Tuesday, 28 February 2017

"அந்த" நாள் !!

நண்பர்களே,

வணக்கம். மாதத்தின் "அந்த" நாள் மீண்டுமொருமுறை வந்து சென்றுள்ளது ! ஆபீசுக்குள் நுழைந்தாலே அட்டை டப்பாக்களில் விரவிக் கிடக்கும் பசையின் நெடி குபீரென்று வரவேற்கும் ;  கம்பியூட்டர் மேஜைகள் 'தேமே' என ஒரு மூலையில் ஓய்வெடுத்துக் கிடக்கும் ;  அச்சுப் பிரிவின் ஆட்களோ சம்மணமிட்டு தரையில் அமர்ந்து கொண்டு, கலர் கலராய்ப் புத்தகங்களை முன்னே குவித்து வைத்துக் கொண்டு "படம் பார்த்துப் பெயர் சொல்" என்ற பயிற்சியில் ஈடுபட்டுள்ள  மாணாக்கர்களைப் போல பக்கம் பக்கமாய்ப் புரட்டிக் கொண்டிருப்பார்கள் ;  கிணுகிணுக்கும் செல்போன்களை ஆளுக்கொன்றாய்க் காதிடுக்குகளுக்குள் அடைக்கொடுத்துக் கொண்டே நம்மவர்கள் - "சரி சார்..ஆமா சார்..இல்லை சார்..!..ஆகட்டும் சார் !" என்று ஏதேதோ பதில் சொல்லிக் கொண்டே ஒரு வண்டி பிரவுண் டேப்பால் பருமனான டப்பாக்களுக்குப்  புத்தூர் கட்டுப் போட்டு விட்டுக் கொண்டிருப்பார்கள் ; மேஜை நிறைய ஸ்டிக்கர்களைப் பரப்பிப் போட்டுக் கொண்டு, குனிந்த தலை நிமிராது வேலை செய்து கொண்டிருக்கும் மைதீனோ அவற்றை எதன் மீதாவது 'சபக்..சபக்கென்று ஒட்டிக் கொண்டிருக்க  ; நமக்கு வாடிக்கையாய் உதவிடும்  லோடு ஆட்டோ 'சர்...சர்ரென்று குறுக்கும் நெடுக்கும் உலாத்திக் கொண்டிருக்கும் ! உள்ளே நுழைவோரோ சுவற்றில் இடுங்கிடும் பல்லிகளைப் போல பம்மிப் பதுங்கி உட்புக வேண்டியிருக்கும் !! அலுவலகமே கருமமே கண்ணாய் பணி செய்து கொண்டிருக்கும் வேளைதனில், வேலையேதுமின்றி முன்னுக்கும், பின்னுக்கும் குட்டி போட்ட பூனை போல நடை பயின்று கொண்டிருக்கும் ஆந்தை விழிக்காரன் இன்னொரு பக்கம் !! 

Welcome to yet another despatch day folks !! 

கடந்த சில பல ஆண்டுகளாய், ஒவ்வொரு மாதத்தின் இறுதி நாட்களுள்  ஏதோவொன்றில் திருவிழாக் கோலம் பூணும் நமது ஆபீசை புதிதாய்ப் பார்ப்போருக்கு கோயம்பேட்டுக் கொத்தவால் சாவடி நினைவுக்கு வரலாம் ! ஆனால் இருக்கும் குறைச்சலான இடத்துக்குள், இருக்கும் சொற்பமான  அவகாசத்துக்குள், சந்தாப் பிரதிகள் மொத்தத்தையும் டெஸ்பாட்ச் செய்திட நம்மவர்கள் அடிக்கும் சர்க்கஸ் வேலைகளை ரசிப்பது எனது மாதாந்திர சந்தோஷ அனுபவங்களுள் உச்சமானது ! 29 நாட்கள் செய்த வேலையினை உங்களிடம் கொண்டு சேர்க்கும் அந்த 30-வது நாள் இன்று வரைக்கும் அதே பரபரப்பை எனக்குள் துளிர் விடச் செய்து வருகிறது ! 

இன்றைய பகல் பொழுதும் அதே routine தான் ; உங்களின் மார்ச் பிரதிகள் அனைத்தையும் கூரியர்களுக்கு 'பேக்-அப்' செய்திடும் மும்முரத்தில் ! தோர்கல் + டெக்ஸ் + லக்கி லூக் + ஸ்பைடர் + மாடஸ்டி + ஒரு குட்டியூண்டு சர்ப்ரைஸ் gift என இம்முறை உங்களை வந்தடையவிருக்கும் டப்பாக்களுக்குள் மாறுபட்டதொரு கூட்டணி காத்துள்ளது ! Fantasy-ம் படிப்போம் ; Cowboy-களும் ரசிப்போம் ; Cartoon-களும் (சு)வாசிப்போம்; ஆக்ஷனுக்கும் ஆர்ப்பரிப்போம் என்றதொரு unique வாசக வட்டத்தை வேறெந்த பிராந்திய மொழியிலும் சல்லடை போட்டாலும் கண்டுபிடிக்க சாத்தியப்படாது என்பதே எனது அனுமானம்!! அத்தகையதொரு அணிக்குப் பணியாற்றுவது செம உற்சாக அனுபவம் என்பது ஒவ்வொரு மாதமும் பலமான அடிக்கோடோடு நிரூபணமாகி வருகிறது! So நாளைய பொழுதைக் கூரியர் கைப்பற்றலோடு துவக்கிடலாம் guys ; புது இதழ்கள் பற்றியும், (வண்ண) மறுபதிப்பு பற்றியும் உங்களின் அபிப்பிராயங்களை அறிந்திட ஆவலாய் இருப்போம் !! 

காதுகளை பிரீயாக வைத்துக் கொள்ளுங்கள் folks ; சரம் சரமாய் காத்துள்ளது  !! 
Before I sign off -  FB பக்கமாய்ப் பயணம் செய்திடா நண்பர்களின் பொருட்டு, கண்ணில்பட்ட சில பல "அஜய்விளையாடல்களை" பகிர்ந்து கொள்கிறேன்  !! 
Phew !!! 
P.S : மார்ச் இதழ்களின் ஆன்லைன் லிஸ்டிங்கும் இப்போது செய்து விட்டாயிற்று ; so சந்தாக்களில் அங்கமாகிடா நண்பர்களும் இப்போதே ஆர்டர் செய்திட துவங்கிடலாம் !! 
http://lioncomics.in/monthly-packs/296-march-2017-pack.html

Saturday, 25 February 2017

ஓராண்டு..ஒற்றை வாரயிறுதியில்.......!

நண்பர்களே,

வணக்கம். நிமிஷமாய் நாட்கள் கரையும் ஒரு தருணத்தின் வழியே நாமெல்லாம் பயணித்து வருகிறோம் தானே?! இரண்டரை மாதங்களுக்கு முன்பாய் தமிழகம் சந்தித்ததொரு இழப்பை நின்று நிதானமாய் அசைபோடக் கூட நேரமின்றி ஏதேதோ அசாத்திய நிகழ்வுகள் அசுர கதியில் தடதடக்கின்றன ! இந்த நிலையில் 2016-ன் நமது இதழ்கள் பற்றிய review-ஐ கையில் எடுக்க எனக்கே சற்றே மலைப்பாக இருந்தது. ஏதோவொரு மாமாங்கத்தில் அவையெல்லாம் வெளியானது போல்த் தோன்றுவது மட்டுமல்லாது - இடைப்பட்ட வேளைகளில் ஏதேனும் பதிவிலோ ; ஹாட்லைனிலோ the year in review என்று ஏதாச்சும் எழுதியிருக்கிறேனா என்பதே நினைவில் இல்லை. ஓலைப்பாயில் மூச்சா போகும் அல்சேஷனைப் போல சிக்கிய சந்திலெல்லாம் ‘சள சள‘ வென்று எதையாவது பதிவிட்டுத் திரிவதால் ‘மறு ஒலிபரப்பாகிடக்‘ கூடாதே என்ற முன்ஜாக்கிரதை மேலோங்குகிறது. அதுமட்டுமன்றி - சிரத்தையாய் நாங்கள் அனுப்பி வைத்த 2016-ன் ரிப்போர்ட் கார்ட் சிலபல அலமாரிகளுக்குள் சேகரிப்புகளோடு பத்திரமாய் செட்டில் ஆகிவிட்டபடியால் உங்களது பார்வைக் கோணங்களை அறிந்திட அதிகமாய் வாய்ப்பும் இல்லாது போய் விட்டது ! ஆனால் சிறுகச் சிறுக ஜனவரியிலும், பிப்ரவரியிலும் அந்த red & black படிவங்கள் நம்மைத் தேடி வரத் தொடங்க, மெதுமெதுவாய் அவற்றின் மீது பார்வையை ஓடச் செய்தேன் ! தலீவரின் படிவமும் சமீபமாய் நம்மை வந்து சேர - ‘அது என்னாச்சு?‘ என்ற கணையோடு அவரொரு கடுதாசித் தாக்குதலைத் துவங்கும் முன்பாக மேட்டருக்குச் சென்றுவிடல் நலம் என்று தோன்றியது ! So here goes :

ஆண்டினில் 54 இதழ்கள் எனும்போது - இதுவரையிலான நமது சர்வீஸில் ஆகக் கூடுதலான அறுவடை ஆண்டு இதுவே என்பதில் சந்தேகமில்லை ! And - மறுபதிப்புகள் நீங்கலான புது இதழ்ப் பட்டியலுள் 2016-ல் சொதப்பல்கள் எண்ணிக்கையும் மிகச் சொற்பமே என்பதால் இதுவொரு "அறுவை ஆண்டாக" இல்லாது போனதில் நிம்மதியும் கூட !Genre-வாரியாக சந்தாக்கள் பிரிக்கப்பட்ட நாள் முதலாய் - கதைத் தேடல்களில் எங்களுக்குள் சற்றே கூடுதலான தெளிவு பிறந்திருப்பது இதற்கொரு முக்கிய காரணி என்பேன் ! So இந்த review படலத்தையும் இதே genre ரீதியில் / சந்தாவாரியாகக் கொள்வதே தேவலாமென்று பட்டது !
சந்தா A:

ஆக்ஷன் அதிரடிகள் என்ற இந்தக் களத்தில் எனக்கும் சரி, உங்களுக்கும் சரி - உச்சமெது? என்ற தேர்வுக்கு அதிகநேரம் அவசியமாகிடவில்லை என்பது தெளிவாய்ப் புரிந்தது ! என்னதான் ஷெல்டன்... கமான்சே... மாடஸ்டி... டைலன் டாக்... ராபின் என்ற நாயகர்கள் சந்தா A-வில் வலம் வந்தாலும், லார்கோவும் சரி, இரவுக் கழுகாரும் சரி - ஒரு பிரத்யேக அணியில் இருப்பது புரிகிறது ! So 2016-ன் டாப் கதைகளுக்குள்ளான போட்டி சர்வமும் நானே ! vs “கடன் தீர்க்கும் நேரமிது” இதழ்களுக்கு மத்தியினில் தான் என்பது உங்கள் மார்க் ஷீட்களில் பிரதிபலிக்கிறது ! என்னைப் பொறுத்தவரை புது அறிமுகம் ஜேசன் ப்ரைசுமே இந்த ஆட்டகளத்தில் சேரத் தகுதி கொண்டவரே ! For the sheer novelty & intensity - ஜேசனின் "எழுதப்பட்ட விதி" + "மறைக்கப்பட்ட நிஜங்கள்”" 2016-ன் உச்சத் தருணங்களுக்குள் இடம்பிடிக்கத் தகுதியுள்ளவை என்றே நினைத்தேன் ! ஆனால் தொடர் (கதை) எனும் போது அதனை முழுமையாய் எடை போடாது - பாகம் பாகமாய் தர நிர்ணயம் செய்ய முயற்சிப்பது அத்தனை சுகப்படாது என்று பட்டதால் ஜேசனை போட்டியிலிருந்து ஓரம்கட்டி விட்டேன் ! உங்களது மதிப்பெண்களையும் சரி, இதழ் வெளியான வேளையில் கிட்டிய அதகள வரவேற்பையும் சரி, மனதில் கொண்டால் 2016-ன் சந்தா A-வின் டாப் : TEX & கோ.வின் "சர்வமும் நானே"” தான் ! தடதடக்கும் சரவெடி ஆக்ஷன்; ரேஞ்சர்களின் ஒட்டுமொத்த dynamic presence ; பாலைவனத்தில் ; நடுக்கடலில் ; கப்பலில் என்று பரந்து விரியும் கதைக்களம் ; மயக்கும் artwork + வர்ணங்கள் என சிலாகிக்க இதனில் சரக்கு ஏகமாய் உள்ளதால் உங்கள் தேர்வின் பின்னணிகளை யூகிப்பதில் சிரமம் இருக்கவில்லை ! அது மட்டுமின்றி - இது வரையிலான ‘தல‘ கதைகளிலேயே நீளத்தில் முதன்மையானது இது தான் எனும் போது- வாசிப்பின் அந்தத் தூக்கலான லயிப்பையும் இதற்கொரு காரணமாகப் பார்க்கிறேன் !
அதே நேரம் - தனிப்பட்ட முறையில் எனக்கு "பெஸ்ட்" என்றுபட்டது லார்கோவின் ஆக்ஷன் த்ரில்லரே ! “கடன் தீர்க்கும் நேரமிது” வழக்கமான லார்கோ template-ல் சவாரி செய்யுமொரு இதழ் தான் - ஒத்துக் கொள்கிறேன் ! ஆனால் கையில் ஆயுதமேந்தா ஒரு கோடீஸ்வரக் கோமகனைப் போராளியாக்குவது ஒரு சுலபக் காரியமல்ல என்றால் - அவரைக் கொண்டு பிசுனஸ்... பங்குச் சந்தை... எண்ணெய் வளம்... இத்யாதி இத்யாதி என்ற ரீதியில் வறட்சியாய்ப் பயணிக்காது இத்தனை துடிப்பானதொரு ரூட் போடுவது சிரமமோ - மெகாச் சிரமம் ! அதுவும் 'உலகம் சுற்றும் வாலிபன்' படப் பாணியில், ஒவ்வொரு தேசத்துக்கொரு adventure என்ற அந்த யுக்தி இந்தத் தொடரின் ஒரு highlight என்பேன் ! நம்மையும் உடனழைத்துக் கொண்டு பூமியுருண்டையின் ஒவ்வொரு மூலைமுடுக்கையும் ஆராய முற்படுவது சுவாரஸ்யத்துக்குப் பஞ்சம் வைப்பதில்லை ! And இம்முறை ஹாங்காங்கில் நடைபெறும் அந்த ஆக்ஷன் தோரணம் துளியும் தொய்வின்றிப் படபடத்த சாகஸம் என்பதால் எனது ஓட்டு – ‘W’ குழுமத் தலைவருக்கே! So - சந்தா A-வில் top:
உங்கள் சாய்ஸ் : “சர்வமும் நானே”
எனது சாய்ஸ் : “கடன் தீர்க்கும் நேரமிது”

"உச்சம் எது?" என்றான பின்னே ‘தாங்கலைடா சாமி‘ award யாருக்கு என்பதையும் தீர்மானிக்க வேண்டுமல்லவா ? இங்குமே நமது தேர்வுகள் ரொம்பவே சுலபம் என்பேன் - லயனின் 32-வது ஆண்டு மலர் புண்ணியத்தில் ! 

கேப்டன் பிரின்ஸ் சிறுகதைத் தொகுப்புகள் + பெட்டி பார்னோஸ்க்கி” என்ற கூட்டணி க்ரீன்வேஸ் சாலையின் ஏமாற்றத்துக்கு நிகரானதொரு disappointment-ஐத் தந்திடும் என்பதை நான் நிச்சயமாய் எதிர்பார்த்திருக்கவில்லை ! இன்று நிதானமாய் யோசிக்க அவகாசம் கிடைக்கும் வேளையில் இதனில் நடந்த தவறுகள் ஸ்பஷ்டமாகத் தெரிகின்றன !

* கேப்டன் ப்ரின்ஸ் சிறுகதைகள் வெவ்வேறு கால கட்டங்களில், வெவ்வேறு டீம்களின் கைவண்ணத்தில், Spirou என்ற வாரயிதழில் 1960-கள் முதலாய் வெளிவந்தவை. கேப்டன் பிரின்ஸ் தொடர் limited ஆன இதழ்களோடு நிறைவு பெறுவதே படைப்பாளிகளின்  திட்டமிடல் என்பதால் இந்தத் துண்டு + துக்கடாக் கதைகளை ஒருங்கிணைத்து சேகரிப்புக்கென இந்த ஆல்பத்தை அவர்கள் உருவாக்கியிருக்க வேண்டும் ! வெற்றி கண்டதொரு தொடரில் இது ஒன்று மட்டுமே எஞ்சி நிற்கிறதே...? இதையும் போட்டு வைப்போமே ?” என்ற சபலத்திற்கு நாமோ அடிமையாகிட இந்த இதழைக் களமிறக்கினேன் ! சிற்சிறு கதைகள் எனும் போது அரை வரிக்குக் கூடத் தேறாத கதைக்களங்களே வியாபித்து நின்றிட - மொத்த ரிசல்ட் - ‘ஙே‘வாகிப் போனதில் (இப்போது)வியப்பில்லை ! ‘பெட்டி பார்னோவ்ஸ்க்கி‘யைப் பொறுத்தவரைக்கும்- இந்த spin-off ல் அவரது மறுபக்கத்தைச் சித்தரித்திருப்பார்களென்று ஹேஷ்யமாகக் கூட எனக்கு அந்நேரம் தெரிந்திருக்கவில்லை ! XIII Mysteries தொடரில் இதுவும் பிரெஞ்சில் ஹிட்டடித்த இதழ்களுள் ஒன்று என்ற தகவலை மட்டுமே என் கதைத் தேர்வுக்கு மூலதனமாக்கிக் கொண்டதால் இந்தச் சொதப்பலை நான் கணித்திருக்க முடியாது போனது ! 

So இங்கே நான் கற்றறிந்துள்ள பாடங்கள் இரண்டு :

* கதைகளில் merit இல்லா பட்சத்தில், பெருங்காய டப்பா வாசனைக்கோசரம் இனியும் கொடி பிடிப்பது சரிப்படாது என்பதே பாடம் # 1 ! எத்தனை பெரிய அப்பாடக்கரா இருப்பினும் ; நேற்று வரை எத்தனை வீரியமான சாகஸங்களை விருந்தாக்கியிருப்பினும் - இன்றைக்கு சரக்கில்லையெனில் இதயத்தில் மட்டுமே இருக்கை!

* "ஜப்பான்லே ஜாக்கி சான் கூப்டாகோ; அமெரிக்காலே மைக்கேல் ஜாக்சன் கூப்டாகோ!”" என்று காதில் விழும் சமாச்சாரங்களை “ஓஹோ ?“ என்று மட்டும் இனிமேல் கேட்டு வைத்துக் கொள்ள வேண்டியது ! ஆனால் இங்கே நம்மிடையே கரகாட்டத்தை ஆரம்பிக்கும் முன்பாக- முடிந்தளவுக்கு மொழிபெயர்ப்பு; கதைப் பரிசீலனை இத்யாதிகளை வழக்கம் போலச் செய்து விடுவது சாலச் சிறந்தது என்று பாடம் படித்துள்ளேன்! 

So மொக்கை பீஸ் of சந்தா A :
எனக்கும், உங்களுக்கும் : 32-வது ஆண்டு மலர்!

Close second: இரத்தப் படலம் “The End?”

சந்தா B:

2016-ஐ துள்ளிக் குதிக்கும் உற்சாகத்தோடு drive செய்து வந்ததே “மாதமொரு இரவுக் கழுகார்”ஃபார்முலா தான் என்பதில் ஐயமேது ? So பெரும்பான்மை Tex இதழ்களைத் தன்னுள் கொண்ட சந்தா B-ன் டாப் இதழ்த் தேர்வு ரொம்பவே சுலபமாகத் தானிருக்குமென்று நான் அவதானித்திருந்தேன் ! இங்கு பதிவான உங்களின் குரல்களுமே பெரும்பாலும் அதையே பிரதிபலித்தன ! So - போட்டியில் வெற்றி பெறுபவர் அரிசோனா மாநில... டெக்சாஸ் மாவட்ட 18-வது வட்டச் செயலாளர் Tex என்று சுலபமாய் அறிவித்து விட முடியுமென்ற நம்பிக்கையோடே 2016-ன் சந்தா B பட்டியல் முன்னமர்ந்தேன் ! Surprise... Surprise... நான் மாத்திரமன்றி; படிவங்களைப் பூர்த்தி செய்து அனுப்பியிருந்த நண்பர்களுள் கணிசமானோரும் ஆட்டத்தைக் கலைக்க வந்தது போலான "ஜெய மார்ட்டின் பேரவைக்கு" ஆதரவு தெரவித்திருப்பது தெரிந்தது!

"இனியெல்லாம் மரணமே”!" மார்ட்டினின் ஒரு அசாத்தியக் களமென்பதை இதழ் வெளியான அந்த மாதமே நாம் அனைவரும் உணர்ந்திருந்தோம் ! அதன் தாக்கமானது 9 டெக்ஸ் வில்லர் இதழ்களையும் மீறி வீரியமாகத் தங்கியிருக்குமென்பது தான் நான் துளியும் உணர்ந்திருக்கா விஷயம் ! So சந்தா B-ன் சந்தேகமிலா ஹிட் - இந்த விஞ்ஞானம் + வரலாறு + கற்பனை கலந்த க்ளாசிக் கூட்டணி என்பதை அறிவிப்பதில் பெருமையாகவுள்ளது ! இது போன்ற கதைகளையும் நாம் just like that ரசிக்க.. ருசிக்கத் தயாராகி விட்டோமெனும் போது -நமது ரசனைக் கொடிகள் பந்தாவாய்ப் படபடப்பது போலொரு உணர்வு எனக்குள் ! இந்த இதழின் மொழிபெயர்ப்பின் போதும், எடிட்டிங்கின் போதும், நான் போட்ட மொக்கைகளுக்கு இந்தத் தீர்ப்பானது ஒரு பாட்டில் ஜண்டு பாமாகத் தெரிகிறது !

இரவுக் கழுகாரின் பலதரப்பட்ட கதைகளுள் “"விதி போட்ட விடுகதை”" ; “"தலையில்லாப் போராளி”" ; “துரோகத்திற்கு முகமில்லை” போன்ற கதைகள் நிறைவாக ஸ்கோர் செய்துள்ள போதிலும்,  அந்த TEX ரேசில் முந்தி நிற்பது “"தற்செயலாய் ஒரு ஹீரோ"” தான்! சுலபமான அந்தக் கதைக்களமும், மனிதனின் இயல்பான கோழைத்தனமும் ; அவசியம் எழும் போது அவன் வீறுகொண்டு எழுவதும் சித்தரிக்கப்பட்டிருந்த விதம் இந்த இதழை ஒரு வித்தியாசமான அனுபவமாக்கியுள்ளது என்பது புரிகிறது ! So சந்தா B-ன் டாப் :

எனக்கும், உங்களுக்கும் : "இனி எல்லாம் மரணமே”"
சந்தா B-ன் ஊ. போ. உ. : “"வேதாள வேட்டை”!"
சந்தா C:

வண்டி வண்டியாய் எதையெதையோ எழுதினாலும், கையாண்டாலும்- இந்தக் கார்ட்டூன் சந்தாக்களின் வாயிலாக எனக்குக் கிடைக்கும் திருப்தி அலாதி ரகம் ! So அதனுள் ஒரு தேடலை செய்ய முனைவதும் சுகமோ சுகம் ! கார்ட்டூன் மைதானத்தில் ஜாஸ்தி தெரிந்தவை நீலத் தலைகளே - நமது Smurf-களின் புண்ணியத்தில் ! துவக்கத்தில் இந்தக் குட்டி பசங்கள் உலகமோ ; இவர்களது பாஷைகளோ அத்தனை லயிப்பைத் தந்திடாது போக - நம்முள் ஒரு கணிசமான பகுதியினர் - கூவத்தூர் பக்கமாய் டேரா போடச் சொன்னதைப் போல முகம் சுளிக்கச் செய்ததில் ரகசியமில்லை ! In fact “இன்னமும் கூட என்னால் smurfs கதைகளுக்குள் ஐக்கியமாக முடியவில்லை சார்!” என்று அவ்வப்போது காதைக் கடிக்கும் நண்பர்களுக்கும் பஞ்சமில்லை ! ஆனால் “"ஒரே ஒரு ஊரிலே"” மற்றும் “"வானம் தந்த வரம்"” இதழ்கள் நம்மிடையே ஏகப்பட்ட மாற்றங்களை ஏற்படுத்தியுள்ளது நிதர்சனம் ! சொல்லப் போனால் இந்தக் கதைகள் - Smurfs அறிமுகப் படலத்தின் அங்கமாக இருந்திருப்பின் - தொடக்கமே டாப்கியரில் இருந்திருக்கக் கூடுமென்று அபிப்பிராயம் சொன்னோரும் உண்டு ! So ஆண்டின் தலைமக்கள் பட்டியலுக்குள் இந்தக் குட்டி உருப்படிகள் தாவித் திரிந்தது மறுக்கவியலா நிஜம் ! ஆனால் அன்றும் சரி, இன்றும் சரி, கார்ட்டூன் ராஜ்யத்தின் நிகரில்லா ‘தல‘ நானே என்றபடிக்குக் குரல் கொடுப்பதோ ஜாலி ஜம்பரின் முதலாளி ! “"ஒரு பட்டாப் போட்டி"” சுவாரஸ்யமான கதையே என்றாலும் - ஆண்டின் பிற்பகுதியில் வெளிவந்த லக்கி லூக்கின் “"திருடனும் திருந்துவான்"” a class apart என்பது உறுதி ! எழுதும் போதே இதுவொரு உறுதியான ‘ஹிட்‘ என்பதை உணர முடிந்தது ; இதழின் ஆக்கம், அட்டைப்படம் என சகலமும் ஒத்துழைக்க - 2016-ன் பெஸ்ட் கார்ட்டூன் என்ற பதக்கத்தைத் தட்டிப் பறித்துக் கொண்டது இந்த இதழானது !

‘உச்சம்‘ இது தானென்று அடையாளம் கண்டான பிறகு, சம்பிரதாயப்படி wash செய்து...wash செய்து..pour பண்ண ஒரு இதழையும் தேடிப் பிடித்தாக வேண்டும் தானே ? இழுத்துப் பிடித்து, நாலு குட்டு வைத்திட அந்த சோன்பப்டித் தாடி வாகாக உதவிட - நமது 24/7 விஞ்ஞானி லியனார்டோ தான் சோப்பு டப்பாவை ஈட்டிடும் நாயகர் சந்தா C-ல்!

So, the best of Cartoons :
* லக்கி லூக்கின் “திருடனும் திருந்துவான் ! ஏகோபித்த தேர்வு !
*"the டொங்க்ஸ் of 2016 - கார்ட்டூன்" : “ஜீனியஸ் உறங்குவதில்லை”!

பெர்சனலாக எனக்கு லியனார்டோ தாத்தாவை ரொம்பவே பிடிக்கும் ; அந்த gags-களை நிதானமாய் ரசித்தால், ஓவியரின் கற்பனை பிரவாகமெடுப்பதை உணர முடியும் ! ஆனால் ஏனோ நமக்கு முழுநீள சாகஸங்கள் அல்லாத கதைகள் மீது ஒரு இனம்புரியா துவேஷம் தொடர்வதன் எதிரொலியாக லியனார்டோ உதை வாங்குகிறார் ! So 2018-க்கும் இவர் நம்மிடையே இடம் பிடிக்கப் போகும் வாய்ப்புகள் சொற்பமே என்று தோன்றுகிறது ! Sad !!

சந்தா D:(Reprints)

பெருசுகளின் பட்டியல்” மத்தியில் top எது ? bottom எது ? என்று நான் பட்டிமன்றம் நடத்தினால் நீங்கள் சேரைத் தூக்கிச் சாத்தி விடும் அபாயம் இருப்பதால் - மரியாதையாக அந்த வி்ஷப்பரீட்சையினைச் செய்யாது ஒதுங்கிக் கொள்கிறேன் ! So போட்டியே இன்றி இங்கே தேர்வு காண்பது டெக்ஸ் வில்லரின் “பழி வாங்கும் புயல்” வண்ண மறுபதிப்பே !

என் பெயர் டைகர் :

ரொம்பவே விநோதமானதொரு அனுபவம் இதனில் எனக்கு! சென்றாண்டின் இதே சமயம் சுமாருக்கு ‘சிவனே‘ என்று இந்த இதழுக்குக் ‘கல்தா‘ கொடுத்து விடலாமா? என்ற யோசனை எனக்குள் பலமாகவே ஓடிக் கொண்டிருந்தது ! ஒரு “மின்னும் மரணம்” ; ஒரு “தங்கக் கல்லறை” யுகத்துக்கொரு முறையே நிகழும் அதிசயங்கள் என்பதை மண்டை புரிந்திருந்தாலும், நெஞ்சமானது அங்கேயே சுற்றிச் சுற்றி கண்ணாமூச்சி ஆடி வருவதைத் தவிர்க்க வழி தெரிந்திருக்கவில்லை! வன்மேற்கின் வரலாறு ; அதனில் இடம்பெற்ற முக்கிய நிகழ்வுகள் ; வாழ்ந்த மாந்தர்கள்... இவர்களுக்கு மத்தியில் நமது சப்பை மூக்கார் என்பதே களம் என்ற நிதர்சனத்தை ரொம்ப நேரத்திற்கு என்னால் ஏற்றுக் கொள்ளவே முடியவில்லை ! என்னை விடவும் பெரிய ஓட்டைவாயன்களாய், கதையில் உலவும் அத்தனை ஆசாமிகளும் ஓயாமல் ஏதாச்சும் பேசிக் கொண்டேயிருக்க- வந்தோமா...சலூனின் நட்டநடுவில் நிற்க வைத்து நாலு பேரை நடுமூக்கில் 'பொளேர்' என்று போட்டோமா - என கெத்து காட்டும் டெக்ஸ் வில்லர் பாணிக்காக மனசு ஏங்கத் தொடங்கியது ! “டேய்... எவனாவது, எவனையாவது அடிங்கடா... இல்லை சுட்டுத் தொலைங்கடா!”!! என்று என் மனம் கூவாத குறை தான் ! ஆனால் இப்போதைக்கு இங்கே தோசை கூட யாரும் சுடப் போவதில்லை என்பதை ஒரு மாதிரியாகப் புரிந்து கொண்ட பிறகு 2 நாட்கள் சுத்தமாய் 'பிரேக்' எடுத்துக் கொண்டு,தட்டுத் தடுமாறி திரும்பவும் கதைக்குள் நுழைந்தேன். இம்முறை கூகுள் உதவியோடு வ்யாட் ஏர்ப்; டாக் ஹாலிடே; OK கார்ரல் மோதல் ; கோசைஸ் என்ற பெயர்களையெல்லாம் அலசோ அலசென்று அலச - சிறுகச் சிறுக கதாசிரியர் இங்கு சித்தரிக்க முயன்றிருக்கும் மெகா ஓவியத்தின் பரிமாணம் புலப்படத் தொடங்கியது ! நிஜத்தினுள் ரீலை இணைத்திருப்பதால்,கைபுள்ளெ ரேஞ்சுக்கு டைகர் சலம்பாது, அடக்கி வாசிக்க வேண்டியதன் அவசியமும் புரிந்தது ! அந்தத் தெளிவோடு மீண்டும் பணியாற்றத் தொடங்கிய பின்னரே “"என் பெயர் டைகர்"“ ஜனித்தது! எனக்கு நேர்ந்த அதே கேச சேதாரங்கள் உங்களையும் தாக்கிடலாகாது என்ற முன்ஜாக்கிரதையில் கூகுளில் நான் கண்ட விபரங்கள் சகலத்தையும் முன்னுரைகளாக்கி, அதன் பின்பாய்க் கதைக்குள் நீங்கள் புகுந்திட வழி செய்தேன் ! இயன்ற அத்தனையையும் செய்து விட்டேன்... புனித மனிடோ... இனி உங்களுக்காச்சு ; வாசகர்களுக்காச்சு!” என்ற மனநிலை தான் அதற்குப் பின்பும் ! ஆனால் உங்கள் ரசனைகளின் பன்முகத்தன்மை - என்னையையும், நமது உடைந்த மூக்காரையும் ஒரு மெகா தர்மசங்கடத்திலிருந்து காப்பாற்றி விட்டது தான் நாம் பார்த்த நிஜம் ! கனமான களம் ; இதுவொரு பாலைவனப் பயணம் போல வறட்சியானது என்பதை நொடிப்பொழுதில் புரிந்து கொண்டு - அதற்கேற்ற mindset சகிதம் உள்ளே நுழைந்து, நிதானமாய் பயணம் செய்து, கதையின் முழுமையையும் ரசித்துப் படித்ததே 2016-ன் உச்சபட்ச அனுபவம் என்பேன் ! தலையில்லாப் போராளி” மெகா இதழ் வெளிவந்த நாட்கள் ; “ஈரோட்டில் இத்தாலி” வெளியான தருணம் - என பல ஸ்பெஷல் வேளைகள் இருந்த போதிலும்- “என் பெயர் டைகர்” சாதித்த வேளையே ஆண்டின் மறக்க இயலாத் தருணம் - என்னளவிற்காவது ! Thanks a ton guys !!

கதைகளுக்கு அப்பால் - கடந்தாண்டின் ஒட்டுமொத்த அனுபவங்களை ஒற்றைச் சொல்லில் அடக்குவதெனில் ‘Awesome’ என்று மாத்திரமே சொல்லத் தோன்றுகிறது ! ஈரோட்டில் அரங்கேறிய வாசகர் சந்திப்பும், அது generate செய்து தந்த அசாத்திய உத்வேகங்களும், நட்புக்களும் தான் 2016-க்கு மாத்திரமன்றி, நமது இத்தனை காலப் பயணத்துக்குமேயொரு அர்த்தத்தைப் போதித்த தருணம் என்பேன் ! இன்னமுமொரு முறை அது சாத்தியமாகுமோ? ; இதை விடவும் பெரியதொரு get-together நனவாகிடுமோ ? என்பதெல்லாம் காலத்தின் கைகளிலுள்ள கேள்விகள் - அவற்றினுள் புகுந்திட நான் தயாரில்லை ! ஆனால் 2016 தான் துவக்கப் புள்ளி என்பது என்றைக்கும் மாறப் போவதில்லை என்பதால் 2016 ஒரு lifetime memory ஆகவே எனக்குள் தொடரும் !

மீண்டும் சந்திப்போம் ! Have a wonderful weekend all!

P.S :சில நாட்களுக்கு முன்பாய் நண்பரொருவரிடமிருந்து வந்ததொரு மின்னஞ்சல் இது !! லேசாக  பீற்றல் பரமசிவமாய் நான் தெரியக் கூடுமென்றாலும், யதார்த்தத்தை அழகாய் விவரித்துள்ள நண்பரின் மடலை உங்களோடு பகிர்வதில் தவறில்லை என்று பட்டது !! !

ஆசிரியர் அவர்களுக்கு,

கடந்த காலங்கள் எல்லாம் நினைத்து பார்க்கிறேன். அறியா வயதில் குடும்பம், பணி சுமை, உறவுகள், தோல்விகள், ஏமாற்றங்கள் என ஏதும் இல்லா பருவத்தில் மகிழ்ச்சி ஒன்று மட்டுமே மனதில் குடி கொண்டு இருக்கும். அந்த மகிழ்ச்சியை இன்னும் கூடுதலாக்க அப்பொழுது ஒன்றே ஒன்று மேலும் கூடுதலாக காணப்பட்டது. அது “காமிக்ஸ் இதழ்கள்” மட்டுமே.

இப்பொழுது எல்லாமே மாறி விட்டது. பிறரை சார்ந்து நாம், நம்மை சார்ந்து குடும்பங்கள். இதன் காரணமாக பணி சுமை, பணச் சுமை, இது மட்டுமா? இன்று நமக்காக உழைப்பதை விட நம்மை சார்ந்து இருப்பவர்களுக்கு உழைப்பதே பெரும்பாடாகி விடுகிறது. இவற்றின் காரணமாகவும், நம்மை சுற்றி இருக்கும் சிலரின் பொறாமைகள், துரோகங்கள், அதன் காரணமாக வருத்தங்கள் காரணமாகவும் மகிழ்ச்சி என்ற எல்லை கோட்டை கூட கண் காணாத தூரத்தில் தான் குடி இருக்க முடிந்தது.

இப்படிபட்ட சூழலில் தான் மாதா மாதம் இவை எல்லாவற்றையும் மறந்து அந்த டவுசர் போட்டு திரிந்த பால்ய வயதில் எந்த கவலையும் இல்லாத, எந்த வருத்தமும் இல்லாத பட்டாம்பூச்சியாய் சுற்றி திரிந்த காலகட்டத்திற்கு மீண்டும் அழைத்து சென்று கொண்டிருப்பது இப்பொழுது “உங்கள் காமிக்ஸ் இதழ்கள்” மட்டுமே.

இதனால் நமது இதழ்கள் மாதா மாதம் வரும் பொழுதெல்லாம் ஓர் இனம் புரியா கொண்டாட்டம். சிறு வயதில் இரண்டு மாதத்திற்கு முன்பிருந்தே எப்பொழுதா தீபாவளி வரும் ஏங்கிக் கொண்டே இருப்போம். அந்த மகிழ்ச்சிகரமான ஏக்கத்தை இன்று வரை ஒவ்வொரு மாதமும் அளித்துக் கொண்டு இருப்பது உங்கள் காமிக்ஸ் இதழ்கள். புது இதழ்க் வந்தவுடன் அவை மறுபதிப்பு இதழ்களாக இருந்தாலும் அந்த சித்திர உலகத்திற்குள் புகுந்தால் தான் மனம் சிறிதாவது நிம்மதி அடைகிறது.

உண்மையில் தாங்கள் ஒவ்வொரு மாதமும் எங்களுக்கு புத்தகங்களை வழங்கிக் கொண்டு இருக்கவில்லை. எங்களின் வாழ்க்கையின் சுவாரஸ்யத்தின் ஒரு பகுதியை வழங்கி கொண்டு இருக்கிறீர்கள். நிஜத்தில் தரிசிக்கும் மனிதர்களால் கொடுக்க முடியாத மகிழ்ச்சியை நிம்மதியை கற்பனை கதாபாத்திரங்களான டெக்ஸ்... லார்கோ... ஷெல்டன்.. லக்கி... சிக்பில்.... என இன்னும் பலப்பல உறவினர்கள் எங்களுக்கு கொடுத்து கொண்டு இருக்கிறார்கள். உண்மையை சொன்னால் தமிழில் இவர்களை எல்லாம் எங்களுக்கு படைத்த- படைத்துக் கொண்டு இருக்கும் தாங்களும் எங்களுக்கு ஒரு “கதாநாயகரே”.!!!

Wednesday, 22 February 2017

தக தகக்கும் தாரகை !

நண்பர்களே,

வணக்கம். ரொம்ப  நாள் கழித்து - ஒரே ஞாயிறில் 270 + பின்னூட்டங்கள் ; செம உற்சாகம் ; உருப்படியான அலசல்கள் என்று இங்கே களைகட்டியதை  பார்த்திட நிறைவாக இருந்தது !! "ஒரு அலசல் அனுபவம்" இத்தனை சுவாரஸ்யமாய் இருக்குமெனில் - ஒவ்வொரு மாதமும் ஏதேனும் ஒரு ஞாயிறை அந்தந்த இதழ்களின் ஆராய்ச்சிக்கு ஒதுக்கினாலென்ன folks ? கதைகள் ; அதன் பின்னணிகள் ; ஒவ்வொருவரின் ரசனைப் பாங்குகள் ; கொஞ்சம் கலாய்ப்புகள் என மாதம்தோறும் ஒரு வாரத்தை இவ்விதம் ஜாலியாக்க சாத்தியமாகின் - I am all for it !! இதனில் உள்ள ஓசையிலா ஆதாயம் - நமது ஆன்லைன் ஸ்டோரில் கடந்த 2 நாட்களாய் தட்டுப்படும் "ஜேசன் ப்ரைஸ்" (விற்பனை) மோகத்தில் தென்படுகிறது ! 'அட..இந்தக் கதையில் இத்தனை சுவாரஸ்யம் உள்ளதா ?' என்ற ஆர்வத்தில் அது வரையிலும் அமைதியாய் இருந்த வாசகர்களும் திடீரென வேகம் பெறுவது புரிகிறது !! So நாம் பெற்ற இன்பம் - கூடுதலாய் சில பல நண்பர்களையும் எட்டும் வாய்ப்புகள் இருப்பின், அதனைத் தொடர்ந்திடலாமே ?! Let 's give it a thought  guys ?

மார்ச்சின் அச்சுப் பணிகள் வேகமாய் நடந்தேறிட, இளவரசியின் (வண்ண) இதழ் சும்மா மின்னுகிறது ! எனக்குத் தெரிந்தளவிற்கு வர்ணங்கள் சேர்க்கையில் சிற்சிறு திருத்தங்கள் மட்டும் செய்திருக்கிறோம். இது நாம் பார்த்துப் பழகியுள்ள படைப்பாளிகளின் கலரிங் யுக்திகள் முன்பாய்க் கத்துக்குட்டித்தனமாய்த் தெரிந்திடக் கூடும்தான் ; ஆனால் முழுக்க முழுக்க black & white-க்கென மட்டுமே உருவாக்கப்பட்டுள்ள இந்தத் தொடரை வர்ணத்துக்கு மாற்றுவது அத்தனை சுலபமாக இருக்கவில்லை என்பதையும் சொல்லியாக வேண்டும் ! But still, புத்தகத்தை வாசிக்கும் போது நிச்சயமாய் ரசிக்கும்விதம் இருந்திடும்    !! பாக்கெட் சைஸ் தன பங்குக்கு கலக்குகிறது  ! And கலக்கோ கலக்கென்று ராப்பரில் தூள் கிளப்புகிறார் - சற்றே கூடுதல் கண்ணியத்துடனான மாடஸ்டி !!!


இது முன்னே........திருத்தங்களுக்கு முன்னே....!! 
எல்லாப் புகழும் சாமிக்கே.....அஜய் சாமிக்கே !  Hats off நண்பரே  !! Bye for now !!

P.S : ஜாக்கி நீரோவின் ....சாரி...சாரி....ஜானி நீரோவின் "கொலைக் கரம்" இதழில் சில பக்கங்கள் + "தங்க விரல் மர்மம்" இதழில் சில பக்கங்கள் அவசியப்படுகின்றன folks !! யாரிடமாவது இந்த இதழ்களிருப்பின் தகவல் தாருங்களேன் - ப்ளீஸ் ? 

Sunday, 19 February 2017

வந்துட்டார்னு சொல்லு..!!!

நண்பர்களே,

வணக்கம். ஒத்துக் கொண்டே தீர வேண்டும் - நிஜம், நிஜம் தான் ; ரீல், ரீல் தானென்று !! என்னதானொரு வான் ஹாம்மேவும், வில்லியம் வான்சும் 'தம்' கட்டி, "இரத்தப் படலம்" என்றொரு க்ளாஸிக்கை உருவாக்கி, செண்டிமெண்ட் ; ஆக்ஷன் ; பரபரப்பு   என்ற சுவைகளை நமக்குக் காட்டட்டுமே.....?! அவற்றை ஒற்றை நொடியில் தூக்கிச் சாப்பிட இன்றைய தமிழகத்தில் நிஜத்தின் நிகழ்வுகள் காத்துள்ளனவே ! என்னதானொரு கோசினியும்,மோரிஸும் இணைந்து "லக்கி லூக்" என்றதொரு ஜாம்பவானைப் படைத்து அவர் மூலமாக நமக்கு கிச்சு கிச்சு மூட்டிப் பார்க்கட்டுமே ...! "யார்கிட்டே...?" என்ற பழிப்புக் காட்டிக் கொண்டே நம்மைக் கெக்கே-பிக்கேவென சிரிப்பில் உருளச் செய்யும் ஆற்றல் சமீபத்தைய அன்றாடங்களிடமா பஞ்சம் ? செம பில்டப்....மர்மம்...திகில்....என்று ஜேசன் ப்ரைஸோ, அவரது தாத்தாவோ களமிறங்கித் தான் பார்க்கட்டுமே - தினமும் இரவிலும், பகலிலும் நான் டி-வியில் பார்க்கும் விவாத மேடைகள் சகலத்தையும், தூக்கிச் சாப்பிட்டு "யேவ்வ்வ்வ்" என்று ஏப்பம் விடுகிறதா - இல்லையா ? So கடந்த வாரம் முழுக்க நான் எங்கெங்கோ சுற்றித் திரிந்து கொண்டிருந்தாலும், பணிநேரம் தவிர்த்த சமயங்களில், நம்மைச் சுற்றி நடந்துவரும் மெகா சீரியல் நிகழ்வுகளைப் பார்ப்பதிலேயே பொழுதைச் சுலபமாய் விரயம் செய்துவிட்டேன் ! தவிர, நமது இதர தொழில்களின் பொருட்டும், நிறையவே மெனக்கெடல்கள் அவசியமாகிட - இந்தப் பக்கமாய்த் தலை காட்டவே சுத்தமாய் முடிந்திடவில்லை ! Sorry all !!

மார்ச் மாதத்துப் பணிகள் இந்தக் கூத்துக்களுக்கு மத்தியில் "தட தடத்து வருகின்றன !! " இதனை நான் அழுத்திச் சொல்லிடக் கூடுதலாயொரு காரணமுள்ளது - simply becos இம்மதத்து இரவுக்கு ககாரின் சாகசத்தில், தண்டவாளங்களை அதிர செய்யும் இரும்புக்
குதிரையாருக்குமொரு முக்கிய பங்குள்ளது ! ஜனவரியில் ஒரு டிடெக்டிவ் ரோல் : பிப்ரவரியில் சுத்தமான அராத்துப் பார்ட்டி வேஷம் என்று டெக்ஸ் வில்லரின் வித்தியாச முகங்களை பார்த்திருந்தோம். ஆனால் அந்நியனையும், ரெமோவையுமே நாள் முழுக்கப் பார்த்திடாது - அவ்வப்போது ஒரிஜினலான அம்பியின் முகத்தையும் ரசிப்பதிலும் சுவாரஸ்யம் உண்டல்லவா ? So நமது ரேஞ்சர்கள் அரிதாரங்களின்றி, அக்மார்க் ரேஞ்சர்களாகவே பட்டையைக் கிளப்பக் காத்துள்ளனர்  இம்மாதம் ! கதையின் முதல் பக்கத்திலிருந்தே டெக்ஸோடு - வெள்ளி முடியாரும் ஒட்டிக் கொண்டிருக்க, "சுப மங்களம்" போடும் வரையிலும் மனுஷன் லொங்கு லொங்கென்று குதிரையை ஒட்டித் திரிகிறார் ; நாமோ - அவரையே  ஒட்டித் திரிகிறோம் ! பொதுவாய் பக்க நீளம் காரணமாய் - டெக்சின் கதைகள்தான் ஒவ்வொரு மாதமும் கடைசியாய்த் தயாராகிடுவது வழக்கம். "அட...black & white இதழ் தானே ? கடைசி நிமிஷத்திலும் தயார் செய்துக்கலாம் !!" என்ற குசும்பும் இதற்கொரு காரணம் ! ஆனால் இம்முறை பணியாற்ற அமர்ந்த போதே ஒரு ஜாலியான வேறுபாடு கண்ணில் பட்டது ! சற்றே கீச்சலான பானிச் சித்திரங்கள் இந்த சாகசத்துக்கெனப் பயன்படுத்தப்பட்டிருப்பதால் கார்சனின் அழகு வதனம் எக்ஸ்ட்ரா அழகாய்த் தெரிவது போலத் தோன்றியது எனக்கு ! அந்த expressive முகத்தில் நெளியும் குசும்பு ; கடுப்பு ; நையாண்டி என சகலமுமே சற்றே தூக்கலாய்த் தெரிந்ததைக் கதை முழுவதிலும் கவனிக்கலாம் ! பற்றாக்குறைக்கு நன்றாகவே ஏறிப் போனதொரு முன்நெற்றியும், குறு குறு ஆட்டு தாடியும், ஓவியர் ஆர்ட்டிசின் புண்ணியத்தில் ஜொலிப்பதை ரசிக்கலாம் !

கதை ஆரம்பமே வித்தியாசமாய் இருந்தது ! வழக்கமாய் குதிரைகளில் பிட்டங்களைத் தேய்த்துத் திரியும் நம்மவர்கள் ஒரு இரவு ரயிலில் சலம்பிக் கொண்டே பயணிக்கின்ற sequence -ல் துவக்கம் இருந்திட - 'அட்ரா சக்கை' என்று பிரகாசமானேன் ! கதைக்குள் புகுந்த பொழுது கதாசிரியர் நிஸ்ஸியின் ஜெட்வேகக் களமும், ஸ்க்ரிப்டும் அதிரச் செய்ய, ஓவியரின் அந்த breezy பாணியும் உற்சாகம் ஊற்றெடுக்கச் செய்ய - 224 பக்கங்களையும் வைகை எக்ஸ்பிரஸ் வேகத்தில் கடந்திட இயன்றது ! துளி கூடத் தொய்வின்றி, பர பரவென்று பட்டாசாய்ப் பொறிகிறது - "இரும்புக் குதிரையில் ஒரு தங்கப் புதையல்"!! So வந்துட்டார்னு சொல்லலாம் ; அதிரடியாய்த் திரும்பவும் வந்துட்டார்னு சொல்லலாம் !! இதோ இந்த crackerjack இதழுக்கான அட்டைப்பட first look ! (இன்னமும் பின்னட்டையில் லேசாய் tasks பாக்கியுள்ளது !)

வழக்கம் போலவே, இதுவுமொரு கூட்டணித் தயாரிப்பே ! நமது ஓவியர் மாலையப்பன் 'தல'யை வரைந்திருக்க, வர்ண மாற்றம் ; பின்னணிச் சித்திர இணைப்பு இத்யாதிகள் பொன்னனின் கைவண்ணம் ! போன மாதம் கட்ட துரையிடம், கட்டம் சரியில்லாது சிக்கிப் போன கைபுள்ளையைப் போல சொக்காயின்றி நம்மவர் நின்றதை ஈடு செய்திட இம்முறையோரு தோரணையான ராப்பரை அமைத்தே தீர வேண்டுமென்று வைராக்கியமாக இருந்தேன் ! நம்மவர்கள் என் ஆசையைப் பூர்த்தி செய்துவிட்டதாகவே தோன்றியது !  What say folks ?

And இதோ - உட்பக்கங்களின்  ஒரு முன்னோட்டமும் கூட ! ஏற்கனவே நமக்குத் பரிச்சயமான ஓவிய பாணி தானென்றாலும், இந்தக் கதைக்கு இதுவொரு வித்தியாசமான flavor தருவதாக எனக்குப் பட்டது ! So மார்ச்சின் ஓட்டப் பந்தயத்தில் 2 வது; 3 வது ; 4 வது ஸ்தானங்களுக்கே போட்டி என்பேன் ! 

'தல; புராணம் போதுமென்பதால் - பார்வைகள் இனி லயிக்கவிருப்பது இன்னுமொரு கௌபாய் மீதே ! முன்னவர் மிரட்டல் திலகமெனில் ; பின்னவர் (சிரிப்பில்) உருட்டல் திலகம் ! Oh yes - நமது பென்சில் பருமன் காமெடி நாயகரான லக்கி லூக் தான் மார்ச்சின் கார்ட்டூன் பிரதிநிதி ! எல்லா நாயகர்களும் ; கதைத்  தொடர்களும் எனக்கு ஆதர்ஷத்தில் சமமான அந்தஸ்தில் இருந்தாலும் கூட, ஒரு சிலர் மீதொரு மிருதுவான மூலை  - (அட soft corner தான் !!)  எனக்குண்டுதான் ! அந்தப் பட்டியலில் ஒரு உச்ச இடத்தைப் பிடித்து நிற்பவர் லக்கி ! கார்ட்டூன்கள் எப்போதுமே உற்சாகம் தரும் பணிக்களங்கள் என்றாலும், லுக்கிக்குப் பேனா பிடிப்பது ஒரு ஜாலியோ ஜாலி job !! மூன்றே ராப்பொழுதுகளில் இதன் மொழிபெயர்ப்பை முடித்திட சாத்தியமானது !!   And  இதோ 'தரைக்கடியில் தங்கம்"  இதழின் அட்டைப்பட முதல் பார்வை ! ஒரிஜினல் டிசைனே ; மெலிதான நகாசு வேலைகளுடன் !  
வழக்கம் போலவே கலரில்  கலக்கும் உட்பக்கங்களிலிருந்தும் ஒரு டீசர் ! கதாசிரியர் கோசினியோடு கரம் கோர்த்து மோரிஸ் உருவாக்கிய பல classic கதைகளுள் "த.அ.த" வும் ஒன்று ! அமெரிக்காவைப் புயலாய் உலுக்கிய எண்ணெய் வள தேடலைப் பின்னணியாகக் கொண்டு அதனுள் லக்கி & ஜாலியை உலவ விட்டுள்ளனர் ! So பார்வைக்கு இதுவொரு கார்ட்டூன் கதையாகத் தெரிந்தாலும், கொஞ்சம் வரலாறு ; நிறைய பகடி ; மெலிதான படிப்பினை என நிறைய சமாச்சாரங்கள் இங்கே பின்னணியில் உள்ளதை உணர முடியும் ! So மார்ச்சின் இந்த 2  கௌபாய்க் கதைகளையும் உங்களிடம் ஒப்படைக்கப் பரபரக்கிறது மனசு !! 
Before I sign off - இதைப்  பாருங்களேன் !! பார்த்த கணம் முதலாய் இழுத்துப் பிடித்த மூச்சை இன்னமும் விட மனதின்றித் திரிகிறேன் !! Breathtaking !!!! யாரது கைவண்ணமாக இருக்குமென்று any  guesses ? Bye now all ! See you around !

  • P.S : அந்த "ஜேசன் ப்ரைஸ் அனுபவத்தை" இன்று  மதியம் ஆராய நேரமிருக்குமா guys ? 1 மணி சுமாருக்கு நான் ஆஜராகியிருப்பேன் !! 


  • உசுப்பி விட்டு கடுப்பேத்துவானேன் ? என்று தோன்றிட - போன பதிவினிலேயே அது பற்றி வாயைத் திறக்கும் சபலத்துக்கு அணை போட்டு வைத்தேன் ; ஆனாலும் அந்தக் கடைவாய் ஓரத்தில் பெருக்கெடுக்கும் ஜொள்ளை துடைத்துக் கொண்டே லேசானதொரு பிட்டைப் போட்டு வைக்கும் ஆசையினை அடக்க இயலவில்லை ! இன்னமுமொரு அட்டகாசப் பதிப்பகத்தோடு கைகோர்க்கும் முயற்சிகள் கனஜோராய் நடந்து வருகின்றன !! ஓரிரு மாதங்களில் வாண வேடிக்கைகள் காத்துள்ளன !! இப்போதைக்கு இந்த பிட் போதும் தானே ? ! 

Sunday, 12 February 2017

இது இளவரசியின் வேளை !!

நண்பர்களே,
            
வணக்கம். ஜேசன் ப்ரைஸ் த்ரில்லரை விடவும் ; லார்கோ வின்ச்சின் rollercoaster கதைக்களங்களை விடவும் படு சுவாரஸ்யமான நிகழ்வுகளை நிஜத்தில் நாம் தரிசித்து வரும் நாட்களிவை ! ரிலீஸாகும் புதுப்படமோ ; கிரிக்கெட் மேட்ச்களின் ஓட்டங்களோ விறுவிறுப்பில் மங்கிப் போகும் வேளைதனில், நாமெல்லாம் எம்மாத்திரம் ? But நொடிக்கு நூறு மாற்றங்கள் நிகழ்ந்து வரும் சமயத்திலும், ஸ்திரமாய், நிலையாக சந்தோஷத்தை வழங்கி வரும் நமது ‘பொம்மை புக்‘ சஞ்சாரத்தை நாம்பாட்டுக்கு  தொடர்வோமே என்று தோன்றியதன் பலனே இந்தப் பதிவு !

இரண்டு வாரங்கள் கூட ஆகியிருக்கா நிலையில் பிப்ரவரி மாதத்து 4 இதழ்களும் அலசி, ஆராயப்பட்டு, ஞாபகப் பேழைகளுக்குள் புதையுண்டு போனதாய் தோன்றுவது எனக்கு மட்டும் தானா என்று தெரியவில்லை ! ஆனால் இப்போதெல்லாம் புஷ்டியான ; தாட்டியமான  இதழ்கள் மாதந்தோறும் இல்லாப் பட்சத்தில் - ரெகுலர் இதழ்களை ஒரே மூச்சில் ஊதித் தள்ளி விடுகிறீர்கள் என்பது கண்கூடு ! காத்திருக்கும் மார்ச் மாதத்தினில் அப்படியொரு “குண்டு புக்” கடமையைச் செவ்வனே ஆற்றக் காத்திருப்பது நமது இளவரசியே ! ‘Super 6’-ன் இதழ் # 2 ஆக மாடஸ்டி பிளைஸியின் “கழுகுமலைக் கோட்டை” அடுத்த சில நாட்களில் அச்சுக்குப் புறப்பட வேண்டிய சூழல் என்பதால் கடந்த சில நாட்களாய் அதன் இறுதிக் கட்டப் பணிகளுக்குள் தலைநுழைத்துக் கிடந்தேன் ! ஏற்கனவே எப்போதோ- எங்கோ நான் பதிவிட்ட கருத்தின் மறுஒலிபரப்பே இது - but இருந்தாலும் அதனை இன்னுமொருமுறை உரக்கச் சொல்லுவதில் தவறில்லை என்று பட்டது !

“கழுகுமலைக் கோட்டை”! Boy... oh boy... oh boy”-  எனது Alltime Top 10 இதழ்களுக்குள் இதற்கொரு பிரதான இடம் உண்டென்று சிலபல ஆண்டுகளுக்கு முன்பாக எழுதிய ஞாபகமுள்ளது ! இன்றைக்கு இதனை முழுமையாய் ஒரு மறுவாசிப்பு செய்திடும் போது - எனது கருத்தில் துளியும் மாறுதலில்லை என்றே சொல்லத் தோன்றுகிறது ! இப்போதுள்ள நண்பர்களுள் ஒரிஜினலாய் முத்து காமிக்ஸில் இந்த இதழ் வெளியான போதும் வாசகர்களாக இருந்தோர் எத்தனை சதவிகித்தினர் என்று தெரியவில்லை ; ஆனால் இன்றைக்கு அட்சரசுத்தமாய் அதே (பாக்கெட்) சைஸில் ; அதே அமைப்பில் இந்த இதழ் வெளியாக உள்ளதன் மூலம் ஒரு பின்னோக்கிய காலப்பயணம் உத்தரவாதம் என்று தோன்றுகிறது ! "எடிட்டர்" என்ற குல்லாவைப் போட்டுக் கொள்ளத் தொடங்கிய நாள் முதலாகவே நமது எந்தவொரு முந்தைய இதழினையுமே மறுமுறை படிக்கும் பழக்கத்தைத் தொலைத்து விட்டேன் ! அந்த மாதத்துப் பணி நிறைவுற்ற பின்னர் அந்தக் கதை, மேலோட்டமான நினைவுகளாக மட்டுமே எனக்குள் தொடர்ந்திடும் ! ‘க.ம.கோ‘ சமாச்சாரம் கூட இதே போலத் தான் என்றாலும் - கதையின் அழுத்தமானது மனதில் செம்மையாகவே பதிந்திருந்தது. So எடிட்டிங்கின் பொருட்டு அமர்ந்த போது - மும்மூர்த்திகளின் மறுபதிப்பு வேளைகளோ ; ஸ்பைடரின் reprint தருணங்களோ ரெடிமேடாகக் கொணரும் ராட்சஸ சைஸ் கொட்டாவிகள் எழுந்திடவில்லை ! மாறாக- ஏதோவொரு யுகத்தில் வாய்பிளக்கப் படித்த இந்தக் கதையினுடன் மீண்டுமொரு கைகுலுக்கல் செய்திடும் ஆர்வமே தலைதூக்கியது !

ஒரிஜினலாய் ‘க.ம.கோ.‘ வெளியான நாட்கள் முத்து காமிக்ஸிற்கு செம விறுவிறுப்பானவை ! Fleetway-ன் அலை சன்னமாய் ஓய்ந்து, அமெரிக்க dailystrip நாயகர்கள் ரிப் கிர்பி ரூபத்திலும், சார்லி, காரிகன், ஜார்ஜ் ஆகியோரின் அவதார்களிலும் சுற்றி வந்து கொண்டிருந்த தருணமது. அப்போது இந்த King Features நாயகர்களின் கதையுரிமைகளை மும்பையிலிருந்த நிறுவனம் மூலம் வாங்கி வந்து கொண்டிருந்தார்கள். ‘மாலைமதி‘ காமிக்ஸ் அதிரடியாய் உள்ளே புகுந்து ஆட்டத்தைத் தற்காலிகமாய்க் குலைத்ததும் ஒரு கட்டத்தில் நடந்தது. இதற்கு மத்தியில் மும்பையில் இன்னமுமொரு அயல்நாட்டுக் காமிக்ஸ் கதை விநியோகப் பிரதிநிதி இருப்பதை சீனியர் கண்டுபிடித்திருந்தார். அவர்களிடம் அந்நாட்களில் தருவித்த கதையே “கழுகுமலைக் கோட்டை”!.

இங்கிலாந்தில் செய்தித்தாளில் தொடராக வெளிவந்து கொண்டிருந்த மாடஸ்டி பிளைஸி கதைகள் அந்நாட்களில்  செம popular ! ஆங்கிலத்தில் ஏதோவொரு பெண்கள் பத்திரிகையிலும் இந்தியாவில் வெளிவந்து கொண்டிருந்தது ! இது போன்ற dailystrip தொடர்களைத் தருவிக்கும் வேளைகளில் கதைகளைப் படித்துப் பார்த்துத், தேர்வு செய்யும் சுதந்திரங்கள் பெரும்பாலும் இருப்பதில்லை ! இன்டர்நெட் கிடையாதெனும் போது, அதே தொடரின் இதர  கதைகள் / விமர்சனங்கள் என எதையும் படித்தறிவது ரொம்பவே கஷ்டம் ! So ஏஜெண்ட்கள் தூக்கி அனுப்பி வைக்கும் கதைகளே நமது வெளியீடுகளாகிடும் கட்டாயம் அன்றைக்குண்டு ! 1980-களின் பின்பகுதியிலும், ’90 களிலும் நான் அவர்களைக் கையைக், காலைப் பிடித்து தாஜா செய்து, ஒரு எட்டுப், பத்துக் கதைகளை மொத்தமாய் எடுத்துத் தரச் செய்து, ரூமில் அமர்ந்து பரீட்சைக்குப் படிப்பவனைப் போல மாங்கு மாங்கென்று படித்து விட்டு- அதனில் ‘தேவலை‘ என்று தோன்றும் கதைகளை மட்டும் வாங்கும் சுதந்திரத்தைக் கொண்டிருந்தேன் !

Back to the '70s - அன்றைக்கு மாடஸ்டியின் இந்தக் கதையினை அந்த ஏஜெண்ட் தற்செயலாய்த் தூக்கியனுப்பி வைத்தது ஒரு கடவுள் செயல் எனலாம் - simply becos மாடஸ்டி தொடரின் alltime best என்ற ரேஞ்சுக்கு உச்சமான கதையிது ! யாரது ஏற்பாடோ நினைவில்லை - இதனை பாக்கெட் சைஸுக்கு உருமாற்றம் செய்திடத் தீர்மானித்திருந்ததால் - கிட்டத்தட்ட 190 பக்க நீளத்தைக் ‘க.ம.கோ.‘ எட்டிப் பிடித்திருந்தது ! சித்திரங்களை கட்டத்தின் நடுவாக்கில் ஒட்டி விட்டு - சுற்றியிருக்கக் கூடிய காலியிடத்தினில் அந்த மையப் படத்துக்குப் பொருந்தும் விதத்தில் background-கள் வரைவது ஒரு கலை ! அதனில் பழம்தின்று கொட்டை போட்ட கில்லாடிகள் நிறையப் பேர் நம்மிடமுண்டு ! அந்நாட்களில் மாடஸ்டியின் இந்த சாகஸத்தில் அந்தப் பணிகளைச் செய்தவர் சிவகாசிக்கருகே உள்ளதொரு சிறு நகர அரசுப் பள்ளியில் பணியாற்றிய ஓவிய டீச்சர். பகுதிநேரமாய் நம்மிடம் வேலை செய்து வந்தார். So அவரது கைவண்ணத்தில் உருவானதே க.ம.கோ.!! அட்டைப்படமோ நமது சிகாமணியின் ஏற்பாடு !

அந்த ஒரிஜினல் இதழை மொட மொடவென ஒடியும் நியூஸ்பிரிண்டில் புரட்டிய போது ‘குப்‘பென்று நாசியைத் தாக்கியது தூசியின் நெடி மட்டுமன்றி ; அந்த எழுபதுகளின் நினைவுகளும். அந்த உற்சாகத்தோடே எடிட்டிங் வேலைகளை ஆரம்பித்த போது, நான் போட்டுக் கொண்டிருந்த முதல் கண்டிஷனானது - "No எக்ஸ்ட்ரா நம்பர்ஸ்" என்பதே ! ஒரிஜினலில் ஈ அடித்திருப்பின், அதே ஈயைத் தேடிப் பிடித்தாவது இம்முறையும் அடித்து விடுவது ; வசனங்களில் கைவைப்பதேயில்லை என்று எனக்கு நானே சொல்லிக் கொண்டேன். இருந்தாலும் - நெருடல் ஏற்படும் இடங்களில் மட்டுமாவது திருத்தங்கள் / மாற்றங்கள் செய்து கொள்ளலாமென்ற சன்னமான சிந்தனையும் எனக்குள் இருந்தன ! ஆனால் முத்து காமிக்ஸின் அந்நாட்களது வெளியீடுகளுள், மொழிபெயர்ப்புத் தரத்தின் ஒரு உச்சம் இந்த இதழ் என்பதை பக்கங்களைப் புரட்டப் புரட்டப் புரிந்து கொள்ள முடிந்தது ! நிச்சயமாய் இது நமது கருணையானந்தம் அவர்களின் வரிகள் என்பதையும் நொடியில் யூகிக்க முடிந்தது ! So சொற்பமான சில இடங்களில் அத்தியாவசியமான சில திருத்தங்கள் நீங்கலாக எங்கும் என் பேனாவைக் கத்திரியாக அவதாரம் எடுக்கச் செய்யவில்லை நான்!

கதையைப் பொறுத்தவரை ஒற்றை வார்த்தையில் விமர்சிப்பதெனில் - ‘stunning!‘ என்று தான் சொல்லத் தோன்றுகிறது ! பொதுவாய் மாடஸ்டி கதைகளில் விறுவிறுப்பிற்குப் பஞ்சமே இருப்பதில்லை என்றாலும், அழுத்தம் என்று வரும் போது ஒரு சில கதைகள் பெரிதாய் மதிப்பெண்கள் பெறுவதில்லை ! 100 கதைகள் கொண்ட இந்தத் தொடரில் நீங்கள் (தமிழில்- நமது இதழ்களிலாவது) படித்துள்ளவை ரொம்பவே சல்லடை போட்டுத் தேர்ந்தெடுக்கப் பெற்ற கதைகளே ! நானே reject செய்து விட்ட கதைகள் பின்னணியில் நிறையவே உள்ளன ! ஆனால் ‘க.ம.கோ.‘ - விறுவிறுப்பு + அழுத்தம் என இரண்டு தரப்புகளிலுமே பின்னிப் பெடலெடுத்திருப்பது ஒரு highlight ! So அந்த அதிரடி ஆக்ஷன் + சென்டிமெண்ட் கரம் கோர்க்கும் கதையை சந்தோஷமாய் ஒரு மறுவாசிப்புப் போட்ட உற்சாகத்தோடே இந்தப் பகுதியை எழுதுகிறேன் ! கலரிங்கைப் பொறுத்தவரையிலும், துவக்கத்தில் அறைகளுக்குள்ளும், ஆஸ்பத்திரிச் சுவர்களுக்குள்ளும் கதை நகர்ந்திடும் தருணத்தில் - லேசான தடுமாற்றம் எழவே செய்கிறது - சுவற்றையும், தரையையும், நாற்காலி, மேஜைகளையும் எவ்விதம் அழகாய் கலர் பண்ணிடுவதென்று?! ஆனால் பிற்பகுதியில் outdoors ; மலை ; நீலவானம் ; கழுகுகள் ராஜ்யம் என்றெல்லாம் கதை பயணிக்கத் தொடங்கும் வேளைகளில், கலரிங் ஒரு புதுப் பரிமாணத்தைத் தொடுகின்றது ! So ஒரு அட்டகாசமான கதைக்களம் - வித்தியாசமான வர்ணங்களோடு ஒரிஜினல் பாக்கெட் சைஸில் காத்துள்ளது ! And of course - நண்பர் அஜயின் அட்டகாசமான அட்டைப்படத்துடன் ! நண்பரின் இல்லத்திலும் ஒரு அழகான சிறு, புதுவரவு ஆஜராகியிருப்பதால் - அவருக்கு வாழ்த்துக்களைச் சொல்ல முகாந்திரங்கள் இரண்டாகின்றன! Congrats அஜய் ! ஜுனியரும் பல உயரங்களைத் தொட வாழ்த்துக்கள் ! So ஒரு அழகான கதை, பிசிறின்றி மறுபதிப்பாகக் காத்துள்ளது ! புதிதாய்ப் படிப்பவர்களாக இருப்பின், நிச்சயமொரு மிரட்டலான அனுபவம் காத்துள்ளது  என்பது உறுதி ! 

இம்மாதம் இளவரசியோடு வலம் வரக் காத்திருப்பது நமது fantasy தளபதி ‘தோர்கல்‘ ! நீண்ட, நெடும் இடைவெளிக்குப் பின்னே தலைகாட்டும் விண்வெளியின் மைந்தன் - வழக்கம் போல வண்ணத்தில், அதகள artwork-ல் மிரட்டுகிறார் ! இது அவரது முன்கதை flashback சார்ந்த கதைகளின் தொகுப்பு என்பதால் - இந்தக் கதாபாத்திரத்தை இன்னமும் நெருக்கமாய் நாம் புரிந்து கொள்ளவொரு வாய்ப்பு ! தோர்கல் கதைக்குப் பேனா பிடிக்கும் வாய்ப்பை சீனியருக்கே இம்முறையும் தந்திருந்தேன் - நேர்கோட்டுக் கதையெனும் போது பெரிதாய் சிரமங்கள் எழக்கூடாதென்ற நம்பிக்கையில் ! And சீனியரும் நிறைய அவகாசம் எடுத்துக் கொண்டு decent ஆனதொரு முயற்சியைச் செய்தும் வைத்திருந்ததைப் பார்க்க முடிந்தது ! ஆனால் எடிட்டிங்கின் போது - CINEBOOK ஆங்கில இதழைக் கையில் வைத்துக் கொண்டே  பக்கங்களுக்குள் புகுந்திட முனைந்த போது தான் புரிந்தது இந்தக் கதையின் மொழியாக்கத்தில் எத்தனை நுணுக்கங்கள் உள்ளனவென்று !! புதிதாய் எழுதுவதைக் கூடச் சமாளித்து விடலாம் - ஆனால் ஏற்கனவே உள்ளதொரு ஸ்கிரிப்டில் டிங்கரிங் செய்வது பிராணன் போகும் வேலை என்பதை இன்னமுமொரு முறை உணர்ந்தேன் - இந்த வாரத்தின் போக்கினில் ! அதிலும், இதுவொரு சுலபப் பணியாக இருக்குமென்று ஏதோவொரு அசட்டு அனுமானத்தில் இருந்துவிட்டு, அது நெட்டியைக் கழற்றும் போது நாக்கார் தான் பாவம் - தொங்கோ தொங்கென்று தொங்கிடுகிறார் ! Phew !!

அமர்க்களச் சித்திரங்களுடன் காத்திருக்கும் இந்த fantasy த்ரில்லருக்கு துளியும் மாற்றமிலா ஒரிஜினல் ராப்பரே ! பாருங்களேன் ! 


So மார்ச் மாதத்திலும் ஒரு fantasy களம் காத்துள்ளது !! 

ஏற்கனவே வெளியாகியுள்ள ஜேசன் ப்ரைஸ் "அனுபவத்தைப்" பற்றி இன்று விவாதிக்க எனக்கு ஆசை தான் ; ஆனால் நானிப்போது இருக்கும் ஊரில்  JIO-வின் internet internet சக்கரம் சுற்றும் வேகத்தினில்  ஆணிகளை அதிகளவில் நெம்பியெடுக்க சாத்தியமாகாது என்பது புரிகிறது ! So அதனை அடுத்த ஞாயிறுக்கென கொண்டு செல்வோமா ?

இந்த வாரம் "இளவரசி வாரம்" என்பதால் - அவரது டாப் கதைகள் பற்றியும் , அவற்றுள் உங்களது favorites பற்றியும் எழுதலாமே ? 

அதே  போல - ஒரு சுவாரஸ்யமான கேள்வியும் எழுந்தது எனக்குள் !! இதுவரையிலான நமது  சுமார் 775 + வெளியீடுகளுக்குள்  (லயன் ; திகில் ; மினி லயன்  ; ஜுனியர் ; etc ) ஒரு தற்போதைய TOP 10 தேர்வினைச் செய்திட  இயலுமா என்று ?! கார்ட்டூன் ; கௌபாய் ' டிடெக்டிவ் என்ற genre பாகுபாடுகளெல்லாம் இல்லாது - "இது லயன் ; இது முத்து ; இது மினி லயன் " என்ற வேற்றுமைகள் ஏதும் பாராது ரசனைகள் அளவுகோல்களின்படி ஒரு பட்டியலைப் போட தான் முனைவோமா ? நிச்சயம் இந்தத் தேர்வானது ரொம்பவே unique ஆன பட்டியல்களைத் தருமென்பது நிச்சயம் ! முதல் ஐந்தை இந்த வாரம் பதிவிட முயற்சிக்கலாமே ? நிறைய சிந்தியுங்கள்  ; நிறைய ஞாபகங்களைத் துணைக்கு அழைத்துக் கொள்ளுங்கள் ; அப்புறமாயொரு   பட்டியல் போட்டுத் தான் பாருங்களேன் ?

Bye for now !! See you around ! Have a great weekend !!


Sunday, 5 February 2017

கச்சிதப் பத்து !!

நண்பர்களே,
            
வணக்கம். ஜனவரி நமக்கு அதிரடியாகத் துவங்கியதெனில் பிப்ரவரி அழகானதொன்றாக அமைந்துள்ளது என்று சொல்லலாம் ! வழக்கமாய் நமது இரவுக் கழுகார் முன்நிற்க- அவரது பரந்த தோள்களுக்குப் பின்னே மற்ற நாயகர்கள் பதுங்கி நிற்பது நடைமுறை. ஆனால் ஜனவரியையும் சரி, இம்மாதத்தையும் சரி- புதியவர்களும், சற்றே விளிம்புநிலை நாயகர்களும், தமதாக்கிக் கொண்டுள்ளது ஒரு ‘பளிச்‘ மாற்றம் என்பேன் ! சத்தமின்றி மிரட்டிச் சென்ற ட்யுராங்கோவும் ; சத்தமாய் தங்கள் இருப்பைப் பதிவு செய்து வைத்த ப்ளுகோட் பட்டாளமும் ஜனவரியின் highlights எனில், ஜேசன் ப்ரைஸ் & மதி மந்திரியாரே பிப்ரவரியின் ஒளிவட்டத்தைப் பகிர்ந்திடுவோர் ! கதைகளென பார்த்தால் ஜேசனும், மோடி மஸ்தானும் - வானவில்லின் இரு எதிரெதிர் முனைகள் ! முன்னது இருண்ட, முரட்டு, மிரட்டல் களமெனில், பின்னது ஜாலியான, ‘பளிச்‘சென்ற சிரிப்பு உருட்டல் களம் ! “ஆனால் இதையும் ரசித்திடுகிறோம்- அதனையும் அமர்க்களப்படுத்திடுகிறோம் !” என்ற ரீதியில் உங்களது ரசனைகள் flexible ஆக அமைந்திருப்பது- இந்தக் காமிக்ஸ் பயணத்தில் நாம் கடந்து வந்துள்ள தூரத்தை ஸ்பஷ்டமாகச் சுட்டிக் காட்டுகிறது ! So ‘ரசனைகளின் பரிணாம வளர்ச்சி‘ என்பதே இந்த ஞாயிறின் மகா சிந்தனையின் பலனான பதிவு ! 

முப்பது ஆண்டுகளுக்கு முன்பாய் இதே வேளையில் தான் நமது லயன் காமிக்ஸின் ஒரு மைல்கல் நிகழ்வு நிஜமாகியது ! Yes- இதுவரையிலான எனது 33 ஆண்டுகால அனுபவத்தில் நமது லயன் / முத்து காமிக்ஸ் இதழ்களுள் ஆகக் கூடுதலான printrun பார்த்திட்ட இதழான “புரட்சித் தலைவன் ஆர்ச்சி” வெளியானது 1987-ன் பிப்ரவரியில் தான் ! 31,000 பிரதிகள் அச்சிட்டோமென்பது நினைவுள்ளது & மொத்தமுமே 6 மாதங்களுக்குள் விற்றும் தீர்ந்து விட்டது ! So முப்பதாண்டுகளுக்கு முன்னே நாம் வாஞ்சையாய்ச் சவாரி செய்து கொண்டிருந்தது சட்டி மண்டையன் ஆர்ச்சியோடும் ; கூர்மண்டையன் ஸ்பைடரோடுமே ! ரசனைகளில் ‘இது உசத்தி; அது கம்மி !‘ என்ற பாகுபாடுகள் இருந்திடத் துளியும் அவசியம் கிடையாது தானே ? So நமது அந்நாளைய tastes இந்த ‘காதுல புய்ப்பம்‘ கதைகள் பக்கமாகயிருப்பின் அதன் பொருட்டு இன்றொரு ஏளனச் சிரிப்பை உதிர்த்திடப் போவதில்லை நான் ! மாறாக- ஏணியில் ஏறும் படலத்தின் முதல் படியாக அதனை வகைப்படுத்திப் பார்க்க நினைக்கிறேன் ! “பாதாளப் போராட்டம்” கதையை மொழிபெயர்க்க இன்றைக்கு அமர்ந்தேனெனில் கைப்புள்ளையின் பச்சைச் சட்டையை விடவும் எனது சொக்காய் கந்தலாகிப் போகுமென்பது உறுதி ! ஆனால் 1984-ல் அதை எழுத உட்கார்ந்த சமயம் எனக்கு உடம்பெல்லாம் புல்லரிக்காத குறை தான் ! ஆர்ச்சியின் முதல் இதழான “இரும்பு மனிதன்” இன்றைக்கு என் கையில் சிக்கியிருப்பின், ஒரு இருட்டான மூலையில் அதைப் பதுக்கி விட்டுப் பீரோவைப் பூட்டி, சாவியைக் கிணற்றுக்குள் தூக்கிப் போட்டு விட்டிருப்பேன் ! ஆனால் அன்றைக்கோ அது எனக்கு (& உங்களுக்கு) நல்கிய புளகாங்கிதம் (!!!) டண்டணக்கா ரகம் ! So அன்றைய நமது வயதுகளுக்கு ; நமது முன்னிருந்த பொழுதுபோக்கு சாதனங்களுக்கு இந்தக் கதைரகங்கள் அழகாய் ஈடு கொடுத்துள்ளன என்பது புரிகிறது ! (இன்னமும் ‘அண்ணன் ஆர்ச்சிக்கு‘ ஆளுயரக் கட்-அவுட் வைக்க ஏங்கும் நண்பர்களும் உண்டென்பதை நானறிவேன்!) 
இந்த fantastic சூப்பர் ஹீரோக்கள் பாணிகளிலிருந்து விலகி நின்று யதார்த்தக் கதைக் களங்களை நாம் ரசிக்க ரோடு போட்டு வைத்தவர் நமது இளவரசியும், வில்லி கார்வினுமே என்பேன் - லயனைப் பொறுத்த மட்டிலாவது ! கலர் கலரான காஸ்ட்யூம்கள் கிடையாது ; ஹெலிகார் ; காலப் பயணக் கோட்டை‘ என்றெல்லாம் புய்ப்பச் சூட்டல்கள் ஏதும் கிடையாது ; இரத்தமும், சதையுமான தடித் தடி வில்லன்கள் மட்டுமே இங்கே......அவர்களைப் பந்தாடும் இந்த சாகஸ ஜோடியும் போலீஸோ, டிடெக்டிவ்களோ, நீதிக் காவலர்களோ  கிடையாது ! அமெரிக்காவும், ரஷ்யாவும் உலக வல்லரசுகளாகவும்; நிரந்தரப் பகையாளிகளாகவும் லயித்திருந்த Cold War நாட்களில் ஜேம்ஸ் பாண்ட் கதைகள் செம ஹிட் ! அந்த பாணியைக் கொஞ்சமாய் இரவல் வாங்கிக் கொண்டு ரஷ்ய வில்லன்கள்... உளவுத் துறை... டபுள்ஏஜெண்ட் etc... etc... என்று மாடஸ்டியின் கதைகளின் ஒரு பகுதியை அமைக்கத் தொடங்கியதால் அந்நாட்களில் இந்தப் பெண் புலியும் ஒரு வெற்றிகரமான (காமிக்ஸ்) நாயகியாக வலம் வந்ததில் வியப்பில்லை ! Of course- “கண்ணுக்குக் குளிர்ச்சியான” அந்த சித்திர பாணிக்கும் இந்தத் தொடரின் வெற்றியிலொரு பங்குண்டு தான்! So நமது ரசனை ஏணியின் இரண்டாவது படியில் பிளைஸி & கார்வினின் அந்த maverick ஆக்ஷன் பாணியினைச் சொல்லலாம் !

1985-ன் தீபாவளி - நமது காமிக்ஸ் வாசிப்புகளை நிறைய விதங்களில் மாற்றியமைத்த புண்ணியம் சேர்த்துக் கொண்டதொரு திருநாள் என்று சொல்லலாம் ! என் பேரன் காலத்திலும் அந்த மஞ்சள்சட்டை மாவீரரை நாம் சிலாகித்துக் கொண்டிருப்பது ஓயப் போவதில்லை என்பதால் - டெக்ஸ் வில்லரின் 32 ஆண்டுகளுக்கு முன்பான அறிமுகத்தை ஒரு gamechanging moment என்று பார்த்திடலாம் தானே ? அதற்கு முன்பாகவும் உதிரியான one-shot கௌ-பாய் நாயகர்களென நாம் பார்த்திருப்போம் தான் ! ஆனால் - கௌபாய் ரசனைகளை நம் மனங்களில் ஆணியடித்து நிரந்தரமாக்கியது இரவுக்கழுகார் தானே ? தொடர்ந்த காலங்களில் கேப்டன் டைகர் அந்த genre-ஐ இன்னுமொரு புது உயரத்துக்கு இட்டுச் செல்ல சாத்தியமானதுமே 1985-ல் போடப்பட்ட சாலையின் மீது தானே ? இன்றைக்கு கமான்சே ; பவுன்சர் ; ட்யுராங்கோ என்ற பெயர்களெல்லாம் நமக்கு ராமசாமி...முனியாண்டி.....நடராஜன் என்ற ரேஞ்சுக்கு ரொம்பவே பரிச்சயமான பெயர்களாய் மாறியிருப்பின், எல்லாப் புகழும்  கௌபாய் ரசனைகளையும் நேசிக்கக் கற்றுத் தந்த அந்த இத்தாலிய மின்னல் மைந்தனுக்கே தானே ?  So அந்த ஏணியின் படி # 3 – நமது கௌபாய் ரசனைகளின் வேரூன்றல் என்பேன் !

1986-ன் ஜனவரியும் - நம்மளவில் ஒரு புதுப் பூங்கா மலர்ந்திட வித்துக்களை விதைத்த மாதமென்பேன் ! Yes - ‘திகில்‘ அறிமுகமான பொழுதல்லவா அது ? கதைகளில் ஹாரர் என்ற genre-ஐ நமக்குக் காட்டியது மட்டுமன்றி, “முழுநீளக் கதைகள் தவிர்த்த சகலமுமே filler pages-க்கு மட்டுமே லாயக்கு !” என்பதான நமது mindset-க்கு மாற்றத்தின் அவசியத்தை சுட்டிக்காட்டிய வேளையது ! அன்றைய தினம் அந்தப் பரிசோதனை சொதப்பலில் தான் முடிந்தது என்பதை நான் மறுக்கப் போவதில்லை ! ஆனால் ஒரு புது ஆரம்பத்துக்கு வழிகாட்டியாக நின்ற அந்தத் ‘திகில்‘ இதழ் நமது பயணத்தினில் ஒரு முக்கிய இதழே ! அமானுஷ்யங்கள் சார்ந்த கதைகள் ; “பதிமூன்றாம் மாடி” போன்ற முற்றிலும் மாறுபட்ட களங்கள் ; (பின்நாட்களில்) “கறுப்புக் கிழவியின் கதைகள்” என ஏகப்பட்ட ‘ஹிட்‘கள் இந்த ஹாரர் genre-ல் கூட சாத்தியமே என்ற புரிதலோடு ஏணிப்படியின் step # 4 ஆக அந்த ரசனையைச் சொல்லி வைப்போமா?

1986-ன் ஜனவரியில் இன்னமுமொரு புதுப் பாதைக்குப் பிள்ளையார் சுழி போடப்பட்டிருந்தது ! யுத்தக் கதைக்களத்தை நமக்கு (லயனில்) முதன்முதலாகக் கண்ணில் காட்டியவர் இரும்புக்கை நார்மன் தானே ? “மனித எரிமலை” அந்த இறுக்க முக ஆக்ஷன் நாயகரின் memorable hit என்ற போதிலும், அந்நாளில் எனது மையல் அவரது உலோகக்கை மீதே பதிந்து கிடந்தது ! கையில் உலோகமிருந்தால் லோகத்தையே வாங்கி விடலாமென்ற சிந்தனை  எனக்கு மாத்திரமன்றி, ஒரு நூறு காமிக்ஸ் பதிப்பகங்களுக்கும் இருந்த நாட்களன்றோ அவை ?  “அட்ரா சக்கை... எங்ககிட்டேயும் ஒரு இரும்புக்கைப் பார்ட்டி இருக்காரே!” என்று முத்து காமிக்ஸை நோக்கிப் பழிப்புக் காட்டிடத் தான் அப்போதைக்குத் தோன்றியது எனக்கு. யுத்த கதைகளை நமக்கு மேற்கொண்டும் பரிச்சயம் செய்து வைக்க அதிரடிப்படை ; பெருச்சாளிப் பட்டாளம் ; மின்னல் படை சார்ஜெண்ட் தாமஸ் என்று நிறையப் பேர் மெனக்கெட்டுள்ளனர் ! இவை சகலமும் இங்கிலாந்தின் தயாரிப்புகள் எனும் போது - உலக யுத்தத்தில் வெற்றி கண்ட அவர்களது பார்வைக் கோணங்களே எல்லாக் கதைகளின் அடித்தளமும் என்பதாலோ, என்னவோ ஒருவித stereotyped பாணியிலேயே பெரும்பாலான கதைகள் அமைந்து போயின ! Maybe இன்னும் சிறிது காலம், விடாமுயற்சியாய் அந்தக் கதைகளை வெளியிட்டிருந்தால், இன்றைக்கு “விண்ணில் ஒரு வேங்கை” பாகம் 2; 3 ஆர்வமாய் போணியாகியிருக்கக் கூடும் ! Just miss !!! எது எப்படியோ- ரசனைகளில் யுத்தக் கதைகளையும் நாம் விட்டு வைக்கவில்லை என்ற திருப்தி மிஞ்சுகிறதே - ஏணியின் படிக்கட்டு நம்பர் 5 -ல் !
அதே  1986-ல் நமது ரசனைகள் மேற்கொண்டுமொரு புது திசையில் take-off ஆனதை மறக்கத் தான் முடியுமா ? ‘ஙே‘ என்ற முழியோடும், மொட்டையடித்த தலையோடும், பெயரின்றி நின்ற அந்தப் புதுமுகத்தை நாம் எவ்விதம் ஏற்றுக் கொள்ளப் போகிறோமோ ? என்று 1986-ன் மே மாதம் என் வயிற்றில் கரைந்த புளியைக் கொண்டு ஒரு சின்ன கல்யாணப் பந்திக்கே ரசம் செய்திருக்க முடியும் ! தலை எது? தூர் எது ? எங்கே துவங்கி - எத்தனை தூரம் பயணித்து - எங்கே நிறைவு காணும் ? என்பதை யூகிக்கக் கூட வாய்ப்பில்லாத அன்றைய தினத்திலும் - “இரத்தப் படலம்” கொண்டிருந்ததொரு இனம்புரியா ஈர்ப்பு - கிராபிக் நாவல்கள் திசையிலான நமது முதல் எட்டு ! டிடெக்டிவ்கள் மட்டுமே எடுபடுவர் ; சூப்பர் நாயகர்களுக்கு மட்டுமே வெகுஜன வரவேற்பிருக்கும் என்றதொரு எழுதப்படா விதியினை முதலில் டெக்ஸ் வில்லரும், அப்புறமாய் நமது நண்பர் XIII-ம் முறியடித்தது நமது ரசனைகளின் பரிணாம வளர்ச்சியல்லவா ? So - ஏணியின் படி # 6 கிராபிக் நாவல்களின் ரசனை ! இதில் கொடுமை என்னவெனில் இன்றைக்கு "கி.நா.க்களா ?" என்று அலறிடும் நண்பர்கள் கூட, அது என்னவென்றே தெரியாத நாட்களிலேயே இரத்தப் படலத்தை மாங்கு மாங்கென்று ஆதரித்து வந்துள்ளனர் ! பூ கூட டூ... புய்ப்பம் கூடப் பழம் !!! இரத்தப் படலத்தின் மறு மாதமே வெளியான ரோஜரின் “மர்மக் கத்தி” கூட ஒரு கிராபிக் நாவலுக்கான தகுதிகள் கொண்ட கதையே என்பேன் ! அந்நாளில் அதனையுமே - வாஞ்சையோடு அரவணைத்துக் கொண்டவர்கள் தானே நாமெல்லாம் ?
பரந்து விரிந்த கடல்... அதில் அலையாடும் சிறு படகு ; படகினுள் ஒரு பரட்டைத் தலையன் ; டாஸ்மாக்கைக் குத்தகைக்கு கேட்கும் ஒரு குடிகாரக் கிழம் ; ஒரு அரை டிக்கெட் பொடியன் - என்ற கூட்டாளிகள் ! இவர்களுக்கு வரையப்பட்டிருந்த சித்திரங்களோ – ஒரு பண்ணைக் கோழிகள் ஒட்டுமொத்தமாய் கீச்சி வைத்திடக் கூடிய தடங்களுக்கு நிகரானது ! இந்த combo-வில் ஒரு கதைத்தொடர் ; அதனைத் தமிழில் நாம் ரசிப்போம் என்பதை கேப்டன் பிரின்ஸின் "பனிமண்டலக் கோட்டையின்" வெற்றிக்கு முன்பாக சத்தியமாய் நம்மில் யாரும் நம்பியிருக்க முடியாது தான் ! ஆனால் உளவுத்துறைகள் இல்லாமலே ; ஜேம்ஸ் பாண்ட் பாணி நாயகர்கள் இல்லாமலே ; டமால்-டுமீல் தோட்டாப் பாய்ச்சல்கள் இல்லாமலே கூட ஒரு தொடர் mass ஹிட்டாகிட முடியுமென்று நிரூபித்த இந்தத் தொடர் - நமது ரசனைகளின் நாற்கால் பாய்ச்சலில் ஒரு முக்கிய தருணம் ! ஓவியர் ஹெர்மனின் அசுர ஆற்றலுக்கொரு பறைசாற்றலும் கூட என்பேன் ! பின்நாட்களில் களமிறங்கிய பீட்டர் பாலண்டைன்; வன்ரேஞ்சர் ஜோ போன்றோரும் - இயற்கையோடு இணைந்து சாகஸங்கள் செய்திடும் பாணியை விசாலப்படுத்தியவர்களே ! So - ‘எது மாதிரியுமிலாப் புது மாதிரி‘ என்ற விதத்தில் இதுவும் கூட ஒரு ரசனைப் படிக்கட்டு தானே ? Number 7!

1987-ன் ஜனவரியும் ஒரு ground breaker நமக்கு ! ஜுனியர் லயன் காமிக்ஸ் தீர்க்கமான  ஆயுள் கொண்டிருக்கவில்லையெனினும், அது விட்டுச் சென்ற legacy இன்றளவும் நமது கார்டூன்களில் தொடர்ந்திடுகிறதல்லவா ? ஒரு தலைவாங்கிக் குரங்கைத் தேடிப் புறப்பட்டதொரு ஆக்ஷன் கௌபாய் 1985 முதல் நம்மைக் கட்டுண்டு வைத்திருப்பது ஒரு பக்கமெனில், ரௌத்திரத்தில் தெருவில் விரட்டி ஓடும் யானையையும், காய்கறி சூப் குடிக்கும்  சிங்கத்தையும், சமாளிக்கவொரு ஒல்லிப்பிச்சான் கௌபாய் களமிறங்கியது 1987-ல் தானே ? விச்சு & கிச்சு; கபிஷ் ; அதிமேதை அப்பு போன்ற துண்டுத் துக்கடாக்களைத் தாண்டியும் ஒரு பரந்த காமிக்ஸ் உலகம் காத்துள்ளது ; அதனைப் படித்திடவும், ரசித்திடவும் மனதளவில் சுட்டிகளாக இருந்தால் கூடப் போதுமென்பதையும் நமக்குப் புரியச் செய்த புண்ணிய ஆத்மா லக்கி லூக் தான் ! அவர் திறந்து வைத்த கதவு தான் - பின்னர் சிக் பில் ; Smurfs ; க்ளிப்டன் ; பென்னி ; மதியில்லா மந்திரி ; ஹெர்லக் ஷோம்ஸ் என்று ஏகப்பட்ட சிரிப்புப் பார்ட்டிகளுக்கு சுலபமாய் என்ட்ரி தந்திட உதவியதல்லவா ? So ஏணியின் முக்கியப் படிகளுள் இந்த கார்ட்டூன் genre ஒன்றல்லவா ? Step # 8 !
1980-களின் இறுதியில் சத்தமின்றி வெளியானதொரு லயன் இதழானது Fantasy கதைகளுக்கு நம்மை இட்டுச் சென்ற முன்னோடி ! சாம்ஸன் என்ற ஜடாமுடிப் போர்வீரனின் சாகஸங்களைத் தாங்கிய “மந்திர ராணி” இன்றைய தோர்கல்களுக்கெல்லாம் ரொம்பவே சீனியர் ! சில மாதங்கள் கழித்து “தங்க நகரம்” என்ற இதழில் தலைகாட்டிய பின்னே hibernate mode-க்குள் புகுந்து விட்டாலும், நமது ரசனைப் படிகளில் ஒரு சின்னப் பங்கு இவருக்குண்டு ! "மோசமில்லை" என்ற வரவேற்பைப் பெற்றிருப்பினும், அந்நாட்களில் இந்தத் தொடரினை நான் தொடராது போனதன் காரணம் நினைவுக்கு வர மறுக்கிறது ! Anyways படிக்கட்டு எண் 9 !

டிடெக்டிவ் Z என்றொரு ரோபோ நாயகர் நமது கதைவரிசையில் ஒரு குட்டித் தலைகாட்டலைச் செய்திட்டதை நமது துவக்க நாட்களது வாசகர்கள் மறந்திருக்க வாய்ப்பில்லை ! இவருமே 1980 களின் பின் பகுதியில் திடுமென என்ட்ரி தந்தவர் ! அந்நாட்களில் FLEETWAY வார இதழ்கள் சகலத்துக்கும் நான் சந்தா செலுத்தியிருந்தேன் என்பதால், அங்கே அவர்கள் தும்மல் போட நினைக்கும் தருணமே எனக்கும் மூக்கு குறுகுறுத்து விடும் ! அவ்விதம் தான் மிஸ்டர் Z எனக்குப் பரிச்சயம் ! EAGLE என்ற அவர்களது வார இதழில் இந்த எதிர்காலத்து போலீஸ்காரர் தலைகாட்டி மறு மாதமே துண்டைப் போட்டு வைத்து விட்டேன் - இந்த சீட் நமக்குத் தானென்று ! So sci -fi ரகக் கதைகளை மேம்போக்காகவேணும் நமக்கு காட்டிய இந்த நாயகரும் ரசனை ஏணியில் படி # 10 -குத் தகுதி வாய்ந்தவரே !! 

So என்றைக்கோ இத்தனை படிகளையும் தாண்டிய "பழங்கள்" என்ற பெருமை நமக்கிருப்பதாலோ என்னவோ - ஜேசனையும், மந்திரியாரையும் ஒரே மூச்சில் ஊதித் தள்ளிட சாத்தியமாகிறது போலும் !! நிஜமாய் பெருமிதப் பெருமூச்ச்சொன்று வெளிப்படுகிறது நமக்கு கிட்டியுள்ள வாசகர்களின் பன்முகத்தன்மையினை நினைத்திடும் போது!! Salute to this ultimate bunch of comics lovers !!

அப்புறம், திருப்பூரில் நடந்து வரும் புத்தக விழா அதிரடி ரகத்தில் இல்லா விட்டாலுமே, decent ஆனா விற்பனையைக் கண்ணில் காட்டியுள்ளது முதலிரு நாட்களிலுமே !! அடுத்த 10 நாட்களுமே இந்த அதிர்ஷ்டம் தொடரின், 2017 -ன் பயணம் பிசிறின்றி வேகம் பிடித்திட வைட்டமின் "ப' கிட்டிடும் !! அப்புறம் இந்த ஊர் சுற்றும் படலம் தொடரவிருப்பது "பெரம்பலூர் BAPASI புத்தக விழாவின் " மார்க்கத்தில் ! தேதிகள் தெரியவில்லை இன்னமும் ; ஆனால் நாமங்கு இருப்பது உறுதி !! 

பிப்ரவரி இதழ்களின் விமர்சனங்களைத் தொடர்ந்திடுங்கள் guys !! ரொம்பவே சுவாரஸ்யமாய் உள்ளது - உங்கள் ஒவ்வொருவரின் பார்வைக் கோணங்களையும், அவரவரது பிரத்யேக எழுத்துப் பாணிகளில் ரசித்திடும் போது !! Keep writing please !! மீண்டும் சந்திப்போம் !! அது வரை - happy reading !! Bye for now !!

திருப்பூரிலிருந்து சுடச்  சுட !!















Wednesday, 1 February 2017

ஜேசனும்...நண்பர்களும்..!

நண்பர்களே,

வணக்கம். பிப்ரவரியின் இதழ்கள் உங்கள் இல்லக் கதவுகளைத் தட்டிடும் பயணத்தைத் துவங்கிவிட்டன ! கூரியர்களில் அனைவரது பிரதிகளும் நேற்றைக்கே சிவகாசியிலிருந்து புறப்பட்டு விட்டன என்பதையும் உறுதி செய்து விட்டோம். So உங்கள் நகரத்துப் பட்டுவாடா நண்பர்களின் ஒத்துழைப்பிருப்பின், மாதத்தின் முதல் தேதிக்கு 4 இதழ்களும் இன்றே உங்கள் கைகளில் இருந்திட வேண்டும் !

And இம்மாத சர்ப்ரைஸ் கிப்ட்டின் பின்னணியினில் நிதி உபயதாரர் யாருமிலர் என்பதால் - நம்மாலான சிறு முயற்சி உங்கள் வசம் ! அது பற்றிய உங்கள் அபிப்பிராயங்களையும், இதழ்களின் முதல் புரட்டல் உருவாக்கும் எண்ணங்களையும் எழுத்துக்களாக்கினால் இந்தப் பதிவினையும், நமது பொழுதுகளையும் சுவாரஸ்யமானவைகளாக மாற்றிடலாமே ?

And பிப்ரவரியின் இதழ்களை இப்போது ஆன்லைனிலும் வாங்கிடலாம் ! இங்கே க்ளிக் செய்யுங்கள் ப்ளீஸ் : 

http://lioncomics.in/monthly-packs/294-february-2017-pack.html

Please do write all !! மீண்டும் சந்திப்போம் ! Happy Reading !!

P.S : திருப்பூரில் இன்று முதல் (03 -பிப்ரவரி) துவங்கிடும் புத்தக விழாவினில் நமது ஸ்டால் நம்பர் : 99 ! அனைவரும் வருகை தாருங்களேன் - ப்ளீஸ் ?



க்யூபாவுக்குப் போவோமா..?

நண்பர்களே, வணக்கம். என் தாய்வழித் தாத்தா ஒரு கதர் பிரியர். சொட சொட சொடக்கும் வெள்ளை கதர் சட்டையும், வெள்ளை வேஷ்டியும் அவருக்கொரு அடைய...