Sunday, 21 May 2017

ஒரு பயணியின் டைரிக் குறிப்பு !

நண்பர்களே,

வணக்கம். காமிக்ஸ் சார்ந்த சமாச்சாரங்களைத் தாண்டி வேறெதையும் இங்கு எழுதுவதில்லை என்ற கட்டுப்பாட்டை லேசாய்த் தளர்த்திக் கொள்ளுகிறேன் - இந்த ஞாயிறுக்கு மட்டும் ! அதற்காகப் பிரபஞ்சத்தைப் புரட்டிப் போடப் போகும் ஏதோவொரு விஷயத்தைப் பகிரப் போகிறேன் என்ற பீலாவெல்லாம் விடமாட்டேன்  ! சொல்லப் போனால் ஒரு பத்தாண்டுகளுக்குப் பின்னே திரும்பிப் பார்த்துப் படித்து எனக்கே இந்த நாட்களின் நினைவுகளை மீட்டுக் கொள்ளவொரு டயரிக் குறிப்பு இது என்றும் சொல்லலாம் ! So ஞாயிறு காலையில் தூக்கம் பாக்கி இருப்பினோ, பணிகள் ஏதேனும் காத்து நிற்பினோ - அவற்றை சாவகாசமாய் முடித்துக் கொண்டு கூட இங்கே ஆஜராகலாம் நீங்கள் ! கொஞ்சம் பெ-ரி-ய மாத்திரை தொடர்கிறது என்பதால் உங்கள் பொறுமையை தயார்நிலையில் வைத்துக் கொண்டால் நலமென்பேன் !! 

எல்லாம் துவங்கியது சென்ற வார சனிக்கிழமையின் ஐரோப்பியப் பயணத்தோடு ! பொதுவாய் வேலைகளை திங்கள் காலைக்கென அட்டவணை போட்டுக் கொண்டு அதற்கேற்பவே அங்கு  போயிறங்கி, வேலைகள் முடிந்த கையோடே தட தடவென ஊருக்குத் திரும்புவதே என் வாடிக்கை ! ஊர் சுற்றிப் பார்க்கும் வயதுகளையெல்லாம் தாண்டி மாமாங்கங்கள் நிறைய ஓடிவிட்டதால் - வாரயிறுதிகளை எப்போதுமே அயல்நாட்டில் செலவிடுவதில்லை ! ஆனால் இம்முறை ஜுனியரும் என்னோடே பயணத்தில் இணைந்து கொள்வதாக இருந்ததால் ஞாயிறு ஒரு நாளையாவது ஐரோப்பிய பராக்குப் பார்க்கும் படலத்துக்கென ஒதுக்கிடலாமே எனத் தீர்மானித்தேன் ! சனி மாலை இத்தாலியில் போயிறங்கினோம் and நேராக ரூமுக்குப் போய் கட்டையைக் கிடத்தினாலும், அதிகாலையில் blog க்குக்கான பக்கங்களை நம்மவர்கள் அனுப்ப மறந்து போயிருந்ததால் எனக்கு கோழித் தூக்கமே சாத்தியமானது ! அங்கிருந்தே மைதீனின் குடலை  உருவி, நான் எழுதி அனுப்பியிருந்த பக்கங்களை டைப் செய்து வாங்கி ஒருமாதிரியாக வலையேற்றம் செய்து விட்டு, ஒன்றிரண்டு பதில்களையும் கூடப் போட்டு விட்டு, நகருக்குள் புறப்படுவோமென நடையைக் கட்டினோம் !  கண்டம் கண்டமாய் ஒற்றைக் காட்டு முனி போலச் சுற்றியே பழகியவனுக்கு, முதன்முறையாக பேச்சுத் துணைக்கு ஆள் கிடைத்த உற்சாகம் ஒருபக்கம் ; ஜுனியருக்கு ஐரோப்பிய அனுபவத்தைப் புகட்டக் கிடைத்த வாய்ப்பின்மகிழ்ச்சி இன்னொரு பக்கமென பிரவாகமெடுக்க, வெயிலில் குளித்துக் கிடந்த மிலன் நகரமே ஒரு சொர்க்க பூமி போல் எனக்குத் தோன்றியது ! பின்மதியம் வரை ஊர் சுற்றி விட்டு, அப்புறமாய் ரயிலைப் பிடித்து அங்கிருந்து பிரான்சின் லியான் நகரில் இரவு டேரா போடுவதாகத் திட்டம் ! திங்கள் அதிகாலையில் லியோனுக்கு அருகாமையிலிருந்ததொரு சிறு நகரில் நாம் வாங்கவிருந்ததொரு அச்சு இயந்திரத்தினைப் பார்வையிடுவதாகத் திட்டம் ! அதை முடித்துக் கொண்டு, பாரிசுக்கு ரயிலைப் பிடித்து மாலைப் பொழுதினில் அந்த நகரின் வீதிகளில் நமது செருப்புகளைத் தேய்ப்பதாகத் திட்டம் ! சாவகாசமாய் (அங்குள்ள) முனியாண்டி விலாஸில் பரோட்டா ; ஐபல் கோபுரத்தில் வாய் பார்த்தல் என்று மாலையை ஒட்டி விட்டு, மறு நாள் அதிகாலையில் பிளைட்டைப் பிடித்து ஸ்பெயின் நாட்டின் தலைநகரில் இன்னொரு மிஷினைப் பார்வையிடுவதாகத் திட்டத்தின் தொடர்ச்சி ! செவ்வாய் இரவு மேட்ரிட் நகரிலிருந்தே ஊருக்குத் திரும்புவது என்ற "வாம்மா மின்னல்" பாணி அட்டவனையே - ஒட்டு மொத்தமாய் !! 3 தினங்களில் - 3 தேசங்கள் எனும் பொழுது பயணத் திட்டங்களை கோர்வையாய் நிர்ணயம் செய்வதற்குள் சந்நியாசம் வாங்கிடுவதே சாலச் சிறந்தது என்று தோன்றும் டிக்கெட் போட்டுத் தரும் ஏஜெண்டுக்கு !! என் சகோதரனின் கல்லூரித் தோழனே மதுரையில் உள்ள டிராவல் ஏஜெண்ட் என்பதால் - நான் அடிக்கக் கோரும் அத்தனை அந்தர் பல்டிகளையும்   அசராமல் அடிக்க முற்படுவார் அந்த நல்ல மனுஷன் ! ஒவ்வொரு முறையும் எனது திட்டங்கள் இது போலவே கோக்கு மாக்காகவே இருந்திடுவது வாடிக்கை என்பதால் அவருக்கும் பழகிப் போய் விட்டது ! எனக்குமே செலவைக் குறைக்கிறோம் ; வேலை முடிந்த கையோடே வீடு திரும்புகிறோம் என்ற திருப்தி இருந்திடுவதால் இந்த நட்டுக் கழன்ற வேக ஓட்டங்களெல்லாம் பழகிப் போயிருந்தன !   

ஜுனியருக்குமே கூட இந்த 'சடுதியில் வீடு திரும்பும் டீலிங் ' பிடித்திருந்ததால் எந்த முகச் சுளிப்புமின்றி உடன் வந்து கொண்டிருந்தார் ! ஆண்டாண்டு காலங்களாய், ஊர் ஊராய், தெருத் தெருவாய்ச் சுற்றியுள்ளதன் பலனாய்க் கிட்டியிருந்ததுஅனுபவம் மாத்திரமன்றி, ஒருவிதத் தெனாவட்டுமே என்பேன் ! 'ஆஹ்...என்ன பெரிய வெளிநாடு ? எதுவானாலும் பார்த்துக்கலாம் ; சமாளிச்சுக்கலாம் !" என்ற ஒருவித கொழுப்பு எனக்குள் சத்தமின்றி வியாபித்திருந்தது ! So மாமூலாய் ஒவ்வொரு பயணத்தின் போதும் செய்திட வேண்டிய முன்ஜாக்கிரதை ஏற்பாடுகளுக்கெல்லாம் பொறுமையே இருப்பதில்லை ! அந்த மப்புக்கு விலை என்ன தரவிருக்கிறோமென்ற புரிதல் துளியுமின்றி பின்மதியம் வரை ஊரை செம உற்சாகமாய்ச் சுற்றிக் காட்டி விட்டு, ரயிலைப்பிடிக்க தரைக்கடியிலிருக்கும் மெட்ரோவை நாடிச் சென்றோம் ! நாலு காசு மிச்சம் பிடித்தால் - அது நாலு காசை சம்பாதித்தற்கு ஈடே  என்ற மாதிரியான எண்ணம் எனக்குள் வேரூன்றிக் கிடப்பதால் ஒரு நாளும் டாக்சிகளுக்கோ ; ஆடம்பரங்களுக்கோ பாக்கெட்டுக்குள் கைவிடத் துணிய மாட்டேன் ! அதே பாணியில் இம்முறையும் கனமானதொரு சூட்கேஸை உருட்டிக் கொண்டே..தோளில் ஒரு backpack -ஐப் போட்டுக் கொண்டே மெட்ரோ ரயிலுக்குள் புகுந்தேன் ! இரு முதிய பெண்கள் சரியாக எனக்கு முன்னேயும் பக்கவாட்டிலும் நெருக்கியடித்துக் கொண்டு நிற்க, ரயில் கதவுகள் அடைத்துத் தொலைக்கும் முன்பாக உள்ளே புகுந்துவிட வேண்டுமென்பதிலேயே என் கவனம் லயித்து நின்றது ! சரியாக அதே நொடியில் என் முதுகில் தொங்கிக் கொண்டிருந்த பையின் ஜிப் மீது ஒரு கை பட்டது போலிருக்க, நானோ  கதவு பூட்டும்போது பை மாட்டிக் கொள்ளக்கூடாதே என்ற நினைப்பிலேயே உள்ளே புகுவதில் தீவிரமாய்  இருந்திட, அந்த இரு கிழக் கோட்டான்களும் உள்ளே ஏறிய அதே வேகத்தில் பிளாட்பாரத்துக்குத் தாவி விட்டன !! கதவு மடேரென அடைபடும் கணமே எனக்குள் சம்மட்டியாய் இறங்கியது என்ன நடந்துள்ளதென்ற புரிதல் ! "என் பேக் திறந்திருக்கான்னு பாரு விக்ரம் !" என்று நான் அலற ; "ஜிப் திறந்து கிடக்குப்பா !!" என்ற பதில் கிட்டியது ! உள்ளே கை விட்டுப் பார்த்த மறு நொடி என் ஈரக்குலையே அறுந்து போனது போலொரு உணர்வு - பாஸ்போர்ட்டும், பணமும் இருந்த ஒரு pouch ஐக் காணோமென்ற போது !! கடவுளின் கிருபை - ஜுனியரின் பாஸ்போர்ட்டும், எங்களது கிரெடிட் கார்டுகளும் தப்பியிருந்தன !! "ஆண்டவா....பணம் கூடப் போயிருக்கட்டும் ; பாஸ்போர்ட் தப்பியிருக்கட்டுமே !!" என்ற வேண்டுதலோடு பைக்குள் கையை விட்டுத் துளாவு-துளாவென்று துளாவினால்- எப்போதோ தின்று விட்டுப் போட்டிருந்த பிஸ்கெட்டின் துகள்கள் மாத்திரமே கையில் ஒட்டின !

6 வருஷங்களுக்கு முன்பாய் இதே போலொரு  இரயில் பயணத்தின் போது எனது பெட்டியை மொத்தமாய் லவட்டிச் சென்றிருந்தனர் இரு ஆப்பிரிக்க தில்லாலங்கடிகள் !! படாத பாடுபட்டு 3 நாட்கள் பிரஸ்ஸல்ஸ் நகரில் தேவுடு காத்து அப்புறமாய் மாற்றுப் பாஸ்போர்ட் பெற்று ஊர் திரும்பிய அல்லல்கள் அத்தனையும் சரம்கோர்த்து தலைக்குள் ஓடிய போது எனக்கு கிறுகிறுத்துப் போனது ! அம்முறையேனும், எனது ரெகுலர் வேலைகள் சகலமும் நிறைவுற்று, ஊர் திரும்பும் தருணத்தில் அந்தக் களவு அரங்கேறியிருந்தது என்பதால் வேலைக்கு பாதிப்பின்றித் தப்பியிருந்தேன் ! ஆனால் இம்முறையோ இரண்டு தினங்களில் இரு வேறு நாடுகளில் பணிகள் ; அதற்கென பயண டிக்கெட்டுகள் ; ஹோட்டல் ஏற்பாடுகள் என அத்தனையும் தயாராக இருந்ததால் - ஒற்றை நொடியில் என் உலகமே சரிந்து மண்ணாகிப் போனது போல் தோன்றியது ! எல்லாவற்றிற்கும் மேலாக - பிள்ளையை உடனழைத்து வந்திருக்கும் தருணத்திலா இந்த இடி இறங்க வேண்டும் ? என்ற குமைச்சலில் அழுகை முட்டிக் கொண்டு வந்தது ! கதவருகே இருந்த அவசர அலாரச் சங்கிலியை இழுக்க நினைப்பதற்குள் அடுத்த ஸ்டேஷன் வந்திருக்க, அங்கே இறங்கினோம் - திரும்பிச்  சென்று கிழவிகளைத் தேடுவோமென்ற வெறியில் !! ஆனால் எனக்கு உள்ளுக்குள் தெரியும் சிட்டாய்ப் பறந்திருக்கும் அந்தத் திருட்டு ஜோடி என்று ! ஆளரவமின்றி நிசப்தமாய்க் கிடந்த அந்த ஸ்டேஷனில் எல்லாமே சூன்யமாய்த் தெரிந்தது எனக்கு  ! பணம் போச்சு...பாஸ்போர்ட் போச்சு...பயண நோக்கம் போச்சு ; அத்தனையும் ஒரே நொடியின் முட்டாள்தனத்தில் பலியாகிப் போச்சென்று புரிந்த போது என் வயிற்றுக்குள் ஒரு அசுர, அரூபக் கரம் புகுந்து மொத்தத்தையும் பிசைவது போலிருந்தது !! Maybe நான் தனியாக வந்திருப்பின் இந்தச் சூழலை வேறு மாதிரியாய்க் கையாண்டிருந்திருப்பேனோ - என்னவோ தெரியவில்லை ; ஆனால் பிள்ளையையும் கஷ்டத்தில் ஆழ்த்தி விட்டோமே என்ற குற்றவுர்ணர்வு என்னை மென்று துப்பிக் கொண்டிருந்தது ! 

இன்றைய தலைமுறை மனதில் எத்தனை வலிமையானவர்கள் என்பதைத் தொடர்ந்த நிமிடங்களில் பார்க்க முடிந்தது, ஜுனியர் எனக்கு ஆறுதல் சொல்லியபடியே, ஆக வேண்டியதைப் பார்ப்போமே என்று திடமாய்ப் பேசத் துவங்கிய போது ! மறு மார்க்கத்தில் அடுத்த இரயில் வந்து சேர, புறப்பட்ட ஸ்டேஷனுக்கே அடித்துப் பிடித்து வந்து பார்த்தால் - சுவடுகளே இல்லை அந்தக் கிழ ஜோடிக்கு ! நான் உருட்டிக்கொண்டிருந்த பெட்டி திடீரென பிணமாய்க் கனத்துகிடப்பது போல் பட்டது ; எதிரே வந்திடும் அத்தனை பேருமே திருட்டு மொள்ளமாறிகள்போல என் கண்களுக்குத் தெரிகிறார்கள் ! லியான் செல்லும் ரயிலுக்கு இன்னமும் 45 நிமிடங்களே பாக்கி எனும் பொழுது என்ன செய்வதென்று கையும் ஓடவில்லை, காலும் ஓடவில்லை ! "வேண்டுமானால் நான் மட்டும் லியானுக்குப் புறப்பட்டுப் போய் மிஷினைப் பார்த்து விட்டு வரவா ?" என ஜுனியர் கேட்ட போது எனக்குள் ஒரே நொடியில் பெருமிதமும், பயமும் வியாபித்தன! 5 நிமிடங்களுக்கு முன்பு வரை என்னோடு முயல்குட்டி போல வலம் வந்து கொண்டிருந்த இளைஞன், பொறுப்புகளை சுமக்கத் தயாராகி நின்றதில் ஒரு பக்கம் பெருமிதம் ! அதே சமயம்   முன்னனுபவமோ, திட்டமிடலோயின்றி - கத்தி மேல் நடப்பது போலான அட்டவணையில் பயணம் செய்ய தனியாக அனுப்பி விட்டு,  ஏற்கனவே சின்னாபின்னமாக்கிப் போயிருக்கும் என்னால் இந்த டென்க்ஷனையும் சேர்த்தே கையாள முடியாதென்ற பயம் இன்னொரு பக்கம் ! 32 ஆண்டுகளுக்கு முன்னே, 18 வயசில் என்னைத் தண்ணீர் தெளித்து அனுப்பி வைத்த என் தந்தையை நினைத்த போது கிறுகிறுக்கத் தான் செய்தது ! "சரி....5 இருக்கு....அதில் ஒண்ணு தானே பயணம் போகுது ?!" என்றபடிக்கு அன்றைக்கு மனசைத் தைரியப்படுத்திக் கொண்டாரோ - என்னவோ தெரியலை ; ஆனால் "ஒன்றே நன்று" என்ற இந்தத் தகப்பனுக்கு  உலகின் இருண்ட சங்கதிகள் மட்டுமே அந்தக் குழப்ப நொடியில் கண்முன்னே கும்மியடித்தன ! "இல்லேப்பா...லியான் போய் விட்டு, நாளை பாரிஸ் திரும்பி, நாளான்னைக்கு அதிகாலையில் பாரிஸ் ஏர்போர்ட்டில் சரியான டெர்மினலைப் பிடித்து ஸ்பெயின் போறதுலாம் கொஞ்சம் டைட்டாவே இருக்கும் ! பாரிஸ் ஏர்போர்ட்டில் நல்ல நாளைக்கே நாழிப் பால் கறக்க நேரிடும், இதில் அதிகாலை 5 மணிக்கு பிளைட்  எனும் போது மூணு மணிக்கெல்லாம் கிளம்பி டாக்சி பிடித்து ஓடணும் ;  நம்ம ராட்ஜா சாரையோ ; ஹசன் சாரையோ, பிரபாநாத் சாரையோ ஒத்தாசைக்கு கூப்பிட்டுக் கொள்ளலாம்தான் என்றாலும், அந்த அர்த்த ராத்திரியில் அந்தத் தொந்தரவெல்லாம் வேணாமே !! லியான் வேலையை மெஷின் சப்ளை செய்யும் ஏஜெண்டின் பொறுப்பிலேயே விட்டு விடுவோம் ; நாளைக்கு மாற்று பாஸ்போர்ட் வாங்கி விட்டு, இங்கிருந்தே நேரடியாக ஸ்பெயின் போகும் வழியைப் பார்ப்போம் !" என்று சொன்னேன் ! 

சரியென்று ஜுனியரும் தலையாட்ட, இரயில்வே போலீசிடம் புகார் என்பதே அடுத்த வைத்திட வேண்டிய எட்டு என்று நடையைக் கட்டினோம் ! அத்தனை நேரமும் கூத்தும், கும்மாளமுமாய்க் காட்சி தந்த மிலன் நகரம் ஒரு திருடர் பூமியாய் என் கண்களுக்குத் திடீரென்று தெரியாத துவங்கியது ! தத்துப் பித்து இங்கிலீஷ் பேசிய ஒரு காவலரிடம் பிளாட்பாரம் நம்பர் 22 -ல் இருந்த போலீஸ் ஸ்டேஷனின் விபரத்தைக் கேட்டுக் கொண்டு அங்கே நடையைக் கட்டினோம் ! அங்கே போனாலோ - கண்ணாடி ஜன்னலில் ஒரு நோடீஸே அச்சடித்து ஒட்டியிருந்தார்கள் - "ஆங்கிலத்தில் புகார் செய்வதாகயிருப்பின் - Turatti என்ற ஏரியாவில் உள்ள தலைமையகத்தில் தான் சாத்தியம்" என்று ! பிசாசாய்க் கணக்கும் பேட்டியளித்த தூக்கிக் கொண்டே ஊரெல்லாம் சுற்றுவானேன் - இரவுக்கு அருகிலேயே ஒரு ரூமைப் போட்டு விட்டு அங்கே பெட்டியை வைத்துவிட்டு அப்புறமாய் அந்தப் போலீஸ் ஸ்டேஷனுக்குப் போகலாமே ? என்று தோன்ற, நெட்டில் புக்கிங் செய்துவிட்டு நடக்கும் தொலைவில் இருந்த அந்த ஹோட்டலுக்குச் சென்றோம் ! பாதித் தூக்கத்தில் இருந்த ரிஷப்ஷனிஸ்ட் - எங்களை ஏற இரங்கப் பார்த்தபடிக்கே - "அடையாள அட்டைகள் ?" என்று கேட்டார் ! ஜுனியரின் பாஸ்போர்டைட் கொடுத்து விட்டு, எனக்கு PAN கார்டை எடுத்து நீட்ட, மனுஷன் சுள்ளென்று முறைத்தார் ! I need your passport ! என்ற மனுஷனிடம் என்ன பதில் சொல்லவென்று தெரியவில்லை ! "உமக்கு மட்டுமல்ல சாமி ; எங்களுக்குமே இப்போது அது தான் தேவை !!" என்று உள்ளுக்குள் எழுந்த குரலை அடக்கிக் கொண்டே எங்கள் இக்கட்டைச் சொன்னேன் ! "No ...no ....I don't  know you ! ஏதாவது போலீஸ் சோதனை நிகழ்ந்தால் நான் வம்பில் மாட்டிக் கொள்வேன் !" என்று அலறிய மனுஷனிடம் - "பெட்டியை மாத்திரம் வைக்க அனுமதி கொடுங்கள் ; போலீஸ் ஸ்டேஷன் போய் புகார் செய்துவிட்டு, அவர்கள் பதிவிடக்கூடிய FIR-ன்  நகலை கொண்டு வந்து தந்த பிற்பாடு ரூம் கொடுங்கள் !" என்று சொன்ன போது வேண்டா வெறுப்பாய் ஒத்துக் கொண்டார் ! 

ஒரு மாதிரியாய்ப் பெட்டியை வைத்து விட்டு, அந்தப் போலீஸ் தலைமையகம் தேடிப்புறப்பட்டோம் ! திரும்பவும் metro - கையிருப்பு குறைச்சலே என்பதால் ! அங்கே போனால் போலீஸ் ஸ்டேஷன் தவிர மற்ற சகலமும் கண்ணில் பட்டது ; ஒரு 20 நிமிடத் தேடலுக்குப் பின்பாய் ஒரு மஞ்சள் நிறக் கட்டிடத்துக்குள் கால் வைத்தபோது - ஆஜானுபாகுவான அரை டஜன் ஆபீசர்கள் ஜாலியாய் அரட்டையடித்துக் கொண்டிருந்தனர் ! எங்களை பார்த்தவுடன் என்னவென்று வினவ - சோகக் கதையை ஒப்பித்தேன் ! அந்த ஊருக்கு இது ரொம்பவே சகஜம் தான் என்பது உலகுக்கே தெரியும் என்பதால் - "ஜாக்கிரதையாக இருக்க வேணாமாடா முட்டாப் பயலே ?" என்பது போலானதொரு பார்வையைத் தந்து விட்டு, எதிரே இருந்ததொரு ஆபீஸ் பக்கமாய்க் கை காட்டினார் ! அங்கே வேக வேகமாய்ப் போனால் - சின்னதொரு புராதன வரவேற்பறைக்குள் சுமார் 20 பேர் அடைந்து கிடந்தனர் ! வெவ்வேறு தேசப் பிரஜைகள்...வெவ்வேறு மொழிகள் பேசுபவர்கள் ...ஆனால் அத்தனை பேரிடமும் ஏதோவொரு இழப்பின் கதை இருப்பது தெரிந்தது ! "என் காரைக் காணோம் !!" என்றபடிக்கொரு ஐரோப்பியர் உறுமிக் கொண்டே திரிய ; இன்னொரு பக்கமோ "எங்க பாஸ்போர்ட் போச்சு !" என்ற ஈனஸ்வரக்   குரல்களுமே  ! "துணைக்கு ஆள் உள்ளதுடா சாமி !" என்றபடிக்கே பார்த்தால் இரு இளம் பெண்கள் - நம்மூர் ஜாடையில் ! தனியாய் சுற்றுலா வந்துள்ளனர் இருவரும், வந்தஇடத்தில் எங்களை போலவே இரயிலில் அல்வா சுவைக்க நேரிட்டுள்ளது ஒரு திருட்டுக் கோஷ்டியிடம் என்பதைக் கேட்டுத் தெரிந்து கொண்டபோது - "ஷப்பா..இந்த ஊரிலே முட்டாப் பிளாஸ்திரி நான் மாத்திரம் தான்னு இல்லே சாமி !" என்பது போலொரு வினோதமான திருப்தி உட்புகுந்தது ! இன்னும் கொஞ்சம் பேசிய போது - அந்தப் பெண்மணி மும்பையில் வக்கீலாய்ப் பணியாற்றுபவர் என்றும், சென்னைப் பூர்வீகமே என்பதும் தெரிந்து கொள்ள முடிந்தது !!  எத்தனை சின்ன உலகமடா சாமி ?! என்றபடிக்கே ஒரு மூலையில் சாய முயற்சித்த கணத்தில் பரபரப்பாக இன்னொரு இந்திய அணி உட்புகுந்தது ! Schneider Electric என்ற பன்னாட்டு நிறுவன ஊழியர்கள் ; பஸ் நிலையத்தில் பாஸ்போர்ட் லவட்டல் படலத்துக்கு ஆளானவர்கள் என்பது சற்றைக்கெல்லாம் புரிந்தது ! "நாங்க முதல்லே வந்தோம் ; அவங்க நெக்ஸ்ட் ; இவங்க அதுக்கப்புறம் !" என்று காரைப் பறிகொடுத்தவர் ஒரு வரிசையை உருவாக்க முயற்சித்துக்கொண்டிருக்க, நேரம் மட்டும்  ஓடிக் கொண்டே இருந்தது !  ஆனால் உள்ளே செல்லும் ஒவ்வொரு புகார்தாரரும் முக்கால் மணி நேரத்துக்கு குறைவாய் வெளியே திரும்பிய பாடைக் காணோம் எனும் போது கால்களும், மனங்களும் கடுத்தன ! துளியும் முகச்சுளிப்பின்றி அங்கே ஓரமாய் நின்று கொண்டிருந்த ஜுனியரைப் பார்க்கப் பார்க்க எனக்கு லஜ்ஜை பிடுங்கித் தின்றது ! "இப்படியொரு மாக்கானா இருந்து தொலைத்து விட்டோமே ?!!" என்று என்மேலேயே தோன்றிய வெறுப்பு, எனக்குள்ளிருந்த சில பல தெனாவட்டுச் சேகரிப்புகளை கரையச் செய்துகொண்டிருந்தது ! மூன்றரைக்கு அங்கே காவல் நிற்கத் துவங்கியவர்கள், மணி ஆறாகிய போதும் எவ்வித முன்னேற்றமும் இன்றி நொந்து போயிருந்த கணத்தில் பணியில் ஷிஃப்ட் மாற்றம் நிகழ்ந்ததைக் கவனிக்க முடிந்தது ! புதிதாய் வந்திருந்த பெண் ஆபீசர் இருந்த கூட்டத்தைப் பார்த்து மிரண்டு போகாத குறை தான் ; உள்ளே போய் புகார் படிவங்களை மொத்தமாய் ஜெராக்ஸ் எடுத்து வந்து பெருமாள்கோவில் வாசலில் நிற்கும் பண்டாரங்களுக்குப் புளியோதரைக் கட்டிகளை விநியோகம் செய்வது போல் கொடுத்துவிட்டு உள்ளே கிளம்பி விட்டார் ! நமக்குத் தான் பேனா பிடிப்பது பரிச்சயமான சமாச்சாரமாச்சே....? கட கடவென்று எழுதிவிட்டு கண்ணாடிக் கதவினருகே நின்று கொண்டு உள்ளே மண்டையை விட்டேன் ! வந்து அதை வாங்கிச் சென்ற அந்த ஆபீசர் ஒரு சீலைப் போட்டு கையெழுத்தைக் கிறுக்கி விட்டு திரும்ப ஒப்படைத்தார் ! "FIR ஒரிஜினல் + நகல் ! இவற்றை நாளைய காலை இந்திய தூதரகத்தில் ஒப்படைத்தால் அவசர கால பாஸ்போர்ட் தந்துவிடுவார்கள் !" என்று 'பாஸ்போர்டைத் தொலைத்த பேமானிகள் ' சங்க உறுப்பினர்களுக்கு மத்தியில் பேசிக்கொண்டோம் ! "நாளைக்கு காலையில் சந்திப்போம் !" என்றபடிக்கே அந்த வரலாற்றுச்சிறப்புமிக்க சந்திப்பை முடித்துக் கொண்டு திரும்பிய போது பிராணனில் துளியும் மிச்சம் இருக்கவில்லை எனக்கு ! அப்போதுதான் ஞாபகம் வந்தது ; பெட்டியின் சாவியுமே அபேஸான pouch-ல் தான் இருந்தது என்பதால் - பூட்டை உடைத்தாலொழிய காலையில் பழனியாண்டியைப் போல் கோவணமே உடுப்பாகிட முடியுமென்று ! "நானாச்சு - அதைத் திறக்க !" என்று ஜுனியர் மார்தட்ட -  ஏதேனும் screwdriver கிடைக்குமா ? ஆக்ஸ்சா பிளேட் கிடைக்குமா ? என்று தேடித் திரிந்தோம் ஞாயிறு இரவில் ! ஒரு மாதிரியாய் சிக்கியதை வாங்கி கொண்டு ஹோட்டலுக்குத் திரும்பினோம் ! 

புண்ணியத்துக்கு ஹோட்டலில் எந்தப் புது ஏழரையையும் கிளப்பாமல் ரூம் தந்த போது, அடித்துப் போட்டது போல் கட்டிலில் விழுந்தோம் ! துள்ளலாய்த் துவங்கியதொரு பொழுது - ஒரு முடியாத் தீக்கனவாய்த் தொடர்வதை ஜீரணிக்க இயலா நிலையில் பசியும் தலை தூக்கவில்லை ! எப்போது தூங்கினோம் ? எப்படித் தூங்கினோம் ? என்று தெரியாது கண்ணயர்ந்த போதிலும் அதிகாலை 4 மணிக்கு முழிப்புத் தட்டிய மறு நொடியே - தலைக்குள் தாண்டவமாடியது இழப்பின் வேதனையே ! "கடவுளே...தூதரகத்தில் என்னலாம் பேப்பர்களைக் கேட்பார்களோ ? நம்மூர் அரசாங்க ஆபீஸ் போலவே அவர்களும் இருப்பின், எத்தனை நாள் இங்கே கிடந்தது அல்லாடுவதோ ?" என்ற பயம் பிறாண்டிக் கொண்டிருந்தது உள்ளுக்குள் ! 

அதற்கு முன்பாய்ப் பெட்டியைத் திறக்க வேண்டுமென்பதால் - அயர்ந்து தூங்கி கொண்டிருந்த ஜுனியரை தட்டியெழுப்புவதைத் தவிர்த்து வேறு வழி தெரியவில்லை !  தொடர்ந்த அடுத்த 30 நிமிடங்களுக்கு, ஒரு 30 ரூபாய் சீனாப் பூட்டு எங்களின் அத்தனை பாகுபலி அஸ்திரங்களுக்கும் 'பிம்பிலிக்கா பிலாக்கி' சொல்வதைப் பார்க்க முடிந்தது ! இது வேலைக்கு ஆகாது...என்று தோன்றத் துவங்கிய நொடியில் - ஏதோ மாயம் நிகழ்ந்தது - ஜுனியரின் இறுதி முயற்சி பலன் தந்த வகையில் ! "பிழைச்சோம்டா சாமி !" என்றபடிக்கே குளித்துக் கிளம்பும் வேலைகளுக்குள் நுழைந்திட - புதுப் பாஸ்போர்ட்டில் ஓட்ட 2 x 2 சைஸ் போட்டோக்கள் மூன்று தேவை என்பதை நெட்டில் படித்துத் தெரிந்து கொண்டிருந்தேன் ! நம்மூர் பாணிகளில் ஸ்டூடியோ இருந்தால் நொடியில் வேலையாகியிருக்கும் ; ஆனால் அதற்கு வழி எது ? தானியங்கி போட்டோ பூத்கள் ஆங்காங்கே இரயில் நிலையங்களில் பிடாரிகள் போல் நிற்க - அதனுள் ஒன்றில் நுழைந்தேன் போட்டோ எடுத்துக் கொள்ள ! சும்மா நாளைக்குச் சிரிக்கச் சொன்னாலே நிலவேம்புக் கஷாயத்தை குடித்தவன் போலத் தான் போகும் என் முகம் ; இந்த லட்சணத்தில் மண்டைக்குள் இத்தனை பாரத்தை வைத்துக் கொண்டு போஸ் கொடுக்க சாத்தியமாகுமா என்ன ? ஒரு மாதிரியாய் முறைக்கும் மிஸ்டர் பீன் போலொரு போட்டவை எடுத்துக் கொண்டு தூதரகத்துக்குப் போனால் - அது முந்தைய தினம் நாங்கள் ஜாலியாய் சுற்றித்  திரிந்த மிலன் தேவாலய சதுக்கத்துக்கு வெகு அருகில் தான் என்பது புரிந்தது ! ஒற்றை நாளில் தான் வாழ்க்கையில் எத்தனை மாற்றங்கள் ?? என்ற சிந்தனையோடு நடையைக் கட்டினால் - தூதரக வாயிலில் நல்ல கூட்டம் ! ஆனால் அவர்களுள் பெரும்பான்மையினர் இத்தாலியில் வசிக்கும் இந்தியர்கள் என்பதும், தத்தம் பாஸ்போர்ட்களில் ஏதேனும் திருத்தங்கள் ; மாற்றங்கள் செய்திட வந்திருக்கிறார்கள் என்பதும் புரிந்தது ! Emergency என்பதால் எங்களை சடக்கென்று உள்ளே நுழைய விட்டது மாத்திரமன்றி, தூதரகத் தலைமை அதிகாரி நொடிப் பொழுதில் நம் தேவைகளைக் கேட்டறிந்து கொண்டார் ! ஒரு இளநிலை அதிகாரியை உடனனுப்பி - அருகாமையில் இருந்ததொரு இந்திய டிராவல் ஏஜென்சி ஆபீசுக்கு வழிகாட்டச் செய்தார் ! அங்கே போனால் கோட் சூட் போட்டுக் கொண்டு ஜம்மென்று ஒரு பஞ்சாபி முதலாளி ; மூன்று பஞ்சாபிப் பெண்கள் என அழகாய், பிஸியாய்ப் பனி செய்து கொண்டிருந்தனர் ! முந்தைய நாள் போலீஸ் ஸ்டேஷனில் நாங்கள் பார்த்த அந்த தமிழ் பேசும் மும்பை பெண் வக்கீலும் அங்கு தான் இருந்தார் ; படிவங்களை பூர்த்தி செய்து கொண்டு ! அப்புறம்தான் புரிந்தது, இந்த ஊரில் பாஸ்போர்ட் களவு போவதென்பதெல்லாம், பீட்சா சாப்பிடுவதை போல சகஜ நிகழ்வே என்றும் ; மாற்று பாஸ்போர்ட் வாங்கிடும் படிவங்களை இவர்கள் ஒரு கட்டணத்துக்கு தயார் செய்து தருகிறார்கள் என்று ! "ஷப்பா..நிம்மதிடா சாமி !" என்றபடிக்கே எங்கள் turn வரும்வரைக் காத்திருந்தோம் ! அங்கேயே வைத்து மீண்டுமொரு புகைப்படமும் எடுக்க, அந்த பூத்தில் எடுத்த பூச்சாண்டி போலான போட்டாக்களைத் தலையைச் சுற்றித் தூர எறிந்தேன் ! ஒரு மாதிரி படிவங்களை பூர்த்தி செய்து விட்டு, தூதரகத்துக்கு ஓடினோம் - அவர்கள் lunch break -க்கு செல்லவிருந்த தருணத்தில் ! முகம் சுளிக்காது படிவங்களையும்,  கட்டணத்தையும் வாங்கி கொண்டு - மதியம் 3 மணிக்கு வந்து புதுப் பாஸ்போர்ட்டை வாங்கி கொள்ளச் சொன்ன போது - எனக்கு அவர் காலில் விழுந்தால் தப்பில்லை என்று தோன்றியது ! ரூமுக்குப் போய் விட்டு திரும்பவும் ஓடி வருவதற்குப் பதிலாக அங்கேயே பொழுதைக் கழிக்கத் தீர்மானித்தோம் - லேசாய் எதையாச்சும் சாப்பிட்ட கையோடு ! 

மதியம் மூன்றும் புலர்ந்த பொழுது - "டாண்" என்று கையில் பாஸ்போர்ட் இருந்தது என்னிடம் ! கடவுளைக் கண்டது போலிருந்தது - அந்தச் சன்னமான ஊதா நிற சமாச்சாரத்தைப் பார்த்த பொழுது ! அவருக்கு நன்றிகளை சொல்லி விட்டு, ஓட்டமாய் ஓடி, ரூமுக்கு வந்தோம் - அடுத்து இங்கிருந்து ஸ்பெயின் எவ்விதம் செல்வதென்று கண்டுபிடிக்கும் திட்டத்தில் ! மதுரையில் டிராவல் ஏஜெண்டை போனில் பிடித்து, நெட்டில் சிக்கிய அத்தனை விமானங்களையும்  அலசச் செய்தேன்- ஏதேனும் ஒத்து வருகிறதா ? என்று பார்க்க ! ஒரு மாதிரியாய் ஒரு டிக்கெட் வாய்ப்பு கண்ணில் பட்டது ! விமான நிறுவனங்களுக்கொரு விசித்திரப் பழக்கமுண்டு ; மூக்கை நேராகத் தொடாமல் - காதைச் சுற்றித் தொடச் செய்தால்  தேவலாம் என்று நினைக்கும் பாங்கில் ! இங்கிருந்து சென்னைக்கு நேராகப் போவதை விடவும், பெங்களூரு போய் விட்டு, அங்கிருந்து சென்னைக்கு இன்னொரு பிளைட்டைப் பிடிப்பது சீப் என்பது போல் சில சமயங்களில் கட்டணங்கள் இருக்கும், நாங்கள் செல்ல வேண்டியதோ மேட்ரிட் நகரம் ; ஆனால் நேரடியாய் மேட்ரிட் போகாது - பார்சிலோனா நகருக்குப் போய் விட்டு, அதிகாலையில் அங்கிருந்து மேட்ரிட்டுக்கு இன்னொரு பிளைட் எடுத்தால் கட்டணம் 6000 ரூபாய் தான் வந்தது ! முடிந்தால் மாட்டு வண்டியில் கூட வரத் தயார் என்ற நிலையில் இருந்தவனுக்கு இந்த பார்சிலோனா-மேட்ரிட் கூத்தெல்லாம் ஒரு சிரமாகவே தெரியவில்லை ! "இந்தத் திருட்டு ஊரிலிருந்து நடையைக் கட்டினால் போதும்டா சாமி !" என்ற உணர்வே மேலோங்க டிக்கெட்டுகளை போடச் செய்தேன் ! இரவு ஒன்பது மணிக்குத் தான் பிளைட்  என்பதால் கொஞ்ச நேரம் கண்ணசர ஜுனியர் தீர்மானித்த போது நான் பேக்கிங் பண்ண ஆரம்பித்தேன் ! அப்போது எனக்குள் மெல்ல குடைந்து கொண்டிருந்ததொரு சந்தேகம் விஸ்வரூபம் எடுத்தது ! ஐரோப்பியக் கூட்டமைப்பின் கீழே வழங்கப்படும் Schengen விசாக்களைக் கொண்டு கிட்டத்தட்ட 25 + தேசங்களுக்குள் பயணிக்க முடியும் என்றாலும், தொலைந்து போன எனது முந்தைய பாஸ்போர்ட்டில் தான் அந்த விசா முத்திரையும் இருந்ததால் - காலியாகக் காட்சி தரும் இந்தப் புது பாஸ்போர்டைக் கொண்டு என்னை ஸ்பெயினுக்கான விமானதை பிடிக்க விடுவார்களா ? என்ற கேள்வி பெரிதாய் நின்றது ! எனது இந்தியா திரும்பும் டிக்கெட் இருப்பது ஸ்பெயினிலிருந்து தான் என்பதால் - எப்படியேனும் கெஞ்சிக் கூத்தாடி கிளம்பி விடலாம் என்ற நப்பாசை மறு  ஓரத்தில் !! போய்த் தான் பார்ப்போமே - என்றபடிக்கு பேக் செய்தவனுக்கு  ஜுனியரின் துணிகளை தனியாக ஒரு பையில் போடும் அளவுக்கு லேசாய் மூளை செயலாற்றியது ! எப்படியேனும் ஸ்பெயின் வேலைக்கு ஒருவராவது போயே தீர வேண்டுமென்பதால் - ஏர்போர்ட்டில் எனக்குத் தடா போட்டு விட்டால் ஜுனியரை மட்டுமாவது அனுப்பியே தீர வேண்டுமென்பது உள்ளுக்குள் பதிவாகியிருந்தது ! அப்போதைக்கு எதையும் சொல்லிக் கொள்ளாமல் மிலன் ஏர்போர்ட்டுக்குக் கிளம்பினோம் இரண்டு பேருமே - மூட்டை முடிச்சுகளோடு ! 

அங்கே போன போது எனது பயங்கள் ஊர்ஜிதமாயின ! "உங்கள் பாஸ்போர்ட்டில் அவசர விசா வாங்கினால் மட்டுமே பயணம் செய்ய முடியும்...!" என்று ஒரேடியாக மறுத்துவிட, கையைப்பிசைய மட்டுமே முடிந்தது எனக்கு ! துளியும் தயக்கமின்றி - "நான் ஸ்பெயின்போய் மிஷினைப் பார்த்து விட்டு அங்கிருந்தே ஊர் திரும்புகிறேன் ; நீங்க டிக்கெட்டை மாற்றிக் கொண்டு மிலனிலிருந்தே கிளம்புங்க !" என்று ஜுனியர் சொன்ன போது - எனக்கு நெஞ்சு டங்கு டங்கென்று அடித்துக் கொண்டது ! எதிர்பார்த்த சமாச்சாரமே ; 25 வயதில் இன்றைக்கு பெண்பிள்ளைகளே  சந்திர மண்டலத்துக்கே தனியாய்ப் பயணிக்கிறார்கள் தான் ; ஏன் - நான் அடிக்காத ஷண்டிங்கே எதுவும் பாக்கி கிடையாது தான் ! ஆனால் - எதிர்பாரா ஒரு சூழலில் ; ஒரு அசம்பாவித நொடியில் - தண்ணீருக்குள் தூக்கிப் போட்டே தீர வேண்டிய அத்தியாவசியம் எழும் போது தொண்டையைக் கவ்வும் பயத்துக்கு மருந்தெதுவென்று தெரிந்திருக்கவில்லை ! போர்டிங் பாசை வாங்கும் நேரத்துக்குள், என்னிடமிருந்த 2 போன்களில் ஒன்றையும், கைவசமிருந்த பணத்தில் ஒரு பகுதியையும் ஜுனியரிடம் கொடுத்து விட்டு, கண்ணாடிக்கு வெளியே நின்று டாட்டா காட்டிய பொழுது வாழ்க்கைச் சக்கரம் ஒரு முழு வட்டம் சுழன்று வந்து நிற்பது  போல் தோன்றியது !  பணிகளை, பொறுப்புகளை சுமந்து மட்டுமே பழகியவனுக்கு, முதன்முறையாக அந்தப் பாரம்  பகிரப்படுவதை உணர முடிந்த பொழுது சந்தோஷப்படுவதா ?  சங்கடப்படுவதா ? சங்கோஜப்படுவதா ? என்றே தெரிந்திருக்கவில்லை ! செக்யூரிட்டி சோதனைகளை முடித்துக் கொண்டு ஜுனியர் உள்ளே ஐக்கியமான பிற்பாடும் அங்கேயே,அந்த கண்ணாடித் தடுப்புக்கு மறுபக்கம் நின்று கொண்டிருக்க மட்டுமே தோன்றியது ! எத்தனை நேரம் அங்கு நின்றேன் என்பதோ ; ஒரு மணி நேர ஊர் திரும்பும் பஸ் பயணத்தை எவ்விதம் சமாளித்தேன் என்பதோ இப்போது நினைவில்லை ! ஆனால் சிந்தனைகளுக்கு இறக்கைகள் இருப்பின், அவை விசாக்களின் அவசியமின்றி ; தேச எல்லைகளின் பதிவுகளை மறந்து - அந்த விமானதை பின்தொடர்ந்திருக்குமென்பது நிச்சயம் ! நான் ரூமுக்குத் திரும்பிய நேரத்துக்கு இரவு 11 ; அங்கே ஜுனியர் பார்சிலோனா சென்று ரூமும் போட்டுப் படுத்து விட்டிருக்க, என் மூச்சு லேசாய் மறுவருகை செய்தது !! புலர்ந்த காலை ; ஜுனியரின் அடுத்த பயணம் ; மெஷின் பார்வையிடல் - என சகலமும் எனக்கு வாட்சப்பிலும், போனிலும் பரிமாறப்பட்ட - 'இந்த லோகம்  ஒண்ணும் அத்தனை மோசமில்லை தானோ ?' என்ற எண்ணம் எனக்குள் உதயமாகத் தொடங்கியது ! பணிகளை முடித்து   விட்டு மேட்ரிட் விமான நிலையத்துக்கே ஜுனியர் திரும்பிய வேளையில் நான் எனது டிக்கெட்டை டில்லிக்கு மாற்றியமைத்து வாங்கியிருந்தேன் ! புதன் காலையில் இருவருமே டில்லியில் சந்தித்துக் கொள்ளும் விதமிருந்த அட்டவணையைப் பார்த்த பொழுது - அந்த நிலவேம்புக் கஷாயப் புன்னகை மீண்டது முகத்துக்கு ! "இல்லே..உன் பாஸ்போர்ட்லே ஐரோப்பிய விசா முத்திரையே இல்லே....நீ உன் சொந்த ஊருக்குத் திரும்பிப் போறதுனாலுமே அது முறையில்லை ; இங்கே இன்னொரு நாள் தங்கியிருந்து, அவசர விசா எடுத்துக் காட்டிட்டுத் தான் நீ போகணும் !" என்று இம்முறை யாராச்சும் குண்டைத் தூக்கிப் போட்டால் - சப்பணமிட்டு "ஓஒ"வென்று அழுது தீர்த்து விடுவது தான் என்ற தீர்மானத்தில் ஏர்போர்ட்டை எட்டிப் பிடித்தேன் ! "நமஸ்தே !" என்றபடிக்கு எனது பாஸ்போர்ட்டில் ஒரு சாப்பாவைக் குத்தி - "ஓடிப் போய்டு" என்பது போல் பார்த்த immigration ஆபீசர் மேல் எனக்கு கோபமே தோன்றவில்லை ! டில்லி திரும்பும் விமானத்தில் வெந்ததும் வேகாததுமாய் எதையோ சாப்பிடத் தந்த நொடியில் கூட எனக்குள் ஆத்திரம் எழவேயில்லை ; டில்லியில் கால் பதித்த பொழுது - எழுந்த உணர்வுகளுக்கோ ;  2 மணி நேரக் காத்திருப்புக்குப் பின்பாய், ஜுனியரின் விமானமும் தரையிறங்க - தூக்கக் கலக்கத்தில் நடை போட்டு வந்த பரிச்சய உருவத்தைப் பார்த்த நொடியில் எழுந்த அசாத்தியத்  துள்ளலுக்கோ பெயர் சொல்லவும் தெரியவில்லை ! ஒரு மாதிரியாய் சென்னை ; அப்புறம் சிவகாசி என வீடு திரும்பிய பொழுது 2 நாட்களுக்கு முன்பான கசப்புகளின் நினைவுகள் லேசாக மங்கியிருந்தன ! இழப்பின் கிரயத்தைக் கணக்கிட்டுப் பார்க்கும் பொழுது ரணமாகிறதே ; ஆனால் சில தருணங்களில் நம்பர்களை மீறியும் வாழ்வில் சில சங்கதிகள் உள்ளதென்பதும் புரிகிறது ! சிறுகச் சிறுக நாட்கள் நகர்ந்திட - மாமூல் பணிகளுக்குள் மூழ்கிட - இதுவும் கடந்து போகும் தான் என்பது புரிகிறது ! ஆனால் எனக்குள்ளிருந்த சன்னமான கொழுப்பு அடுத்தமுறை சிங்கம்புணரி போகும் போது கூடத் தலைகாட்டாது என்றே நினைக்கிறேன் !! அதே போல சங்கடத்திலும் ஒரு சில்வர் கீற்றை பார்த்திட விழைகிறேன் ! 

என்னிடமிருந்து களவு போன பாஸ்போர்ட், ஒருக்கால் ஜுனியரின் தோளில் பை இருந்த சமயம் காணாது போயிருப்பேன், அப்பனின் பாஸ்போர்டைத் தொலைத்த உறுத்தலை வாழ்க்கை முழுவதும்  நல்கியிருக்குமே ?!! At least அந்தக் கஷ்டம் நிகழாததில் சந்தோஷமே ! என் மடமை ; எனக்கே தண்டனை ! என்று எடுத்துக் கொள்கிறேன் !! 

ஒன்றரையணா பெறா சமாச்சாரத்துக்கு இவ்வளவு அலப்பரையா ? என்று உங்களுக்குத் தோன்றினால் நிச்சயம் அதனில் குறை காண மாட்டேன் guys ! ஆனால் அக்கடாவென்று ஒய்வை  நான் நாடும் ஏதோவொரு நாளில் இந்தக் கூத்துக்களெல்லாமே மறந்தும், மங்கியும் போயிருக்கும் என்பது நிச்சயம் !  கண்முன்னே ஒரு ஜோடி இறக்கைகள் மலர்ந்ததை பார்த்த அனுபவத்தை எனக்கு நானே நினைவூட்டிக் கொள்ளவேனும் இந்தப் பதிவைத் தேடிப்  படிப்பேன் ! So அந்தமட்டிற்கு இந்தப் பதிவு எனக்கே ஒரு டைரிக் குறிப்பாகிடட்டுமே ? அந்த ஒரு luxury-ஐ உங்கள் பெயரைச் சொல்லி எனதாக்கிக் கொள்கிறேனே guys ?

Bye all !! See you around !!

P.S : இந்த நாலைந்து நாட்களின் விரயம் காரணமாய் ஜூன் இதழ்களில் ஓரிரு நாள் தாமதம் நிகழக் கூடும் ! இயன்ற மட்டிலும் முயல்வேன் அதனைத் தவிர்க்க ! இதோ - இம்மாதத் 'தல' அட்டைப்பட முதல் பார்வை - ஒரிஜினல் டிசைனோடு !! அசாத்திய சித்திரத் தரத்துடன் நம்மவர் கலக்கக்  காத்திருக்கிறார் !! 
மிலன் நகரில் நமது போனெல்லி & டயபாலிக்  குழுமம் உள்ளது தான் ; எனது 20 ஆண்டு கால மிஷினரி வியாபார நண்பர்கள் ஏகப்பட்டவர்களும் அங்கே உள்ளனர் தான் ! இக்கட்டென்று அவர்களிடம் போய் நின்றிருந்தால் நிச்சயம் துளியும் யோசிக்காது இயன்ற ஒத்தாசைகளை செய்திருப்பார்கள் ! ஆனால் இந்த மாதிரி பல்ப் வாங்கியதை வெளிச் சொல்லக் கூச்சமா ? அல்லது அவர்களை தொல்லைப்படுத்துவானேன்  என்ற எண்ணமா ? - என்று சொல்லத் தெரியவில்லை  - வாயையே திறக்காது இருந்து விட்டேன் ! அங்கே திறக்கா வாய் இங்கே அலிபாபா குகையின் வாயிலைப் போலத் திறந்துவிட்டுள்ளது !! இன்னமும் யோசிக்கிறேன் - ஏனென்று !! 

சென்ற வார பதிவுக்கான உங்களின் பின்னூட்டங்களை இங்கே கொணர்ந்து பதிலளிக்க முயற்சிக்கிறேன் guys !! Bye again !!

Sunday, 14 May 2017

ஒரு அரையாண்டுத் தேர்வு !

நண்பர்களே,

ஞாயிறு வணக்கங்கள் ! வேறொரு time zone -ல் நானிப்போது இருக்க ; வரும் வழியில் மாங்கு மாங்கென்று எழுதிய பக்கங்களை  ஊருக்குப்  போட்டோ எடுத்து வாட்சப்பில் அனுப்பி, டைப்படித்துத் திருப்பி அனுப்ப கோரியிருக்க, நம்மவர்கள் கோட்டையும், குறட்டையும் விட்டுக் கொண்டிருக்க ; பாதித் தூக்கத்தில் எழுந்து அவர்கள் குடலை நான் உருவிய பிழைப்பாகியிருக்க   - அடுத்த 30 நிமிடங்களுக்குள் பதிவோடு ஆஜராகியிருப்பேன் guys !! Sorry !!

------------------------------------------------------------------------------------------------------------

வழக்கமாய் பதிவுகளை டைப்பும் போது வீடோ; அலுவலக அறையோ நிசப்தமாகவே இருக்கும் - என் மைண்ட் வாய்ஸே எனக்குக் கேட்கக் கூடிய விதத்தில்! ஆனால் அவ்வப்போது எங்கேயாவது யாத்திரைகள் போகும் வேளைகளில் தான் எத்தனை பெரிய மாற்றம்! சுற்றுமுற்றும் பரபரப்பு... சட்டியும், பெட்டியுமாய் ஷண்டிங் அடிக்கும் மனிதர்களின் அவசரங்கள்; நம்மூர்களுக்கே உரிதான சத்த மேளாக்கள் என்று ஒவ்வொரு ரயில் நிலையத்திலும், விமான நிலையத்திலும் வியாபித்துக் கிடக்கும் அந்தத் திருவிழாக் கோலத்துக்கு மத்தியில் எழுத முற்படும் போது தான் எத்தனை தினுசு தினுசான அனுபவங்கள்? ‘இந்தாள் என்ன பண்றார்?‘ என்ற குறுகுறுப்பில் கிட்டே வந்து எட்டிப் பார்க்கும் குட்டீஸ்; ‘ஓவரா பிலிம் காட்றானே?‘ என்ற விதப் பார்வைகளோடு பரிசீலனை பண்ணும் not so குட்டீஸ்; ‘மோட்டைப் பார்க்கிறான்... என்னமோ கிறுக்கி வைக்கிறானே முட்டைக்கண்ணன்?‘ என்ற புதிர் முகமெல்லாம் தெறிக்க முறைக்கும் ஆசாமிகள் என்றதொரு களேபர சூழலில் எழுதுவதும் ஒரு செம அனுபவமே! மண்டைக்குள் ஏதேனும் ஒரு சிந்தனை லேசாக ஓடத் தொடங்கும் நொடியில் மூன்று தெரு தள்ளிக் கேட்கக் கூடிய குரலில் “ஹலோாா!!” என்று செல்போன்களுக்குள் நம்மாட்கள் பிளிறுவதற்கும் சரியாக இருக்கும்! ஆனால் அத்தனையையும் மீறி நம் கனவு லோகத்தினுள் ஆழ்ந்திட முயற்சிப்பது – நமது மாடஸ்டி வெங்கடேஸ்வரன் சார் உதாரணம் காட்டுவது போல ‘சிந்தனை ஒருமுகப்படுத்துதலுக்கான‘ இளவரசியின் பயிற்சிக்கு ஒப்பானதாக இருக்கும்!

And டில்லியின் விமான நிலையத்தில் தேவுடா காத்துக் கிடக்கும் வேளைதனில் பேனாவைக் கையில் ஏந்திடும் போது அந்த சிந்தனைகளைக் கட்டி வைக்கும் கலையை அவசரம் அவசரமாய்த் தேடிக் கொண்டிருக்கிறேன்! அகன்ற கண்ணாடி ஜன்னல்களுக்கு வெளியே ராட்சஸ விமானங்கள், தத்தம் வயிறுகளுக்குள் கங்காரூக் குட்டிகளைப் போல இருநூறு-முன்னூறு பயணிகளைச் சுமந்து கொண்டு ‘சொய்ங்ங்க்க‘ என்று மின்னல் வேகத்தில் மேலெழும்புவதைப் பார்க்கும் போது- நமது நாட்களுமே அதே துரிதத்தோடு பறந்து செல்வதை உணர முடிந்தது! நடப்பாண்டின் அட்டவணையைப் போட்ட நினைவுகளே இன்னும் பசுமை குன்றாது மனதிற்குள் பளபளக்க- ஆண்டின் பாதிப் பொழுதைக் கடக்கும் தருணத்தில் இருப்பதை தலை சொல்கிறது! And இன்னும் ஓரிரு மாதங்களுக்குள்- காத்திருக்கும் பதினெட்டின் திட்டமிடல்கள் இறுதி செய்யப்பட வேண்டிய பொழுது புலர்ந்திருக்கும் எனும் போது- இது வரையிலான பயணத்துக்கொரு பின்திரும்புதலைத் தந்து பார்க்கத் தோன்றியது! 2017ன் முக்கால் பங்கு கடந்திருக்கும் ஒரு அக்டோபரில் அடுத்தாண்டின் schedule ஐ உங்களிடம் ஒப்படைக்கும் வேளையில் உங்களது பரிந்துரைகளைப் பெரிதாய் அமல் செய்ய நேரமிருக்காது என்பதால், உங்கள் உரத்த சிந்தனைகளுக்கு இந்த ஞாயிறைக் களமாக்க நினைத்தேன்! So here goes!

* ‘கதை ரகவாரியான சந்தாக்கள்‘ என்ற நிர்ணயம் நமக்குச் சமீப வரவே! லக்கி லூக்கையும், லார்கோவையும்; வில்லரையும், சிக் பில்லையும் ஒரே கட்டுக்குள் அடைத்து வைத்திருந்ததை வருஷமாய்ச் செய்து கொண்டிருந்தோம்! ஆனால் 2016 முதலாக முடிந்தமட்டிற்குக் கதை ரகங்களை வரிசைப்படுத்தத் துவங்கினோம்! தற்போதைக்கு ஆங்கில எழுத்துக்களின் முதல் ஐந்தைக் குத்தகைக்கு எடுத்துக் கொண்டிருக்கும் நிலையில்- தொடரும் ஆண்டும் கிட்டத்தட்ட இதே template-ல் தான் நடைமுறை இருந்திடுமென்று தோன்றுகிறது! எனது முதல் கேள்வியானது- சந்தா A –விலிருந்து! ட்யுராங்கோ; லார்கோ; தோர்கல்; ஜேசன் ப்ரைஸ்; கமான்சே; ஷெல்டன்; ஜானி; Lady S என்று அணிவகுக்கும் இந்தச் சந்தாவினில் இன்னும் யாருக்கு இடமிருந்தால் தேவலாம்? என்று கேட்கப் போவதில்லை! மாறாக- இதனில் யாரேனும் இல்லாதிருப்பின் மகிழ்வீர்களா? என்றே கேட்கத் தோன்றுகிறது! ஒட்டுமொத்தச் சந்தா எனும் போது- ‘விதியே!‘ என்று யாரையேனும் சகிக்க வேண்டி வருகிறதெனில் அவரைச் சுட்டிக் காட்டி எனக்கொரு சின்ன ஈ-மெயில் தட்டி விட்டால் அது பற்றி நிச்சயம் யோசிப்பேன்! Any வீட்டோடு மாப்பிள்ளைகள் உள்ளனரா- நமது சந்தா A-வில்?
* ‘சந்தா B‘ என்பதை விட, ‘சந்தா Tex‘ என்ற பெயரே இதற்குப் பொருத்தமாக இருக்கும் எனும் போது என் கேள்விகள் எல்லாமே இரவுக்கழுகாரைச் சார்ந்தே இருந்திடவுள்ளன!

1. ‘மாதமொரு டெக்ஸ்‘ வேண்டுமா? வேணாமா? என்று கேட்டு வைத்தால் ‘ஜோக்கர் ஸ்மர்ஃப் கூட என்னைப் பார்த்து இடிச் சிரிப்பு சிரிப்பான் என்பதால் அதனை நான் செய்யப் போவதில்லை! மாறாக என் கேள்வியே வேறு! டெக்ஸ் கதைகளுக்கு மத்தியினில் இயன்றளவு ஒரு variety தென்பட்டால் தேவலாம்! என்று எனக்குத் தோன்றியதன் பலனாய்- மஞ்சள் சட்டை மாவீரரின் பலவிதக் கதைகளைத் துளாவித் துளாவி வரவழைத்து வந்துள்ளேன்! ‘டாக்டர் டெக்ஸ்‘; ‘தற்செயலாய் ஒரு ஹீரோ‘; ‘நீதிக்கு நிறமில்லை‘; ‘ஒரு வெறியனின் தடத்தில்‘ என்பனவெல்லாமே அந்தத் தேடல்களின் பலன்களே! ஆனால் இவற்றுள் சில புஸ்வானங்களும் இல்லாது போகாது என்பதை அனுபவத்தில் உணர்ந்துள்ளோம் என்று எனக்குத் தோன்றுகிறது! So- மாற்றம்; முன்னேற்றம் என்ற கோஷம் நம்மவருக்கு அவசியம் தானா? என்ற கேள்விக்கு உங்கள் பதில்கள் என்னவாக இருந்திடும்? “பட்டாசு என்றால் அதகளமாய் வெடிக்கத் தான் வேண்டும்?‘ அதில் வித்தியாசமெல்லாம் நாங்க கேட்டோமா?“ என்பது உங்கள் அபிப்பிராயங்களெனில் ‘பளிச்‘ என்று பதிவு செய்யுங்களேன் folks? மாறாக- “ஒரே மாதிரியான கதை பாணிகள் அலுத்துப் போகுமே; இந்த வித்தியாசங்களெனும் எக்ஸ்ட்ரா நம்பர் நிச்சயம் தேவையே!” என்று நீங்கள் நினைத்தால்- அதையும் சொல்லிப் போட்டீர்களெனில் டெக்ஸின் 70-ம் ஆண்டின் கதைத் தேர்வுகளை ஒரு தெளிவோடு அணுகிட முடியும் எனக்கு!

2. டெக்ஸ் கதைகள் விதவிதமான சித்திர பாணிகளோடு வலம் வருவதை நாமறிவோம்! சில சமயங்களில் கதை நன்றாக இருக்கிறதென்ற நம்பிக்கையில் சற்றே சுமாரான சித்திர பாணி கொண்ட கதைகளைத் தேர்வு செய்து விட்டு- இறுதித் தருணத்தில் ‘இது டெக்ஸுக்கு ஒன்று விட்ட சித்தப்பா புள்ளை போலத் தெரியுதுடோய்‘ என்று உதறவும் செய்திருக்கின்றன! May be நல்ல கதைகளை நாமங்கே miss செய்திருக்கவும் கூடும் தான்! சொல்லுங்களேன்- எனது இந்தத் தேர்வு பாலிசியினை கொஞ்சமாய் தளர்த்திக் கொள்ளலாமாவென்று? குருமா மீடியமா இருந்தாலும் லெக்பீஸ் ஓ.கே.வெனில் உங்களுக்கு ஓ.கே. தானா ? அல்லது தற்போதைய எனது பாணிக்கே ‘ஜே‘ போடுவீர்களா?

3. டெக்ஸின் புராதனங்களுக்குள் பல முத்துக்களும் உள்ளன; சில கல்யாணி கவரிங் சமாச்சாரங்களும் உள்ளன என்பதை நாம் பார்த்துள்ளோம்! “அராஜகம் அன்லிமிடெட்” அதற்கொரு prime உதாரணம் என்பேன் ! டெக்ஸின் 1-200 கதைகளுக்குள் தேடிடும் ஆர்வத்தில் ‘டிக்‘ ஆன கதையிது! தற்போதைய எடிட்டர் போசெல்லியின் வருகைக்குப் பின்னே இது போன்ற oldies சற்றே நெருடலாய்த் தெரிவது எனக்கு மட்டும் தானா? அல்லது உங்களுக்கும் அந்த வேறுபாடுகள் தட்டுப்படுகின்றனவா? ஒட்டுமொத்தமாய் ‘புதுயுக டெக்ஸ்‘ பக்கமாய் சாய்ந்து / பாய்ந்து விடலாமா? Of course – புதுசெல்லாமே கிடையாதென்பதை நாமறிவோம் தான்; ஆனால் புது யுகப் பயணத்தின் திகிலை அனுபவிக்க முனைவோமா?

4. டெக்ஸின் சிங்கிள் ஆல்பங்கள் நம் யானைப் பசிகளுக்கு நிச்சயம் பக்கோடாக்களாய் மாத்திரம் இருந்திடக் கூடும் தான்! ஆனால் பட்ஜெட்டையும் சரி , பணிச் சுமைகளை balance செய்திடவும் சரி, இந்த 110 பக்க டெக்ஸ்  கதைகள் தவிர்க்க இயலா விஷயங்களாய் கண்ணில் படுகிறன்றன. இவற்றைப் படிக்கும் போது பெரிதாய் நெருடல்கள் இல்லையெனில் சந்தோஷமே! What say all?

5. ஏற்கனவே கேட்ட கேள்வியே ; ஆனால் இம்முறை சற்றே சீரியஸாகவே! மாந்த்ரீகம் சார்ந்த கதைகள்; மெஃபிஸ்டோ; எமா என்ற விட்டலாச்சார்யா ரக வில்லன்களை நாம் பரணிலேயே குடிவைத்துள்ளோம் ரொம்ப காலமாகவே! ஆனால் இத்தாலிய வாசகர்களோ- நம்மவர் தடித்தடியான வில்லன்களை சாத்துவதை ரசிக்கும் அதே வேகத்தோடே இந்தச் செவியில் புய்ப்ப ஹீரோக்களையும் ரசித்து வருகின்றனர்! நமக்கும் இது சாத்தியப்படுமா? அல்லது ‘சிவனே‘ யென்று தற்போதைய பாதைகளில் சவாரிகளைத் தொடர்வோமா?

- கார்ட்டூன் ‘C‘ சந்தா ! எனது ஆதர்ஷ சந்தா இதுவே என்பதில் ஐயம் லேது தான்! ஆனால் இது இன்னமும் நிறைய நண்பர்களுக்கு பொம்மைக் கதைகளே என்பதும் நிஜமே! கார்ட்டூன் அணிவகுப்பில் கல்தா தருவதாயின் அது யாருக்கெல்லாம் என் அபிப்பிராயப்படுவீர்களோ? All is well என்றால் சுகமே ! ஆனால் சில நெருடல்களைக் களைய அவசியம் இருப்பதாகத் தோன்றின் ஒரு பிரத்யேக மின்னஞ்சல் ப்ளீஸ்!!

- மறுபதிப்புச் சந்தா D: கேள்விகளே எனக்கில்லாத சந்தா இது! எடிட்டராகப் பேய் முழியும்; பதிப்பாளனாக சந்தோஷத் தாண்டவமும் ஆடச் செய்திடும் இந்தப் பழமைகளின் மறுவருகையை 2018லும் தொடரவே உள்ளோம்! But இவற்றை சற்றே மெருகூட்டிட என்ன செய்யலாம் என்பது பற்றி ஏதேனும் யோசனைகள் folks? Serious question guys !!!

- சந்தா E: எட்டு வைக்கக் கூடப் படித்திரா பிள்ளை என்பதால் கருத்துச் சொல்ல இது ரொம்பவே சீக்கிரம் தானே? So இது தொடர்பான எனது கேள்விகளை ஆண்டின் இறுதிக்கு வைத்துக் கொள்வோமே? தற்போதைய தொடக்கம் promising ஆக இருப்பதால் செல்லக் கூடிய தொலைவு ஏகமென்ற நம்பிக்கையோடு தொடர்கிறோம்!

- What else? ஏதேனும் ஒரு புதிய நாயகரை அறிமுகம் செய்வதாகயிருப்பின் உங்களது suggestion ப்ளீஸ்? ஒரேயொரு நாயகத் தேர்வு மட்டுமே allowed என்பதோடு; அது நமது ஆதிகாலத்து ஆசாமிகளாய் இருத்தலும் வேண்டாமே என்ற வேண்டுகோளும் ! பழைய ஆசாமிகளுக்கு சந்தா D-ல் உரிய சமயங்களில் வேளை பிறக்குமென்பதால் - அவர்களை உங்கள் தேர்வாக்கிட வேண்டாமே- ப்ளீஸ்?

ஜுன் மாதத்து இதழ்கள் பரபரப்பாய் ஒரு பக்கம் தயாராகி வருகின்றன! ரிப்போர்டர் ஜானியின் மாமூலான தலையைச் சுற்றி மூக்கைத் தொடும் பாணி இம்முறையும் நம்மை ‘மெர்செல்‘ ஆக்கக் காத்துள்ளது ஒரு பக்கமெனில் போட்டிக்கு நிற்கக் கூடிய அத்தனை பேரையும்- ‘ஓரமாய்ப் போய் விளையாடுங்கப்பா!‘ என்று மூட்டை கட்டி அனுப்பத் தயாராகி வரும் டெக்ஸ் வில்லர் சாகஸம் மறுபக்கம்! ‘கவரிமான்களின் கதை‘ சித்திர பாணிகளலும் சரி, கதையிலும் சரி, பிரித்து போய்க் காத்துள்ளது! இந்த இதழை உங்களிடம் ஒப்படைக்க இப்போதே கை பரபரக்கிறது!! பற்றாக்குறைக்கு சந்தா E சார்பாய்க் காத்திருக்கும் அண்டர்டேக்கரின் அதகளமும்!! ஜுன் ஒரு த்ரில்லிங் வாசிப்பை வழங்கக் காத்துள்ளது என்ற மட்டிற்கு நடையைக் கட்டுகிறேன்! Bye all! See you around soon !

நம்மிடையே உள்ள அத்தனை தாயுள்ளங்களுக்கும் நமது அன்னையர் தின வாழ்த்துக்களும், வணக்கங்களும் உரித்தாகுக  !!

Sunday, 7 May 2017

மார்க் போடும் ஞாயிறு இது !

நண்பர்களே,

வணக்கம். கந்தக பூமி தான்... ‘மழை‘ என்பதையெல்லாம் பேப்பரில் எழுதிப் பார்த்து ரசித்துக் கொள்ள வேண்டியதொரு மண் தான் ; மல்லாக்கப் படுத்து உத்திரத்தை ரசிப்பதைத் தாண்டி பொழுதைப் போக்க இங்கே புகலிடங்கள் கிடையாது தான் ; ஆனாலும் முகத்திலொரு புன்னகையோடு, அவரவர் பிழைப்புகளைப் பார்க்க ஓடியாடும் இந்த ஊரில் வசித்திட ஏப்ரலும், மே மாதங்களும் ரம்யமான பொழுதுகள் என்பேன் ! ஒன்றுக்கு, இரண்டாய் அம்மன்கோவில்கள் இருப்பதால் - தென்மாவட்டங்களின் தனி அடையாளமான பங்குனித் திருவிழா மாத்திரமன்றி - சித்திரைத் திருவிழாவும் இங்கே களைகட்டுவது இந்த 2 மாதங்களில் தான் ! பள்ளி விடுமுறைகளும், சித்திரைப் பொருட்காட்சியும் சேர்ந்து கொள்ள - ஊருக்குள் திரும்பிய திசையெல்லாம் ஒளி வெள்ளமும், ஒலிப் பிரவாகமுமே ! நாளையும், வரும் புதனும் திருவிழாவின் பொருட்டு ஊருக்கே விடுமுறை என்பதால், நமது அலுவலகமும், அலைபேசிகளுக்குமே லீவு தான் ! So நீங்களெல்லாம் பிஸியாக இருக்கவுள்ள வாரநாட்களில்- ரின்டின் கேனோடு ஒரு பக்கமும், அண்டர்டேக்கரோடு மறுபுறமும் எனது நேரத்தைச் செலவிடவுள்ளேன் ! எட்டு கழுதை வயசானாலும் லீவுகளைப் பார்த்து ‘ஹை... ஜாலி !‘ என்று மனம் துள்ளுவதன் மாயம் என்னவென்ற தெரியவில்லை ! அது ஏன்கிறேன்...? 

Moving on to May albums...

Early days தான்... உங்களுள் ஒரு கணிசமான பகுதியினர் இன்னமும் மே மாத இதழ்களின் ‘மசி முகர்தல்களையும்‘; ‘படம் பார்க்கும் படலங்களையும்‘ தாண்டி நகர்ந்திருக்க மாட்டீர்கள் என்று யூகிக்கவும் முடிகிறது தான் ! ஆனால் இதுவரையிலான reactions சொல்லும் முக்கிய  சேதி ஒன்றே ! அது சந்தா E–யின் “ஆத்தா... நான் பாசாயிட்டேன்!” என்ற கூக்குரலே ! 

லார்கோ வின்ச் தலைகாட்டும் தருணங்களில் - கதைகளில் மாத்திரமன்றி, நம்மிடையேயும் பரிபூரண கவனம் அவர் திசையில் பிரவாகமெடுப்பது இயல்பே ! So இம்மாத “சதுரங்கத்திலொரு சிப்பாய்” வெளியாகும் முன்பாகவே அதன் 'நலம்' பற்றிய நம்பிக்கை எனக்குள் நிறையவே இருந்தது. மாமூலான லார்கோ templates கொண்ட கதை தான் இதுவும் - ‘திடுக்‘ கொலையோடு ஆரம்பம் ; உலக வரைபடத்தின் புதுப்புதுப் பகுதிகளாய் தேடிப் பிடித்து ப்ளுஜீன்ஸ் பில்லியனரை அங்கே இட்டுச் செல்வது ; சைமனின் ஜாலி சைட்-டிராக் ஒன்றினை ஓடச் செய்வது etc... என்ற வகையில் ! ஆனால் இந்தத் தொடரை நாம் நேசிக்கும் பிரதான காரணங்களுள் முக்கியமானவை இந்த சுவாரஸ்ய templates தான் எனும்போது- நாமிதை இம்முறையும் சந்தோஷமாய் ஏற்றுக் கொள்வோம் என்ற நம்பிக்கை நிறையவே இருந்தது என்னுள் ! வழக்கமான லார்கோ standards-க்கு இம்முறை கதையின் ஆழம் ஒரு மாற்று குறைவு என்ற போதிலும் - அனல் பறக்கும் அந்தக் கதையோட்ட வேகத்தை நாம் ரசிப்பது சுலபம் என்று நினைத்தேன் ! Add to it - ஓவியர் பிலிப் ப்ரான்கின் மூச்சிரைக்கச் செய்யும் ஓவியங்கள் & கலரிங் – ஒரு டப்பா கிருஷ்ணா ஸ்வீட்ஸ் மைசூர்பாகு நம்முன்னே இம்மாத லார்கோவின் ரூபத்தில் திறந்து வைக்கப்பட்டிருப்பது போல உணர்ந்தேன் ! So ப்ளுஜீன்ஸ் பில்லியனர் பற்றி எனக்குக் கவலை இருந்திருக்கவில்லை !

கேரட் மீசைக்காரரும் கூட எனக்குள் சலனங்களையோ ; சந்தேகங்களையோ அதிகம் எழச் செய்திருக்கவில்லை ! எப்போதுமே நமது மார்க் போடும் அளவுகோல்கள் கார்ட்டூன்களுக்கு சற்றே இளகிய மனம் கொண்டிருப்பது ஒரு பக்கமெனில் - இது போன்ற breezy reads இன்றைய நமது பிசியான நாட்களை இலகுவாக்க உதவிடுவதால் சிரமமின்றி இவற்றை ஏற்றுக் கொள்வது சுலபமாகிறது தானே ? ‘இதெல்லாம் என் வீட்டு அரை நிஜார்களுக்கு மாத்திரமே !‘ என்று கார்ட்டூன்களை குச்சி முட்டாய் & குருவி ரொட்டி ரகத்துக்கு ஒதுக்கிடும் நண்பர்கள் நீங்கலாக - பாக்கிப் பேரை நமது க்ளிப்டன் சுலபமாய் ஈர்த்து விடுவாரென்ற நம்பிக்கை எனக்கிருந்தது ! என்ன - அந்தச் சிறுத்தைக்குக் கதையின் ஓட்டத்தில் இன்னும் கொஞ்சம் கூடுதல் பங்கு தந்திருப்பின்- சிரிப்பு மீட்டரை இன்னமுமே கொஞ்சம் உயர்த்தியிருக்கலாமென்று பட்டது ! கதைகளுள் நாய்கள், பூனைகள், ஏன் - யானைகள் கூட வலம் வந்திருக்கலாம் ; ஆனால் ஒரு ஜாலியான பப்ளிமா ரூபத்தில் சிறுத்தை அறிமுகமாவது நமக்காவது இதுவே முதல் தடவையல்லவா ? So “கர்னலுக்கொரு சிறுத்தை” நிச்சயம் உதைபடாது என்ற எனது எதிர்பார்ப்பு பொய்த்திடவில்லை !

மறுபதிப்பைப் பற்றி நான் புதுசாய் சொல்ல என்ன பாக்கியிருக்க முடியும்? நல்ல நாளைக்கே விற்பனைகளில் முன்னணி வகிக்கும் இதழ்களுள் ஒரு நிஜமான classic சாகஸம் இடம்பெறும் போது, விறுவிறுப்பிற்குப் பஞ்சம் இராது தானே? “தலைகேட்ட தங்கப் புதையல்” இந்த வாரத்தின் hotseller - நமது ஸ்டோரிலும், ஏஜெண்ட்களிடமும் !!

‘தல‘ இல்லாத மாதம் என்று நிறையவே சோக முகங்களைப் பார்க்க முடிந்த போது ஒரு சில சமாச்சாரங்கள் என் தலைக்குள் realign ஆகின என்பதை நானிங்கே குறிப்பிட்டாக வேண்டும் ! “மாதமொரு டெக்ஸ்”-ன் ஆரம்பம் 2016-ல் தான் என்றாலும், தொடர்ச்சியாய் பத்துப்-பதினைந்து Tex இதழ்களுக்குப் பின்னே துவக்க நாட்களது ஈர்ப்பு தொடர்ந்திடுமோ - தொடர்ந்திடாதோ ? என்ற மெல்லிய சந்தேகம் எனக்குள் ஒரு ஓரமாய் குடியிருந்தது ! என்றைக்குமே நாம் திகட்டத் திகட்ட variety களை ரசித்துப் பழகியவர்கள் என்பதால் ஒருசேர எந்தவொரு நாயகரையும் இத்தனை இதழ்களுக்குத் தொடர்ச்சியாய் நாம் வாசித்திருக்க மாட்டோம் ! இதற்கு முன்பாய் 1995+ல் ஒரு காலகட்டத்தில் 4 டெக்ஸ் இதழ்கள் அடுத்தடுத்த மாதங்களில் வந்தது தான் longest stretch என்றிருந்திருக்கும் (am I right guys ??)  எனும் போது- எனது பயங்களே இந்தப் பொன் வாத்தை - பிரியாணி போட்டு விடக் கூடாதே என்பதே ! So 2017-ன் சந்தாக்களில் மொத்தமே 10 இதழ்களே ஒவ்வொரு பிரிவிலும் என்ற அறிவிப்பைத் தொடர்ந்து - இடைப்பட்ட ஏதோவொரு மாதம் ‘தல‘ இலா மாதமாய் அமைந்திடுமென்ற “ஞானம்” பிறந்த போதே- அச்சமயம் உங்களது reactions களைக் கூர்ந்து கவனித்திட வேண்டுமென நினைத்திருந்தேன் ! மேயும் புலர்ந்து... டெக்ஸ் நஹி ! என்ற யதார்த்தமும் புலர்ந்த போது உங்களது வதனங்களில் வடிந்த கவலை ரேகைகளே என் கேள்விகள் / சந்தேகங்கள் அத்தனைக்கும் ஒட்டுமொத்தப் பதில்களாகி விட்டன ! மாதந்தோறும் நமது கூரியர் கவர்களில் ஒரு தவிர்க்க இயலா அங்கமாகிப் போனவர் - நம் மனங்களிலுமே ஒரு நிரந்தர சீட்டை ‘புக்‘ பண்ணி விட்டார் என்பதை அட்சரசுத்தமாய் புரியச் செய்தமைக்கு நன்றிகள் folks ! தொடரும் காலங்ளில் “சூன்ய மாதம்” எதுவுமேயிராது என்ற உறுதியை இப்போதே பதிவிட்டு விடுகிறேன்! 

And இந்த மே மாதம் ‘டெக்ஸ்‘ இல்லாது போனதற்கு ரொம்பவே சிம்பிளானதொரு காரணமும் உள்ளது ! In fact அதனை யாருமே யூகிக்காது போனதில் ஆச்சர்யமே எனக்கு ! மே மாதத்து 4 இதழ்களுள் – லயன் காமிக்ஸ் ஒரு இடம் கூடப் பிடித்திருக்கவில்லை எனும் போதே அதன் பின்னுள்ள காரணத்தை கவனிக்க முயற்சித்திருப்பீர்கள் என்று நினைத்தேன் ! நமது தற்போதைய "லயன்" வெளியீடு நம்பரையும்  ; அப்புறம்  ஜுலையில் நமது ஆண்டுமலர் தருணம் காத்திருப்பதையும்; கூப்பிடு தொலைவில் கைதூக்கி நிற்கும் நமது லயன் # 300 இதழையும் ஒரே நேர்கோட்டில் ஒன்றிணைத்துப் பாருங்களேன் guys- ‘இது தான் அது... அது தான் இது...!‘ என்று சொல்ல விழையும் எனது திட்டமிடல் புரியும் ! இம்மாதம் மட்டும் லயன் இதழ் ஏதும் இல்லாது கடந்து போயின்- ஜுலைக்கு Issue # 300 வெளிவருவது கச்சிதமாய் பொருந்திப் போகும் என்பதால் - எப்படியும் Tex-க்குக் கொடுத்தாக வேண்டிய ஓய்வை இந்தத் தருணத்தில் கொடுத்திட முன்வந்தேன்! Last but not the least – இன்னமுமொரு (முக்கிய) காரணமும் உண்டு - இரவுக் கழுகாரை கண்ணில் காட்டாததற்கு ! !

சந்தா E தனது அறிமுகப் படலத்தை அரங்கேற்றும் மாதத்தில் – black & white ஒளிவட்டத்தை பிரதானமாய் அதற்கே தந்திடுவதில் தவறில்லை என்று நினைத்தேன் ! அட்டகாசச் சித்திரங்களுடனும், செம விறுவிறுப்பாதொரு போசெல்லி கதையோடும் காத்துள்ள ‘கவரிமான்களின் கதை‘யையும், இம்மாதமே தயார் செய்திருந்தால் - சந்தா E யோ - கொசுவோ ; 'ஏக் தம்மில்' - மொத்தத்தையும் நம்மாள் கபளீகரம் செய்திருப்பார் என்ற பயம் (!!) எனக்கிருந்தது ! ரொம்ப ரொம்ப வித்தியாசமான கதைக்களம் ; அனல் பறக்கும் action என்று டெக்ஸ் ஒரு டபுள் ஆல்பத்தில் அதகளத்தை அரங்கேற்றம் செய்யும் போது - பக்கத்து மேடையில் ஒரு இளம்... புதுப் பாகவதர் சாதகம் செய்ய முயற்சித்தால் பருப்பு வேகத்தான் செய்யுமா ? 

பாகுபலியையும், ஒரு art film-ஐயும் ஒரே நேரத்தில், ஒரே காம்ப்ளெக்சில் ஓடச் செய்தால் விசில்கள் பறப்பது எங்காக இருக்கக்கூடும் ? என்பதில் சந்தேகம் இருக்கத் தான் முடியுமா ? So புதுவரவுக்கு மூச்சு விடச் சிறிதளவாவது சுதந்திரம் தந்திடும் எண்ணமும் எனது தீர்மானத்துக்குப் பின்னணி ! ஜுன் மாதம் சந்தா E-யிலும் ஒரு புது அதிரடிக்காரர்- ‘அண்டர்டேக்கர்‘ ரூபத்தில், அதுவும் வண்ணத்தில்  காத்திருப்பதால் எனக்குக் கவலைகளில்லை - TEX-ஐ எவ்விதம் அடுத்த மாதம் சந்தா E சமாளிக்குமோ என்று !சரி... சாலைகளைச் சீராக்கித் தந்து ; வண்டிக்குப் பெட்ரோலும் போட்டுவிட்டான பிறகு - சவாரி செய்யும் பொறுப்பானது சம்பந்தப்பட்டவர் கைகளில் தானே இருக்க முடியும் ? களமிறக்கிவிட்ட பிறகு தனது ஆட்டத்தை வெளிப்படுத்த வேண்டியது சந்தா E தானே ? இதனில் முதல் இதழாக நான் துவக்கத்தில் திட்டமிட்டிருந்தது – “என் சித்தம் சாத்தானுக்கே சொந்தம்” இதழினைத் தான்! ஆனால் ஆங்கில மொழிபெயர்ப்பு முடிந்த நிலையில் இரண்டு கதைகளுமே லேப்டாப்பில் இருந்திட - பொறுமையாய் வாசித்தேன் ! சந்தேகமின்றி “ஒரு முடியா இரவு” நமது இன்னிங்ஸைத் துவக்கித் தர பிரமாதமான ஓபனிங் பேட்ஸ்மேனாகக் காட்சி தர- இதனுள் புகுந்தேன் பணி செய்ய ! 

சில ஆண்டுகளுக்கு முன்னர் வரையிலும் மொழிபெயர்ப்பு / எடிட்டிங் பணிகளின் போது இன்டர்நெட்டைத் தோண்டுவது ; பின்னணிகளை ஆராய்ச்சி செய்ய (!!!) முற்படுவது என்ற ஞான மார்க்கங்களில் நான் பயணித்ததில்லை ! இந்தாண்டை ஒரிஜினல் படங்கள்...அந்தாண்டை டைப்செட்டிங் முடிந்த பக்கங்கள்....சைடாண்டை ஆங்கில மொழிபெயர்ப்பு என்று பரப்பிப் போட்டுக் கொண்டு சிண்டைப் பிய்த்துக் கொள்ளும் தருணங்களிலும் நெட்டைத் தேடும்  பணி/ பாணி துவங்கியது - க்ரீன் மேனர் முதலாய் !! அதனில் பயன்படுத்த அவசியமான கட்டாணியும்- முட்டாணியுமான சொற்களின் spelling-களைச் சரிபார்க்கும் பொருட்டு இன்டர்நெட்டை நாடத் தொடங்கியவனுக்கு பின்நாட்களில் “மர்ம மனிதன் மார்டின்”; “மேஜிக் விண்ட்”; கிராபிக் நாவல்கள் என்ற தருணங்களில் கூகுளாண்டவரின் கிருபை இன்றியமையாததாகிப் போனது ! “ஒரு முடியா இரவு” இதழைத் தேர்வு செய்ததே நிறைய விமர்சனங்களை நெட்டில் பரிசீலித்த பின்னரே எனும் போது - கதைக்குள் பணி செய்யும் போதும் அவ்வப்போது இணைய தேடல்கள் அவசியமானது ! ‘கேட்டானிக்  மனச்சிதைவு‘ என்றால் என்னவென்று புரிந்து கொள்ளாது - மார்வினின் கதாப்பாத்திரத்தைப் புரிந்து கொள்ளத் தடுமாறியிருப்பேன் ! இதை போல ஆங்காங்கே இன்னும் சில தருணங்களும் எழுந்தன !  ‘சிவனே‘யென்று கதையைச் சத்தமின்றி நமது செனா.ஆனா ஜிக்கு கூரியர் அனுப்பி விட்டு எழுதச் சொன்னால் இன்னும் தேவலாமோ  ? என்ற எண்ணம் கூட மேலோங்கியது ! ஆனால் சவாலானதொரு அப்பத்தைப் பிரித்துக் கொடுக்க இந்தக் குரங்குக்குச் சம்மதம் தோன்றவில்லை என்பதால் ‘தம்‘ கட்டி அச்சுக்குப் போகும் 2 நாட்களுக்கு முன்னர் வரை எழுதிக் கொண்டிருந்தேன் ! மாதத்தின் கடைசி வாரத்தில், நமது ஆபீஸ்  அந்த செயிண்ட் பிரான்சிஸ் மனநல க்ளினிக்குக்குப் போட்டியாய் எப்போதுமே காட்சி தருவதுண்டு தான் ; ஆனால் இம்முறை அடித்த கூத்துக்கள் ஒரு படி ஜாஸ்தி என்பேன் ! So ‘விடாதே- பிடி...!‘ என்று தட்டுத் தடுமாறி தயார் செய்த இதழைக் கையில் ஏந்தி ஆற; அமரப் பார்க்கக் கூட நேரமின்றி உங்களுக்கு டெஸ்பாட்ச் செய்து விட்டு - இந்த இதழுக்கான உங்கள் முதல் reactions எவ்விதமிருக்கக் காத்துள்ளதோ ? என்ற ‘டர்ரோடே‘ இங்கே பதிவுப் பக்கங்களை எட்டிப்பார்த்துக் கொண்டே இருந்தேன்!

Oh yes- எனக்கு வித்தியாசமாகத் தோன்றியது என்பதற்காக மட்டுமோ ; சிரமப்பட்டு பணியாற்றினோம் என்பதற்காக மாத்திரமோ ஒரு கதையை / இதழை நீங்களும் கொண்டாட வேண்டுமென்ற எதிர்பார்ப்பு குழந்தைத்தனமானது என்பது புரிந்தது தான் ! இருந்தாலும் – மனசுக்குள் ஒரு நப்பாசை, நமது பரஸ்பர ரசனைகளும் ஒரே பக்கத்தில் லயித்து விட்டால் பிரமாதமாய் இருக்குமே என்று ! ! இன்னும் கொஞ்சம் போனால் -“டெம்போல்லாம் வச்சுக் கடத்தியிருக்கோம் ! ஏதாச்சும் பார்த்து மார்க் போடுங்க ஷாமியோவ் !” என்ற எனது மைண்ட்வாய்ஸ் வெளியே கேட்டுத் தொலைத்துவிடுமோ என்றும் தோன்ற ஆரம்பித்தது  ! ஆனால் சிறுகச் சிறுக thumbs up சின்னங்கள் இங்கும், நமது இ-மெயில்களிலும் பதிவாகத் துவங்கிய போது “ஆத்தா... நான் பாசாயிட்டேன்” என்று LGN கைதூக்கி கர்ஜிப்பது போலப்பட்டது ! Of course தலீவரின் சிலாகிப்பு கேக் மீதான ஐசிங் என்பதில் ஐயமில்லை தான் ; ஆனால் இன்னமும் பெரும்பான்மை நண்பர்களின் அபிப்பிராயங்களை / அலசல்களை அறிய முடியும் போதே இந்தப் பாஸ் - முதல் வகுப்பிலா ? distinction சகிதமா ? அல்லது ஜஸ்ட் பாஸா ? என்பதை உறுதி செய்து கொள்ள முடியும் ! So இந்த ஞாயிறையும், தொடரும் சில நாட்களையும் “ஒரு முடியா இரவின்” அலசலுக்கென ஒதுக்கிடுவோமா guys? 

Only சிலாகிப்புகள் தேவை ; விமர்சனங்களுக்குத் தடா ! என்ற தயக்கங்கள் நிச்சயமாய் இங்கே அவசியமாகா ! ஒரு புது முயற்சிக்குப் பரவலான- ஆழ்மன அபிப்பிராயங்கள் தானே உரமிட முடியும்? So மனதில் பட்டதைப் ‘பளிச்‘சென்று சொல்லுங்கள் நண்பர்களே ! அதே சமயம் - கண்ணில் castor oil வீட்டுக் கொண்டு நெருடல்களுக்கு தேடிட வேண்டாமே - ப்ளீஸ் ? இயல்பாய்ப் படிக்கும் சமயம் உங்களுக்குத் தோன்றிடும் reactions தான் நமக்கு பயனாகிடும் ! 

சந்தா E-ல் எனக்கு சந்தோஷமே என்றாலும் ; 2 சிறு வருத்தங்கள் இல்லாதில்லை - இந்த இதழினில் ! முதலாவது - கதையின் இடையிடையே "லூசுப் பசங்கள் " ; "மெண்டல்கள்" etc என்று நோயாளிகளை அந்தத் திருட்டுக் கும்பல் கூப்பிடுவது போலிருக்கும் வரிகளை எழுதியது சற்றே நெருடலாகவே இருந்தது ! மனநலமற்றிருப்போரை அவ்விதம் விழிப்பது தவறு என்றாலும், கதையோட்டத்தில் இயல்பாய் வசனங்கள் தோன்றிட வேண்டுமென்ற ஆசையில் அவற்றைத் தவிர்க்க இயலவில்லை ! வருத்தம் # 2 - LGN லோகோவை டிசைன் செய்து தந்த நண்பர் கார்த்திக்கின் பெயரைக் குறிப்பிட விடுபட்டுப் போனது தொடர்பாய் ! இதழ் அச்சாகி முடிந்த பின்னே தான் அது நினைவுக்கு வர - ஒரு ரப்பர் ஸ்டாம்ப் செய்து கருப்பு மசியில் தொட்டு சாப்பா பதித்து விடுவோம் என்று சொல்லியிருந்தேன் ! But சனிக்கிழமையன்று இதழ்களை பைண்டிங்கில் இருந்து கொணர்ந்து சேர்ப்பதிலேயே  நம்மவர்களுக்கு கவனம் லயித்து நிற்க, ரப்பர் ஸ்டாம்பைக் கோட்டை விட்டு விட்டார்கள் ! நானும் ஊரில் அன்று இல்லாது போக - அவசரத்தில் வேறெதுவும் செய்திட முடியாது போனது !  Phew !

அடுத்த மாதம் காத்திருக்கும் சந்தா E-யின் “அண்டர் டேக்கர்” தூள் கிளப்பக் காத்திருக்கும் ஒரு அடாவடி ஆசாமி என்பதில் எனக்கு ஐயமே கிடையாது! அதனால் அடுத்த மாதம் கவலைகளும் கிடையாது ! இந்த b&w கிராபிக் நாவல் பாணி நமது வாசிப்புக் களங்களுக்கு மெருகூட்டும் சாத்தியங்கள் பிரகாசமா ? என்பதை நீங்கள் ஊர்ஜிதம் செய்யின் - எனது திட்டமிடல்களுக்கு அவை ரொம்பவே சகாயம் செய்திடும் ! 2018-ன் லிஸ்ட்கள் மண்டைக்குள் ஓடிவரும் வேளைதனில் உங்களது நேரங்களை சன்னமாய் இதற்கென செலவிட்டால் - பலன் நம் அனைவருக்குமே இருந்திடும் ! So வாருங்களேன் மார்க் போடும் மார்க்கர் பேனாக்களோடு ?

Before I sign off - சில குட்டித் தகவல்கள்!

*இரத்தப் படலம்- பாகம் 25 தயாராகி வருகிறதாம்  !! சீக்கிரமே அதன் first-look இணையத்தில் வெளியானால் ஆச்சர்யம் கொள்ளாதீர்கள் !

*XIII மர்மங்கள் பட்டியலில் “ஜாதைன் ப்ளை” இதழ் # 11 ஆக வெளிவரவுள்ளது ஜூன் 2 -ம் தேதிக்கு ! சஞ்சய் ராமசாமி அணியைச் சார்ந்த என் போன்றோர்க்கு... நிறைய மண்டை சொரிதலுக்குப் பின்னரே அவர் யாரென்று நினைவுக்கு வருமென்று நினைக்கிறேன் !

*“இளம் டைகர்” படலம் தொடர்கிறது... நம்மவரின் இளவயது சாகஸங்களோடு ! ஆல்பம் # 22 தயாரிப்பில் உள்ளது ! 

மீண்டும் சந்திப்போம்! Have a relaxed Sunday & a week ahead! Bye for now!

Tuesday, 2 May 2017

ஒரு "முன்குறிப்பு" !!

நண்பர்களே,

முன்குறிப்பு :

வணக்கம். வழக்கமாய் இடைச்செருகல் செய்திகளை பின்குறிப்பாய் இணைத்திடுவேன் ; ஆனால் இதுவோ முத்தான சேதி எனும் போது - "முன்குறிப்பு மரியாதை" தந்திடுவதே பொருத்தமென்று நினைத்தேன் !! நேற்று காலை புதியதொரு நம்பரிலிருந்து ஸ்நேகமானதொரு குரலில் ஒரு அழைப்பு ! மறுமுனையில் இருந்தவர்   குமுதம் வார இதழின் "அரசு" என்பதைத் தெரிந்து கொண்ட போது இதயம் ஒரு நொடி துள்ளியது !! மக்களின் நாடித் துடிப்பில் ஒரு கையும், முத்திரை பதிக்கும் எழுத்துக்களை வாரித் தந்திடும் பேனாவை இன்னொரு கையிலும் பிடித்து நிற்கும் இந்த ஆற்றலாளர் "நல்லா இருக்கீங்களா ?" என்று நலம் விசாரித்த போது எனக்கு பெப்பே பெப்பே என்ற மட்டுக்கே பேச்சு வந்தது ! "நாளைய குமுதத்தைப்பாருங்களேன்..!" என்றவாறே அன்போடு பேசியதெல்லாம் ஒரு கனவு போலவே இருந்தது ! ஜெரெமியா புதுவரவினைப் பற்றிய அவரது பார்வைகளை முன்வைத்திட, அக்னி நட்சத்திரமாவது - ஒண்ணாவது - கொடைக்கானலின் குளிர்ச்சி தான் என்னுள்  !!


And இன்று காலை குமுதம் இதழை வாங்கிப் பார்த்தால்  - அட்டைப்படத்தோடு நமது MILLION & MORE SPECIAL க்கு அவர் நல்கியிருந்த சிலாகிப்பு அசாத்திய ரகம் என்பது புரிந்தது  !! புத்தக தின வாசிப்புக்கென அவர் தேர்வு செய்தது நமது ஜெரெமியாவையே என்பதை மிகப் பிரமாதமாய் எழுதியுள்ளார் !! ஒரு காமிக்ஸ் ஆர்வலரான தனது ரசனையை தமிழகத்தோடு பகிர்ந்து கொள்ள முன்வந்திருக்கும் அவரது அன்புக்கும், பெருந்தன்மைக்கு நமது சிரம் தாழ்த்திய நன்றிகள் !!


அதுமாத்திரமன்றி மாறுபட்ட களப் பயணங்களின் வீச்சு எத்தகையது என்பதையும் அழுத்தமாய் அடிக்கோடிட்டுக் காட்டியிருக்கும்  "அரசு" சாருக்கு பூங்கொத்துக்கள் - உங்கள் சார்பிலும், நம் சார்பிலும்  !!


மே மாதத்து இதழ்கள் கைக்குக் கிடைக்கும் முன்பாகவே பின்னூட்டங்கள் load more புதைகுழிக்குள் சிக்கித் தவிப்பதால் - இதோ மூச்சு விட வாய்ப்புத் தருமொரு உபபதிவு !! 'தல' இல்லா மாதத்தில்  உங்கள் கவனங்களை முதலில் ஈர்த்திருக்கக் கூடியது நமது கேரட் மீசைக்காரராகத் தானிருக்கும் என்றொரு யூகம் என்னுள் ! So நமது மே அலசல்களை  அவரிடமிருந்தே ஆரம்பிப்பதும் பொருத்தமாயிருக்கும் என்று பட்டது ! சிறுத்தையோடு, சிரத்தையாய்ச்  சுற்றித் திரியும் நம்மாளை இம்மாத கார்ட்டூன் இதழில் ரசிக்க இயன்றதா ? இதழ் பற்றிய உங்களின் முதல் பார்வை சொல்லும் சேதிகள் என்னவோ ?
And சந்தா E புரட்டலைத் தாண்டிய கவனங்களைப் பெற்றிருக்கிறதா இது வரையிலும் ? ஆவலாயிருப்போம் உங்கள் அபிப்பிராயங்களை அறிந்திட !! Let the fun begin !!

P.S : May online listing : http://lioncomics.in/monthly-packs/354-may-2017-pack.html

Sunday, 30 April 2017

Hello மே !

நண்பர்களே,

வணக்கம். திறந்த வாய் இன்னமும் மூடாத நிலையில் இந்தப் பதிவினை ஞாயிறு அதிகாலையில் டைப்புகிறேன் !! வேறென்ன ? தேசமே மலைத்தும், வியந்தும் பார்த்துவரும் பாகுபலி - The Conclusion திரைப்படத்தை சனி மதியம் சோழ மண்டலத்துத் தியேட்டர் ஒன்றில் ஜுனியரோடு பார்த்துவிட்டு வந்த போது ஓபன் ஆன வாய் தான் இன்னமும் அலிபாபா குகை போலவே திறந்து கிடக்கிறது ! நமது வலைப்பதிவினில் காமிக்ஸ் சார்ந்த சமாச்சாரங்களைத் தாண்டி வேறெதுவும் இடம்பிடித்திடாது என்பதை ஒரு எழுதப்படா கோட்பாடாய் நாம் கொண்டு செல்வதில் இரகசியம் இல்லை தான் ; ஆனால் ஒரு அசாத்திய கற்பனைப் புனைவு கண்முன்னே திரைவிலகும் வேளையில் அதனைச் சிலாகிப்பதில் தவறில்லை என்று பட்டது - simply becos சித்திரங்கள் வாயிலாய்க் கதை சொல்லும் காமிக்ஸ் யுக்திக்கும் , இந்தத் திரைமுயற்சிக்கும் ஒரு மிக நெருக்கமான தொடர்பு இருப்பதை படம் நெடுகிலும் உணர முடிந்தது !  டைரக்டர் ராஜமௌலி  ஒரு அதிதீவிர Amar Chithra Katha ரசிகர் எனும் பொழுது அவரது மனதில் ஓடிய ஒவ்வொரு பிரேமிலும் என்றோ, எங்கெங்கோ அவர் படித்திருக்கக்கூடிய காமிக்ஸ் கதைகள் inspire செய்த சமாச்சாரங்கள் இடம்பிடித்தல் சாத்தியமே என்று நினைத்தேன் ! And படம் ஓட ஓட - எனக்கு ஒவ்வொரு காட்சியிலும் கண்ணில் தெரிந்தது நாயகர்  பிரபாஸ் அல்ல - நம்மவர் தோர்கலே !! அனுஷ்காவாய் என் முன்னே நிழலாடியது முழுக்கவே அரிசியா தான் !!  இந்தக் கற்பனைக் களத்துக்கு இந்திய சாயல் மாத்திரம் இல்லாவிடின் - தோர்கலை இங்கு பொருத்திப் பார்ப்பது வெகு சுலபம் என்பேன் ! படம் நெடுகிலும் அள்ளித் தெளிக்கப்பட்டிருக்கும் பிரம்மாண்டமானspecial effects ஒவ்வொன்றும் அதன்பின்னுள்ள ஓவியர் அணியின் அசாத்திய உழைப்பையும் பறைசாற்றுவதை உணர்ந்த பொழுது - ரொம்பவே பெருமையாக இருந்தது ! அசாத்திய ஆற்றல் கொண்டதொரு அணியின் கூட்டு வெற்றி இது என்ற போதிலும், அதன் ஒரு ஓரத்தில் ஒட்டிக் கொண்டிருக்கும் காமிக்ஸ் என்ற முத்திரை நமக்கெல்லாம் பொதுவானதொரு விஷயம் என்ற விதத்தில் பாகுபாலியோடு நாமும் நெருக்கமாய் உணர முடிகிறதோ என்னவோ ?!! 

ஆகாச உயரத்திலிருந்து நம் நடைமுறைக்குத் திரும்புவோமா இனி ? நேற்றைய தினம் (சனி) உங்களது சந்தாப் பிரதிகள் சகலமும் கூரியரில் புறப்பட்டு விட்டன guys ! தென்னைமரத்திலே தேள் கொட்ட முகாந்திரம் என்னவோ - தெரியாது ; ஆனால் அது கொட்டிவைத்தால்  அதன் பலனாய் பனைமரத்தில் நெரி கட்டுமென்பது பழமொழி அல்லவா ? அதனை இந்த வாரத்தில் உணர்ந்தோம் ! மேதின விடுமுறை காத்திருப்பதால் கூறியர்களை எப்பாடு பட்டேனும் வெள்ளிக்கிழமையே இங்கிருந்து கிளப்பியாக வேண்டுமென்று திட்டமிட்டிருந்தோம். ஆனால் ஊரின் மையத்தில் நெடுங்காலமாய் நீடித்து வந்ததொரு ஆக்கிரமிப்பைத் தட்டிவிட உச்சநீதிமன்றத்தின் உத்தரவு வியாழனன்று அமல்படுத்தப்பட்டது ! So புல்டோசர்களும் , போலீஸ் பாதுகாப்புமாய் பனி ஜரூராய் நடைபெறத் துவங்கிய சற்றைக்கெல்லாமே பெரும்பான்மையான பகுதிகளில் மின்சாரத்தையும் துண்டித்துவிட்டார்கள் ! So வியாழன் முன்னிரவு வரை நமது பைண்டிங் ஆபீஸ் இருளிலே மிதக்க, அன்றைய பணிகளும், நமது திட்டமிடல்களும் ஒருங்கே பணாலாகிப் போயின !  வெள்ளியிரவே பிரதிகள் நம்மை வந்து சேர, சனிக்கிழமை பேக்கிங் செய்து அவற்றை அனுப்பியுள்ளனர் !! ஒருக்கால் ஞாயிறன்றும் கூரியரின் கதவைத் தட்டிப் பார்சலை வாங்கி கொள்ளல் சாத்தியமாகியின் - good luck & happy reading over the weekend !
மே இதழ்களின் ஆன்லைன் லிஸ்டிங்குமே தற்போது செய்யப்பட்டுள்ளது - மொத்தமாகவும், தனித் தனியாகவும் ! So சந்தாவில் இடம் பெறா நண்பர்கள் இங்கே க்ளிக் செய்திட்டால் போதும் : http://lioncomics.in/monthly-packs/354-may-2017-pack.html 

சந்தா என்ற topic-ல் இருக்கும் வேளையிலேயே சின்னதொரு நினைவூட்டலுமே கூட  : சந்தாக்களை 2 தவணைகளாய்   செலுத்தத் திட்டமிட்டிருந்த நண்பர்கள் இறுதித் தவணைகளை அனுப்பி உதவிடுங்களேன் - ப்ளீஸ் ?  

Moving on, அடுத்த மாதங்களின் பக்கமாயும், எஞ்சியிருக்கும் 2017-ன் இதழ்கள் பக்கமாயும் பார்வைகளை சில நாட்களுக்கு முன்பாய் ஓடவிட்டுக் கொண்டிருந்த பொழுது சில விஷயங்கள் பளிச் என்று கவனத்தைக் கோரின ! ரெகுலர் சந்தாப் பிரிவுகள் A B C & D-ல் தலா 10 இதழ்கள் எனும் பொழுது மாதம்தோறும் 4 இதழ்களென்ற பார்முலாவைத் தொடர்ந்திடும் பட்சத்தில் - அக்டோபரிலேயே அறிவிக்கப்பட்ட இதழ்களை மங்களம் பாடி முடித்திருப்போம் !! சந்தா E & Super 6-ன் எஞ்சியுள்ள இதழ்களும் கைவசம் இருப்பதால் ஒரு தினுசாய் manage செய்ய முடிகிறது ! அவை மட்டும் இல்லாது போகும் பட்சம் - லேசாயொரு வெற்றிடம் தெரிந்திட வாப்புகளுண்டு என்பேன் ! Take away சந்தா D (மறுபதிப்புகள்) from the equation & எஞ்சி நிற்க கூடியது 2 புது இதழ்கள் மட்டுமே என்றிருக்கக் கூடும் ! 

இங்கொரு கேள்வி எழுப்பிட ஆசை ! மாதம்தோறும் 4 இதழ்கள் எனும் பொழுது - இவற்றைப் படித்து முடிக்க சராசரியாய் உங்களுக்கு அவசியமாவது எத்தனை நாட்கள் ? அதைவிட முக்கியமான இன்னொரு வினாவும் ! இந்தாண்டின் இதுவரையிலுமான இதழ்களில் எத்தனை பாக்கி நிற்கின்றன - படிக்க அவகாசம் கிட்டா காரணத்தின் பொருட்டு ?  நிச்சயம் கோபித்துக் கொள்ள மாட்டேன் - தாராளமாய் நிஜத்தைப் பகிர்ந்திடலாம் - ப்ளீஸ் ? கிட்டத்தட்ட வருடத்தின் பாதிப் பகுதியை எட்டிப் பிடிக்கவிருக்கிறோம் என்ற நிலையில் - 2018-ன் அட்டவணைத் திட்டமிடல் பக்கமாய் நிறையவே சிந்தனை தந்திட அவசியமாகிறது ! So இந்தத் தருணத்தில் உங்களது inputs கிடைப்பின் - நிச்சயம் உதவிடும் ! 

அரைத்த மாவுகளையே புதுசாய் recycle செய்திடாது ஒரு ஒட்டுமொத்தமான புது நாயக அணியோடு ஓராண்டாவது களமிறங்கித் தான் பார்க்க வேண்டும் - என்பது எனது சமீப காலத்து அவா ! No லார்கோ ; No ஷெல்டன் ; No கமான்சே ; No லக்கி ; No சிக்பில் என்ற ரீதியில் ஒரு அட்டவணையை 2017 க்கே ஒருவாட்டி எழுதிப் பார்த்தேன் - எங்கோ ஒரு இரயில்நிலையத்தில் தேவுடு காத்து நின்ற வேளையில் ! ஆனால் சிலபல துடைப்பங்கள் DTDC கூரியரில் கிளம்பிடக்கூடுமென்று பட்டதால் - ஜகாவும் வாங்கிவிட்டேன் ! என் கேள்வி இதுவே : ஒரு சுழற்சி முறையில் ஒவ்வொரு ஆண்டும் ஒவ்வொரு சந்தாப் பிரிவில் ஒரு ஒட்டுமொத்த ஆள்மாறாட்டம் செய்ய முனைந்தால் ஓவராய் உதைப்பீர்களா - மிதமாய்ச் சாத்துவீர்களா ? Say - முதல் ஆண்டில் சந்தா A -வில் ஒட்டுமொத்தமாய் புது ஆக்ஷன் & டிடெக்டிவ் நாயகர்களை புகுத்துவது  ; மறு ஆண்டில் - தற்போதைய black & white நாயகர்கள் சகலருக்கும் ஓராண்டு விடுமுறை தந்து - புதுவரவுகளை வரவேற்பது ; ஆண்டு # 3 -ல் அந்தப் பரீட்சார்த்த முயற்சியைக் கார்ட்டூன்கள் பக்கமாய்த் திருப்புவது என்றிருப்பின் - அது பற்றிய உங்கள் எண்ணங்கள் என்னவாக இருக்கும் ? 'ரைட்டு...பாயைப் பிறாண்ட ஆரம்பிச்சுட்டான் புள்ளையாண்டான் !' என்ற பயம் வேண்டாமே - இது சும்மா தலைக்குள் தோன்றியதொரு நினைப்பின் உரத்த பகிர்வே ! ஒருவித அயர்ச்சியை  விலக்கி, இந்த முயற்சியானது நமது உற்சாகங்களைத் தக்க வைக்குமென்று உங்களுக்குமே தோன்றிடும் பட்சத்தில் - maybe 2019 முதல் இதுக்கொரு துவக்கம் தந்து பார்க்கலாம் ! 'பரவால்லே...இப்போ பிடுங்கிட்டு இருக்கும் ஆணிகளே நலம் !"  என்று மனதில் பட்டால் - அதையும் தெரிவிக்கலாம் guys ! 

போன மாதம் இலண்டனுக்குப் போயிருந்த சமயம் நான் கவனித்த சில விஷயங்கள் பற்றியும், அவை நமது திட்டமிடல்களை மெருகூட்டக் கூடிய விதங்களைப் பற்றியுமே கொஞ்சம் பேசட்டுமா ? நமது ஆரம்பங்கள் சகலமுமே பிரிட்டனின் கரைகளைச் சார்ந்த கதைகளே என்பதை நாமறிவோம் ! மாயாவிகாருவில் துவங்கி இரும்புக்கை உளவாளி (வில்சன்)  வரைக்கும் ஒருவண்டி Fleetway & DC Thomson கதைகளுக்குள் நாம் மண்டையை நுழைத்து நின்றது அந்நாட்களது உச்சங்கள் ! அப்போதெல்லாம் இங்கிலாந்தின் காமிக்ஸ் மார்க்கெட்டும் செம விறுவிறுப்பாய் இருந்திடும் ! ஏதேனும் வேலை காரணமாய் அங்கு செல்லும் போதெல்லாம் - புத்தகக் கடைகளுக்குள் புகுவதே  சொர்க்கத்துக்குச் செல்லும் ஒரு அனுபவமாய் இருப்பது வழக்கம் ! ரேக் முழுவதும் வித விதமாய் ; கலர் கலராய் காமிக்ஸ் இதழ்கள் கண்ணைப் பறிக்கும்  !! அங்கேயே நின்று அவற்றைப் புரட்டினாலோ, படித்தாலோ, யாரும் ஏதும் சொல்வதில்லை என்பதால் சாவகாசமாய் மாலைப் பொழுதுகளை இந்தப் பராக்குப் பார்க்கும் படலத்தில் செலவிடுவது வழக்கம் ! ஆனால் துரதிர்ஷ்டவசமாய் பிரிட்டிஷ் காமிக்ஸ் பாணிகள் சிறுகச் சிறுக ஈர்ப்பை இழந்திட, அமெரிக்க காமிக்ஸ் படையெடுப்பு இங்கு வெற்றி காணத் துவங்கியது ! BUSTER ; BEANO ; DANDY ; VULCAN ; MISTY என்ற இதழ்களையாகப் பார்த்தும், ரசித்தும் வந்த பிற்பாடு - ஸ்பைடர்மேன் / சூப்பர்மேன் என்ற அமெரிக்க சூப்பர் ஹீரோ சாகசங்களை அதே ரேக்கில் பார்க்கும் போது ஏனோ ஒரு சின்ன ஏமாற்றம் தோன்றும் உள்ளுக்குள் ! ஆனால் இம்முறையோ ஒரு ரொம்பவே pleasant surprise !! பிரிட்டிஷ் சிறுவர் இதழ்கள் & காமிக்ஸ் மறுபடியும் ஒரு மெல்லிய சுறுசுறுப்பைக் காட்டி வருவதை - உணர முடிந்தது ! அந்நாட்களது அதே அதகளம் என்றில்லை தான் ; but நிச்சயமாய் ஒரு சின்ன மறுமலர்ச்சி கண்ணில்பட்டது போலிருந்தது ! Of course - CINEBOOK அதிரடியாய் பிரெஞ்சு காமிக்ஸ் இதழ்களை மொழிமாற்றம் செய்து ஆங்கிலத்தில் வெளியிட்டு தூள் கிளப்பி வருகிறது தான் ; ஆனால் ஏனோ தெரியவில்லை லண்டனின் புத்தகக் கடைகளில் அவை அவ்வளவாய்க் கண்ணில்படவே இல்லை !! வேற்றுமொழிப் படைப்புகள் - என்ற கோணத்தில் இவையங்கு பார்க்கப் படுகிறதா   - சொல்லத் தெரியவில்லை ! நம்மைப் பொறுத்தவையிலும் என்னதான் பிரான்க்கோ-பெல்ஜிய கதைகள் ; இத்தாலியக் கதைகள் என்ற நாம் சுற்றி வந்தாலுமே  - அந்த நேர்கோட்டு fleetway சாகசங்களின் சுவாரஸ்யமும், சுலபத்தனமும் ஒரு வித்தியாசமே என்ற சிந்தனைக்குச் சொந்தக்காரன் நான் ! So முன்னர் போல முழுக்க அதனுள் மூழ்கிடாது போனாலும் - நடுநடுவே பிரிட்டிஷ் கதைகளைக் கண்ணில் காட்டல் ஓகே தானா ? இது தொடர்பாய் பிள்ளையார் சுழிகள் ஏற்கனவே போட்டு வைத்திருக்கிறேன் என்றாலும் - உங்களின் அபிப்பிராயங்களே எனது அடுத்த அடிகளை நிர்ணயிக்க உதவிடும் ! இதனையொரு ரிவர்ஸ் கியர் போடும் முயற்சியாக நீங்கள் பார்ப்பீர்களா ? அல்லது சிகப்புக் கம்பளம் இல்லாட்டியும் லேசாய்ச் சாயம் போனதொரு  ஜமுக்காளத்தையாவது விரிக்கத் தயாராவீர்களா ? 

Before I sign off - சில வேண்டுகோள்கள் !! 

# 1 : நமது சூப்பர் 6 -ல் காத்திருக்கும் டிராகன் நகரம் இதழின் முதல் பக்கத்தில் உங்கள் போட்டோக்களை அச்சிட்டுத் தருவதாய்ச் சொல்லி இருந்ததை நிச்சயம் மறந்திருக்க மாட்டீர்கள் ! நேரமிது - உங்கள் போட்டோக்களை சேகரித்திட !! ஏற்கனவே ஒரு 25 பேர் சுமாருக்கு மட்டும் தபாலில் தங்களது போட்டோக்களை வெவ்வேறு தருணங்களில் அனுப்பி இருப்பர் ! இப்போது எல்லோருமே தங்கள் படங்களை : photos_lion@yahoo.com என்ற மின்னஞ்சல் முகவரிக்கு அனுப்பிட இயலுமா - ப்ளீஸ் ? இப்போதிலிருந்து துவக்கினாலே இந்த மெகா முயற்சியை வெற்றியாக்கிட இயலும் ! So சீக்கிரமே அனுப்புங்களேன் - Super 6 subscribers ? 

# 2 : இரத்தக் கோட்டை தொகுப்பு தயாராகி வருகிறது ! Early Birds களுக்கு அது தொடர்பான டீசர்கள் சீக்கிரமே அனுப்பப்படும் ! இந்த இதழில் "டைகர் - தொடரும் ஒரு சகாப்தம் ! " என்ற தலைப்பில் சில பக்கங்களை ஒதுக்கியுள்ளோம் - உங்களின் எண்ணச்   சிதறல்களை அதனுள் அடக்கிடும் பொருட்டு ! So இங்கே பின்னூட்டங்களாக வெளியிட்டாலும் சரி, நமக்கு மின்னஞ்சலில் (lioncomics@yahoo.com)அனுப்பினாலும் சரி - பயனாகிடும் ! பேனாக்களைத் தயார் செய்யுங்களேன் folks ?
# 3 : சமீபமாய் நமது பதிவில் வாசக டிசைனர்களின் திறமைகளை முன்னிறுத்திய "பயங்கர புயல்" ராப்பர்களைப் பார்த்துக் கொண்டிருந்த பொழுது - உங்களின் திறமைகளை மீண்டுமொருமுறை showcase செய்திடும் ஆவல் மேலோங்கியது ! காத்திருக்கும் அடுத்த கார்ட்டூன் இதழுக்கு ராப்பர் வடிவமைக்கும் ஒரு குட்டியான contest வைத்தாலென்னவென்று தோன்றியது ! So ரின்டின் கேனாரின் "தடை பல தகர்த்தெழு !!" இதழின் முகப்பை உங்கள் கைவண்ணத்தில் மிளிரச் செய்வோமா ? ஆர்வமுள்ள நண்பர்கள் கரம் தூக்குங்களேன் - ப்ளீஸ் ? 
மீண்டும் சந்திப்போம் all - மறவாது இன்றைய கேள்விகளுக்கு பதில்கள் சொல்லிட நேரம் ஒதுக்குங்களேன் ? Bye for now !! 

Sunday, 23 April 2017

ஒரு ஜாலி Sunday !

நண்பர்களே,

வணக்கம். பாகிஸ்தானிய கிரிக்கெட்டில் ஒரு ஜோக் உண்டு ; அது தான் ஷாஹித் அப்ரிடியின் ஒய்வு பற்றிய அறிவிப்புகள் ! மனுஷன் ஆறு மாதங்களுக்கொருமுறையாவது ரிட்டையர் ஆகப் போவதாய் அறிக்கை விட்டிருப்பார் ; ஆனால் பத்திரிகையில் மசியின்ஈரம் காய்வதற்கு முன்பாகவே பேட்டைத் தூக்கிக் கொண்டு "மறுபிரவேசம்" செய்திருப்பார் ! நானுமே கிட்டத்தட்ட அப்ரிடிக்கு  அண்ணாத்தே ரேஞ்சில் இருப்பேன் என்று தான் படுகிறது !! பிரேக் விடுகிறேன் என்று புறப்பட எண்ணி, ஏதேதோ காரணங்களுக்காய் யு-டர்ன் அடிப்பது இது அநேகமாய் அரை டஜனாவது வாட்டியாக இருக்கக்கூடும் ! Knowing me - என்னால் இங்கிருந்து அதிகம் விலகி நிற்க சாத்தியப்படாதென்பதை நீங்கள் யூகித்திருப்பீர்கள் தான் ; ஆனால் இம்முறை மெய்யாகவே ஒரு சன்னமான பிரேக் அவசியமென்றே எனக்குப்பட்டது ! அந்த உறுதி  நேற்றைய பதிவிற்கு உங்கள் ஒவ்வொருவரின் ஆத்மார்த்தமான பின்னூட்டங்களையும் படிக்கும் வரையிலுமே ! இயந்திரமயமாய் மாறி வரும் வாழ்க்கையில், எஞ்சி நிற்கும் சில சின்னஞ்சிறு சந்தோஷங்களுக்கு  உள்ள முக்கியத்துவத்தை உங்கள்ஒவ்வொருவரது பார்வைகளிலும் உணர முடிந்த போது - எனது பிடிவாதத்தைத் தலையைச் சுற்றி தூர ஏறியத் தான் தோன்றியது ! எனது  எழுத்து பாணி என்பதைவிடவும், நான் எழுதும் விஷயங்கள் மீதுள்ள மையலும் ; நம்மை ஒன்றிணைக்கும்  காமிக்ஸின் மாயாஜாலும், நண்பர்களாய் நாம் இங்கு ஒவ்வொருவாரமும் சந்தித்துக் கொள்வதில்  கிடைக்கும் குதூகலமும் நம்முள் ஒரு நிரந்தர இடத்தைச் செதுக்கி வைத்திருப்பது புரிகிறது ! More than anything else - வாரம்தோறும் முகம் பார்த்துப் பழகிப் போனதொரு கண்ணாடி திடீரென விரிசலோடு நின்றால் - அதனை சரி செய்து விட்டே மறுவேலை என்ற உங்களின் முனைப்புக்கு முன்னே என்னால் தாக்குப்பிடிக்கத் தான் முடியுமா ? 

அட....பில்டப் போதுமே....get on with it !!  என்று எனது மண்டைக்குள்ளேயே  ஒரு குரல் ஒலிப்பதால் - வழக்கம் போல நமது ஞாயிறு routine க்குள் மூழ்கிடுவோமா ?

போன வாரம் இங்கே டிரைலர்களாய் நாம் பார்த்த காமெடி கர்னல் இப்போது டாலடிக்கும் வண்ண புக்காகி நிற்கிறார் ! சனியிரவோடு  கேரட் மீசைக்காரரின் அச்சுப் பணிகள் நிறைவு பெற்றிருக்க, திங்கள் முதல் லார்கோ  ராஜ்ஜியம் காத்துள்ளது நம் அச்சுக் கூடத்தில் ! "சதுரங்கத்திலொரு சிப்பாய்" லார்கோ தொடருள் ஒரு சுலபப் பயணமென்பேன் !வழக்கம் போலவே கதை துவங்கிய நான்காம் பக்கத்திலேயே ஒரு 'பொளேர்' கொலை சம்பவிப்பதும், அதன் முடிச்சுக்கள் லார்கோவை மையமாக்கிட முனைவதும் நாம் ஏற்கனவே பார்த்துவிட்ட templates தான் என்றாலும், நிறைய twists இன்றி ஒரு சீராய்ப் பயணிக்கும் கதை இந்தத் தொடருக்கு கொஞ்சம் புதுசே ! பிரமிக்கச் செய்யும் கடலும், கப்பலும் சார்ந்த ஓவியங்கள் இந்த இதழின் அசாத்திய highlight !! அப்புறம் கதாசிரியர் வான் ஹாம்மேவுமே இந்தக் கதையினிடையில் ஒரு கெளரவ தோற்றத்தில் வந்து போகிறார் !! யாராக ஆஜராகிறார் ? என்பதைக் கண்டுபிடிப்பது உங்கள் வேலை ! வான் ஹாம்மேவின் பேனாவோடு லார்கோ பயணிக்கக் காத்துள்ளது இன்னமும் ஒரேயொரு சாகசத்தில் மட்டுமே எனும் போது - 2018-ன் அட்டவணைக்குள் அதனை நுழைத்தான பிற்பாடு - லார்கோ 2 .0 க்கு நல்வரவு சொல்வதே எஞ்சி நிற்கும் வேலையாக இருந்திடும் ! ஒரு கால்நூற்றாண்டை தனதாக்கியதொரு தொடர் உத்வேகம் இழக்காது முன்செல்லும் பட்சத்தில் all will be well !! நம்பிக்கையோடு காத்திருப்போம் !

சந்தா E யின் அறிமுகமும் இம்மாதமே என்பதை அறிவோம் தானே ? "ஒரு முடியா இரவு"  - இம்மாத black & white கோட்டாவிற்கு ஜன்னலைத் திறக்கவிருக்கும் இதழ் ! இந்த இதழின் பணிகளுக்கும் புகுந்த வேளையில் சமீப நிகழ்வொன்றே என் நினைவில் நிழலாடியது ! அதை ஏற்கனவே உங்களோடு பகிர்ந்து விட்டேனா - இல்லையா ? என்பது பற்றி  மண்டைக்குள் தெளிவில்லை என்ற போதிலும் - அது பற்றி ! ஒரு மாதத்துக்கு முன்பாய், தமிழகத்து திரையுலக இயக்குனர் ஒருவர் நம் அலுவலகத்திற்கு போன் செய்திருந்தார் ! நம்மவர்கள் விபரத்தைச் சொன்ன போதே எனக்குத் தெரிந்திருந்தது - அந்த போன்காலின்நோக்கம் என்னவாக இருக்கக்கூடுமென்று ! அவருடன் பேசிய போது என் யூகம் அட்சரசுத்தமாய்ச் சரி என்பது புரிந்தது - நமது மாயாவி மாமா பற்றிய பேச்சை அவர் துவக்கிய போதே ! இரும்புக்கை மாயாவி தொடரின் ஏதேனும் ஒரு சூப்பர் ஹிட் கதையினை வெள்ளித் திரைக்குக் கொண்டு செல்ல விரும்புவதாகவும், அதன் பொருட்டு யாரோடு பேச வேண்டும் ? என்ற கேள்வியையும் முன்வைத்தார் ! இதே ஆர்வத்தை  அவ்வப்போது சிலபல இயக்குனர்களும் ; சின்னத்திரை தயாரிப்புக் கூடங்களும் காட்டியுள்ள விஷயத்தைப் பகிர்ந்த கையோடு - அவருக்கு அவசியமான விபரங்களை சொல்லி வைத்தேன் ! ரொம்ப நேரம் சகஜமாய்ப் பேசிக் கொண்டிருந்தவர் - இது குறித்து நிறையவே research செய்து வைத்திருப்பதும் புரிந்தது ! மாயாவி தொடரில் எந்தக் கதையை நான் பரிந்துரை செய்வேன் ? என்று கேட்ட போது - நான் 'பெ பெ பெ' என்று தான் உளறி வைத்தேன் ; simply becos சமீபமாய் நம் மறுபதிப்புப் படலம் துவங்கிய நாள் முதலாய் - மாயாவி & கோ.வின் புராதனத்தனத்தை பகடி செய்துவரும் முதல் ஆசாமியாகவே நானிருந்து வந்திருக்கிறேன் ! Anyways - special effects சகிதம் வெள்ளித் திரையில் "இயந்திரத் தலை மனிதர்கள்" வலம் வந்தால் ரம்யமாகவே இருக்குமென்று எனக்குத் தோன்றிட, அதையும் சொல்லி வைத்தேன் ! தயாரிப்பாளரின் சம்மதம் கிட்டிடும் பட்சத்தில் - நம்மாள் தமிழ்நாட்டுத் திரையரங்குகளில் மின்சார ஓட்டைகளைத் தேடித் திரியும் சாத்தியங்கள் பிரகாசம் என்பேன் ! "தேவ் ஆனந்துக்கு வயசாகிப் போச்சு ; so மாயாவியாய் அரிதாரம் பூச யாருக்குப் பொருந்தும்  ? என்ற curiosity எனக்குள் !! இயக்குனரின் மனதில் ஓரிரு நடிகர்கள் இருப்பதை புரிந்து கொள்ள முடிந்த போதும், ஓவராய் நோண்டிடத்  தோன்றவில்லை ! ஆனால் ஒரு  பகீர் குண்டைத் தூக்கி அவர் போட்ட போது 'ஆத்தாடியோவ்!!' என்றிருந்தது ! "உங்களைப் பற்றி நான் தெரிந்து கொள்ள நேரிட்ட கதையைக் கேட்டால் சிரிப்பீர்கள் சார் ; அது வேண்டாம் !" என்று பேச்சுவாக்கில் அவர் சொல்லிட - அது என்ன சமாச்சாரமோ ? என்ற கேள்வி குடைய ஆரம்பித்தது ! "அட..அதையும் சொல்லுங்களேன் சார் - சிரித்து வைப்போமே ?" என்று நான் கேட்டேன் ! "நண்பர் ஒருவரைப் பார்க்கப் போயிருந்த பொழுது தான் உங்களை நான் கவனித்தேன். நண்பர் Youtube-ல்  உங்கள் பேட்டி ஒன்றினை ஓடவிட்டுப் பார்த்துக் கொண்டிருந்தார். அடடே....யார் இவர் ? எனது அடுத்த படத்தில் உள்ளதொரு கேரக்டர்  ரோலுக்கு இவர் பிரமாதமாய்ப் பொருந்துவாரே ! என்று சொன்னேன். அப்புறம் தான் நீங்கள் லயன்-முத்து காமிக்ஸின்  எடிட்டர் என்ற விஷயத்தை நண்பர் சொல்லித் தெரிந்து கொண்டேன். மாயாவி பற்றிய project ஏற்கனவே என் மனதில் ஓடிக்கொண்டிருக்க, நண்பரிடம் உங்கள் அலுவலக முகவரி ; வலைப்பதிவுப் பக்க முகவரி என எல்லாவற்றையும் பெற்றுக் கொண்டேன் !" என்றார்.!! நவரசங்களையும் சமீப நாட்களில் நான் பிழியோ பிழியென்று பிழியும் அழகை மட்டும் இயக்குனர் பார்த்திருப்பின், நமது பவர் ஸ்டாருக்கொரு  கடும் போட்டியாய் என்னை திரைக்குள் இறக்கி விட்டிருப்பார் !! "சார்..'சினிமா' என்பதையெல்லாம் பேப்பரில் எழுதிப் பார்க்கவே தெரிந்திருக்கா ஞானசூன்யம் நான் ; நமக்கு இந்தப் பிழைப்பே போதும் !" என்று சிரித்தபடிக்குச் சொல்லிவிட்டு தலைதெறிக்க ஓட்டம் பிடித்தேன் ! அப்போது பேச்சுவாக்கில் எழுந்ததொரு கேள்வியையே  தற்போதைய context-க்கு சம்பந்தப்படுத்திப் பார்க்க நினைக்கிறேன் ! "மாயாவி நீங்கலாய் - சினிமாவுக்கு உகந்த கதைகளாய் நீங்கள் எவற்றைப் பரிந்துரை செய்வீர்கள் ? " என்று கேட்டார் ! 'பளிச்' என்று மனதில் தோன்றிய XIII ; லார்கோ பற்றிச் சொன்னேன். கவனமாய்க் கேட்டுக் கொண்டார் ! அந்த போன் பேசிய சமயத்தில் மட்டும் "ஒரு முடியா இரவு" கதைக்குள் நான் பணி செய்யத் தொடங்கியிருப்பின், நிச்சயமாய் இந்த ஸ்கிரிப்ட்டை பரிசீலிக்கச் சொல்லிக் கோரியிருப்பேன் ! ஒரு திறமையான இயக்குனரின் கையில் இந்தக் கதை மட்டும் சிக்கினால் - ஒரு செம வித்தியாசமான short film உத்திரவாதம் என்பேன் ! அப்படியொரு மாறுபட்ட களமிது !! இன்றும், நாளையும் தான் climax-க்குள் நானே புகுந்திடவுள்ளேன் ; ஆனால் இதுவரைக்கும் கடந்து வந்துள்ளது மிரட்டல் ரகம் !!

என்னதான் நான் சந்தா E ; கொசு ; விட்டில்பூச்சி என்று அடுக்கிக் கொண்டே போக நினைத்தாலும் - 'அப்டியே வருவோம் ; அப்டியே கலக்குவோம் !' என்று முத்திரைகளை விற்பனையில் பதித்து வரும் மும்மூர்த்திகளின் சந்தா D தான் நமது ஏஜெண்ட்களின் செல்லப் பிள்ளைகள் !! கோவையிலுள்ள நம் முகவர் ஒருவருக்காக சமீபமாய் ஒரு டஜன் flex banner களை உருவாக்கித் தந்தோம் - வெறுமனே மாயாவி + லாரன்ஸ்-டேவிட் + ஜானி நீரோ படங்களை போட்டு ! "டெக்ஸ் வில்லர்..டைகர்...லார்கோ படங்களையெல்லாம்  போட்டு யாரை சார் கவரப் போகுது banner ? மாயாவியைப் போட்டா சும்மா அதிரும்லே !!"  என்று அதிரடி காட்டுபவரை நாம் என்ன சொல்வது ? பீட்சா ; பர்கர் ; ஸ்ப்ரிங்ரோல் ; டக்கிலோ இத்யாதிகளை நீங்களே வைத்துக் கொள்ளுங்கள் ; எங்களுக்கு இருட்டுக் கடை அல்வாவே போதும் என்பதே அவரது கருத்து ! விற்பனையிலும் அதை அவர் பிரதிபலித்துக் காட்டும் போது 'செரிங்க ஆபீசர் !" என்றபடிக்கே நடையைக் கட்ட வேண்டி வருகிறது ! And இதோ - இம்மாத இருட்டுக்கடை சமாச்சாரம் - "தலை கேட்ட தங்கப் புதையல்" வாயிலாக  !
நம் பழமைக் காதலர்களுக்கு ரொம்பவே பரிச்சயமானதொரு சாகசமாய் இது இருக்குமென்பதில் எனக்கு ஐயமில்லை ! அந்நாட்களில் எனக்கும் இது பிரமிப்பை ஏற்படுத்தியதொரு கதையே ! அஸ்டெக் புதையல் ; நரபலி ; வரலாறு சார்ந்த climax என்ற சமாச்சாரங்களெல்லாமே லேசாய் நினைவில் எஞ்சி நின்றன தான் ! தற்போதைய கழுதை வயசில் அந்நாட்களது அதே தாக்கம் தொடரவில்லை எனினும், ஓவராய் சொதப்பலாகவும் தெரிந்திடவில்லை இம்முறை ! ஒரு மாறுதலுக்கு முன்னட்டையில் மொட்டை டேவிட்டை மட்டுமே ஆக்ஷனில் இறக்கி விட்டுள்ளோம் நம் ஓவியரின் சகாயத்தோடு ! Hope it looks o.k. !

சின்னதாயொரு கசப்பு மாத்திரையும் இங்கே ! "மாதம்தோறும் maximum 4 இதழ்களுக்கு மேலாக வேண்டாமே - ப்ளீஸ் ?! கடைகளில் வாங்க வரும் வாசகர்கள் அவற்றுள் ஏதேனும் மூன்றை மட்டும் தேர்வு செய்து வாங்கிடும் போது எப்படியும் 1 இதழ் அடிவாங்கி விடுகிறது ! இதில் நீங்கள் இதழ்களின் எண்ணிக்கையைக் கூட்டி விட்டால் அம்மாதம் சேதாரம் ஜாஸ்தியாகிப் போகிறது !" என்று நமது முகவர்கள் சொல்லி வருவது சமீப நாட்களது நடப்பு ! அவர்களது கூற்றிலும் நியாயம் உள்ளது என்று தோன்றுவதால் - இதழ்களின் எண்ணிக்கை வரம்பை 4-ஐத் தாண்டிட இனி வரும் நாட்களில்  அனுமதிக்க வேண்டாமே என்று தோன்றுகிறது ! So சந்தா E-க்கு வழி விடும் பொருட்டு இம்மாதம் மட்டும் 'தல' தலைகாட்டாது இருந்திடுவார் ! சமீப சமயங்களில் - டெக்ஸ் இலா மாதமே லேது என்றிருந்ததை இந்த மே மாற்றிக் காட்டிடுகிறது ! So "கவரிமான்களின் கதை" யோடு டெக்ஸ் ஜுனில் காத்திருப்பார் !

On the subject of TEX - காத்திருக்கும் 2018 - நம்மவராது 70 வது பிறந்தநாள் ஆண்டென்பதை நாம் அறிவோம் ! அந்த 70-ல் ஒரு  32 ஆண்டுகளாவது நாமும் அந்தப் பயணத்தில் ஒரு சிறு பங்கு எடுத்துக் கொண்ட விதத்தில் மகிழ்கிறோம் ! செப்டெம்பரில் தான் இரவுக் ககாரின் பிறந்தநாள் என்றாலும், நாம் அதனை 1 மாதம் முன்பாக 2018 ஈரோட்டில் கொண்டாடி விடுவோமே ? என்று தோன்றியது ! உலகெங்கும் உள்ள டெக்ஸ் ரசிகர் மன்றங்களின் கொண்டாட்டங்களுக்குச் சிறிதும் சளைக்கா விதத்தில் நாமும் ஒரு TEX artwork பவனி ; அன்று முதல் இன்று வரையிலான TEX இதழ்களின் display ; கதைகளின் அலசல்கள் ; வாசகர்களின் பார்வைகளில் TEX என்று கலக்கினாலென்ன guys ? அடுத்தாண்டின் ஈரோட்டுச் சந்திப்பை A CELEBRATION OF TEX !! என்று இப்போதே fix செய்திடலாமா ? Oh yes - பட்டாசில்லா தீபாவளியா ? ஸ்பெஷல் இதழ் இல்லா கொண்டாட்டமா ? நண்பர்களின் வேண்டுகோளுக்கு ஏற்ப டெக்சின் அனல்பறக்கும் சாகசங்களின் தொகுப்பொன்று மெகா சைசில், மெகா பருமனில் வெளிவந்திடும் ! TEX Over the Ages - என்ற விதமாய் அதன்  iconic கதாசிரியர்களின்  படைப்புகள் ஒரே இதழில் அதிர்வேட்டாய் இடம்பிடிக்கவிருப்பதை இப்போதே சொல்லி வைக்கிறேன் !! எத்தனை கதைகள் ? எத்தனை பக்கங்கள் ? என்பதை உங்கள் யூகங்களுக்கே இப்போதைக்கு விட்டு விடுகிறேன் !! தற்போதைய  TEX  எடிட்டரின் முன்னுரையும் அந்த இதலுக்குப் பெருமை சேர்க்கும் என்பது கொசுறுச் சேதி !! இந்த landmark இதழுக்கொரு பெயர் suggest செய்யுங்களேன் guys ?

Before I sign off - இதோ இவ்வாரம் உங்கள் பொழுதுகளை சுவாரஸ்யமாக்கிட நான் ஆங்காங்கே எழுப்பியுள்ள சில ஜாலி கேள்விகளின் தொகுப்பு :

1 மாயாவிகாரு வெள்ளித் திரைக்கு ப்ரோமோஷன் காண்பாரா - மாட்டாரா ? என்பதெல்லாம் நம் கைகளிலோ , கற்பனைகளிலோ இல்லா ஒரு விஷயம் ! ஆனால் மாயாவியாக அரிதாரம் பூசிட யார் பொருத்தமான தேர்வாக இருப்பாரென்று நினைப்பீர்கள் guys ?

2 .மாயாவியின் தொடரில் - திரைப்படமாக உருமாற்றம் காண மிகத் தகுதி வாய்ந்த கதையாக எதை பார்ப்பீர்கள் ?

3 மாயாவிக்குப் பின்பாய், (தமிழ்) சினிமாவுக்கு ஏற்ற கதைத் தொடராய் எதனைச் சொல்லிடலாம் ?

4 TEX - 70 : ஒரு அதிரடிப் பெயர் ப்ளீஸ் ?

இப்போதைக்கு நடையைக் காட்டுகிறேன் folks - முடியா இரவை இன்றைய பகலிலாவது முடிக்கும் பொருட்டு ! See you arund !! Bye for now ! Have an awesome Sunday !! 

Saturday, 22 April 2017

பேனா போன போக்கில்...!

நண்பர்களே,

வணக்கம். எங்கே ஆரம்பிப்பது ? ; எங்கே கொண்டு செல்வது ? என்று தெரியாது பேனாவைக் கையில் பிடிக்கிறேன் - மனம் போன திக்கில் அதுவுமே பயணமாகட்டுமே என்று! ஏற்கனவெ சொல்லியிருந்தேன்- 5 ஆண்டுகள் இங்கே நான் கற்றதும்,பெற்றதும் அதற்கு முந்தைய 45 ஆண்டுகளின் வாழ்க்கைப் பாடங்களை விடவும் மதிப்பில் அதிகமென்று! தொடரும் ஒவ்வொரு நாளும், அதனைப் புதுப்புது பரிமாணங்களில், நல்ல விதங்களிலும், சங்கட சூழல்களிலும் உணர்ந்து வருகிறேன்!

உங்களது தற்போதைய உணர்வுகளை என்னால் அட்சர சுத்தமாய் யூகிக்க முடிகிறது! ஆனால் என் தலைக்குள் ஓடும் சமாச்சாரங்களை அத்தனை இலகுவாய்க் கணிக்க யாருக்கும் சாத்தியமாகாது என்பமே என் எண்ணம்! Because என்னுள் தற்சமயம் விரவிக் கிடப்பது ஒரு விசித்திரமான நிம்மதியே! Yes of course - சங்கடம்; ஆற்றமாட்டாமை ; அய்யரவு என நெகடிவான எண்ணங்கள் வீரியமாய் அலையடிக்கின்றன தான் ; ஆனால் அவற்றோடு ஒரு இனம்புரியா அமைதியும் சேர்ந்து நிற்பது எனக்கே புரியாத புதிராய் உள்ளது! இன்டர்நெட்; FB; சமூக வலைத்தளம்; வலைப்பதிவு என்பனவெல்லாம் புதிதாக இருந்த ஆரம்ப நாட்களில் தட்டுத் தடுமாறி நிறைய ஏழரைகளுக்குள் நான் கால் விட்டதில் இரகசியமில்லை தான்! அவற்றைக் கையாளத் தெரிந்தும், தெரியாமலும் நான் ஈட்டியது நிறைய நட்புகளையும், சில மௌனப் பகைகளையும் என்பதுமே ஊரறிந்த ரகசியம். அந்த வேளையில் தான் இந்த வௌவால் மீது எட்டுக்கால் சமாச்சாரம் தோண்டியெடுக்கப்பட்டு FB-யிலும் சரி, நமது பதிவிலும் சரி ஒரு சூடான விவாதப் பொருளாகியது. அன்றைக்கே எனக்குத் தெரியும், நான் அதே பாணியில் செய்திருந்த லாரன்ஸ் - டேவிட் உல்டா & ஜானி நீரோ makeover என்றேனும் ஒரு நான் வெளிக்கிளம்பி நிச்சயமாய்த் தலைகுனியச் செய்யுமென்று! மாமூலான நாயகர்களின் இடத்தில் சாதனை செய்த ஹீரோக்கள் இடம்பிடிக்கும் பட்சத்தில், அந்நாளைய விற்பனைச் சறுக்கல்கள் சமனப்பட்டு விடுமென்ற பைத்தியக்கார சிந்தனைகள் எழுந்த நாட்களை என்ன செய்தாலும் மாற்றிட முடியாது என்பது புரிந்தது! புத்தியைப் பறிகொடுத்துவிட்ட தருணங்களை என்ன சொல்லியும் நியாயப்படுத்திட இயலாது என்பதுமே புரிந்தது. ஆக தாமதமாகவோ- சீக்கிரமாகவோ இந்த விவகாரத்தில் சங்கடம் உத்தரவாதம் என்பதை 4 ஆண்டுகளுக்கு முன்பாக உணர்ந்த போதே மனதுக்குள் கரையான் கோட்டை ஒரு மூலையில் உருவாகத் தொடங்கியிருந்தது! என்றைக்கோ ஒரு நாள் யார் சொல்லியோ நீங்கள் இதனைத் தெரிந்து கொள்வதை விடவும்- நானே மனம் திறந்திடலாமென்று எத்தனையோ முறைகள் தோன்றியிருக்கிறது. ஆனால் ஒவ்வொரு தடவையும் உங்கள் ஒவ்வொருவரது கண்களையும் நேரில் பார்க்கும் திராணியின்றிப் போய் விடும்; அமைதி காத்து விடுவேன்! இது சத்தியமான நிஜம்!

இன்றைக்கு இந்தப் பூசணியை முற்சந்தியில் போட்டு உடைத்த பெருமைக்குச் சொந்தக்காரரின் கர சுத்தத்தைப் பற்றியோ; 'எனக்கு ஒரு கண் போனாலும்- உனக்கு ரெண்டையும் நொள்ளையாக்காது விட்டேனா பார்?' என்ற சிந்தனையைப் பற்றியோ நான் விமர்சிக்கப் போவதில்லை! ஏனெனில் என்றைக்கோ நானாகவே செய்திருக்க வேண்டிய ஒப்புதல் விஷயத்தை இன்றைக்கு என் சார்பில் அவர் செய்து தந்திருக்கிறார்! அதுமட்டுமன்றி, பகைமைக்கு அவர் தலைக்குள் என்ன முகாந்திரங்கள் தோன்றியிருப்பினும் சரி, என்னளவில் அவ்விதம் ஏதும் கிடையாது என்பதுமே நிஜம்.நமக்கு ஸ்டால் கிடைக்க ஏகமாய் பாடுபட்டிருக்கிறார் ஆரம்ப நாட்களில்; டி.வி; மீடியா என்று வெளிச்ச வட்டங்கள் நம் பக்கம் பாய்ந்திட மெனக்கெட்டிருக்கிறார்; எத்தனையோ நாட்கள் நம்மைச் சந்திக்க சிவகாசிக்கு விசிட் அடித்துள்ளார்; நம் பணிகளின் பொருட்டு சென்னையின் வீதிகளில் சுற்றித் திரிந்திருக்கிறார் ; பற்றாக்குறைக்கு சீனியர் எடிட்டரின் அசைக்கமுடியா நம்பிக்கையையும் ஈட்டியிருக்கிறார் எனும் போது- தற்போதைய “புலன் விசாரணைகளையுமே” அந்த ஒத்தாசைகளின் பட்டியலில் சேர்த்து வைத்துப் பார்த்துப் போகிறேனே? நீளமான திரி கொண்ட பட்டாசைப் பக்கத்திலிருந்து பார்த்து நிற்பதை விடவும், அது வெடித்து விட்ட பிறகு ரணத்தைச் சகித்து விடல் தேவலை என்பதைச் சமீப நாட்களில் புரிந்து கொண்டதன் பலனோ என்னவோ- என்னுள் தலைகாட்டும் அந்த அமைதி?! சந்தேகத்துக்கு இடமின்றிக் கூனி நிற்கிறேன்; உங்களின் பொழுதுகளை ஏதோவொரு சிறு விகிதத்தில் வெளிச்சமாக்கியவன் இன்றைக்கு உங்களையும் சங்கடத்தில் ஆழத்தியதுக்கு எவ்விதச் சமாதானமும் கிடையாதென்றும் புரிகிறது! ஆனால் இந்த வார ஜுனியர் விகடனில்  திரு.மனுஷ்ய புத்திரன் ‘ஒரு வரி- ஒரு நெறி‘ பக்கத்தில் எழுதியிருந்த வரிகளைக் படிக்க நேர்ந்தபோது அவை எனது இக்கட்டை மனதில் கொண்டு எழுதப்பட்டவை போலவேபட்டது! வாரந்தோறும் நான் மண்டியிட்டு மன்னிப்புக் கோரத் துவங்கிடும் பட்சத்தில் அது அந்த வார்த்தையினையே கேலிக் கூத்தாக்கி விடுமென்பதால் மறுபடியும் அந்தச் சாலை பக்கமாய் நடை பயில்வதாகயில்லை! ‘செய்றதையும் செஞ்சிட்டு, திமிர் வேண்டிக் கிடக்கோ  ??‘ என்று ஒருசிலருக்குப்படலாம் தான்; ஆனால் நிபந்தனைகளின்றி என் மீது அன்பு காட்ட எஞ்சியிருக்கும் ஒரு சிறுவட்டத்தை திரும்பத் திரும்ப தர்மசங்கடத்துக்கு ஆளாக்கி, அவர்கள் என்னைச் சமாதானம் செய்யத் தத்தளிப்பதென்பது என் ஆன்மாவைச் சித்ரவதை செய்யும் வலியைத் தருகிறது! அதே போல-

தவறென்று இவையனைத்தையும் சுட்டிக்காட்டி பதிவிலோ; FB-யிலோ எழுதியிருக்கும் பட்சத்தில் நிச்சயமாய் வருத்தம் நேர்ந்திருக்குமென்று தோன்றவில்லை; ஆனால் ஓரிடத்தில் ததும்பிய “'சீக்கிரப் பறவை'” உற்சாகங்களும், உதிரப்படல உத்வேகங்களும், பிறிதோரிடத்தில் இத்தனை தாக்கத்தை உருவாக்கி, ஒரு முன்னணி ஊடகத்தைக் கொண்டேனும் அதற்கொரு வடிகால் தேடிக் கொள்ள முனையும் போது- நிலவரம் வேறாகிறது! ‘உன்னைக் காவு வாங்கும் முயற்சியில், சுற்றுமுற்றும் சிக்கிடக்கூடிய அந்த ஆகச் சிறிய காமிக்ஸ் வட்டம் மீதும் இரத்தம் தெறித்தாலும் எனக்குக் கவலையில்லை!‘ என்ற தீவிரம் குடிகொண்ட பின்பாய் மன்னிப்புக் கோரல் என்பதையே தொடர்ந்து கேடயமாக்கி நான் நிற்பது மடத்தனத்தின் உச்சமாகப்படுகிறது! அதற்காக- look who’s calling the kettle black?’ என்ற ரீதியில் நானும் சேற்றை வாரி இரைக்க முனையப் போவதில்லை! ‘இழப்பதற்கு ஏதுமில்லை!‘ என்ற நிலையிலிருந்து ஒருவர் எடுக்கும் தீர்மானங்களுக்கும்; 'இழப்பது சுயத்தையே என்றிருந்தாலும்- சேதம் நாமெலாம் நேசிக்கும் காமிக்ஸ்களுக்கும்; அவற்றை (சு)வாசிக்கும் நண்பர்களுக்கும் வேண்டாமே!!'‘ என்று நினைப்பவனின் தீர்மானங்களுக்குமிடையே வேறுபாடு இருக்கத்தானே செய்யும்? So எனது பதிவும், பாதையும், பயணமும் நிதானமாகவே   இருந்திடும்! “"பயந்திட்டான் பாரேன்!”"என்ற நகையாடல்கள் எழும்பிடக்கூடும் என்று தோன்றினால் கூட எனக்குள் அதன் பொருட்டு கவலை ரேகைகள் இல்லை !! 

காமிக்ஸ் உலகைத் தூக்கி நிறுத்தப் பிறந்தவனாய் என்னை ஒருபோதும் நான் பார்த்ததில்லை! எஞ்சி நிற்கும் ஒரே பிரதிநிதி என்பதற்காக தமிழ் காமிக்ஸ் உலகே நம்மைச் சுற்றித் தான் என்ற கற்பனைகளும் எனக்குக் கிடையாது! In fact- இந்தத் துறையில் துணைக்கு யாரேனும் வந்தால் தேவலையே- கிடைக்கும் கவனத்திலும், சாத்துகளிலும் பங்கு போட்டுக் கொள்ளவாவது!” என்று பல முறைகள் நண்பர்களிடம் பகிர்ந்துள்ளேன்! ஆனால் அதற்காக 'நீயொருவன் பந்தி விரித்து டிபன் போட்டுக் கொண்டேயிருக்கும் வரைக்கும் அடுத்த கேட்டரிங் கான்டிராக்டர் உள்ளே நுழைய முடியாதே?” என்ற ஆதங்கத்திற்கெல்லாம் நான் செய்திடல் என்னவாக இருக்க முடியும்? ஏற்கனவே ஏழு கோடிப் பேர் கொண்ட தமிழகத்தில் 1500 பேர் தேறுவது உயிர் போகும் பிரயத்தனமாயுள்ளது - – காமிக்ஸ் எனும் சுவையைப் பகிர்ந்து கொள்ள! அந்த சொற்ப நம்பரையும் கரைத்தலையே ஊன்உறக்கம் பாரா தற்போதைய இலட்சியமாய்க் கொண்டு செயலாற்றும் போது நானிங்கே தடுமாறத் தொடங்கினால் என்னை நம்பி என்னிடம் ஒப்படைக்கப்பட்ட விருட்சத்தைக் கைவிட்டவனாவேன்! So அந்தத் தவறைச் செய்வதாக நானில்லை! 50 வயதில் புதிதாய் பிள்ளையார்சுழியிலிருந்து துவங்க வேண்டியதொரு சூழலில் இருப்பது போல் உணர்கிறேன்! “"அழிக்க"“ இவ்வளவு வியர்வை சிந்திட ஒருவர் கண்முன்னே தயாராய் நிற்கும் போது- “"ஆக்க"” அதே தீவிர உழைப்பைப் பயன்படுத்திடப் படித்துக் கொண்டால் போச்சு என்று தோன்றியது! So முன்னெப்போதையும் விட திடமாய் உழைக்க வேண்டிய நாட்கள் முன்னிற்பதாய் நினைக்கிறேன் ! 

'எல்லாம் சரிதான் ; ஆனால் கடைசி வரையிலும் ‘வள வள‘.... ‘கொள-கொள‘ ஆசாமியாகவே இருந்து விடப் போகிறாயா?' என்று நம்முள் சற்றே சிறுதிரிகள் கொண்ட நண்பர்கள் எரிச்சலோடு சமீப நாட்களது எனது மௌனத்தைப் பார்த்திடக் கூடுமென்பதும் எனக்குப் புரியாதில்லை! செய்த பிழைக்கு தண்டனை என்ற ரீதியில் பார்த்ததோடு மட்டுமன்றி, கற்பனையான மகுடங்களும், காற்றில் மட்டுமே ஜீவிக்கக் கூடிய சில வெற்றிகளையும், தோல்விகளையும் இத்தனை வன்மத்துக்கு பெட்ரோல் ஆக்கிடவும் சாத்தியம்தானா ? என்ற மலைப்புமே அதன் காரணம்! எல்லாவற்றிற்கும் மேலாய் ஒரு 76 வயது முதியவரின் நம்பிக்கையையும், நட்பையும் கூட காலுக்குள் போட்டு நசுக்கியேனும் காரியத்தைச் சாதித்துக்கொள்ளத் தோன்றிடும் பட்சத்தில்- அதன் பின்னுள்ள திட்டமிடலும், agenda-வும் வெளித்தோற்றத்தோடு சம்பந்தம் கொண்டவைகள் தானா? என்றும் நினைக்கத் தோன்றியது!  

தவறைச் சுட்டிக்காட்டிட சரியானவர் தானா ? என்றோ; அவரது தகுதியோ / தகுதியின்மைகளோ எனது பிழைகளைச் சரிசெய்யும் அழிரப்பராகிடும் என்றோ நான் கனவு காணப் போவதில்லை! அதே போல இந்த ஸ்பீட் பிரேக்கரால் நமது பயணமும் தடைபடவோ; தாமதப்படவோ போவதுமில்லை! அதற்காக எதுவுமே நேர்ந்திடவில்லை என்பது போல பதிவுகளில் பாசாங்கும் செய்ய மாட்டேன்! உங்களின் காயங்களுக்கு காலம் மாத்திரமே மருந்திட முடியுமென்பதால் அந்த நலம் பெறலுக்கு அவசியப்படும். அவகாசத்தைத் தந்திடும் பொருட்டு இங்கு மட்டுமாவது உங்களுக்குச் சின்னதொரு ‘பிரேக்‘ தந்திடலாமென்றுள்ளேன் -- நீட்டி முழக்கும் என் வரிகளிலிருந்து ! காணாது போகப் போவதாய் நான் சொல்ல வரவில்லை ; சிந்தையில் கொஞ்சமே கொஞ்சமாய் சகஜம் மீண்டிடும்வரையிலும் பெரும்பங்கு கவனத்தைப் பணிகளின் பொருட்டு தந்து பார்க்கிறேன் என்றுதான் சொல்ல முனைகிறேன் !  எனக்குள்ளும், உங்களுக்குள்ளும் சற்றே ‘நார்மலான‘ அமைதி திரும்பும் வரை இந்தப் பதிவுப் பக்கத்தில் நமது இதழ்களின் அறிவிப்புகளை மட்டும், சுருக்கமான வரிகளோடு  செய்திட அனுமதி தாருங்களேன் - ப்ளீஸ்?! சின்னதொரு இடைவெளியில் நமது பரஸ்பர பேட்டரிகளைச் சார்ஜ் செய்து விட்டுத் திரும்புவோமே ? என் மடமையினைச் சலவை செய்ய முயற்சிக்கவும் இந்த நாட்களைப் பயன்படுத்திக் கொள்கிறேனே ? 'வாட்சப்' க்ரூப்களிலும், தொலைபேசி உரையாடல்களிலும் உரிய இடங்களைக் காமிக்ஸ் இதழ்கள் மீட்டிடும் தருணத்தில் நான் உங்கள் முன்னே ஆஜராகியிருப்பேன் guys! Bye for now!

P.S: துவக்கத்தில் சொன்னது போலவே இது மனம் போன போக்கிலான பதிவு மட்டுமே! கோர்வையோ; வார்த்தைப் பிரயோகங்களோ சற்றே மேம்பட்டும் இருக்கலாம் தான்! ஆனால் மறுவாசிப்பு செய்திடாது தலையில் தோன்றியவைகளை அப்படியே வரிகளாக்கியுள்ளேன் என்பதால் அவற்றைப் பொருட்படுத்த வேண்டாமே? அதே போல ‘சென்டிமெண்டலாகப்‘ பேசுவதோ; வார்த்தை ஜாலங்களில் பூசி மெழுகிடுவதோ என் நோக்கமும் அல்ல! எங்கேனும் அதுபொருட்டு நெருடினால், பிழை என் பேனாவின் வார்த்தைகளில் தானேயொழிய என் உள்ளத்து வார்த்தைகளில் அல்ல என்ற புரிதலுக்கு முன்கூட்டியே நன்றிகள்!

என்னென்னவோ எண்ணங்கள் சிந்தனையை ஆக்கிரமித்திருந்தன! அவற்றையெல்லாம் இங்கே எழுதிவிட்டேனா என்று தெரியவில்லை! Maybe நடுச்சாமத்தில்- ‘ஐயோ; அதைச் சொல்ல மறந்துட்டேனே!‘ என்றோ; அடடா... இதை வேறுவிதமாய்ச் சொல்லியிருக்கலாமோ ?!‘ என்றும் விசனப்படக் கூடும் தான் ! ஆனால் இதற்கு மேலாய் என்னால் காமிக்ஸ்களுக்குப் பாதிப்பு எந்தவொரு இடத்திலும் - நேர்ந்திடக் கூடாதே என்ற ஜாக்கிரதையுணர்வு மிகுந்திருந்ததால் நிறைய ஜாடிகளை மூடியிருக்க அனுமதிப்பதே தேவலை என்று தீர்மானித்தேன்!

அடுத்த ஸ்பெஷல் இதழ் அறிவிப்பின் திட்டமிடலுக்கும்; செயலாக்கத்துக்கும் தொடரும் நாட்களை நிச்சயம் பயன்படுத்திக் கொள்வேன் !! See you around ! Be back soon ! And more than anything else - sorry from the bottom of my heart once again !