்தைப் பிடிக்குமென்பது உறுதி ! பாருங்களேன் இந்த ரங்கோலியை !


அக்டோபரில் ஒரு அட்டகாச நகைச்சுவை விருந்தோடு ஆஜராகியும் வெண்கலக் கோப்யையை மட்டுமே பெற்றிடும் லக்கியாரை எண்ணி ‘லைட்டாக மண்டையைச் சொரியத்தான் முடிகிறது ! லக்கியின் கதைவரிசையினுள் ஒரு டாப் ஆல்பம் “திருடனும் திருந்துவான்” என்பதில் ஐயம் கிடையாது ! ஆனால் அதுவே போட்டியில் மூன்றாமிடத்தைப் பிடித்துள்ளதென்று நினைக்கையில், புதுவரவு ஜேசனும், இரவுக்கழுகாரும் ஸ்கோர் செய்திருப்பதன் வீரியத்தைப் புரிந்து கொள்ள முடிகிறது ! 

And surprise.... surprise! கூர்மண்டையரின் “கடத்தல் குமிழிகள்” பெற்றுள்ள applause ! இது போன்ற சூப்பர் ஹீரோ-சூப்பர் "புய்ப்பச்சூட்டல்" கதைகளிலுள்ள ஒரே ப்ளஸ் பாய்ண்ட்- புராதன நெடிகளுக்கு இங்கே அதிகமாய் இடமிருப்பதில்லை என்பதே ! So - ஒரு லாரன்ஸ், டேவிட் கதையில் தென்படுமளவிற்கு ஸ்பைடர் கதைகளில் அந்த பழமை நெடி தூக்கலாய் தெரிந்திட வாய்ப்புகள் குறைச்சல் என்பதால் – “கடத்தல் குமிழிகள்” போன்ற கதைகள் சேதமின்றித் தலை தப்பி விடுகின்றன ! And guess what ? நமது ஆன்லைன் ஸ்டோரில் செப்டம்பர் மாதத்து விற்பனை # 1 – மிஸ்டர் சிலந்தியாரின் அத்தனை இதழ்களும் அடங்கிய pack தான் ! So எட்டுத்திக்கிலும் சிலந்தியாரின் சிரசாசன SMS களும் ; ஹெலி-கார் சாகஸங்களும் ஒரு இரண்டாவது ரவுண்ட் சுற்றி வருவது புரிகிறது ! Phew !!

தீபாவளியும், தீபாவளி மலர்களும் கவனத்தைக் கோரி வரும் வேளையில் - கைவசமிருக்கும் கதைகளின் ஸ்டாக் எடுக்கும் படலத்தை நடத்திக்கொண்டிருந்தேன் நேற்றைய பகலில் ! அப்போது நமது முதன்முதல் தீபாவளி மலரும் கண்ணில் பட்ட போது - சின்னதொரு curiosity-ல் பக்கங்களைப் புரட்டினேன் ! சட்டித்தலையன் டன் டன்னாய் காதில் பூ சுற்றுவதைத் தாண்டி ; அந்த அட்டைப்படத்தைத் தாண்டி எனக்கெதுவும் நினைவில் இல்லை ! ப்ளு; ஆரஞ்சு; தேன் மஞ்சள்; கிளிப் பச்சை; ராமராஜன் பிங்க் என்று 5 மாறுபட்ட வண்ணங்களோடு இன்னமும் நியூஸ்பிரிண்டில் இதழ் டாலடிப்பதைப் பார்க்க பிரமிப்பாகவே இருந்தது ! “ஆர்ச்சியை நம்பினோர் கைவிடப்படார் !” போன்ற அகிலத்தை அசங்கச் செய்யும் ஆழ்ந்த வசனங்கள் ஆங்காங்கே விரவிக் கிடப்பதைப் பார்த்த போது அந்நாட்களிலேயே உங்களை நான் படாத பாடு படுத்தி வந்திருப்பது புரிந்தது ! ஆனால் அழகான அந்நாட்களது அச்சுப் கோர்ப்பும், நமது ஆர்டிஸ்ட்களின் நேர்த்தியான பணிகளையும் மெய்யாக ரசிக்க முடிந்தது ! கனத்த அட்டைகளில் ஒரிஜினல் b&w பிரிண்ட்களை வெட்டி, ஒட்டி, அப்புறமாய் அதன் மீது அச்சுக் கோர்ப்பின் பிரிண்ட்களை ஒட்டி விடடு - படங்களை, பலூன்களைப் பூர்த்தி செய்வது ஒரு நுணுக்கமான, நுட்பமான கலை ! பலூன்களைச் சுற்றிய strokes ; படங்களை நீட்டிக்கும் strokes பட்டையாக அமைந்தால் அது என்னை ரொம்பவே உறுத்திடும். மெல்லிதான, ஷார்ப்பான strokes இதமாக இருந்திடும் ! காளிராஜன் & சிகாமணி என இரு ஓவியர்களும் இந்த மெலிதான strokes-களில் கில்லாடிகள். இந்த இதழின் முழுமையிலும் அவர்களது பணித்தடங்களைப் பார்க்க முடிந்த போது அந்நாட்களது நினைவுகள் அநியாயத்துக்கு அலையடித்தன ! இரவு டிபனுக்கு 5 ரூபாய் தந்தனுப்பி விட்டு, நானொரு பத்து ரூபாயைப் பாக்கெட்டில் செருகிக் கொண்டு இங்க்கி-பிங்க்கி-பாங்க்கி போட்டு ஏதேனும் ஒரு ஹோட்டலில் நுழைந்த நினைவுகள் இன்றைக்கு போதி தர்மரது காலத்துச் சமாச்சாரங்களாய் தோன்றுகின்றன. இதழின் விளம்பரப் பக்கங்களில் முழுக்க முழுக்க கையால் எழுதப்பட்ட தலைப்புகள் ; நெருடலில்லா filler pages லே-அவுட் என்பது போதாதென்று - அடியேனின் கதையோடும் (!!?); ஓவியர் சிகாமணியின் சித்திரத்தோடும் டாலடிக்கும் ஒற்றைப்பக்கக் கார்ட்டூன் - அந்நாட்களது திறமைசாலிகளை நினைத்துப் பெருமூச்சிடச் செய்தது ! இன்றைக்குக் கணினிகளில் உலகுக்கே பாடம் சொல்லித்தருகிறோம் தான் ; ஆனால் மனிதனின் ஆற்றல்கள் மட்டுமே முன்னணியில் நின்ற அந்நாட்கள் ரொம்ப ரொம்ப ஸ்பெஷல் என்பேன் ! 

இதோ- வால்ட் டிஸ்னியையும், ப்ராங்கோ-பெல்ஜியக் காமிக்ஸ் ஸ்டூடியோக்களையும் ‘டரியலாக்கிய‘ அந்நாட்களது நமது படைப்பு! நல்ல காலத்துக்கு அந்தக் ‘கலைச் சேவையைத் தொடரவில்லை... இல்லையேல் பற்பல ‘காதல்‘ பரத்கள் நம் புண்ணித்தில் சாலைகளில் உலாற்றிக் கொண்டிருந்திருப்பார்கள்.

அப்புறம் சந்தா 2017 பற்றி ! ஒருவழியாய் அட்டவணைப் படலமும் நிறைவு கண்டு ; அதன் சாதக-பாதகங்கள் அலசப்பட்டு வரும் நிலையில் கிட்டியிருக்கும் சூப்பர் நியூஸ்- சந்தா E-க்கென நீங்கள் தந்திருக்கும் ஏகோபித்த thumbs up தான் ! ஒரேயொரு PLATINUM ; 3 SILVER நீங்கலாகப் பாக்கி அனைத்துமே A B C D E என்ற GOLD சந்தாவுக்கே ! எப்போதுமே டிசம்பரிலும், ஜனவரியிலும் தான் சந்தாக்கள் விறுவிறுப்படைவது வாடிக்கை ; ஆனால் இம்முறையோ இந்தத் துவக்கப் படலமே அதிரடி ரகம் தான் ! 

"இவற்றைக் கடையில் வாங்கினால் இருநூறு ரூபாய் மிச்சம் பண்ணுகிறீர்கள்" ;   "புத்தக விழாக்களில் வாங்கினால் முன்னூறு ரூபாய்சேமிக்கிறீர்களென்ற" ஆழமான ஆராய்ச்சிகள் ஒரு பக்கம் ஓடிக் கொண்டிருப்பதும் இயல்பே ! ஆனால் இந்த இருநூறு , முன்னூறு ரூபாய்கள் நாம் செய்யும் பணிகளுக்கு கிடைக்கும் ஊதியமாக இருந்துவிட்டுப் போகட்டுமே என்ற  கண்ணோட்டத்தில் பார்த்திடுவதில்  நண்பர்களுக்கு  என்ன சிரமம் என்று சத்தியமாய்ப் புரியவில்லை எனக்கு ! இங்கே நான் ஈட்டும் ஒவ்வொரு ரூபாயும் ஒன்றரை ரூபாயாகவோ, இரண்டு ரூபாயாகவோ மறுபடியும் இங்கேயே தான் விதைக்கப்படுமே தவிர, அதனில் என் இடுப்பின் சுற்றளவை அதிகம் செய்ய நான் வழி தேடியதே கிடையாதே ? எங்களிடம் நீங்கள் ஒப்படைக்கும் ஒவ்வொரு ஒற்றை ரூபாயும் உங்களின் உழைப்பின் பலன்களே என்பதை நாங்கள் ஒருநாளும் மறந்திடுவதில்லை ; ஆனால் சந்தா செலுத்தாது நீங்கள் மிச்சம்பிடிக்கப் போகும் அந்த 200 / 300 ரூபாய்கள் மெய்யாக இன்றைய உலகினில் அத்தனை அசாத்தியமான தொகைகள் தானா ? பொருளாதார ரீதியினில் அனைவருக்கும் நமது சந்தாத் தொகைகள் சாத்தியமென்ற கற்பனைகள் நிச்சயமாய் நமக்கு கிடையாது ! So உங்களளவில் அவ்வப்போது கடைகளில் வாங்கி கொள்ளும் பட்சங்களில் நிச்சயம் அதில் பிழையில்லை ! ஆனால் சென்னை போன்றதொரு பெருநகரில் எங்கோ ஒரு மூலையில் இருக்கும் விற்பனையாளர்களைத் தேடிச் செல்லும் நேரங்களும், செலவுகளும் நிச்சயமாய் கணக்கினில் வந்திட வேண்டிய அம்சங்கள் தானே ? சென்னையில் THREE ELEPHANTS தற்காலிகமாய் செயலாற்றும் சூழலில் இல்லை  ; திருப்பூர் ஏஜெண்ட் - இது சரிப்படாது எனக்கு ! என்று கைவிரித்து விட்டார் ! So இத்தகைய சிரமங்கள் நேரும் இடங்களில்  மாற்று ஏற்பாடுகள் நடந்தேறும்வரையிலும் இதழ்கள் கிடைக்காதென்பதும் கணக்கில் கொள்ள வேண்டிய சிந்தனைகள் அல்லவா ? இதோ - இந்த மாதம் ஈரோட்டில். சேலத்தில்...மதுரையில் வாசகர்கள் புகார் சொல்லியுள்ளனர் கடைகளில் 2017-ன் கேட்டலாக் தர  மறந்துவிட்டார்கள் என்று ! அதனை மறுபடியும் வாங்கச் செல்வதென்பதெல்லாம் அத்தனை சுலபமே சுலபம் தானா ?  And ஏதோ காரணங்களின் பொருட்டு உங்களுக்கு சந்தா வசதியாகத் தோன்றிடாது போகும் பட்சத்தில் புரிந்து கொள்ளுவதில் சிரமமில்லை ! ஆனால் சக வாசகர்களையும் அதனிலிருந்து discourage செய்திட ஆர்வம் காட்டுவதன் பின்னணியில் இருப்பது மெய்யாக சேமிப்பு சார்ந்த சிந்தனைகள் மட்டுமே தானா ? அலசுங்கள் ...ஆராயுங்கள் ...வாட்சப் ...வலைப்பக்கங்கள் ...FB என்று விவாதங்கள் பண்ணுங்கள்... நையாண்டி பண்ணுங்கள்...அறிவுரை வழங்குங்கள்... தவறில்லை ; அதே மூச்சில் இதே துறையில் உள்ள ஏதேனும் ஒரு மூத்த பதிப்பகத்திடம் நமது 46 இதழ்களின் திட்டமிடல்களையும், விலைகளை, தரங்களையும் காட்டிவிட்டு - அரையணாவிற்கு விளம்பரமே இல்லாதொரு ஒரு துக்கனூண்டு சர்குலேஷனில் இவற்றினுள் இருக்கக் கூடிய இலாப விகிதம் என்னவாக இருக்குமென்ற அபிப்பிராயங்களையும் கோரிடப் பாருங்களேன் ? அட.. அவ்வளவு தூரம் போவானேன் ? அவரவருக்குள் உறையும் ஆழ்மனதிடம் கேட்டுத் தான் பாருங்களேன் - இதனில் உள்ள பணிச் சுமைக்கும் - லாப விகிதத்துக்கும் ஏதேனும் சம்பந்தம் இருந்திடல் சாத்தியம்தானா என்று  ? இன்றைய பதிப்புலக சூழலில் ஊர் ஊராய்க் கடன் கொடுத்து விட்டு அதனை வசூலிக்க நாயாய்ப், பேயாய் அலைந்து, போலீஸ் ஸ்டேஷன், பஞ்சாயத்து என்றெல்லாம் நம்மாட்கள் வலம் வந்து, ஆண்டுக்கு குறைந்தது நாலு / ஐந்து இலட்சங்களை நிலுவைச் சேதாரங்களாய் இழந்து, அப்புறமும் "வலிக்கலியே  " என்று புன்னகைக்க முற்படுவது அத்தனை சுலபம்தானா என்றும் கேட்டுத் தான் பாருங்களேன் ?

ஊர் கூடி இழுக்க வேண்டிய தேர் அல்லவா இது ? என் மீதான வருத்தங்களை வெளிப்படுத்த சக்கைகள் செதுக்கும் நேரத்திற்கு, வடம்பிடிக்க முன்வந்தால் ஒன்றிணைந்த சந்தோஷம் நமதாகிடாதா  ? அந்தச் சக்கைகள் செதுக்கும் முனைப்பினை அழகாய் சிறு சிற்பங்கள் செதுக்குவதனில் காட்டிடும் பட்சத்தில் அழகாகிடுவது தேராக இருக்குமன்றோ ?  2017-க்கென நீங்கள் அனுப்பி வரும் தொகைகளை கவனமாய் அடுத்தாண்டின் செலவினங்களுக்கென ஒதுக்கி வைத்து - அவசர ஆத்திரங்களுக்கு அதனிலிருந்து லேசாய்  லவட்டும் சபலத்தைக் கடும் பிரயத்தனத்தின் பேரில் தவிர்த்து வருகிறோம் ! போனெல்லியும், பிராங்கோ-பெல்ஜியக் குழுமங்களும் நம் ஆர்வங்களை மதித்து, 2017-ன் கதைகளில் ஒரு கணிசமான பகுதியை ஏற்கனவே தந்து விட்டபடியால் – “நாங்க இங்கே ஒரே பிஸி !” 2017-ன் இதழ்களை நாளைக்கே கண்ணில் காட்ட வேண்டுமா ? நாங்கள் ரெடி ! நீங்களும் ரெடியாகிக் கொள்ளுங்களேன் – சந்தாக் குடும்பத்தில் ஐக்கியமாகி !

மீண்டும் சந்திப்போம் guys! அனைவருக்கும் நமது சரஸ்வதி பூஜை வாழ்த்துக்கள்! Have a fun filled weekend & more!

P.S : முதிர்ந்த நமக்கெதற்கு வரையறைகள் ? என்ற சிந்தனையில்தான் கிட்டத்தட்ட 5 ஆண்டுகளாய் இந்தத் தளத்தில் எவ்விதக் கட்டுப்பாடுகளையும் விதிக்க நான் முனையவில்லை ! ஆனால் blog admin ஆன எனக்கு இடையிடையே மட்டுமே தலைகாட்ட நேரம் கிட்டுகிறதெனும் பொழுது - வீடு பற்றி எரிந்த பின்னே சைரன் ஊதிக் கொண்டு வரும் தீயணைப்பு எஞ்சினைப் போலவே காட்சி தர முடிகிறது. So நிலைமைகளை சீர் செய்திட சிற்சிறு மாற்றங்களை அமல்படுத்தவிருக்கிறோம் வரும் திங்கட்கிழமை  முதல் ! (நாளைய பொழுதினில் அந்தப் பதிவு செய்து கொள்ளும்  படிவத்தை தயார் செய்திடுவோம் ! )

இனி இங்கே தத்தம் ஐடி களைப் பதிவு செய்து கொள்ளும் நண்பர்கள் மாத்திரமே கமெண்ட் செய்திட இயலும் வகையில் செட்டிங்ஸ் மாற்றிடப்படும். So அதற்கென சிறிது நேரம் எடுத்துக் கொள்ளத் தேவைப்படும் !

உங்கள் எண்ணங்கள் என்னவாக இருப்பினும் - அதனை இனி நிஜ முகங்களோடு பதிவிடும் முயற்சிகளுக்கு தொடக்கம் கொடுப்போமே ?!

Saturday, October 01, 2016

ஹலோ அக்டோபர் !

நண்பர்களே,

வணக்கம். அட்டவணையா ? அக்டோபரா ? என்ற போட்டியில் (எதிர்பார்த்தபடியே) அட்டவணை சுனாமியாய் கவனங்களை ஈர்த்திருக்க - 'தேமே' என்று நிற்கின்றனர் லக்கியும், ஜேசனும், இரவுக் கழுகாரும் ! நாளைய நாஷ்டாக்கள் விருந்தாகவே இருப்பினும், இன்றைய இட்லிக்களும், கெட்டிச் சட்னிக்களும் அவசியம் தானே ? யாராச்சும் அக்டோபருக்குள் புகுந்திருப்பின், review பிள்ளையார் சுழிகளைப் போடத் துவங்கலாமே ? Bye for now !